ႁူဝ်ပဝ်ႈ ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တႂ်ႈသိုၵ်းမၢၼ်ႈယိုတ်းမိူင်း ဢူးတဵင်းၸူဝ်း လၢတ်ႈၵႂႃႇဝႃႈ – ၼေႃႇၽူႈတႅၼ်း ဢၼ်တေၶဝ်ႈပၢင်လိူၵ်ႈတင်ႈဢၼ်တေၸတ်းၼႆႉ  တေလႆႈပဵၼ်ၵူၼ်းႁပ်ႉပွႆႉႁပ်ႉၶူး၊ ယူႇတီႈပႃႇတီႇၵၢၼ်မိူင်းသေ ႁႂ်ႈႁၢင်ႈႁႅၼ်းဝႆႉၸဵမ်မိူဝ်ႈလဵဝ် ဝႃႈၼႆ။

ၼႂ်းဝၼ်းတီႈ 26/08/2025 ယၢမ်းၵၢင်ၼႂ် ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တႂ်ႈသိုၵ်းမၢၼ်ႈ လႄႈ ပႃႇတီႇၵၢၼ်မိူင်း ဢၼ်လႆႈမၢႆၾၢင် ႁဵတ်းပၢင်ႁူပ်ႉထူပ်းၵၼ်တီႈၼေႇပျီႇတေႃႇသေ ႁူဝ်ပဝ်ႈ UEC တိုၵ်းသူၼ်းလၢတ်ႈၵႂႃႇ ၼင်ႇၼႆ။

ၸွမ်းၼင်ႇ ပၵ်းပိူင်ၾၢႆႇတၢင်ႇမၢႆၾၢင်သေ ဢၼ်တၢင်ႇမၢႆၾၢင်မႃးတီႈ ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် မီးတၢင်းၼမ် ၼႂ်းၼၼ်ႉ သိုၵ်းမၢၼ်ႈပၼ်မၢႆၾၢင်တႃႇ  61 ပႃႇတီႇ။ ပႃႇတီႇၵၢၼ်မိူင်း ဢၼ်တေလူင်းႁႃသဵင် ၼႂ်းမိူင်းပတ်းပိုၼ်ႉၼႆႉ မီး 9 ပႃႇတီႇ၊ ပႃႇတီႇၵၢၼ်မိူင်း ဢၼ်တေလူင်းႁႃသဵင် ၼႂ်းတိူင်း လႄႈ ၸႄႈမိူင်းသမ်ႉ မီးဝႆႉ 52 ပႃႇတီႈ ဝႃႈၼႆ။

ၼႂ်းမၢႆမီႈပၵ်းပိူင် ဢၼ်တၢင်ႇယိုၼ်ႈ သဵၼ်ႈမၢႆၽူႈတႅၼ်းပႃႇတီႇၼၼ်ႉ ႁႂ်ႈၾၢင်ႉပႃးလွင်ႈ တေလႆႈပဵၼ်ၵူၼ်း ဢၼ်ပူၼ်ႉၸၼ်ႉႁဵၼ်းလိၵ်ႈ ၸၼ်ႉသုင် (အထက်တန်း)၊ ပၢင်လိူၵ်ႈတင်ႈမိူဝ်းၼႃႈမႃး တေလႆႈပဵၼ်ၵူၼ်း ဢၼ်လႆႈႁပ်ႉ ၸုမ်ႈၶူး ႁပ်ႉပွႆႉဝႆႉ တီႈၸၼ်ႉၸွမ်   သေဢၼ်ဢၼ်၊ လွင်ႈၼႆႉ ယူႇတီႈ ပႃႇတီႇၵၢၼ်မိူင်းၵေႃႈ ႁႂ်ႈႁၢင်ႈႁႅၼ်းၼႆ – ဢူးတဵင်းၸူဝ်း လၢတ်ႈၵႂႃႇၼင်ႇၼႆ။

ပၢင်လိူၵ်ႈတင်ႈ ဢၼ်သိုၵ်းမၢၼ်ႈတေဢွၼ်ၸတ်းႁဵတ်းၼႆႉ တွၼ်ႈၼိုင်ႈ တေပဵၼ်ၼႂ်းလိူၼ် တီႊသႅမ်ႊပိူဝ်ႊ ပီ 2025 ၼႆႉ။