တႃႇတေပဵၼ်မႃး ၵူၼ်းမေႃႁၢင်ႈၶိူင်ႈတႃးၼႃႈ Makeup Artist ၼႆႉ ဢမ်ႇငၢႆႈ သင်ဢမ်ႇပႃးၸႂ် မီးဝႃႇသၼႃႇ တႄႉတႄႉၸိုင်။ ၵွပ်ႈၼႆလႄႈ တွၼ်ႈတႃႇၼႂ်းၸၢဝ်းတႆးႁဝ်းၶႃႈတႄႉ မီးယူႇသေတႃႉ ၵူၺ်းၵႃႈ မီးၵမ်ႈဢေႇ။ ဢၼ်ထိုင်ၸၼ်ႉပေႃးလႆႈႁၢင်ႈၶိူင်ႈတႃးၼႃႈပၼ် ၼၢင်းငၢမ်းၵူႈမိူင်းမိူင်း (Miss Grand International 2023) ဢၼ်မႃးတီႈမိူင်းမၢၼ်ႈၼႆႉလႄႈသင် ဢၼ်လႆႈၶဝ်ႈႁူမ်ႈပၢင်ပွႆးလိူၵ်ႈၼၢင်းငၢမ်း ၼႂ်းႁူမ်ႈတုမ်မၢၼ်ႈၼႆႉသေ လႆႈပဵၼ်ၽူႈပၼ်ဝၢၵ်ႈ (ၶၼႅၼ်း) ၾၢႆႇႁၢင်ႈၶိူင်ႈတႃးၼႃႈ ၼႆႉလႄႈသင် ၼႂ်းတႆးႁဝ်းဢမ်ႇသူႈမီး ၵွပ်ႈၼႆလႄႈ ၼႂ်းၼၼ်ႉ ပႃးၼၢင်းမူဝ်သႅင် (ႁွင်ႉ) Sora ၵေႃႉၼိုင်ႈ ၼႆယဝ်ႉ။ ဢိင်ၼိူဝ် လွင်ႈၼႆႉသေ ယူႇတီႈ ၼၢင်းငိုၼ်းႁွမ် ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉ လွင်ႈၶတ်းၸႂ်မၼ်းၼၢင်း ႁဵတ်း ႁိုဝ်လႄႈ ပဵၼ်မႃးမေႃႁၢင်ႈၶိူင်ႈတႃးၼႃႈ ၼႆႉမႃး။  

ထၢမ် – မႂ်ႇသုင်ၶႃႈ … မိူဝ်ႈၼႆႉၵေႃႈ လႆႈမီးတိုဝ်ႉတၢင်းလီ မႃးႁူပ်ႉထူပ်းၵၼ်တီႈတၢင်း ႁူင်းပွႆႇသဵင်ၽူႈတွႆႇႁွၵ်ႈ ႁဝ်းၶႃႈၼေႃႈ။ ဢွၼ်တၢင်းသုတ်းတႄႉ ၶႂ်ႈႁႂ်ႈပီႈၵပ်းသိုပ်ႇၼႄႉၼမ်းပၼ်ၸိုဝ်ႈသဵင်ဢိတ်းၼိုင်ႈၶႃႈ?

တွပ်ႇ – မႂ်ႇသုင်ၵူႈၵေႃႉၶႃႈ … ၸိုဝ်ႈတႆးၶႃႈႁဝ်းတႄႉပဵၼ် ၼၢင်းမူဝ်သႅင် ၼႆဢေႃႈ။ ၸိုဝ်ႈၾၢႆႇႁဵတ်းၵၢၼ်ယူႇ ယၢမ်းလဵဝ်ၼႆႉတႄႉပဵၼ် Sora ၶႃႈ။ မိူဝ်ႈလဵဝ် Sora ႁဵတ်းၵၢၼ်ပိုတ်ႇၾၢႆႇသွၼ် ႁၢင်ႈၶိူင်ႈ (makeup) ဝႆႉတီႈဝဵင်းတႃႈၵုင်ႈ ၶႃႈဢေႃႈ။

ထၢမ် – ပေႃးလၢတ်ႈဝႃႈ Makeup Sora ၼႆ လႆႈႁၼ်ၵူၼ်းၼုမ်ႇတႆးလႄႈ တၢင်ႇၸၢဝ်းၶိူဝ်းၸိူဝ်းသူၼ်ၸႂ် ယွၼ်ႉသီတႃးၼႃႈ (Makeup) ၸိူဝ်းၼႆႉ ဢွၼ်ၵၼ်ႁူႉၸၵ်းၸိုဝ်ႈဢၼ်ၼႆႉဝႆႉၶႃႈၼေႃႈ။ ယွၼ်ႉသင်လႄႈ လႆႈလိူၵ်ႈၸိုဝ်ႈ Sora ၼႆၶႃႈၼေႃ?

တွပ်ႇ – ႁဵတ်းသင်လႄႈ လႆႈလိူၵ်ႈၸိုဝ်ႈဢၼ်ၼႆႉၼႆ ဢွၼ်တၢင်းၸိုဝ်ႈၼၢင်းမူဝ်သႅင် ၼႆၼၼ်ႉ ပေႃးပဵၼ်ပီႈၼွင်ႉတႆးႁဝ်းတႄႉ မေႃႁွင်ႉယူႇသေတႃႉၵေႃႈ ပေႃးပဵၼ်တၢင်ႇၸၢဝ်းၶိူဝ်း တေႁွင်ႉၸွမ်းသမ်ႉယၢပ်ႇ ၼၼ်ႉၼႃႇၼေႃႈ။ ႁဵတ်းၼၼ်သေ လႆႈပၢႆးဝူၼ်ႉမႃးတီႈ ၽူႈမၢၵ်ႈမီးလူင်မိူင်းၶႄႇ Jack Ma ။ မၼ်းလၢတ်ႈဝႆႉဝႃႈ ႁဝ်းတေႁဵတ်းၵၢၼ်ဢၼ်လႂ်ၵေႃႈယဝ်ႉ ၸိုဝ်ႈႁဝ်းၼႆႉလမ်ႇလွင်ႈလိူဝ်သေပိူၼ်ႈ၊ ႁႂ်ႈပိူၼ်ႈႁွင်ႉငၢႆႈတွင်းငၢႆႈၵွၼ်ႇ ပိူၼ်ႈၸင်ႇတေတွင်းၸိုဝ်ႈႁဝ်း၊ ပေႃးပိူၼ်ႈတွင်းၸိုဝ်ႈႁဝ်းယဝ်ႉ ပိူၼ်ႈၸင်ႇတေတွင်းၵၢၼ်ႁဝ်း။ ၵွပ်ႈၼၼ် Sora ၵေႃႈ ဝူၼ်ႉလိူၵ်ႈႁႃၸိုဝ်ႈဢၼ်တေၵိုင်ႇလႅပ်ႈၼႆသေ ႁၼ်မႅၼ်ႈၸိုဝ်ႈဢၼ်ၼႆႉႁွင်ႉငၢႆႈ ယဝ်ႉၵေႃႈဝူၼ်ႉဝႃႈ လႅပ်ႈတၢင်းတူဝ်ၸဝ်ႈၵဝ်ႇၼႆသေ လႆႈလိူၵ်ႈၸိုဝ်ႈဢၼ်ၼႆႉၶႃႈဢေႃႈ။

ထၢမ် – ပီႈ Sora ၼႆႉ ပဵၼ်ၵူၼ်းၸႃႇတိတၢင်းလႂ် ယဝ်ႉၵေႃႈ မီးပီႈၼွင်ႉလၢႆၵေႃႉၶႃႈၼေႃ?

တွပ်ႇ – Sora ပဵၼ်ၵူၼ်းၸႃႇတိ ဝဵင်းပၢင်လူင်၊ ၸိုင်ႈတႆးပွတ်းၸၢၼ်းဢေႃႈ၊ မီးပီႈၼွင်ႉ 3 ၵေႃႉသေ Sora တႄႉပဵၼ်ၵေႃႉၵၢင်ၶႃႈ။

ထၢမ် – ပီႈ Sora ၼႆႉ ႁဵတ်းႁိုဝ်သေသူၼ်ၸႂ် ပႃးၸႂ်မႃးၾၢႆႇႁၢင်ႈၶိူင်ႈ(makeup) ၼႆႉၶႃႈ?

