ၵဵဝ်ႇလူၺ်း ပၼ်ႁႃ သိုၵ်းတႆး 2 ၸုမ်း ဢၼ်ပဵၼ်ယူႇၼႂ်းၸိုင်ႈတႆးပွတ်းႁွင်ႇၼၼ်ႉ ငဝ်ႈငုၼ်းၵေႃလိၵ်ႈလၢႆး တုၵ်းယွၼ်း ႁႂ်ႈတိတ်းတေႃႇၵပ်းသိုပ်ႇၶဝ်ႈႁႃၵၼ်သေ ၵႄႈလိတ်ႈလွင်ႈပၼ်ႁႃပၢင်တိုၵ်း ဝႃႈၼႆ။

ဝၼ်းတီႈ 17/08/2018 ယူႇတီႈငဝ်ႈငုၼ်း ၵေႃလိၵ်ႈလၢႆးလႄႈၾိင်ႈငႄႈတႆး မိူင်းတႆးပတ်းပိုၼ်ႉ ဢွၵ်ႇလိၵ်ႈတုၵ်းယွၼ်း ထိုင် ႁူဝ်ပဝ်ႈ တပ်ႉသိုၵ်းတႆး 2 ၸုမ်း။ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လႄႈ ပႃႇတီႇမႂ်ႇ သုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ႁႂ်ႈဝႆႉၼမ်ႉၼၵ်းသေ ၸဵဝ်းႁႃလွၵ်းလၢႆးတႃႇၵႄႈလိတ်ႈလွင်ႈပၼ်ႁႃ ဢၼ်ပဵၼ်ပၢင်တိုၵ်းၵၼ်တၢင်းပွတ်းႁွင်ႇၼၼ်ႉ ႁႂ်ႈၸွႆႈၵႄႈလိတ်ႈၽႂ်းၽႂ်းသေ သၢင်ႈၽွၼ်းပၢင်ႈတႃႇၸိူဝ်ႉၸၢတ်ႈၵႂႃႇ ဝႃႈၼႆ။

ၸၢႆးတိၼ်ႇ ႁူဝ်ပဝ်ႈ ငဝ်ႈငုၼ်းၵေႃလိၵ်ႈလၢႆးလႄႈၾိင်ႈငႄႈတႆး မိူင်းတႆးပတ်းပိုၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ပိူင် လူင်မၼ်းတႄႉ ႁဝ်းၶႃႈႁဵတ်းပၢင်ၵုမ်တႃႇတေၸတ်းႁဵတ်းပွႆးပီမႂ်ႇတႆး တီႈလႃႈသဵဝ်ႈ။ ဢုပ်ႇၵၼ်လူင်ႈၼႃႈ ပဵၼ် ပွၵ်ႈၵမ်းၼိုင်ႈ။ ၵမ်းၼႆႉ ယူႇတီႈၵူၼ်းမိူင်းၼမ်ႉတူႈ တီႈတၢင်းထုင်ႉမိူင်းယဵၼ် တၢင်ႇလၢတ်ႈၼႂ်းပၢင်ၵုမ်ဝႃႈ ႁဝ်းတေ ႁဵတ်းပွႆးပီမႂ်ႇတႆးၼႆႉ ၸႂ်ႈယဝ်ႉ ၵူၺ်းၼႃႇ တၢင်းၼမ်ႉတူႈမိူင်းယဵၼ်ႁဝ်းၼႆႉ ပဵၼ်ၼမ်ႉႁူ ၼမ်ႉတႃယူႇ ပဵၼ်သိုၵ်းပဵၼ် သိူဝ်ၵၼ် ၵူၼ်းမိူင်းၵေႃႈ ဢမ်ႇလႆႈယူႇႁိူၼ်း မီးႁိူၼ်းၵေႃႈလႆႈပၢႆႈပႅတ်ႈ မီးသူၼ်မီးၼႃးၵေႃႈ ဢမ်ႇလႆႈၵႂႃႇၸႂ်း ဢမ်ႇလႆႈ ၵႂႃႇႁဵတ်း ယွၼ်ႉၼၼ်လႄႈ တူၺ်းထိုင်ႁဝ်းဢိတ်းၼိုင်ႈ။ ၵမ်းၼၼ် ယူႇတီႈၼႂ်းပၢင်ၵုမ်ႁဝ်းသေ ဢွၼ်ၵၼ် တုၵ်းယွၼ်းထိုင် တပ်ႉသိုၵ်းတႆး 2 ပႃႈ 2 ၾၢႆႇလီယူႇယူဝ်ႉၼႆသေ ၸင်ႇလႆႈႁဵတ်းလိၵ်ႈတုၵ်းယွၼ်းထိုင်” ဝႃႈၼႆ။

