ၸုမ်းယေးငိုၼ်း ဝူင်းမဵတ်ႉတႃႇ ၸႄႈဝဵင်းမူႇၸေႊ ၵေႃႇတင်ႈမႃး မီး 7 ပီတဵမ် မီးၽူႈၶဝ်ႈၸုမ်း 2,420 ၵေႃႉလႄႈ ငိုၼ်းၵၢၼ်မုၼ်ပၼ်ႇဝႆႉ တင်းမူတ်း 6 ႁဵင်သႅၼ်ပျႃးပၢႆ ဝႃႈၼႆ။
ဝၼ်းတီႈ 17/08/2018 ယၢမ်းၵၢင်ၼႂ် 8:30 ထိုင် 11:30 မူင်း ၵၢင်ဝၼ်း ၸုမ်းယေးငိုၼ်း ဝူင်းမဵတ့်တႃႇ ၸႄႈဝဵင်း မူႇၸေႊ ဢွၼ်ၸတ်းႁဵတ်း ဝၼ်းၵိူတ်ႇၶွပ်ႈတဵမ် 7 ပီ ဢၼ်လႆႈၵေႃႇတင်ႈၶိုၼ်ႈမႃး ဝူင်းမဵတ်ႉတႃႇ တီႈဝတ်ႉဝိ ႁၢရ်လူင် မႁႃဝၼ်ႇ / ၵျွင်းႁွင်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၸၢႆးသၢႆလႅင်း ၵႅမ်ႁူဝ်ပဝ်ႈ ၸုမ်းယေးငိုၼ်း ဝူင်းမဵတ်ႉတႃႇ ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၸတ်း ႁဵတ်း ဝၼ်းၶွပ်ႈတဵမ် 7 ပီ တီႈဢၼ်လႆႈၵေႃႇတင်ႈၶိုၼ်ႈမႃး ဝူင်းမဵတ်ႉတႃႇ။ တင်ႈတႄႇ ဢၼ်လႆႈၵေႃႇတင်ႈၶိုၼ်ႈမႃး 7 ပီတဵမ်ၼႆႉ မီးပီႈၼွင်ႉၵူၼ်းမိူင်း ဢၼ်ၶဝ်ႈမႃးပဵၼ်လုၵ်ႈၸုမ်း တင်းမူတ်း မီး 2,420 ၵေႃႉ။ ငိုၼ်းႁွမ်သမ်ႉ လႆႈ 6 ႁဵင်သႅၼ်ပျႃး။ ငိုၼ်းဢၼ်ပီႈၼွင်ႉႁဝ်း ၵူႈယိုမ်ၵႂႃႇ ၼႂ်းၶၢဝ်းတၢင်း 7 ပီၼႆႉမႃး မႅၼ်ႈငိုၼ်း 4 ႁဵင်သႅၼ်ပျႃး။ ၼႂ်းၵူၼ်း ၵူႈယိုမ် ငိုၼ်း 4 ႁဵင် သႅၼ်ပျႃးၼၼ်ႉ ႁူဝ်ၵူၼ်းၵူႈယိုမ် 890 ၵေႃႉ။ ဢၼ်လႆႈပၼ်ၵူႈယိုမ်သမ်ႉ ၼမ်သုတ်း 30 သႅၼ် ပျႃး။ ၶၢဝ်းတၢင်းႁိုင် 12 လိူၼ် ဢမ်ႇၼၼ် 1 ပီ ႁႂ်ႈလႆႈသၢႆႈတႅၼ်းၶိုၼ်းႁႂ်ႈယဝ်ႉ။ တေႃႈလဵဝ် ၵိုတ်းထႅင်ႈ 49 ၵေႃႉ ဢၼ်ပႆႇလႆႈသၢႆႈတႅၼ်း” ဝႃႈၼႆ။
လိူဝ်ၼၼ်ႉ ယူႇတီႈၸုမ်းယေးငိုၼ်း ဝူင်းမဵတ်ႉတႃႇ ၸႄႈဝဵင်းမူႇၸေႊ ဢၼ်လႆႈၵေႃႇတင်ႈၶိုၼ်ႈမႃး 7 ပီၼႆႉ လႆႈၵမ်ႉ ၸွႆႈထႅမ် ၸုမ်းတူင်ႉၼိုင်တူင်ႇဝူင်းၵူၼ်း မိူၼ်ၼင်ႇ ႁူင်းႁဵၼ်းသရိပုတ်ႉထ တႃႇငိုၼ်း 10 သႅၼ်ပျႃး။ ႁူင်း ႁဵၼ်းထမ်မ မူႇၸေႊ 10 သႅၼ်ပျႃး။ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းမူႇၸေႊ 10 သႅၼ်ပျႃးလႄႈ ႁဵတ်း ပပ်ႉပဝ်ႇ (ပပ်ႉတႅမ်ႈ) ၸွႆႈထႅမ်ပၼ်ႁူင်းႁဵၼ်းထမ်မ ၼႂ်းထုင်ႉမၢဝ်း မိူၼ်ၼင်ႇ ၼမ်ႉၶမ်း၊ မူႇၸေႊ၊ ထုင်ႉလွႆႁူဝ်သိူဝ်လႄႈ မိူင်းမၢဝ်း တႃႇငိုၼ်း 23 သႅၼ်ပျႃး ၸိူဝ်းၼႆႉ ဝႃႈၼႆ။
ၸၢႆးသၢႆလႅင်း လၢတ်ႈဝႃႈ “ ၵဵဝ်ႇၵပ်းလွင်ႈၸုမ်းယေးငိုၼ်း ဝူင်းမဵတ်ႉတႃႇႁဝ်းၶႃႈ ဢၼ်လႆႈႁူပ်ႉလွင်ႈယၢပ်ႇၽိုတ်ႇ မႃးၼႆႉတႄႉ လွင်ႈလုၵ်ႈၸုမ်းဢမ်ႇပွင်ႇၸႂ် ယိူင်းဢၢၼ်း ၸုမ်းယေးငိုၼ်းႁဝ်း။ ၸုမ်းယေးငိုၼ်းႁဝ်းၶႃႈၼႆႉ ယိူင်းဢၢၼ်း တႃႇပူၵ်းပွင်တူင်ႇဝူင်းၵူၼ်းၶိုၼ်ႈယႂ်ႇ။ ၶဝ်သမ်ႉမီးယိူင်းဢၢၼ်းသုၼ်ႇတူဝ်ၵူၺ်း ဢၼ်ၼႆႉၵေႃႈ မီးလွင်ႈ ယၢပ်ႇဢိတ်းၼိုင်ႈ။ ပီႈၼွင်ႉမိူင်းတႆးႁဝ်း ၵူႈတီႈတီႈၵူႈဝဵင်းဝဵင်း ယူႇတီႈသင်ၶၸဝ်ႈ ပဵၼ်ငဝ်ႈပဵၼ်ၵၼ်း မၼ်းသေ ယူႇတီႈဢဵၼ်ႁႅင်းၵူၼ်းၼုမ်ႇႁဝ်းတင်းသဵင်ႈသေ လီလဵပ်ႈႁဵၼ်းတူၺ်း တီႈၵၢၼ်ယေးငိုၼ်း ဝူင်းမဵတ်ႉတႃႇ လီလီ။ ယူႇတီႈၵၢၼ်ႁွမ်ငိုၼ်းၼႆႉသေ ႁဝ်းၶႃႈၸင်ႈပူၵ်းပွင်ပၼ် မုင်ႉႁေႃႁိူၼ်းပီႈၼွင်ႉၵူၼ်းမိူင်းႁဝ်း ဢၼ်ႁူပ်ႉ လွင်ႈယၢပ်ႇ ၽိုတ်ႇၸိူဝ်းၼၼ်ႉ ” ဝႃႈၼႆ။
ၸုမ်းယေးငိုၼ်း ဝူင်းမဵတ်ႉတႃႇၼႆႉ ယူႇတီႈၸရေးၵေႃႇမိူင်း တင်း ၸၢႆးလႅင်းဝၼ်း ဢွၼ်ႁူဝ်သေ ၵေႃႇတင်ႈၶိုၼ်ႈမႃး မိူဝ်ႈပီ 2008 ။ တေႃႈလဵဝ် ၸုမ်းယေးငိုၼ်း ဝူင်းမဵတ်ႉတႃႇၼႆႉ တင်းမူတ်း ပိုတ်ႇဝႆႉ မီး 422 တီႈ။ ၼႂ်း 422 တီႈၼၼ်ႉ ပႃးၼႂ်း မိူင်းၶၢင်၊ ပႃႇၵိူဝ်လႄႈ ႁုင်းမၢၵ်ႇလၢင်း ၸိူဝ်းၼႆႉ ဝႃႈၼႆ။
ၸုမ်းယေးငိုၼ်း ဝူင်းမဵတ်ႉတႃႇၼႆႉ ႁွမ်ၸူႉငိုၼ်းၵၼ် ၼိုင်ႈၵေႃႉလႂ် 1,000 ပျႃး ထိုင် 30,000 ပျႃး တေႃႇလိူၼ် ဝႃႈၼႆ။