တွပ်ႇ – Sora သူၼ်ၸႂ်ႁၢင်ႈၶိူင်ႈၼႆႉတႄႉ ႁိုင်ၼႃႇယဝ်ႉၶႃႈ၊ ၸဵမ်မိူဝ်ႈတိုၵ်ႉၶိုၼ်ႈႁူင်းႁဵၼ်းၸၼ်ႉၸဵတ်း ၸၼ်ႉပႅတ်ႇၼၼ်ႉဢေႃႈ လႆႈၸႂ်တႄႉတႄႉဝႃႈဝႃႈၶႃႈ။ မိူဝ်ႈၶိုၼ်ႈၸၼ်ႉၸွမ် ၵေႃႈ လႆႈၸႂ်ႁၢင်ႈၶိူင်ႈပၼ် ဢူၺ်းၵေႃႉ ၸိူဝ်းၼႆႉဢေႃႈ။ ၵူၺ်းၵႃႈ မိူင်းတႆးႁဝ်းသမ်ႉ မိူၼ်ၼင်ႇႁူႉၼၼ်ႉၶႃႈၼႃႇၼေႃႈ ပေႃးႁၢင်ႈၶိူင်ႈၼႆႉ ဢမ်ႇပေႃးလႆႈငိုၼ်းၼမ်ၵႃႈႁိုဝ်၊ မႄႈ Sora ၵေႃႈ ဢမ်ႇပၼ်ႁႅင်းၾၢႆႇၵၢၼ်ႁၢင်ႈၶိူင်ႈသေ ႁႂ်ႈယဵပ်ႉၶူဝ်းဢေႃႈ။ မိူင်းတႆးႁဝ်းတႄႉ ပွႆးလိူင်ႇ၊ မီးပွႆးမီးလၢမ်းတႃႇသေႇလႄႈ ယဵပ်ႉၶူဝ်းတႄႉ ပဵၼ်ၵၢၼ်တႃႇသေႇ ယဝ်ႉၵေႃႈ လႆႈယူႇၸွမ်းပေႃႈမႄႈ ဢမ်ႇလႆႈၽၢတ်ႇၵၼ်၊ ငိုၼ်းၵေႃႈလႆႈတႃႇသေႇၼႆသေ မႄႈတႄႉၸႂ်ႉ ယဵပ်ႉၶူဝ်းၶႃႈဢေႃႈ။ ၵူၺ်းၵႃႈ Sora သမ်ႉသူၼ်ၸႂ်ၾၢႆႇႁၢင်ႈၶိူင်ႈၼႆလႄႈ လႆႈလိူၵ်ႈသဵၼ်ႈတၢင်းၾၢႆႇႁၢင်ႈၶိူင်ႈ (makeup) ၼႆႉၶႃႈဢေႃႈ။

ထၢမ် – ပေႃးၼၼ် ဢၼ်လႆႈတႄႇယၢင်ႈၶဝ်ႈမႃးၾၢႆႇၵၢၼ်ႁၢင်ႈၶိူင်ႈၼႆႉ တေပဵၼ်မိူဝ်ႈၽွင်းပီႈလႂ်ၶႃႈ?

တွပ်ႇ – ပဵၼ်ၼႂ်းပီ 2018 ၶႃႈဢေႃႈ။ မိူဝ်ႈပီ 2018 ၼၼ်ႉ Sora သမ်ႉပႃးၸႂ်ၾၢႆႇႁၢင်ႈၶိူင်ႈၼႆႉႁႅင်းၼႃႇ ၵူၺ်းၵႃႈ မႄႈသမ်ႉၸႂ်ႉယဵပ်းၶူဝ်းၼႆ ယဵပ်းၶူဝ်းယူႇမိူင်းတႆးႁဝ်းၼၼ်ႉတိၵ်းတိၵ်း ၵေႃႈ Sora ဢမ်ႇပႃးၸႂ်သေဢိတ်း၊ ၵူႈဝၼ်းဢၼ်လႆႈယဵပ်ႉၶူဝ်းယူႇၼၼ်ႉၵေႃႈ ဢမ်ႇမီးတၢင်းသိူဝ်းၸႂ်၊ မိူဝ်ႈၼၼ်ႉၵေႃႈ လႆႈဝူၼ်ႉဝႃႈ သဵၼ်ႈတၢင်း ၾၢႆႇၵၢၼ်ယဵပ်ႉၶူဝ်းၼႆႉ ၸဝ်ႈၵဝ်ႇ ဢမ်ႇလႆႈလွင်ႈ၊ ယဵပ်ႉၶူဝ်းမႃးၶၢဝ်းတၢင်း 3 ပီၵေႃႈ မႄႈဢမ်ႇလႆႈၼုင်ႈသိူဝ်ႈ ဢၼ် Sora ယဵပ်ႉသေၽိုၼ်၊ Sora ယဵပ်ႉတႃႇတူဝ်ၸဝ်ႈၵဝ်ႇၼုင်ႈၵူၺ်း၊ တႃႇပိူၼ်ႈၵေႃႈ ဢမ်ႇလႆႈယဵပ်ႉပၼ်သေၽိုၼ် ယဝ်ႉၵေႃႈ ယွၼ်ႉဢမ်ႇပႃးၸႂ်လႄႈ ပေႃးပိူၼ်ႈမႃးၸူးယဵပ်ႉသေ ၵမ်ႉႁိတ်ႉၵမ်ႉငႅၼ်းၼႆၵေႃႈ လႆႈယဵပ်ႉၶူဝ်းယူႇၵေႃႈဢမ်ႇမီးတၢင်းသိူဝ်းၸႂ်။ ၵူႈဝၼ်းၼႆႉ မိူၼ်ၼင်ႇ ၸၢတ်ႈပၢၼ် ႁဝ်းၵေႃႈ ဢမ်ႇမီးၵႃႈၶၼ်၊ လႆႈႁဵတ်းၵၢၼ်ဢၼ်ႁဝ်းဢမ်ႇသူၼ်ၸႂ်ပႃးၸႂ်ၼႆႉ ဢမ်ႇၵျေႃႇၸိူင်ႉၼၼ်ဢေႃႈ။

ႁဵတ်းၼၼ်သေ Sora ၵေႃႈလႆႈဢုပ်ႇၶႆႈၼႄၶိုၼ်း တီႈၵေႃႉပဵၼ်ၸဝ်ႈၽူဝ်ဢေႃႈ။ မၼ်းတႄႉဝႃႈႁင်း Sora ဝႃႈၵျေႃႇၸႂ် ၵၢၼ်ဢၼ်လႂ်ၵေႃႈ ႁဵတ်းဢၼ်ၼၼ်ႉလႄႈၼႆဢေႃႈ။ ၵူၺ်း ၵႃႈ Sora သမ်ႉၶိုၼ်းဝူၼ်ႉဝႃႈ ပေႃႈမႄႈသမ်ႉ ၶႂ်ႈႁႂ်ႈယဵပ်ႉၶူဝ်းသေ ၸွႆႈထႅမ်ပၼ်မႃးၵေႃႈၶၢဝ်းတၢင်း 3 ပီယဝ်ႉ ၵဵင်ၸႂ်ပေႃႈမႄႈ ယွၼ်ႉလႆႈသဵင်ႈငိုၼ်းၸွမ်းၼမ် ၼႆဢေႃႈ။

ၽွင်းၼၼ်ႉ ၸဝ်ႈၽူဝ် Sora လၢတ်ႈၵႂၢမ်းၶေႃႈလဵဝ်ၵူၺ်း၊ မၼ်းဝႃႈ “တူၺ်းလွႆလုၵ်ႈၼႆႉလႄႈ မိူဝ်ႈလဵဝ်ဢႃယုသူတိုၵ်ႉလဵၵ်ႉ သူၶိုၼ်ႈလႆႈယူႇ ၵူၺ်းၵႃႈသူဢမ်ႇၶိုၼ်ႈ။ သူၵုမ်ႇဝႃႈၵွပ်ႈ ၵေႃႉပုၼ်ႉ ၵေႃႉၼႆႉၼႆ ယူႇတိၵ်းတိၵ်းသေ သူဢမ်ႇပဵၼ်ၶိုၼ်ႈ။ ဢိူဝ်ႈ…ပေႃးဢႃယုသူယႂ်ႇမႃးသေ ၶိုၼ်းဝႃႈၽိူဝ်ႇတႃႉၵဝ်ၶိုၼ်ႈႁေလႃႈၼေႃ ၵဝ်ဢမ်ႇလႆႈၶိုၼ်ႈၼႆႉ လႆႈၼႅင်ၸႂ်ၼႃႇ… မိူဝ်ႈလဵဝ်ဢႃယုယႂ်ႇယဝ်ႉ ဢမ်ႇၶိုၼ်ႈလႆႈယဝ်ႉၼႆသေ ၶႂ်ႈလႆႈလွင်ႈၼႅင်ၸႂ်ၸိူင်ႉၼၼ်ယူႇႁႃႉ…” ၼႆဢေႃႈ။

ၽိူဝ်ႇလႆႈငိၼ်းၶေႃႈၵႂၢမ်းၼၼ်ႉၵေႃႈ Sora ၶိုၼ်းဝူၼ်ႉဝႃႈ မိူဝ်လဵဝ်ဢႃယုတိုၵ်ႉလဵၵ်ႉယူႇ ၶႂ်ႈႁဵတ်းသင်ၵေႃႈ တေႁဵတ်း၊ ၸၢတ်ႈပၢၼ်ႁဝ်းၵေႃႈ မီးတီႈႁဝ်းၵူၺ်းဢမ်ႇမီးတီႈၽႂ်၊ လူဝ်ႇႁတ်းႁဵတ်းၵူၺ်းၼႆသေ Sora ၸင်ႇၸုၼ်ႉသေ ဢမ်ႇလၢတ်ႈပေႃႈလၢတ်ႈမႄႈႁေယဝ်ႉၵေႃႈ ပႃးတၢင်းၽူဝ်တၢင်းလုၵ်ႈၸူဝ်းၵၼ်လူင်းမႃး တီႈဝဵင်းတႃႈၵုင်ႈ ၼႆႉဢေႃႈ။

ထၢမ် – ဢေႃႈၶႃႈ… ပေႃးၼၼ် ၶႂ်ႈႁႂ်ႈပီႈ Sora ၶူၼ်ႉၶႆႈၼႄၶိုၼ်းလွင်ႈတူဝ်ထူပ်း မိူဝ်ႈၽွင်းၼၼ်ႉ ဢိတ်ႉၼိုင်ႈၶႃႈ?

