ၽူႈယိင်းၵူၼ်းၼမ်ႉၶမ်း ဢၼ်သိုၵ်းတဢၢင်း TNLA တီႉၺွပ်းၵႂႃႇၼၼ်ႉ ယူႇတီႈၸုမ်းၵူၼ်းၼုမ်ႇၼမ်ႉၶမ်းသေ ႁူမ်ႈၵၼ် တုၵ်းယွၼ်းႁႂ်ႈၸဵဝ်းပွႆႇတူဝ်ပၼ်ၶိုၼ်းၽႂ်းၽႂ်း ဝႃႈၼႆ။
ဝၼ်းတီႈ 19/08/2018 ယၢမ်းၵၢင်ၼႂ် ၸုမ်းၵူၼ်းၼုမ်ႇၼမ်ႉၶမ်း ဢၼ်မီးမူႇၸုမ်း ႁူမ်ႈၵၼ် 20 ၸုမ်းပၢႆၼၼ်ႉ တုၵ်းယွၼ်း ႁႂ်ႈပွႆႇ ပၼ်ၶိုၼ်း ၼၢင်းမူဝ်ႁွမ် ၵူၼ်းမိူင်းၼမ်ႉၶမ်း ဢၼ်သိုၵ်းတဢၢင်း TNLA တီႉၺွပ်းၵႂႃႇၼၼ်ႉ ၽႂ်း ၽႂ်း။ ယဝ်ႉၵေႃႈ သၢၼ်ၶတ်းပႃးထႅင်ႈလွင်ႈသိုၵ်း TNLA ၸႂ်ႉႁႅင်းသိုၵ်းတင်းၼမ်သေ ၶဝ်ႈတီႉၺွပ်းၵူၼ်းမိူင်းဢၼ် ဢမ်ႇမီးတၢင်းၽိတ်းသင်။ ယင်းပေႃႉထုပ်ႉပႃးၸၢၵ်ႈၵွင်ႈထၢႆႇ CCTV သေ ဢဝ်ႁၢတ်ႊၻိတ်ႉၵႂႃႇ ၸဵမ်ၸိူဝ်းၼႆႉ။
ၸၢႆးတဵင်းသူၺ်ႇ ၽူႈၶၢၼ်ပၢၵ်ႇ ၸုမ်းၵပ်းသၢၼ်ၵူၼ်းၼုမ်ႇ ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ဢၼ်ၶဝ်တီႉၺွပ်း ၵႂႃႇၼၼ်ႉ မီး 3 – 4 ဝၼ်းယဝ်ႉ။ ပႆႇပွႆႇတူဝ်မႃးၶိုၼ်း။ ႁဝ်းၶႃႈ ၸင်ႇႁဵတ်းလိၵ်ႈ တုၵ်းယွၼ်းႁႂ်ႈ/ပွႆႇ ပၼ်ၶိုၼ်းလီလီငၢမ်းငၢမ်း။ ဢၼ်ၶဝ်ႁဵတ်းၸိူင်ႉၼႆၼႆႉ မၼ်းဢမ်ႇသၢင်ႇထုၵ်ႇသေဢိတ်း။ ယဝ်ႉၵေႃႈ ဢၼ်ၶဝ်တီႉ ၺွပ်း ၵႂႃႇၶၢဝ်းတၢင်းႁိုင်ၸိူင်ႉၼႆ ၸိူဝ်းပဵၼ်ပီႈၼွင်ႉၸိူဝ်ႉၶိူဝ်းလႄႈလုၵ်ႈမၼ်းၼၢင်း ပဵၼ်ဢၼ်မႆႈ ၸႂ်ၸွမ်းတႄႉတႄႉ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၵႂႃႇတီႈ လုမ်းၵပ်းသၢၼ် TNLA ၵေႃႈဢမ်ႇလႆႈ။
ပီႈၼွင်ႉၸမ်ၸႂ် ၼၢင်းမူဝ်ႁွမ် ၵေႃႉၼိုင်ႈလၢတ်ႈဝႃႈ “ သိုၵ်းလွႆတႄႉ လၢတ်ႈဝႃႈၶဝ်လႆႈတီႉၺွပ်းၵႂႃႇၼႆႉယွၼ်ႉပိူဝ်ႈ မၼ်းၼၢင်းပူၼ်ႉပႅၼ်ပၵ်းပိူင်မၢႆမီႈ TNLA ၼႆဝႃႇ။ ၵူၺ်းၵႃႈ မၼ်းၼၢင်းပူၼ်ႉပႅၼ်မၢႆမီႈဢၼ်လႂ် ဢၼ်ဝႃႈၼၼ်ႉ ၾၢႆႇTNLA ဢမ်ႇလၢတ်ႈ။ ပေႃးတႅပ်းတတ်းတြႃးတေႁွင်ႉ ပေႃႈမႄႈပီႈၼွင်ႉမၼ်းၼၢင်းယူႇၼႆၵူၺ်း” ဝႃႈၼႆ။
