ၵူၼ်းပၢႆႈၽေးသိုၵ်း ဢၼ်လုၵ်ႉတၢင်း ဢိူင်ႇပၢင်လူင် ၸႄႈဝဵင်းၼမ်ႉတူႈ မႃးသွၼ်ႈယူႇ တီႈသီႇပေႃႉ ႁူဝ်ၵူၼ်း 162 ၵေႃႉၼၼ်ႉ ပႃးမႄႈမၢၼ်း 4 ၵေႃႉ ၼႂ်း 4 ၵေႃႉၼၼ်ႉ လႆႈၵိူတ်ႇ လုၵ်ႈတီႈႁူင်းယႃ ၵူၼ်းမိူင်း ၸႄႈဝဵင်းသီႇပေႃႉ ၵေႃႉၼိုင်ႈ ဝႃႈၼႆ။
ဝၼ်းတီႈ 17/08/2018 ယၢမ်းၵၢင်ဝၼ်း 12:30 မူင်း ၼၢင်းၶမ်းၶိၼ်ႇ ၵူၼ်းပၢႆႈၽေးသိုၵ်းၵေႃႉၼိုင်ႈ ဢၼ်မႃးသွၼ်ႈ သဝ်းဝႆႉတီႈဝတ်ႉမင်ႇၵလႃႇၽူဝ်းတေႃႇ ၸႄႈဝဵင်းသီႇပေႃႉၼၼ်ႉ လႆႈၵိူတ်ႇလုၵ်ႈဢွၼ်ႇတီႈႁူင်းယႃ ၸႄႈဝဵင်းသီႇပေႃႉ ၵေႃႉၼိုင်ႈ ပဵၼ်လုၵ်ႈၸၢႆး။ ၵူၺ်းၵႃႈ လုၵ်ႈဢွၼ်ႇၼၼ်ႉ လႆႈၸပ်းတၢင်းပဵၼ်ပွတ်ႇဝႆႉၼႆသေ ယူႇတီႈၾၢႆႇမေႃယႃၶဝ် လႆႈ လုမ်းလႃးတူၺ်းထိုင်ဝႆႉလီငၢမ်း ဝႃႈၼႆ။
ၸၢႆးတၢၼ်းမွင်ႇ ၵေႃႉပဵၼ်ၽူဝ်ၼၢင်းၶမ်းၶိၼ်ႇလၢတ်ႈတီႈၽူႈတွႆႇႁွၵ်ႈဝႃႈ “ လုၵ်ႈၶႃႈၵိူတ်ႇမႃးၵေႃႈ ပဵၼ်တၢင်းပဵၼ် ပွတ်ႇ/ ၼမ်ႉထူမ်ႈပွတ်ႇၼႆၶႃႈ။ တေႃႈလဵဝ် ယူႇတီႈမေႃယႃၶဝ်သေ ဢဝ်ငွမ်းထၢတ်ႈဝႆႉယူႇၶႃႈ။ မေႃယႃၶဝ်တႄႉလၢတ်ႈ ဝႃႈ ယႃႇၸႂ်လဵၵ်ႉ မေႃယႃၶဝ် တေတူၺ်းထိုင်လုမ်းလႃးပၼ်လီလီၼႆၶႃႈ။ မိူဝ်ႈၼႆႉတႄႉ လႆႈ ႁၼ်လုၵ်ႈၶႃႈႁဝ်း ၸိုၼ်ႈ သႂ်လီၶိုၼ်ႈမႃးတင်းၼမ်ၶႃႈယဝ်ႉ။ ၵေႃႉပဵၼ်မေးၶႃႈႁဝ်း ၼၢင်းၶမ်းၶိၼ်ႇတႄႉ ဢမ်ႇပဵၼ် သင်ၶႃႈ” ဝႃႈၼႆ။
ၸၢႆးတၢၼ်းမွင်ႇ တင်း ၼၢင်းၶမ်းၶိၼ်ႇၼႆႉ ပဵၼ်ၵူၼ်းၸႃတိ ဝၢၼ်ႈပၢင်လူင် ဢိူင်ႇပၢင်လူင် ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ဝၼ်းတီႈ 15/08/2018 ၸုမ်းဢူၺ်းလီပွတ်းႁွင်ႇလႄႈ တပ်ႉသိုၵ်းၸိုင်ႈတႆး RCSS ၶဵင်ႈၶႅင်ၵၢၼ် သိုၵ်းၵၼ် ၼႂ်း ဢိူင်ႇပၢင်လူင် ၵူၼ်းဝၢၼ်ႈလႆႈငိၼ်းသဵင်ၵွင်ႈလႄႈ လႆႈဢွၼ်ၵၼ်ပၢႆႈ၊ ၵူၼ်းဝၢၼ်ႈ ၼႂ်းဢိူင်ႇပၢင်လူင် ဢွၼ်ၵၼ် ပၢႆႈမႃးယူႇတီႈဝတ်ႉၵျွင်းမုၼ်ၸဝ်ႈ ယၢမ်းလဵဝ်တီႈၵျွင်းဝၢၼ်ႈလီႈမီး 380 ပၢႆ၊ ဝတ်ႉၵျွင်းပၢင်သပေႇ မီး 200 ပၢႆ ၸိူဝ်းပၢႆႈၶဝ်ႈဝဵင်းသီႇပေႃႉၵေႃႈမီး။