တွပ်ႇ – မိူဝ်ႈၽွင်းၼၼ်ႉတႄႉ ဝဵင်းပၢင်လူင်ၼႆႉၵေႃႈ ဢမ်ႇၸႂ်ႈဝဵင်းလူင်ၶႃႈၼႃႇၼေႃႈ တိုၵ်ႉမိူၼ်ၵၼ်တၢင်းဝၢၼ်ႈၵူၺ်း။ တႃႇတေလုၵ်ႉတီႈဝၢၼ်ႈသေ ၶိုၼ်ႈမႃးတီႈၼႂ်းဝဵင်းလူင်ၼႆႉ ၵေႃႈ ဢမ်ႇငၢႆႈၶႃႈ။ ထႅင်ႈလွင်ႈၼိုင်ႈၵေႃႈ မိူဝ်ႈ Sora ဝႃႈပႃးၸႂ်ၾၢႆႇႁၢင်ႈၶိူင်ႈၼႆၼၼ်ႉ မႄႈၵေႃႈဢမ်ႇပၼ်ႁႅင်း၊ မႄးလၢတ်ႈဝႃႈ ႁဝ်းတေႁဵတ်းႁိုဝ် ၵႂႃႇႁဵတ်းၸွမ်းပိူၼ်ႈလႆႈ ပိူၼ်ႈၵတ်ႉ ၶႅၼ်ႇၵျႃႉပေႃးတၢၼ်ႇၼၼ်ႉ၊ ႁဝ်းတမ်ႉဢမ်ႇၶႅၼ်ႇ ႁဝ်းတေႁဵတ်းႁိုဝ် ၵႂႃႇၶႅင်ႇၵၼ်တၢင်းပိူၼ်ႈလႆႈ၊ ယဵပ်ႉၶူဝ်းယူႇမိူင်းႁဝ်းၼႆႉ တိူဝ်းၵျႃႉဢိူဝ်ႈၼႆၼၼ်ႉၶႃႈၼႃႇ။ ၸဵမ်ပိုင်းမၼ်း မႄႈ ပေႃးယႃႉပႅတ်ႈလွင်ႈယုမ်ႇယမ်တူဝ်ၸဝ်ႈၵဝ်ႇယဝ်ႉၶႃႈ။

ၾၢႆႇၼိုင်ႈၵေႃႈ ပေႃးမႃးဝူၼ်ႉတူၺ်းၼႆ ၸႂ်ႈတႄႉၼင်ႇၵွၼ်ႇဢေႃႈ။ တႃႇလုၵ်ႈဢွၼ်ႇဝၢၼ်ႈၼွၵ်ႈ သၢဝ်ဝၢၼ်ႈၼွၵ်ႈၼိုင်ႈၵေႃႉ တေၵႂႃႇႁဵတ်းၵၢၼ်လႆႈတီႈမိူင်းတႃႈၵုင်ႈၼႆၼၼ်ႉ မၼ်း ၵေႃႈဢမ်ႇငၢႆႈ၊ ဢမ်ႇလႅပ်ႈပဵၼ်လႆႈၶႃႈၼႃႇၼေႃႈ။ ၵူၺ်းၵႃႈ Sora တႄႉဝူၼ်ႉဝႃႈ တေႃႈပိူၼ်ႈတၢင်းႁဵတ်းလႆႈ ႁဵတ်းသင်လႄႈ ၵဝ်ႇတေဢမ်ႇႁဵတ်းလႆႈ၊ ပိူၼ်ႈမီးႁူဝ်ၼိုင်ႈလုၵ်ႈ မိုဝ်းသွင် ၶွၼ် ႁဝ်းၵေႃႈမီးမိူၼ်ပိူၼ်ႈယူႇ၊ ႁဵတ်းသင်ပိူၼ်ႈပဵၼ်လႆႈသေ ႁဝ်းသမ်ႉတေဢမ်ႇပဵၼ်လႆႈၼႆသေ Sora ၵေႃႈ ဢမ်ႇလၢတ်ႈပေႃႈမႄႈသေ လုၵ်ႉတီႈဝဵင်းပၢင်လူင် လူင်းမႃးတၢင်းဝဵင်းတႃႈၵုင်ႈၼႆႉဢေႃႈ။

မိူဝ်ႈၽွင်းၼၼ်ႉတႄႉ ငိုၼ်းတႃႇၶိုၼ်ႈပၢင်သွၼ်တႃႇသွၼ် ၾၢႆႇႁၢင်ႈၶိူင်ႈၼၼ်ႉၵေႃႈ ဢမ်ႇပေႃးၶႃႈ လႆႈၵူႈယိမ်တီႈဢူၺ်းၵေႃႉၸိူဝ်းၼႆႉသေ ၶိုၼ်ႈပၢင်သွၼ်ႁၢင်ႈၶိူင်ႈမႃးၶႃႈဢေႃႈ။ လႆႈၶိုၼ်ႈမႃးၵမ်းၸၼ်ႉၸၼ်ႉၶႃႈ။ ၼႂ်းလေႃးၵၼႆႉ ႁဝ်းၶႂ်ႈႁဵတ်းဢၼ်လႂ်သေဢမ်ႇဝႃႈ မိူဝ်ႈႁဝ်းတႄႇငဝ်ႈမၼ်းၼၼ်ႉ မၼ်းဢမ်ႇငၢႆႈသေမဵဝ်းၶႃႈ။ ၵူၺ်းၵႃႈ ႁဝ်းလူဝ်ႇလႆႈတႄႇၵူၺ်း၊ ပေႃးတႄႇယဝ်ႉၵေႃႈ မၼ်းတေပဵၼ်ၵႂႃႇၵူၺ်း။ ၵူၼ်းႁဝ်းၵူႈၵေႃႉၼႆႉ ၵူဝ်တႃႇတေတႄႇၶႃႈဢေႃႈ။ ပေႃးတႄႇႁဵတ်းယဝ်ႉ ၵူဝ်ဢမ်ႇပဵၼ်၊ ၵူဝ်ဢမ်ႇလႆႈ၊ ၵူဝ်သုမ်း ၸိူင်ႉၼႆဢေႃႈ။ Sora တႄႉမီးၸႂ်ဝႆႉဝႃႈ မိူဝ်ႈႁဝ်းၵိူတ်ႇမႃးၵေႃႈ ဢမ်ႇပႃးသင်မႃးသေမဵဝ်း၊ ပေႃးႁဵတ်းၵႂႃႇသေ သုမ်းၼႆၵေႃႈ ပဵၼ်ဢလၢင်းမၼ်းၵူၺ်း ႁဝ်းပႆႇတၢႆ၊ ၸူဝ်ႈပႆႇတၢႆၼႆႉ ႁဵတ်းႁႃလႆႈထႅင်ႈတႃႇသေႇ ဝူၼ်ႉၸိူင်ႉၼၼ်ၶႃႈဢေႃႈ။ ၵွပ်ႈၼၼ်လႄႈ မီးပၼ်ႁႃၸိူင်ႉႁိုဝ်မႃးၵေႃႈယဝ်ႉ Sora တႄႉ ဢမ်ႇယွမ်းသုမ်းသေပွၵ်ႈၶႃႈ။

ၵႂၢမ်းၶေႃႈလဵဝ် ဢၼ် Sora လၢတ်ႈတူဝ်ၸဝ်ႈၵဝ်ႇယူႇတႃႇသေႇတႄႉ ပဵၼ်သင်မႃးၵေႃႈ တေဢမ်ႇယွမ်းသုမ်းၼႆၶႃႈ။ ပၼ်ႁႃၼႆႉတႄႉ တိုၼ်းတေမီးယူႇၶႃႈ။ ၽဝဢၼ်ဝႃႈၼၼ်ႉ တိုၼ်းတေမီးမိူဝ်ႈၶိုၼ်ႈမိူဝ်ႈလူင်း ၸိူင်ႉၼၼ်ယူႇၶႃႈ၊ ၵူၺ်းၵႃႈ ထူပ်းၺႃးၸိူင်ႉႁိုဝ်ၵေႃႈယဝ်ႉ တိုၼ်းတေဢမ်ႇလႆႈယွမ်းသုမ်းၼၼ်ႉၶႃႈၼႃႇၼေႃႈ။

ထၢမ် – ၵၢၼ်ဢၼ်လႂ်ၵေႃႈယဝ်ႉ တိုၼ်းမီးလွင်ႈယၢပ်ႇယူႇၼႆလႄႈ ယူႇတီႈ ၵၢၼ်ပဵၼ် makeup artist ၼိုင်ႈၵေႃႉၶႃႈလူး ၶေႃႈလီတင်း ၶေႃႈဢမ်ႇလီ မီးၸိူင်ႉႁိုဝ်ၽွင်ႈ?

