ၵူၼ်းပၢႆႈၽေးသိုၵ်း 160 ပၢႆ ဢၼ်မႃးမီးဝႆႉတီႈ သီႇပေႃႉၼၼ်ႉ ၶႂ်ႈဢွၼ်ၵၼ် ပွၵ်ႈၶိုၼ်းႁိူၼ်းယေးၽႂ်မၼ်း ယဝ်ႉ ယွၼ်ႉမႆႈၸႂ်သူၼ်ႁႆႈၼႃးလႄႈ ႁိူၼ်းယေး ဝၼ်းမိူဝ်ႈၼႆႉၵေႃႈသဵင် ၵွင်ႈတိုၵ်ႉတႅၵ်ႇယူႇ ဝႃႈၼႆ။

မိူဝ်ႈၼႆႉဝၼ်းတီႈ 22/08/2018 ၼႂ်းၸႄႈဝဵင်းၼမ်ႉတူႈ ထုင်ႉဢိူင်ႇပၢင်လူင် သဵင်ၵွင်ႈတိုၵ်ႉတႅၵ်ႇယူႇလႄႈ ၵူၼ်းပၢႆႈ ၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ဝတ်ႉဢွင်ႇမင်ႇၵလႃႇ ၽူဝ်းတေႃႇ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၼၼ်ႉ ပႆႇၸၢင်ႈပွၵ်ႈၶိုၼ်းဝၢၼ်ႈ၊ မႃးမီးတီႈသီႇပေႃႉၼႆႉ မီးၶၢဝ်းတၢင်း 8 ဝၼ်းယဝ်ႉ လႄႈဢွၼ်ၵၼ်မႆႈၸႂ် လွင်ႈသူၼ်ႁႆႈၼႃး လႄႈ ႁိူၼ်းယေး ဝႃႈၼႆ။

ၼၢင်းဢေး ၵူၼ်းပၢႆႈၽေးသိုၵ်းဢၼ်ႁွတ်ႈၽႅဝ်ဝႆႉတီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းလိူၼ်ၼႆႉၵူၺ်း ႁဝ်းၶႃႈလႆႈပၢႆႈၽေးသိုၵ်း 4 ပွၵ်ႈယဝ်ႉ။ ႁဝ်းၶႃႈ ပၢႆႈမႃးယူႇတီႈဝတ်ႉၽူဝ်းတေႃႇၼႆႉ မီး 8 ဝၼ်းယဝ်ႉ ပႆႇလႆႈပွၵ်ႈ။ ႁဝ်းၶႃႈၶႂ်ႈပွၵ်ႈၼႃႇၶႃႈယဝ်ႉ မႆႈၸႂ်သူၼ်ႁႆႈၼႃးၶႃႈဢေႃႈ။ ၼႃးႁဝ်းၵေႃႈ ပႆႇလႆႈသႂ်ႇၾုၼ်ႇ၊ ထူဝ်ႇလိၼ်ႁဝ်းၶႃႈၵေႃႈ သမ်ႉထူၺ်ႈဝႆႉယဝ်ႉ ၶႂ်ႈပွၵ်ႈၶႂ်ႈမိူဝ်းၼႃႇယဝ်ႉ ယူႇလႆႈလၢႆဝၼ်းၵေႃႈယူႇ ႁဝ်းတႄႉဝူၼ်ႉဝႆႉၼင်ႇၼႆ။ မိူဝ်ႈၼႆႉၵၢင်ၼႂ် ၽူႈယႂ်ႇၵူၼ်းလူင်ႁဝ်း ဢၼ်မီးဝႆႉတီႈဝၢၼ်ႈႁဝ်းၼၼ်ႉ ၵပ်းၾူၼ်းမႃးၸဵမ်ၸဝ်ႉ ယႃႇၽူမ်ႈဢွၼ်ၵၼ်မႃးၶိုၼ်း၊ သဵင်ၵွင်ႈတိုၵ်ႉဢွၵ်ႇထႅင်ႈယူႇၼႆသေ ႁဝ်းၶႃႈၵေႃႈ ပႆႇပဵၼ်မိူဝ်းတေလႆႈပႂ်ႉတူၺ်းထႅင်ႈၵွၼ်ႇၶႃႈ” ဝႃႈၼႆ။