သိုပ်ႇလၢတ်ႈဝႃႈ “ ၵၢၼ်မိူင်းလႄႈ ၵၢၼ်ၵေႃလိၵ်ႈလၢႆးလႄႈၾိင်ႈငႄႈတႆး မၼ်းဢမ်ႇၵဵဝ်ႇ ၵပ်းၵၼ် ၵမ်းသိုဝ်ႈသေတႃႉ ၵေႃႈ မၼ်းပၢႆႉပႃးၵၼ်သဵင်ႈသဵင်ႈၶႃႈယဝ်ႉ မၼ်းပဵၼ်ၵၢၼ်တႆးတင်းမူတ်းၶႃႈယဝ်ႉ။ ထႅင်ႈၾၢႆႇၼိုင်ႈ ၵေႃႈ ပဵၼ်ၽႂ်ၵေႃႈ ဢမ်ႇၸႂ်ႈ ႁဝ်းၼင်ႇၵၼ်ၵူၺ်း/ တႆးၼင်ႇၵၼ်ၵူၺ်း ယွၼ်ႉၼၼ်လႄႈ ႁဝ်းတုၵ်းယွၼ်းထိုင် ၸွမ်သိုၵ်းလူင် ႁဝ်းတင်း သွင်ၾၢႆႇ” ဝႃႈၼႆ။

လွင်ႈတၢင်းၶေႃႈတုၵ်းယွၼ်းပေႃႈမႄႈၵူၼ်းမိူင်း ဢၼ်လႆႈတုၵ်းယွၼ်းထိုင် တပ်ႉသိုၵ်းတႆး 2 ၸုမ်းၼႆႉတႄႉ ယွၼ်ႉပေႃႈမႄႈၵူၼ်းမိူင်းၼႂ်းမိူင်းတႆးပွတ်းႁွင်ႇ လႆႈၶၢမ်ႇတၢမ်ႇသိုၵ်းမႃး ဢမ်ႇထၢတ်ႇဢမ်ႇဝၢႆး၊ ပၢႆႈယၢၼ် တီႈယူႇ တီႈသဝ်း သူၼ်ႁႆႈၼႃး၊ ဢမ်ႇၸၢင်ႈႁဵတ်းသၢင်ႈၵၢၼ်ႁႆႈၵၢၼ်သူၼ်၊ ပေႃးယၢပ်ႇတႃႇလဵင်ႉတွင်ႉ၊ တေႁဵတ်း ႁိုဝ်ၵမ်ႉ ၸွႆႈၵၼ် သိုၵ်းတႆးယွၼ်းၶဝ်ႈယွၼ်းၼမ်ႉ။

သိုပ်ႇသေၼၼ်ႉ ပဵၼ်မုၵ်ႉၸုမ်းတႆးၼင်ႇၵၼ် လွင်ႈဝူၼ်ႉလႄႈ လွင်ႈပွင်ႇၸႂ်လႆႈပႅၵ်ႇပိူင်ႈၵၼ်သေ ႁဝ်းၼင်ႇၵၼ်ပေႃး လႆႈဢဝ်ၵၢၼ်သိုၵ်းၵႄႈလိတ်ႈတေႃႇၵၼ်ၼၼ်ႉ ပေႃႈမႄႈၵူၼ်းမိူင်းမီးလွင်ႈၸႂ်လဵၵ်ႉၶေႃႈၶူမ်ၸွမ်းလွင်ႈတႆး ၼင်ႇ ၵၼ်လႆႈဝၢႆႇပၢၵ်ႇၵွင်ႈတေႃႇၵၼ် လွင်ႈပၼ်ႁႃပိုၼ်းႁၢင်ႈၸႃႉၼႆႉ ဢမ်ႇထုၵ်ႇလီလႆႈပဵၼ်။