တွပ်ႇ – ၾၢႆႇႁၢင်ႈၶိူင်ႈၼႆႉ ၶေႃႈလီလႄႈတင်း ၶေႃႈဢမ်ႇလီဢၼ်ဝႃႈၼၼ်ႉ ယူႇတီႈႁဝ်းႁၵ်ႉၵၢၼ်ႁဝ်းႁႃႉ ဢမ်ႇႁၵ်ႉၵၢၼ်ႁဝ်းၼၼ်ႉၶႃႈၼႃႇ။ ၵၢၼ်ငၢၼ်းဢၼ်ႁဝ်းႁဵတ်းၼိုင်ႈဢၼ် ၼႆႉ လႆႈငိုၼ်းၼမ်/ ဢေႇၵႃႈႁိုဝ်ၵေႃႈၶႂ်ႈယဝ်ႉ ပေႃးႁဝ်းသူၼ်ၸႂ်ၼႆႉမၼ်းပဵၼ်လွင်ႈလီတႃႇႁဝ်းယဝ်ႉ။ ၵူၼ်းႁဝ်းၵမ်ႈၼမ်တႄႉ ၵႂႃႇၸွမ်းၾၢႆႇလင်ငိုၼ်းၶႃႈဢေႃႈ။ မိူၼ်ၼင်ႇ မိူဝ်ႈ Sora တႄႇႁဵတ်းၵၢၼ်ပဵၼ်ၵူၼ်းယဵပ်ႉၶူဝ်းၵေႃႈ Sora ၵႂႃႇၾၢႆႇငိုၼ်း။ ၶႂ်ႈလႆႈငိုၼ်း ၵူၺ်းၵႃႈဢမ်ႇပေႃးသူၼ်ၸႂ်ၵၢၼ်။ ၵွပ်ႈၼၼ်ႉ လႆႈမၼ်းဢမ်ႇထိုင် ၸိၵ်းၸွမ်မၼ်းလႆႈ။ ႁဝ်းၵေႃႈ ဢမ်ႇၵျေႃႇ။

ၵွပ်ႈၼၼ် Sora တႄႉ သင်ႇသွၼ်တူဝ်ၸဝ်ႈၵဝ်ႇဝႃႈ ႁဵတ်းၵၢၼ်ဢၼ်လႂ်ၵေႃႈယဝ်ႉ ဢမ်ႇလူဝ်ႇႁဵတ်းၵွပ်ႈငိုၼ်း၊ ႁႂ်ႈႁဵတ်းလူၺ်ႈၵၢၼ်ဢၼ်ႁဝ်းၵျေႃႇ ဢၼ်ႁဝ်းႁၵ်ႉ။ ၵၢၼ်ႁၢင်ႈၶိူင်ႈ makeup ၼႆႉ လွင်ႈလီလွင်ႈႁၢႆႉ ဢၼ်ဝႃႈၼၼ်ႉ ယူႇတီႈၵူၼ်းႁဵတ်းမၼ်းၵူၺ်းၶႃႈ။ Sora တႄႉႁၵ်ႉၾၢႆႇၵၢၼ်ႁၢင်ႈၶိူင်ႈၼႆႉႁႅင်းၼႃႇ ၶၢဝ်းလုၵ်ႉၶၢဝ်းၼွၼ်းၵေႃႈ ၼႂ်းတႃၼႆႉတိုၼ်းမီးဝႆႉလွင်ႈႁၢင်ႈၶိူင်ႈၵူၺ်း။ ၵွပ်ႈၼၼ်လႄႈ ဢၼ် Sora လႆႈႁဵတ်းၵၢၼ်ယူႇၵူႈဝၼ်းဝၼ်းၼႆႉ မိူၼ်ၵၼ်တၢင်းလႆႈလိုဝ်ႈႁိူဝ်ႉၵူၺ်း ယွၼ်ႉလႆႈႁဵတ်းၵၢၼ်ဢၼ်ႁဝ်းႁၵ်ႉ။ လွင်ႈလႂ်ဢမ်ႇထုၵ်ႇမႅၼ်ႈၵေႃႈ ၶိုၼ်ႈမူၼ်ႉမႄးသေ မႄးႁဵတ်းဢၼ်မႂ်ႇ။ ပေႃးႁၼ်ပိူၼ်ႈႁၢင်ႈလီၵေႃႈ ပေႃးၵျေႃႇၸႂ် လိုမ်းၶဝ်ႈလိုမ်းၼမ်ႉယဝ်ႉ။ ပေႃးႁဵတ်းၵၢၼ်ဢၼ်ႁဝ်းႁၵ်ႉၼႆႉ လႆႈငိုၼ်းၵေႃႈယဝ်ႉဢမ်ႇလႆႈငိုၼ်းၵေႃႈယဝ်ႉ ႁဝ်းမီးတၢင်းသိူဝ်းၸႂ်ၶႃႈဢေႃႈ။

ၵွပ်ႈၼၼ် ဢၼ်ၶႂ်ႈလၢတ်ႈတႄႉၵေႃႈ ပိူင်လူင်မၼ်းလူဝ်ႇပဵၼ်ၵၢၼ်ဢၼ်ႁဝ်းႁၵ်ႉ ၼၼ်ႉယဝ်ႉၶႃႈ။

ထၢမ် – ၼႂ်းၵၢပ်ႈပၢၼ်ယၢမ်းလဵဝ်ၼႆႉ လွင်ႈႁၢင်ႈၶိူင်ႈၼႃႈတႃလမ်ႇလွင်ႈၸိူင်ႉႁိုဝ်ၶႃႈၼေႃ။ ယွၼ်ႉသင်လႄႈ လမ်ႇလွင်ႈၼႆ ၶႂ်ႈႁႂ်ႈမွၵ်ႇလၢတ်ႈၼႄပၼ် လွင်ႈၵႃႈၶၼ်မၼ်းဢိတ်ႉၼိုင်ႈ?

တွပ်ႇ – လမ်ႇလွင်ႈၸိူင်ႉႁိုဝ်ၼႆ ၼၢင်းယိင်းၵူႈၵေႃႉၼႆႉ ပေႃႈဢမ်ႇႁၢင်ႈၶိူင်ႈဝႆႉသေ ၵႂႃႇၼႂ်းၵႄႈၵၢင်ပိူၼ်ႈၼႆ ၸွင်ႇႁတ်းၵႂႃႇယူႇၶႃႈႁႃႉ? ဢမ်ႇပေႃးႁတ်းၵႂႃႇၸွင်ႇၸႂ်ႈၶႃႈ။ ၵွပ်ႈၼၼ် ပေႃးတူဝ်ၸဝ်ႈၵဝ်ႇႁၢင်ႈၶိူင်ႈတႃးၼႃႈ ႁၢင်ႈလီဝႆႉယဝ်ႉၼႆ ၵႂႃႇၼႂ်းၵႄႈပိူၼ်ႈၵေႃႈ ႁတ်းႁႅၼ်ႁူဝ် ႁတ်းလၢတ်ႈတေႃႇပိူၼ်ႈၼၼ်ႉၶႃႈၼႃႇ။ ဢၼ်ၼႆႉ ပိူၼ်ႈႁွင်ႉဝႃႈလွင်ႈယုမ်ႇယမ်တူဝ်ၸဝ်ႈၵဝ်ႇ (confident) ဢေႃႈ။

ႁၢင်ႈၶိူင်ႈဢၼ်ဝႃႈၼႆႉသမ်ႉ တႆးႁဝ်းမိူဝ်ႈၵူႈပွၵ်ႈ မၢင်ၵေႃႉတေဝူၼ်ႉဝႃႈ ၶႂ်ႈလႆႈၸူႉမႂ်ႇ၊ ၶႂ်ႈလႆႈၽူဝ်မႂ်ႇ ၼႆၶႃႈၼေႃႈ။ တီႈတႄႉမၼ်း ဢမ်ႇၸႂ်ႈၸိူင်ႉၼၼ်ၶႃႈ။ ပေႃးတူဝ်ၸဝ်ႈၵဝ်ႇႁဝ်းႁၢင်ႈလီၼႆ ႁဝ်းမီးလွင်ႈယုမ်ႇယမ် တူဝ်ၸဝ်ႈၵဝ်ႇ၊ ပေႃးႁဝ်းယုမ်ႇယမ်တူဝ်ၼႆ ႁဝ်းႁဵတ်းၵၢၼ်သင်ၵေႃႈတေပဵၼ်။ ပေႃးႁၢင်ႈၶိူင်ႈႁၢင်ႈလီလီဝႆႉၼႆ ၵူၼ်းႁိမ်းႁွမ်းတူၺ်းမႅၼ်ႈၵေႃႈ ၸႂ်တေ ၵတ်းယဵၼ်ၸွမ်းၶႃႈဢေႃႈ။ လွင်ႈႁၢင်ႈၶိူင်ႈၼႆႉ ပဵၼ်လွင်ႈယုမ်ႇယမ်တႃႇၼၢင်းယိင်း ၼိုင်ႈၵေႃႉယဝ်ႉၶႃႈ။

မၢင်ၵေႃႉတေထၢင်ႇဝႃႈ ၵူၼ်းၸၢႆးၵူၺ်းႁဵတ်းလႆႈၵၢၼ်ပၢႆးမၢၵ်ႈမီးၼႆၼေႃႈ တီႈတႄႉမၼ်း ၼၢင်းယိင်းႁဝ်းၵေႃႈ ပေႃးႁဝ်းမီးလွင်ႈယုမ်ႇယမ်တူဝ်ၸိုင် ႁဝ်းႁဵတ်းသၢင်ႈလႆႈၵူႈမဵဝ်းယူႇ ၶႃႈ။

ထၢမ် – မိူဝ်ႈပီ 2023 ၼၼ်ႉ လႆႈႁၼ်ပီႈ Sora ႁၢင်ႈၶိူင်ႈပၼ်ၼၢင်းငမ်းၵူႈမိူင်းမိူင်း (Miss Grand International 2023) ဢၼ်မႃးတီႈမိူင်းမၢၼ်ႈၶႃႈၼေႃႈ။ ယဝ်ႉၵေႃႈ မိူၼ်ၼင်ႇ ပၢင်ပွႆးလိူၵ်ႈၼၢင်းငၢမ်း ၼႂ်းမိူင်းႁူမ်ႈတုမ်မၢၼ်ႈ ၸိူဝ်းၼႆႉၵေႃႈ ၵႆႉလႆႈႁၼ်ပီႈ Sora ၶဝ်ႈပႃးပဵၼ်ၽူႈပၼ်ဝၢၵ်ႈ ၾၢႆႇႁၢင်ႈၶိူင်ႈၼႃႈတႃ ၶႃႈၼေႃ… ဢၼ်ၼႆႉၵေႃႈ ဢဝ်ၵုင်ႇမုၼ်ၸွမ်းတႄႉ ၶႃႈ။ တီႈၼႆႈၵေႃႈ ၶႂ်ႈထၢမ်ဝႃႈ ယူႇတီႈပီႈပဵၼ်ၸၢဝ်းၶိူဝ်း တႆးၵေႃႉၼိုင်ႈသေ တႃႇတေယၢင်ႈၶဝ်ႈႁႂ်ႈထိုင်လႆႈ ၼႂ်းတူင်ႇဝူင်းၸၢဝ်းမၢၼ်ႈ ၼႂ်းမိူင်းမၢၼ်ႈတူင်ႈပဵင်းသေ ႁႂ်ႈပေႃးမီးၸိုဝ်ႈသဵင် ၼႄၼမ်ႉၵတ်ႉလႆႈၼၼ်ႉ မီးလွင်ႈယၢပ်ႇၽိုတ်ႇ/ လွင်ႈၶဵင်ႇတႃႉ ၸိူင်ႉႁိုဝ်ၽွင်ႈၶႃႈ?

တွပ်ႇ – လွင်ႈယၢပ်ႇၽိုတ်ႇတႄႉ မီးယူႇၵူႈမဵဝ်းၶႃႈ။ မီးတီႈဝႃႈ လွင်ႈယုမ်ႇယမ်တူဝ်ၸဝ်ႈၵဝ်ႇ၊ ႁဝ်းယုမ်ႇယမ် တူဝ်ၸဝ်ႈၵဝ်ႇမွၵ်ႈၵႃႈႁိုဝ် ၼႆဢေႃႈ။ ႁဵတ်းသင်လႄႈ Sora ႁွတ်ႈထိုင်မႃးတီႈၼႆႈၼႆတႄႉ Sora ႁဵတ်းၵၢၼ်ဢၼ်လႂ်ၵေႃႈယဝ်ႉ Sora ဝႆႉၼမ်ႉၸႂ်ၸေႇတႃႇၼ ၽိူၵ်ႇၸိုၼ်ႈၶၢဝ်သႂ်သေၸွႆႈပိူၼ်ႈ၊ ႁဵတ်းပၼ်ႁႂ်ႈပိူၼ်ႈႁၢင်ႈလီတႄႉတႄႉ၊ ပေႃးတူဝ်ၸဝ်ႈၵဝ်ႇဢမ်ႇလီတီႈလႂ်ၵေႃႈ မူၼ်ႉမႄးဢေႃႈ။ ပိူင်လူင်တႄႇ Sora ဝူၼ်ႉဝႃႈ Sora ႁဵတ်းလူၺ်ႈၼမ်ႉၸႂ်၊ လွင်ႈဢဝ်ပုၼ်ႈၽွၼ်း ႁပ်ႉပုၼ်ႈၽွၼ်းၸိူဝ်းၼႆႉ၊ ပေႃးပိူၼ်ႈဢၢပ်ႈၵၢၼ်ၼိုင်ႈ ဢၼ်ၵေႃႈ Sora ႁဵတ်းပၼ်ႁႂ်ႈထိုင်တီႈ၊ ယၢပ်ႇယဵၼ်းၸိူင်ႉႁိုဝ်ၵေႃႈ Sora ႁဵတ်းပၼ်ႁႂ်ႈထိုင်တီႈသေ ပိူၼ်ႈၵေႃႈလႆႈၸႂ်လႄႈ ၵႂၢမ်းၵူၼ်းၼင်ႇၵၼ်သိုပ်ႇ ယိုၼ်ႈလၢတ်ႈၼႄၵၼ်လႄႈ ဢဝ်ၸိုဝ်ႈသဵင်ယႂ်ႇၵႂႃႇၵူၺ်းၶႃႈ ယူဝ်ႉၼႃ…။ ၵူၺ်းၵႃႈ တေႃႇထိုင်မိူဝ်ႈလဵဝ်ၵေႃႈ Sora တႄႉ ဢမ်ႇဝူၼ်ႉဝႃႈတူဝ်ၸဝ်ႈၵဝ်ႇၵျႃႉၶႃႈ၊ Sora တိုၵ်ႉလူဝ်ႇၶတ်းၸႂ်၊ တိုၵ်ႉလူဝ်ႇလဵပ်ႈႁဵၼ်းထႅင်ႈတင်းၼမ်ယူႇၶႃႈ။

ထၢမ် – မိူဝ်ႈၽွင်းတိုၵ်ႉၶတ်းၸႂ်ယူႇၼၼ်ႉၶႃႈလူး ၸွင်ႇယၢမ်ႈမီးလွင်ႈၸႂ်တူၵ်းယူႇၶႃႈႁႃႉ?

တွပ်ႇ – မီးၶႃႈဢေႃႈ… ၸႂ်တူၵ်းသေထိုင်တီႈ ပေႃးၶႂ်ႈၶႃႈတူဝ်တၢႆၶိုၼ်းယဝ်ႉၶႃႈ။ ႁဝ်းႁဵတ်းၵၢၼ်ဢၼ်ဝႃႈၼႆႉ ဢႃယုၵေႃႈတိုၵ်ႉလဵၵ်ႉလႄႈ ၵူၼ်းဢၼ်ပၼ်ႁႅင်းၸႂ်ၵေႃႈ ဢမ်ႇမီးတႄႉတႄႉ။ မၢင်ပွၵ်ႈၼႆႉ ႁဵတ်းၵၢၼ်ႁိူဝ်ႉႁႅင်းၼႃႇသေ ထိုင်တီႈဢမ်ႇၶႂ်ႈသိုပ်ႇမီးဢသၢၵ်ႈယူႇၵႂႃႇၵေႃႈ ပဵၼ်ၶႃႈဢေႃႈ။ ဢၼ် Sora တိူဝ်ႉၸႂ်ႁႅင်းၼႃႇၼႆႉ မီးပွၵ်ႈၼိုင်ႈၶႃႈ။ ပွၵ်ႈၼၼ်ႉၼႆ ပဵၼ်ၽွင်းမိူဝ်ႈဝၢၼ်ႈမိူင်းဢမ်ႇလီ တၢင်းပဵၼ်ၶူဝ်ႊဝိတ်ႉၽႄႈလၢမ်း ပိူၼ်ႈဢွၼ်ၵၼ်လႅၵ်ႈလၢႆႈၵႂႃႇႁဵတ်းၵၢၼ်တၢင်ႇမဵဝ်း။ ႁဵတ်းၵၢၼ်ၾၢႆႇၶၢႆတၢင်းၵိၼ်ႁႃႉ၊ ၶၢႆသေဢၼ်ဢၼ် ၼိူဝ် Online ႁႃႉၸိူင်ႉၼၼ်ႉၶႃႈ။ Sora သမ်ႉဢမ်ႇသူၼ်ၸႂ် မေႃႁၢင်ႈၶိူင်ႈမဵဝ်းလဵဝ်ၵူၺ်း။ မိူဝ်ႈၼၼ်ႉၵေႃႈ သမ်ႉလႆႈလိုဝ်ႈၵၢၼ်ဝႆႉႁိုင်ၼႃႇၶႃႈ ဢမ်ႇမီးၵၢၼ်မီးငၢၼ်း။ ၵူၼ်းမိုတ်ႈၵိုဝ်းႁိမ်းႁွမ်း Sora ၵေႃႈဝႃႈ ႁဵတ်းသင် ဢမ်ႇႁဵတ်းၵၢၼ်သင်လႃႇ၊ ႁဵတ်းၼၼ်ႁဵတ်းၼႆလေႃႇ တေႃႈၼင်ႇ ပိူၼ်ႈႁဵတ်းတၢင်းလႆႈ၊ မႂ်းသမ်ႉၵုမ်ႇ ယူႇလၢႆလၢႆၵူၺ်း ၼႆၼၼ်ႉၼႃႇၼေႃႈ။  