ၵဵဝ်ႇလူၺ်ႈလွင်ႈ ၼၢင်းမူဝ်ႁွမ် ဢၼ်ၺႃးသိုၵ်း TNLA ၵုမ်းၶင်တူဝ်ၵႂႃႇၼႆႉ ယူႇတီႈၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ် တႅမ်ႈလိၵ်ႈထိုင် တပ်ႉသိုၵ်းတႆးပွတ်းႁွင်ႇ ႁႂ်ႈၸွႆႈထႅမ်ပၼ် ယွၼ်ႉဝႃႈ တပ်ႉသိုၵ်းတႆးပွတ်းႁွင်ႇၵေႃႈ ပဵၼ်ၼႂ်းလုၵ်ႈၸုမ်း ၸုမ်းဢူၺ်းလီပွတ်းႁွင်ႇ 7 ၸုမ်းဝႆႉ ဝႃႈၼႆ။
ၽူႈမီးၸၼ်ႉၼႂ်းတပ်ႉသိုၵ်းၸိုင်ႈတႆး SSPP/SSA ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ TNLA တီႉၺွပ်း ၵႂႃႇၼၼ်ႉ ၸႂ်ႈၶႃႈဢေႃႈ။ တွၼ်ႈတႃႇတေပွႆႇပၼ်ၶိုၼ်းၼၢင်းမူဝ်ႁွမ်ၼၼ်ႉ ႁဝ်းၶႃႈ လႆႈတႅမ်ႈလိၵ်ႈထိုင် တီႈ TNLA ယဝ်ႉ။ ၼင်ႇႁိုဝ် တေပွႆႇတူဝ်ၶိုၼ်းၽႂ်းၽႂ်းၼၼ်ႉ ႁဝ်းၶႃႈ ႁူမ်ႈၵၼ်သေ ၸတ်းသၢင်ႈႁဵတ်းၵႂႃႇယူႇ” ဝႃႈၼႆ။
မိူဝ်ႈၵၢင်ပီ 2017 ၼၼ်ႉ သိုၵ်း TNLA 2 ၵေႃႉ ၵဵပ်းၶွၼ်ႇ တီႈႁၢၼ်ႉၶၢႆၶိူင်ႈၶူဝ်းႁိူၼ်း ၼွင်မၢဝ်း (လၢၼ်ႉမႄႈၸဝ်ႈ ၼၢင်းမူဝ်ႁွမ်) 11 သႅၼ် ပျႃး။ မိူဝ်ႈၵူၼ်းသိုၵ်း TNLA 2 ၵေႃႉ ဢဝ်ငိုၼ်းဢွၵ်ႇ ၵႂႃႇၼၼ်ႉ ၺႃးသိုၵ်းမၢၼ်ႈ ပဵၼ်တပ်ႉမ 88 ပႂ်ႉငွႆးယိုဝ်း ၵၢင်တၢင်းသေ တၢႆၵေႃႉၼိုင်ႈ၊ ၺႃးတီႉၺွပ်းၵႂႃႇၵေႃႉၼိုင်ႈ။ ၵဵဝ်ႇလူၺ်ႈလွင်ႈၼႆႉသေ သိုၵ်းတဢၢင်း TNLA ၵပ်းသိုပ်ႇၾူၼ်းၸူးမၼ်းၼၢင်း မၢပ်ႇၼႄးဝႃႈ မၼ်းၼၢင်းပဵၼ်ၵူၼ်းသူင်ႇၶၢဝ်ႇပၼ်သိုၵ်းလူင်ပွင်ၸိုင်ႈမၢၼ်ႈ ဝႃႈၼႆ။
ၵေႃႉပဵၼ်ၸဝ်ႈၽူဝ် ၼၢင်းမူဝ်ႁွမ် လၢတ်ႈဝႃႈ “ မိူဝ်ႈပီ 2017 ႁဝ်းၶႃႈလႆႈပၼ် 11 သႅၼ်ပျႃး။ မိူဝ်ႈ 2016 သမ်ႉ လႆႈပၼ် 3 သႅၼ်ပျႃး။ ပီၼႆႉတႄႉ ၶဝ်ဢမ်ႇမႃးၵဵပ်း။ ၽွင်းၶဝ်မႃးတီႉၺွပ်းၼၢင်းမူဝ်ႁွမ်ၼၼ်ႉ ၶႃႈႁဝ်းသမ်ႉၵႂႃႇ ၶဝ်ႈၵျွင်းၵမ်မထၢၼ်းႁဵတ်းဝိပသ်ႉသၼႃႇ။ ၵူၼ်းႁိူၼ်းႁဝ်းၶႃႈၼႆႉ ဢမ်ႇၵဵဝ်ႇၶွင်ႈၸွမ်း ၸုမ်းလႂ်။ လွင်ႈၵၢၼ်မိူင်းၼႆႉ ယိုင်ႈၶႅၼ်းဝႆႉၵႆယဝ်ႉ။ ယွၼ်ႉၼၼ်လႄႈ တုၵ်းယွၼ်းထိုင် ႁႂ်ႈၸဵဝ်းပွႆႇတူဝ်ပၼ်ၶိုၼ်းၽႂ်းၽႂ်းသေၵမ်း ယွၼ်ႉဝႃႈ မီးလုၵ်ႈဢွၼ်ႇလဵၵ်ႉ ဢၼ်ၶိုၼ်ႈႁူင်းႁဵၼ်းဝႆႉ” ဝႃႈၼႆ။
ၸုမ်းၵူၼ်းၼုမ်ႇဢၼ်တုၵ်းယွၼ်းႁႂ်ႈပွႆႇတူဝ်ၼၢင်းမူဝ်ႁွမ်ၼႆႉ ဢဝ်ဢဵၼ်ႁႅင်းၸုမ်းၵူၼ်းၼုမ်ႇၸိုင်ႈတႆး ပွတ်းႁွင်ႇ 20 ၸုမ်းသေ ၶွတ်ႇၽွတ်ႈဝႆႉမိူဝ်ႈႁူဝ်ပီ 2018 ၼႆႉ။