ယူႇတီႈပေႃႈမႄႈၵူၼ်းမိူင်းသေ ၶႂ်ႈတုၵ်းယွၼ်း ႁႂ်ႈဝူၼ်ႉတေႃႇၼႃႈၵူၼ်းမိူင်းသေ ဢဝ်လၢႆးလႂ်ၵေႃႈလီ ၶႂ်ႈႁႂ်ႈတိတ်း တေႃႇၵပ်းသိုပ်ႇၶဝ်ႈႁႃၵၼ်သေ ၵႄႈလိတ်ႈလွင်ႈပၼ်ႁႃႁၢင်ႈၸႃႉၼႆႉ ႁႂ်ႈမၼ်းယဝ်ႉၵႂႃႇလွင်ႈလီ ဢၼ်ဝႃႈၼၼ်ႉ ၸင်ႇလႆႈတုၵ်းယွၼ်းထိုင်တီႈ ပႃႇတီႇမႂ်ႇသုင်ၸိုင်ႈတႆး SSPP လႄႈ ၶွင်ႇသီႇဢဝ်ၶိုၼ်းၸိုင်ႈတႆး RCSS တင်းသွင်ၸုမ်း။

ၶႂ်ႈႁႂ်ႈဝႆႉၼမ်ႉၼၵ်းသေ ၸဵဝ်းႁႃလွၵ်းလၢႆးတႃႇၵႄႈလိတ်ႈလွင်ႈပၼ်ႁႃၼႆႉ ႁႂ်ႈမၼ်းၸဵဝ်းယဝ်ႉလွင်ႈလီသေၵမ်း ဝႃႈၼႆ။

ပၢင်ၵုမ်ငဝ်ႈငုၼ်း ၵေႃလိၵ်ႈလၢႆးလႄႈ ၾိင်ႈငႄႈတႆး မိူင်းတႆးပတ်းပိုၼ်ႉၼႆႉ ၸတ်းႁဵတ်းတီႈႁူင်းႁေႃ ၵေႃလိၵ်ႈလၢႆး ၸႄႈဝဵင်းလႃႈသဵဝ်ႈ မီးတူဝ်တႅၼ်း တႃႇ 16 ၸႄႈဝဵင်း ႁူဝ်ၵူၼ်း 80 ပၢႆ ႁူမ်ႈၵၼ်လႆႈၸႂ် ဢွၵ်ႇလိၵ်ႈတုၵ်းယွၼ်း ထိုင် တပ်ႉသိုၵ်းတႆး 2 ၸုမ်း ႁႂ်ႈၵိုတ်းယင်ႉပႅတ်ႈပၢင်တိုၵ်း ဢၼ်ပဵၼ်ယူႇၼႂ်းမိူင်းတႆးပွတ်းႁွင်ႇၼၼ်ႉ ဝႃႈၼႆ။

ဝၼ်းတီႈ 20/08/2018 သင်ၶၸဝ်ႈပတ်းပိုၼ်ႉၸိုင်ႈတႆး 55 ၸႄႈဝဵင်း ႁူမ်ႈပႃးထိုင်ဝတ်ႉလႅင်းႁၢၼ်တႆး ဢၼ်မီး တီႈငဝ်ႈၸိုင်ႈလွႆတႆးလႅင်း သုတ်ႇမုၼ်းၽႄမဵတ်ႉတႃႇ ၶၢဝ်းလဵဝ်ၵၼ်ဝႃႈၼႆ။

ယိူင်းဢၢၼ်းတႄႉ ႁႂ်ႈတပ်ႉသိုၵ်းၸိုင်ႈတႆးသွင်ၸုမ်း ၶဝ်ႈၸႂ်ၵၼ်သေ ၵိုတ်းလွင်ႈပိုတ်းယိုဝ်းၵၼ်၊ ႁႂ်ႈပေႃႈမႄႈၵူၼ်း မိူင်းတႆး လႆႈယူႇသဝ်းၵတ်းယဵၼ်၊ ႁႂ်ႈသိုၵ်းၼႂ်းမိူင်းတႆးတင်းသဵင်ႈ ၵိုတ်းလွင်ႈပိုတ်းယိုဝ်းၵၼ် ၼႂ်းမိူင်းတႆးၵူႈတီႈတီႈ၊ ပႃးၸဵမ် ႁႂ်ႈၼႂ်းမိူင်းႁူမ်ႈတုမ်မၢၼ်ႈလႄႈ ၼႂ်းလုမ်ႈၾႃႉမီးလွင်ႈၵတ်းယဵၼ်။