မိူဝ်ႈၼၼ်ႉ Sora ၵေႃႈ ဢဝ်လွင်ႈယုမ်ႇယမ်တူဝ်ၸဝ်ႈၵဝ်ႇတူၵ်း၊ ထၢတ်ႈၸႂ်တူၵ်းပႅတ်ႈဢေႃႈ။ Sora ဝူၼ်ႉဝႃႈ တူဝ်ၸဝ်ႈၵဝ်ႇ ဢမ်ႇလႆႈလွင်ႈတႄႉယဝ်ႉႁႃႉ … ဢမ်ႇၶဝ်ႈတၢင်းတိုဝ်းတီႈလႂ်ယဝ်ႉႁႃႉ … ၸၢတ်ႈပၢၼ်ၼႆႉ ယူႇၵႂႃႇၵေႃႈ ဢမ်ႇမီးလွင်ႈသင်၊ ၵၢၼ်ငၢၼ်းသင်ၵေႃႈ ဢမ်ႇလႆႈႁဵတ်း၊ လႆႈႁၼ်မိူၼ်ၼင်ႇတူဝ်ၸဝ်ႈၵဝ်ႇ ဢမ်ႇမီးၵႃႈၶၼ်သင်ႁႅင်းၼႃႇ၊ ပိူၼ်ႈသမ်ႉၶႅင်ႇၵၼ် ၵေႃႉပုၼ်ႉၵေႃႉၼႆႉပဵၼ်ၼႆ ၼႆသေယဝ်ႉၵေႃႈ ဢဝ်ၸႂ်သုၵ်ႉႁႅင်း ထၢတ်ႈၸႂ်တူၵ်းသေ ၶႂ်ႈၶႃႈတူဝ်တၢႆဢေႃႈ။

Sora ဝူၼ်ႉဝႃႈ သိုပ်ႇယူႇၵႂႃႇၼႂ်းမိူင်းၵူၼ်းၼႆႉၵေႃႈ ဢမ်ႇမီးၵႃႈၶၼ်သင် သုမ်းၶဝ်ႈသုမ်းၼမ်ႉၵူၺ်းၼႆသေ ဢၢင်ႈၵႂႃႇၵျွၵ်းတူၵ်းတီႈလွႆတူၼ်ႈတီး(လွႆတွင်ႇၵျီး) သေ ၶႃႈတူဝ်တၢႆဢေႃႈ။ ၵူၺ်းၵႃႈ မိူဝ်ႈၽွင်းၼၼ်ႉ ၽူဝ် Sora ၵေႃႈႁၢမ်ႈၶႃႈဢေႃႈ။ Sora သမ်ႉပဵၼ်ၵူၼ်းၸႂ်ဝႆး ထၢတ်ႈၸႂ်တူၵ်းငၢႆႈ ၶိုၼ်ႈငၢႆႈဢေႃႈ။ ႁဵတ်းၼၼ်သေ Sora ၵေႃႈၶိုၼ်းမီးသတိမႃး၊ ၶိုၼ်းဝူၼ်ႉဝႃႈ ၵဝ်ၼႆႉၵတ်ႉတႄႉယဝ်ႉ တႃႇတေၶႃႈတူဝ်တၢႆၼႆႉ ႁတ်းႁၢၼ်ၼႃႇ၊ ၵူၼ်းႁဝ်းၼႆႉ ဢၼ်ႁဝ်းႁၵ်ႉသေပိူၼ်ႈၼႆႉ ပဵၼ်ဢသၢၵ်ႈႁဝ်းလူး တႃႇတေၶႃႈတူဝ်တၢႆယင်းႁတ်းႁၢၼ် ပေႃးတၢၼ်ႇၼႆႉ တႃႇတေလုၵ်ႉသေၶိုၼ်းမႃးတေႃႇသူႈၵႂႃႇ ႁႂ်ႈပေႃးၶိုၼ်ႈယႂ်ႇၼၼ်ႉ ၵွပ်ႈသင်လႄႈၵဝ်သမ်ႉ ဢမ်ႇႁတ်း၊ ႁၢႆႉ/ယၢပ်ႇ လိူဝ်သေၶႃႈတူဝ်တၢႆၼႆႉ တေမီးသင်ထႅင်ႈၼႆသေ Sora ၶိုၼ်းမူၼ်ႉမႄးပၢႆး ဝူၼ်ႉတူဝ်ၸဝ်ႈၵဝ်ႇသေ လုၵ်ႉၶိုၼ်ႈမႃးတေႃႇသူႈၵႂႃႇၶႃႈဢေႃႈ။

ၾၢႆႇၼိုင်ႈၵေႃႈ ၶိုၼ်းဝူၼ်ႉထိုင်ပႃး လုၵ်ႈ Sora ၼၼ်ႉၶႃႈၼႃႇ၊ လုၵ်ႈဢွၼ်ႇၵေႃႈပႂ်ႉဝႆႉယူႇ လုၵ်ႈႁဝ်းၵေႃႈ လႆႈၵိူတ်ႇမႃးယဝ်ႉလႄႈ လူဝ်ႇႁပ်ႉဢဝ်ပုၼ်ႈၽွၼ်းၶဝ်ၼၼ်ႉၼႃႇၼေႃႈ။ ဝူၼ်ႉႁၼ်ထိုင်ၼႃႈလုၵ်ႈၸၢႆးသေ ၶိုၼ်းလုၵ်ႉမႃးတေႃႇသူႈ ဢမ်ႇယွမ်းသုမ်းဢမ်ႇယွမ်းၵၢၼ်ႉသင်သေမဵဝ်း ႁၢၼ်ႉတေႃႇပေႃးထိုင်ဝၼ်းမိူဝ်ႈၼႆႉ ယဝ်ႉၶႃႈ။

ထၢမ် – ၵူၼ်းႁဝ်းၵူႈၵေႃႉၵေႃႈ ယၢမ်ႈၸႂ်တူၵ်းယူႇႁင်းၽႂ်မၼ်း ယူႇတီႈ ပီႈ Sora ၵေႃႈ ယၢမ်ႈတူဝ်ထူပ်းမႃးလႄႈ တေၶႂ်ႈၾၢၵ်ႇၵႂၢမ်းပၼ်ႁႅင်းၸႂ်ထိုင် ၵူၼ်းၸိူဝ်းႁႅင်းထၢတ်ႈၸႂ်တူၵ်းဝႆႉၸိူဝ်းၼၼ်ႉ ၸိူင်ႉႁိုဝ်ၽွင်ႈၶႃႈ?

တွပ်ႇ –  Sora ၶႂ်ႈလၢတ်ႈတႄႉၵေႃႈ လွင်ႈထၢတ်ႈၸႂ်တူၵ်းၼႆႉ မီးတီႈၸႂ်ႁဝ်းၵူၺ်းၶႃႈ။ ထၢတ်ႈၸႂ်တူၵ်းဢၼ်ဝႃႈၼႆႉ ယွၼ်ႉႁဝ်းဢဝ်တူဝ်ႁဝ်း ၵႂႃႇတႅၵ်ႈၼိူင်းၵၼ်တၢင်းပိူၼ်ႈ၊ ပိူၼ်ႈႁဵတ်းလႆႈ ႁဝ်းဢမ်ႇႁဵတ်းလႆႈ ၸဵမ်ၸိူဝ်းၼႆႉ။ တီႈတႄႉမၼ်း တူဝ်ပိူၼ်ႈၵေႃႈ ပဵၼ်တူဝ်ပိူၼ်ႈၵူၺ်း၊ တူဝ်ႁဝ်းၵေႃႈပဵၼ်တူဝ်ႁဝ်းၵူၺ်း၊ ႁဝ်းလူဝ်ႇၶတ်းၸႂ်တွၼ်ႈတႃႇႁဝ်း၊ ၼိုင်ႈဝၼ်းၼႆႉ ႁဝ်းဢမ်ႇၵိုတ်း ႁဝ်းယၢင်ႈယူႇၼိုင်ႈသဵၼ်ႈၼိုင်ႈသဵၼ်ႈၼႆၸိုင် ဝၼ်းမိူဝ်းၼႃႈ ႁဝ်းတိုၼ်းတေႁွတ်ႈတီႈတၢင်းယိူင်းမၢႆ ဢၼ်ႁဝ်းၶႂ်ႈၵႂႃႇယူႇၶႃႈ။ ႁဝ်းဢမ်ႇပေႃးလူဝ်ႇ မီးၸႂ်လေႃးၽၼမ်၊ လေႃးၵဢၼ်ဝႃႈၼႆႉ ဢၼ်ဢမ်ႇပဵၼ်လႆႈဢမ်ႇမီး၊ ႁဝ်းဢမ်ႇပႆႇႁဵတ်းလႄႈ မၼ်းပႆႇပဵၼ်မႃးၵူၺ်း။ ၽဝႁဝ်းၼႆႉ မၼ်းၵဵဝ်ႇၸွမ်းႁဝ်းၵူၺ်း ဢမ်ႇၵဵဝ်ႇၸွမ်းပေႃႈမႄႈ၊ ပီႈၼွင်ႉၸိူဝ်ႉၶိူဝ်း၊ ဢူၺ်းၵေႃႉႁဝ်း၊ တႃႇၽဝႁဝ်း တေၶိုၼ်ႈယႂ်ႇၼၼ်ႉ မီးတီႈတူဝ်ႁဝ်းၵူၺ်း၊ ၽႂ်ၶတ်းၸႂ်ၵေႃႈ မၼ်းလႆႈၶႃႈဢေႃႈ။

