တႄႇႁၢင်လိူၼ်ဢေႃႊၵတ်ႉသ်မႃး ၸဝ်ႈၼႃႈတီႈၸိူဝ်းပႂ်ႉၵဵၵ်ႉလၢၼ်ႇ မူႇၸေႊ လႄႈ ၸေႊၵဝ်ႇ ၽၵ်းတူၶၢမ်ႈလႅၼ်လိၼ်မိူင်းတႆး- မိူင်းၶႄႇ ႁေႉႁၢမ်ႈ ဢမ်ႇပၼ်ၵူၼ်းမိူင်းတေႃႉဢဝ်ၶူဝ်းၵုၼ်ႇ လတ်းၽၢၼ်ႇသေႁူးယဝ်ႉလႄႈ ႁဵတ်းႁႂ်ႈၵူၼ်းပိုၼ်ႉတီႈတင်းသွင်ၾၢႆႇ ယၢပ်ႇၽိုတ်ႇၵၢၼ်တေႃႉၶူဝ်းၵုၼ်ႇ ။
သင်တေလုၵ်ႉတၢင်းၾင်ႇမိူင်းတႆး တေႃႉဢဝ်ၶူဝ်းၵုၼ်ႇၶၢမ်ႈၵႂႃႇတၢင်းမိူင်းၶႄႇၵေႃႈ ၺႃးၸဝ်ႈၼႃႈတီႈတႂ်ႈသိုၵ်းမၢၼ်ႈ ႁေႉႁၢမ်ႈ၊ လုၵ်ႉၼႂ်းမိူင်းၶႄႇသေ တေတေႃႉဢဝ်ၶူဝ်းၵုၼ်ႇၶၢမ်ႈမႃးတၢင်းမိူင်းမၢၼ်ႈၵေႃႈ ၺႃးၸဝ်ႈၼႃႈတီႈၾၢႆႇမိူင်းၶႄႇၶဝ် ႁၢမ်ႈ တိုၼ်းဢမ်ႇပၼ်ၶၢမ်ႈလႃးလႃး ။ ယၢမ်းလဵဝ်ၽၵ်းတူ ႁေႃၶမ်းလႄႈ ၽၵ်းတူၸၢင်ႉၽိူၵ်ႇ ထုၵ်ႇသင်ႇဢိုတ်းဝႆႉတင်းသွင်ၾၢႆႇၼႆ ၵူၼ်းမိူင်းပိုၼ်ႉတီႈ ဝဵင်းမူႇၸေႊ ၵေႃႉႁဵတ်းၵၢၼ်ၵႃႉၶၢႆ ယူႇၸွမ်းလႅၼ်လိၼ် တႆး- ၶႄႇ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။
“လႆႈငိၼ်းဝႃႈ ၶဝ်တေလႅၵ်ႈလၢႆႈလၢႆးမၼ်းၼႆယူႇ။ ၵူၺ်းတေပဵၼ်လၢႆးလႂ်တႄႉဢမ်ႇႁူႉ။ မိူဝ်ႈလဵဝ်ၼႆႉ ၶဝ်ၺွပ်းတင်းသွင်ၾၢႆႇ။ ၵူၼ်းတေႃႉၶူဝ်းၵေႃႈ တႃႇတေႁဵတ်းၵၢၼ်ၵိၼ် ၼႆႉမၼ်းယၢပ်ႇ။ ယဝ်ႉၶၼ်ၵုၼ်ႇၵေႃႈမၼ်းၶိုၼ်ႈမႃး။ တႃႇဢဝ်ၶူဝ်းၵုၼ်ႇဢွၵ်ႇ ၶၢမ်ႈလႅၼ်လိၼ်လႆႈၼႆႉ မၢင်ၸိူဝ်းလႆႈၸႂ်ႉငိုၼ်းၼမ် ၼႃႇ။ ၼိုင်ႈပွၵ်ႈၼႆႉ သမ်ႉလႆႈဢဝ်ၶူဝ်းႁဝ်းဢွၵ်ႇၼိုင်ႈဢိတ်းၵူၺ်း။ ယွၼ်ႉၼၼ် ၶၼ်ၵုၼ်ႇၼႂ်းမိူင်းၼႆႉ မၼ်းၵိုင်ႉၵၢင်ႉၶိုၼ်ႈႁႅင်းမႃး ၵမ်းသိုဝ်ႈ။”
လႆႈႁူႉဝႃႈ ၵူၼ်းၼႂ်းပိုၼ်ႉတီႈ လႆႈဢဝ်ၶူဝ်းၵုၼ်ႇ မိူၼ်ၼင်ႇၶိူင်ႈၶူဝ်းဢၼ်လူဝ်ႇၸႂ်ႉတိုဝ်းၼႂ်းၵၢၼ်ၵေႃႇသၢင်ႈ တေႃႉမႃးတၢင်း ၵဵၵ်ႉ လၢၼ်ႇသၢမ်ၸဵင်ႇၶမ်း (ၵျိၼ်ႊသၢၼ်ႊၵျေႃႉ) ယဝ်ႉ ၸင်ႇတေႃႉ ၶဝ်ႈၵႂႃႇၼႂ်းဝဵင်းမူႇၸေႊလႆႈၼႆ ၵူၼ်းၸၢႆးၵေႃႉယူႇဝႆႉ ၼႂ်းဝဵင်းမူႇၸေႊ ႁဵတ်းၵၢၼ်ၵႃႉၶၢႆ ၸွမ်းလႅၼ်လိၼ် တႆး- ၶႄႇ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“မိူဝ်ႈလဵဝ်ၼႆႉ လႆႈဢဝ်ၶူဝ်းၵုၼ်ႇႁဝ်းဢွၵ်ႇတၢင်း ၵျိၼ်ႊသၢၼ်ႊၵျေႃႉဝႆႉယူႇၼႆၵေႃႈ ဢိင်ၼိူဝ်ၶၼ်ငိုၼ်းၶႄႇ ၶိုၼ်ႈၶိုၼ်ႈလူင်းလူင်းသေ ၶၼ်ၵုၼ်ႇၼႆႉ မၢင်ပွၵ်ႈၵေႃႈ ယွမ်းလူင်းဢိတ်းဢိတ်းၸိူင်ႉၼၼ်ၵေႃႈ မီးယူႇၽွင်ႈ။ ဢၼ်ၵႃႈၶၼ်ပုင်ႈၶိုၼ်ႈႁႅင်းၼႆႉတႄႉ ပဵၼ်ၶိူင်ႈၶူဝ်း ဢၼ်ၸႂ်ႉၼႂ်းၵၢၼ်ၵေႃႇသၢင်ႈ မိူၼ်ၼင်ႇ လဵၵ်း၊ လိၼ်ပုၼ် (ဘိလပ်မြေ) ၸိူဝ်းၼႆႉ။”
ၵဵၵ်ႉလၢၼ်ႇတီႈၸေႊၵဝ်ႇ လႅၼ်လိၼ်မိူင်းတႆး- မိူင်းၶႄႇၼႆႉ ၾၢႆႇၸဝ်ႈၼႃႈတီႈၶဝ် တႄႇဢိုတ်းႁၢမ်ႈၵၢၼ်တေႃႉၶူဝ်းၵုၼ်ႇမႃး ႁိုင် ၶၢဝ်း တၢင်းၸမ်လိူၼ်ယဝ်ႉလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈလူဝ်ႇႁဵတ်းၵၢၼ်ၵႃႉၶၢႆ ႁႃလဵင်ႉၼႃႈႁိူၼ်း ႁူပ်ႉတၢင်းယၢပ်ႇဝႆႉ ႁၢဝ်ႈ ႁႅင်းၼႆယဝ်ႉ။
ဝၢႆးလင် သိုၵ်းမၢၼ်ႈယိုတ်းမိူင်းမႃးသေ ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၵိူတ်ႇပဵၼ်ၼႂ်းမိူင်းတႆးပွတ်းႁွင်ႇ၊ လၢမ်းပႃးထိုင်ၸွမ်း လႅၼ်လိၼ် မိူင်းတႆး- မိူင်းၶႄႇ ၾၢႆႇၸဝ်ႈၼႃႈတီႈမိူင်းၶႄႇ လႄႈ မိူင်းမၢၼ်ႈ ႁေႉႁၢမ်ႈပိၵ်ႉဢိုတ်းၵၢၼ်တေႃႉၶူဝ်းၵုၼ်ႇ၊ မၢင်တီႈထုၵ်ႇ ဢိုတ်းၵဵၵ်ႉလၢၼ်ႇပႅတ်ႈတင်းပိုၵ်းလႄႈ ႁဵတ်းႁႂ်ႈၶၼ်ၵုၼ်ႇၼႂ်းပိုၼ်ႉတီႈပုင်ႈၶိုၼ်ႈသုင်မႃးမွၵ်ႈ 2-3 ပုၼ်ႈ။ ၵူၼ်းၼႂ်းပိုၼ်ႉတီႈၸိူဝ်းႁဵတ်း ၵၢၼ်ယူႇၸွမ်းလႅၼ်လိၼ်ၵေႃႈ ယၢပ်ႇၽိုတ်ႇ၊ ၵူၼ်းမိူင်းၸိူဝ်းယူႇသဝ်းၼႂ်းမိူင်းတႆးပွတ်းႁွင်ႇ လႆႈႁူပ်ႉပၼ်ႁႃ ၵႃႈၶၼ်ၵုၼ်ႇပုင်ႈၶိုၼ်ႈ သုင်ႁႅင်းတီႈသုတ်း ႁၢၼ်ႉတေႃႇထိုင်ယၢမ်းလဵဝ်။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