ၵဵဝ်ႇလူၺ်ႈလွင်ႈပဵၼ်ပၢင်တိုၵ်းၼႆႉသေ မိူဝ်ႈဝၼ်းတီႈ 15 ၼၼ်ႉ ယွၼ်ႉသိုၵ်းဢူၺ်းလီပွတ်းႁွင်ႇတင်း သိုၵ်း RCSS ပဵၼ်ပၢင်တိုၵ်းၵၼ် တၢင်းပွတ်းဢိူင်ႇပၢင်လူင်ဝႆႉ ၵူၼ်းမိူင်းၼပ်ႉႁူဝ်ပၢၵ်ႇ လႆႈဢွၼ်ၵၼ်ပၢႆႈၽေးသိုၵ်း ၸိူဝ်းႁွတ်ႈၽႅဝ် တၢင်းဢိူင်ႇမၢၼ်ႈၸၢမ်၊ မိူင်းမူႉ ၊ ဝတ်ႉဝၢၼ်ႈလီႈလႄႈ ဝၢၼ်ႈပၢင်သပေႇ ၸိူဝ်းၼႆႉ။ ၸိူဝ်းဢမ်ႇပၢႆႈထိုင်သီႇပေႃႉသေ မူၵ်းထိူၼ်ႇဝႆႉၵေႃႈမီး။

ၵူၼ်းဝၢၼ်ႈပၢင်လူင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵၢင်ၼႂ် သဵင်ၵွင်ႈတႅၵ်ႇထႅင်ႈၶႃႈ ပဵၼ်ၸုမ်းလႂ် တင်းၸုမ်းလႂ် ယိုဝ်းၵၼ်ၵေႃႈ ပႆႇႁူႉ။ တေႃႈ လဵဝ် ႁဝ်းၶႃႈ တိုၵ်ႉထွမ်ႇတူၺ်းငဝ်းလၢႆးမၼ်းယူႇၶႃႈ သင်ပဵၼ်ပၢင်တိုၵ်း ၵၼ်ႁၢဝ်ႈႁႅင်းၸိုင် ၸိူဝ်းၵိုတ်းၵေႃႈတေလႆႈပၢႆႈထႅင်ႈဢေႃႈ။ ၵွပ်ႈၼၼ်ၸိူဝ်းၵႂႃႇ မီးဝႆႉတီႈသီႇပေႃႉၵေႃႈ ႁဝ်းၶႃႈသင်ႇ ၵႂႃႇဝႃႈ ယႃႇၼႅတ်ႈဢွၼ်ၵၼ်ပွၵ်ႈမႃး ပႂ်ႉတူၺ်းငဝ်းလၢႆးထႅင်ႈဢိတ်းၼိုင်ႈၵွၼ်ႇ” ဝႃႈၼႆ။

ဝၼ်းတီႈ 15/08/2018 ၸုမ်းဢူၺ်းလီပွတ်းႁွင်ႇလႄႈ တပ်ႉသိုၵ်းၸိုင်ႈတႆး RCSS ၶဵင်ႈၶႅင်ၵၢၼ်သိုၵ်း ၵၼ် ၼႂ်း ဢိူင်ႇပၢင်လူင် ၵူၼ်းဝၢၼ်ႈလႆႈငိၼ်းသဵင်ၵွင်ႈလႄႈ လႆႈဢွၼ်ၵၼ်ပၢႆႈ၊ ၵူၼ်းဝၢၼ်ႈ ၼႂ်းဢိူင်ႇပၢင်လူင် ဢွၼ်ၵၼ် ပၢႆႈမႃးယူႇတီႈဝတ်ႉၵျွင်းမုၼ်ၸဝ်ႈ ၵျွင်းဝၢၼ်ႈလီႈမီး 380 ပၢႆ၊ ဝတ်ႉၵျွင်းပၢင်သပေႇ မီး 200 ပၢႆ ၸိူဝ်းပၢႆႈၶဝ်ႈ ဝဵင်း သီႇပေႃႉၵေႃႈမီး ၸိူဝ်းပၢႆႈၵႂႃႇတီႈဝၢၼ်ႈၸၢမ်မိူင်းမူႉ တၢင်းဝဵင်းၼမ်ႉတူႈၵေႃႈမီး။