ၵွပ်ႈၼၼ်လႄႈ Sora တႄႉ ၶႂ်ႈလၢတ်ႈဝႃႈ မီးလွင်ႈသင်မႃးၵေႃႈ ဢမ်ႇလူဝ်ႇလႆႈယွမ်းသုမ်း၊ ပေႃးႁဝ်းပႆယူႇ ၼိုင်ႈဝၼ်းၼိုင်ႈဢိတ်ႉ တၢင်းယိူင်းမၢႆႁဝ်းၼၼ်ႉ မၼ်းတေထိုင်မႃးၵူၺ်း၊ မိူဝ်ႈၽွင်းႁဝ်းတိုၵ်ႉပႆယူႇသေ ပႆႇႁွတ်ႈထိုင်တီႈယိူင်းမၢႆၼၼ်ႉ လွင်ႈယၢပ်ႇၼႆႉႁူႉတိုၼ်းတေမီးယူႇ၊ ယၢပ်ႇယဵၼ်းၵႃႈႁိုဝ်ၵေႃႈယဝ်ႉ လူဝ်ႇလႆႈတေႃႇသူႈၶိုၼ်း၊ ၸၢတ်ႈပၢၼ်ႁဝ်းမီးတီႈႁဝ်း ၵူၺ်း၊ ပေႃးႁဝ်းဢမ်ႇယွမ်းသုမ်း မၼ်းဢမ်ႇသုမ်း၊ ပေႃးႁဝ်းယွမ်းသုမ်းၵႂႃႇၵွၼ်ႇ ၸၢတ်ႈပၢၼ်ႁဝ်းၸင်ႇတေသုမ်း။ ပိူၼ်ႈမီးလႆႈႁဵတ်းလႆႈ ၵွပ်ႈသင်ႁဝ်းတေဢမ်ႇႁဵတ်းလႆႈ၊ မီးႁူဝ်ၼိုင်ႈလုၵ်ႈ မီးသွင်ၶွၼ်မိူၼ်ၵၼ် ႁဝ်းဢမ်ႇလႆႈယူပ်ႈယွမ်းတီႈလႂ်။ ၵွပ်ႈၼၼ်လႄႈ Sora ၶႂ်ႈပၼ်ႁႅင်းၸႂ် လုၵ်ႈဢွၼ်ႇၼုမ်ႇလႄႈ ၵူႈၵေႃႉၸိူဝ်းထၢတ်ႈၸႂ်တူၵ်းယူႇယၢမ်းလဵဝ်ၼႆႉဝႃႈ လွင်ႈထၢတ်ႈၸႂ်တူၵ်း ဢၼ်ဝႃႈၼၼ်ႉ မၼ်းမီးတီႈတၢင်းဝူၼ်ႉႁဝ်းၵူၺ်း၊ ႁဝ်းၵႂႃႇဝူၼ်ႉတီႈထၢတ်ႈၸႂ်တူၵ်းယူႇတိၵ်းတိၵ်းၵေႃႈ ၸႂ်ႁဝ်းတေတူၵ်း။ ၵွပ်ႈၼၼ် ႁဝ်းႁဵတ်းလႆႈဢီႈသင်ၵေႃႈ လူဝ်ႇႁဵတ်းႁႂ်ႈထိုင်တီႈ၊ ႁဵတ်းထိုင်ၼိုင်ႈပၢၵ်ႇတဵမ်တီႈၼႆႉ မၼ်းတေပဵၼ်မႃးႁင်းၵူၺ်းမၼ်းၵူၺ်း။ ႁဝ်းလူဝ်ႇၶတ်းၸႂ်ၵႂႃႇပုင်ႇမၢၼ်ႇ ပေႃးဢမ်ႇၵိုတ်းၵေႃႈ လႆႈယဝ်ႉ။ ယဝ်ႉၵေႃႈ ဢၼ်လမ်ႇလွင်ႈလိူဝ်သေပိူၼ်ႈဢၼ်ၼိုင်ႈတႄႉ ႁဝ်းလူဝ်ႇလႆႈမီး ၶူးသွၼ်လီ၊ ဢူၺ်းၵေႃႉလီ။ ႁဝ်းၵတ်ႉၶႅၼ်ႇယူႇသေတႃႉ ပေႃးဢမ်ႇမီးၶူးသွၼ်/သြႃႇလီ၊ ဢူၺ်းၵေႃႉလီၵေႃႈ ပိူၼ်ႈဢမ်ႇသွၼ် ပၼ်ႁဝ်းလႆႈ၊ ႁဝ်းႁၢင်ႈႁႅၼ်းဝႆႉတႃႇတေမေႃ တႃႇတေၶိုၼ်ႈယႂ်ႇသေတႃႉ ပေႃးပိူၼ်ႈဢမ်ႇၸီႉၼႄသဵၼ်ႈ တၢင်းႁဝ်းၼႆ ႁဝ်းတေဢမ်ႇမေႃလႆႈ။ ၵွပ်ႈၼၼ် ႁဝ်းလူဝ်ႇမီးသတိသေ လူဝ်ႇမေႃႁႃဢူၺ်းၵေႃႉလီ၊ လူဝ်ႇမေႃလိူၵ်ႈ ၼၼ်ႉၶႃႈၼႃႇၼေႃႈ။

ထၢမ် – သင်ဝႃႈပၼ်ႁႅင်း ပီႈ Sora ဢမ်ႇၼၼ် ၶႂ်ႈၵပ်းသိုပ်ႇတႃႇၶိုၼ်ႈပၢင်သွၼ် ၾၢႆႇႁၢင်ႈၶိူင်ႈတႃးၼႃႈ (makeup) ၼႆၸိုင် တေလႆႈၵပ်းသိုပ်ႇတီႈလႂ်ၽွင်ႈၶႃႈ?

တွပ်ႇ –  ၵပ်းသိုပ်ႇတီႈ TikTok ၵေႃႈလႆႈ၊ တီႈ Makeup SORA ၵေႃႈလႆႈၶႃႈ။ ပေႃးဝၢႆးၼႆႉမႃးတႄႉ Sora မီးယိူင်းဢၢၼ်းဝႃႈ တေၶႂ်ႈႁႂ်ႈတႆးႁဝ်းမေႃႁၢင်ႈၶိူင်ႈ၊ ယွၼ်ႉ Sora မေႃႁၢင်ႈၶိူင်ႈဝႆႉလႄႈ ၶႂ်ႈႁႂ်ႈပီႈၼွင်ႉတႆးႁဝ်းၵေႃႈ လႆႈမီးပၺ်ႇၺႃႇ ဢၼ်တေလဵင်ႉသၢႆၸႂ်ႁႃလဵင်ႉတွင်ႉၵႂႃႇလႆႈ။ ယိူင်းဢၢၼ်းၶႂ်ႈပိုတ်ႇပၼ် ပၢင်သွၼ်ၾၢႆႇတႆး ၼႆၶႃႈဢေႃႈ။

မိူၼ်ၼင်ႇ မိူဝ်ႈလဵဝ်သင်ဝႃႈသူၼ်ၸႂ်ၶႂ်ႈႁဵၼ်းၼႆၸိုင် ပၢင်သွၼ်ဢၼ်ပိုတ်ႇဝႆႉၾၢႆႇမၢၼ်ႈတႄႉၵေႃႈ မီးဝႆႉယူႇၶႃႈ။ မႃးၵပ်းသိုပ်ႇတွင်ႈထၢမ်လႆႈတီႈ Facebook page – Makeup SORA ၼႆၵေႃႈလႆႈၶႃႈ။ ပၢင်သွၼ်တႄႉ ယၢမ်းလဵဝ်ပိုတ်ႇဝႆႉတီႈဝဵင်းတႃႈၵုင်ႈၶႃႈဢေႃႈ ယဝ်ႉၵေႃႈ တွၼ်ႈတႃႇၵူၼ်းၸိူဝ်းဢၼ်ဢမ်ႇၸၢင်ႈမႃးၶိုၼ်ႈ လႆႈတၢင်းၼွၵ်ႈမၼ်းသမ်ႉ တီႈၼိူဝ် Online ၵေႃႈပိုတ်ႇဝႆႉပၼ်ပႃးယူႇၶႃႈ။ Online ၼႆႉတႄႉ ယူႇတီႈလႂ် မိူင်းလႂ်ၵေႃႈ ၶိုၼ်ႈႁဵၼ်းလႆႈယူႇၼၼ်ႉၶႃႈၼႃႇၼေႃႈ။

ပၺ်ႇၺႃႇတၢင်းမေႃၸိူဝ်းၼႆႉၵေႃႈ Sora ဢမ်ႇသိူင်ႇသိမ်းသင် သွၼ်ဝႆႉပၼ်မူတ်းမူတ်းၶႃႈဢေႃႈ။ သင်ဝႃႈ ပႃးၸႂ်သူၼ်ၸႂ်တႄႉတႄႉၼႆတႄႉ Sora ၶႂ်ႈႁႂ်ႈၶိုၼ်ႈၶႃႈဢေႃႈ။ သင်ဝႃႈၶိုၼ်ႈပၢင်သွၼ် ယဝ်ႉၵႂႃႇယဝ်ႉၼႆၵေႃႈ ၶႂ်ႈႁႂ်ႈဢဝ်ၵႂႃႇၸႂ်ႉတိုဝ်းတႄႉတႄႉ၊ ဢဝ်ႁဵတ်းႁႃလဵင်ႉတွင်ႉတႄႉတႄႉ ၸိူင်ႉၼၼ်ၶႃႈ။

ၸိူဝ်းမႃးၶိုၼ်ႈပၢင်သွၼ်ယူႇယၢမ်းလဵဝ်ၼႆႉၵေႃႈ လႆႈဝႃႈမီးၵူႈၸၢဝ်းၶိူဝ်း ၼႂ်းမိူင်းမၢၼ်ႈပတ်းပိုၼ်ႉယဝ်ႉၶႃႈ။ မိူဝ်ႈလဵဝ်တႄႉ ယွၼ်ႉပိုတ်ႇပႃး Online လႄႈ ၵူၼ်းမိူင်းမၢၼ်ႈၸိူဝ်းမီးဝႆႉ ၼွၵ်ႈမိူင်း မိူၼ်ၼင်ႇ – မိူင်းတူႇပၢႆး၊ ဢေႃႊသတြေႊလီႊယိူဝ်ႊ၊ ဢမေႊရိၵၼ်ႊ၊ ၵျပၼ်ႊ ၸိူဝ်းၼႆႉ ၵူႈတီႈၵူႈမိူင်းၵေႃႈ ဢွၼ်ၵၼ်မႃးၶိုၼ်းႁဵၼ်း ဝႆႉယူႇၶႃႈ။

ထၢမ် – ၵမ်းလိုၼ်းသုတ်း ဢၼ်ဢမ်ႇလႆႈထၢမ်မႅၼ်ႈသေ ၶႂ်ႈလၢတ်ႈၼၼ်ႉလူး ၸွင်ႇတေမီးသင်ထႅင်ႈၶႃႈ?

တွပ်ႇ – ၶႂ်ႈသင်ႇလၢတ်ႈထိုင်ၵူၼ်းၼုမ်ႇတႆးႁဝ်းၶဝ်ဝႃႈ လူဝ်ႇဢွၼ်ၵၼ်ၶတ်းၸႂ်ၵႂႃႇပုင်ႇမၢၼ်ႇ၊ လူဝ်ႇမီးၸႂ်မႅတ်ႉတႃႇသေ ၸွႆႈထႅမ်ၵၼ်ၵႂႃႇ၊ ႁဵတ်းဢၼ်လႂ်သေဢမ်ႇဝႃႈ ဢမ်ႇလူဝ်ႇၵူဝ်၊ တႃႇတေၶတ်းၸႂ်ႁႂ်ႈၵႂႃႇထိုင် တီႈယိူင်းမၢႆႁဝ်းၼၼ်ႉ ဢမ်ႇလူဝ်ႇၵူဝ်သင်၊ ယႃႇပေၵူဝ်ၽိတ်း၊ လွင်ႈၽိတ်းၼႆႉ ပဵၼ်ဢၼ်သွၼ်ပၼ်ႁႂ်ႈႁဝ်း ၶိုၼ်ႈယႂ်ႇထိုင်တီႈယိူင်းမၢႆႁဝ်း။

လုၵ်ႈဢွၼ်ႇၼုမ်ႇတႆးႁဝ်းၼႆႉ ၵမ်ႈၼမ်တေမီးၸႂ်ၵူဝ်၊ ပေႃးႁဵတ်းသေလွင်ႈလွင်ႈ ၵူဝ်ဢမ်ႇပဵၼ်၊ ၵူဝ်သုမ်းဢလၢင်း၊ ၵူဝ်ပေႃႈမႄႈဝႃႈ ၸိူဝ်းၼႆႉ။ ၵူၺ်းၵႃႈ မိူၼ် Sora လၢတ်ႈၵႂႃႇၼၼ်ႉယဝ်ႉ ၵူၼ်းႁဝ်းၼႆႉတၢႆၵႂႃႇၵေႃႈ ဢမ်ႇပႃးၵႂႃႇသင် ၵွပ်ႈၼၼ်လႄႈ ႁဝ်းဢမ်ႇသုမ်းသင်၊ ဢမ်ႇလူဝ်ႇၵူဝ်သုမ်း ပေႃးဢမ်ႇႁဵတ်းၵေႃႈဢမ်ႇပဵၼ် ႁဝ်းလူဝ်ႁတ်းႁဵတ်း၊ ၶေႃႈၽိတ်းၼႆႉ ပဵၼ် ၶေႃႈသွၼ်၊ ပေႃးႁဝ်းၶိုၼ်းမူၼ်ႉမႄး မၼ်းၵေႃႈတေပဵၼ် ၶေႃႈထုၵ်ႇမႅၼ်ႈ တႃႇႁဝ်းတေၵႂႃႇထိုင်တီႈယိူင်းမၢႆ။ ၵွပ်ႈၼၼ်လႄႈ ၶႂ်ႈလၢတ်ႈဝႃႈ ယႃႇပေၵူဝ်ၽိတ်းၶႃႈ၊ ပေႃးမီးတၢင်းယိူင်းမၢႆၼႆႉ လူဝ်ႇလႆႈၵႂႃႇႁႂ်ႈမၼ်းထိုင်ၶႃႈဢေႃႈ၊ ဢမ်ႇလူဝ်ႇသူၼ်ၸႂ်ၵႂၢမ်းတၢင်းၼွၵ်ႈ၊ ဢမ်ႇလူဝ်ႇသူၼ်ၸႂ်ၵႂၢမ်းၽႂ်၊ လူဝ်ႇသူၼ်ၸႂ်ၵႂၢမ်းၼႂ်းမၢၵ်ႇႁူဝ်ၸႂ်ႁဝ်းၵူၺ်း၊ ႁဝ်းၶႂ်ႈပဵၼ်သင်၊ ႁဝ်းႁၵ်ႉ ဢီႈသင်၊ ႁဝ်းၵျေႃႇလူၺ်ႈဢီႈသင်၊ ထွမ်ႇသဵင်မၢၵ်ႇႁူဝ်ၸႂ်ႁဝ်းသေ ဢမ်ႇလူဝ်ႇမီးလွင်ႈၵူဝ်သင်သေၶတ်းၸႂ်ၵႂႃႇ ႁႂ်ႈထိုင်တီႈယိူင်းမၢႆႁဝ်းၶႃႈၼၼ်ႉၼႃႇၼေႃႈ။

ၼႂ်းလေႃးၵၼႆႉ ဢၼ်ဢမ်ႇပဵၼ်လႆႈဢမ်ႇမီးၶႃႈ တေႃႈၼင်ႇသၢဝ်တႆးၼွၵ်ႈ ယူႇဝဵင်းပၢင်လူင် မႃးၶတ်းၸႂ် ႁႂ်ႈပေႃးလႆႈထိုင် ဝဵင်းတႃႈၵုင်ႈၶႃႈၼေႃႈ။ Sora မီးငိုၼ်းၼမ်ၼႃႇၵေႃႈဢမ်ႇ ၸႂ်ႈ ယွၼ်ႉတၢင်းယိူင်းမၢႆသေ ၸင်ႇႁွတ်ႈထိုင်မႃးတီႈၼႆႈၶႃႈၼႃႇ၊ Sora ၶိုၼ်ႈယႂ်ႇႁႅင်းၼႃႇၵေႃႈ ဢမ်ႇပႆႇၸႂ်ႈၼင်ႇၵဝ်ႇၶႃႈ။ မိူၼ်ၼင်ႇ ၽြႃးပဵၼ်ၸဝ်ႈႁဝ်းၼႆႉ ၶတ်းၸႂ်ႁႅင်းၼႃႇသေ ထိုင်တီႈပေႃးပဵၼ်ၽြႃးမႃး၊ ႁဝ်းၶႃႈသမ်ႉ ၶႂ်ႈၶတ်းၸႂ်ႁႂ်ႈထိုင်တၢင်းယိူင်းမၢႆႁဝ်း၊ ႁႂ်ႈၶိုၼ်ႈယႂ်ႇၵူၺ်း မၼ်းဢမ်ႇယၢပ်ႇတီႈလႂ်ၶႃႈၼေႃႈ…လွင်ႈလႂ်ၵေႃႈယဝ်ႉ မီးတီႈၸႂ်ႁဝ်းၵူၺ်း၊ ၶႂ်ႈႁဵတ်းသင် ၵေႃႈ လူဝ်ႇလႆႈႁဵတ်းႁတ်းႁတ်း ဢမ်ႇလူဝ်ႇၵူဝ်သင်သေမဵဝ်းၼႆၶႃႈ … Sora ၶႂ်ႈလၢတ်ႈၼင်ႇၼႆၶႃႈ။

ၼႂ်းဢၼ် Sora လၢတ်ႈၵႂႃႇတင်းသဵင်ႈၼႆႉၵေႃႈ ပဵၼ်တူဝ်ထူပ်း Sora ၼၼ်ႉၶႃႈၼႃႇၼေႃႈ။ သင်ဝႃႈမီးတီႈၽိတ်း တီႈပိူင်ႈၼႆၵေႃႈ သင်ႇသွၼ်ၸီႉၼႄသဵၼ်ႈတၢင်းပၼ် Sora လႆႈယူႇၶႃႈ။ ယိၼ်းၸူမ်းၶွပ်ႈၸႂ်ထိုင် ၵူႈၵေႃႉၶႃႈ။