ႁႅင်းၵၢၼ်တႆး ႁွတ်ႈမိူင်းထႆးႁဵတ်းၵၢၼ်သူၼ် ယွၼ်ႉငိုၼ်းၸႂ်ႉၸၢႆႇဢမ်ႇပဵင်းပေႃးလႄႈ ႁႃႁဵတ်းၵၢၼ်တၢင်းၼွၵ်ႈ ပေႃႈလဵင်ႉဢမ်ႇႁၢၼ်ႉၸႂ် ၸွမ်းယိုဝ်း ထိုင်တီႈပေႃးတၢႆ။

ဝၼ်းတီႈ17/08/2018 ပူၼ်ႉမႃးၼၼ်ႉ ၸဝ်ႈၼႃႈတီႈပလိၵ်ႈ၊ ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ၊ ၵေႃႁူမ်ႈသၢင်ႈၸိူဝ်ႉၸၢတ်ႈတႆး ၸိူဝ်းၼႆႉႁူမ်ႈၵၼ်သေ လူင်းပိုၼ်ႉတီႈၵႂႃႇတီႈဢိူင်ႇပၢင်ႁိၼ်ၾူၼ် ၸႄႈဝဵင်းမႄႈၸႅမ်ႇ ၸႄႈတွၼ်ႈၵဵင်းမႆႇ ၸိုင်ႈထႆး။ ၸဝ်ႈၼႃႈတီႈႁူမ်ႈၵၼ်တီႉၺွပ်း ၸၢႆးသိတ်ႊထိရူတ်ႊ သႅင်ၽဵတ်ႊၽႆးၿုၼ်ႊ ဢႃယု 50 ပီ ၼႂ်းတူတ်ႈတၢမ်ႇတၢင်းၽိတ်း ၶႃႈႁႅမ်လုၵ်ႈလဵင်ႉ ဢၼ်ပဵၼ်ၸၢႆးသၢင်ႇယဵၼ်ႇ ဢႃယု 40 ပီပၢႆ။ မီးၵွင်ႈဝႆႉၼႂ်းမိုဝ်းလူၺ်ႈတီႈဢမ်ႇလႆႈႁပ်ႉဢၼုၺၢတ်ႈ၊ ၶႃႈႁႅမ်ၵူၼ်းတၢႆယဝ်ႉဢဝ်ၾင်လိၼ် ၸိူဝ်းၼႆႉ။

ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ႁႅင်းၵၢၼ်ယၢၼ် မိူင်းဢၼ်ထုၵ်ႇ ၺႃးၶႃႈႁႅမ်တၢႆၼႆႉ ၸွမ်းၼင်ႇပၵ်းပိူင်ယဝ်ႉ တေလႆႈႁပ်ႉၵႃႈသၢႆႈတႅၼ်း တီႈႁွင်ႈၵၢၼ်လူင်ၾၢႆႇၽဵင်ႇပဵင်းပဵၼ်ထမ်းလႄႈ တီႈပေႃႈလဵင်ႉၼၢႆးၸၢင်ႈၵူၺ်းၵႃႈ ဢၼ်ၸိူဝ်းၶဝ်ထူပ်းတၢင်းယၢပ်ႇတႄႉ ပဵၼ်ယွၼ်ႉၶဝ်ဢမ်ႇမီးဝတ်းဝႂ်တၢင်း ၼႆႉၶႃႈဢေႃႈ ” ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 08/08/2018 ၵေႃႉပဵၼ်ပေႃႈလဵင်ႉ ၸႂ်လမ်တေႃႇလုၵ်ႈလဵင်ႉ ဢၼ်ၵႂႃႇႁႃႁဵတ်းၵၢၼ်တၢင်း ၼွၵ်ႈလႄႈ လမ်းၵႂႃႇၸွမ်းယိုဝ်းထိုင်တီႈပေႃးတၢႆ သိုပ်ႇၼၼ်ႉဢဝ်ၵႂႃႇၾင်လိၼ်ပႅတ်ႈ တီႈၼႂ်းပႃႇႁိမ်းသူၼ်သူမ်ႈ။ ဝၼ်းတီႈ 17/08/2018 ၸဝ်ႈၼႃႈတီႈ ၸင်ႇႁူမ်ႈၵၼ်ၵႂႃႇတီႉၺွပ်းလႆႈတူဝ်ပေႃႈလဵင်ႉလႄႈ ႁူမ်ႈၵၼ်ၶုတ်းဢဝ်ၶၢပ်ႈတူဝ်ၸၢႆးသၢင်ႇယဵၼ်ႇ သူင်ႇႁူင်းယႃသူၼ်ၻွၵ်ႇပိူဝ်ႈ ၵူတ်ႇထတ်းႁႃလွင်ႈတၢင်းၵၢၼ်တၢႆ။ သိုပ်ႇၼၼ်ႉယူႇတီႈႁူင်းယႃ သူၼ်ၻွၵ်ႇသေလုမ်းလႃးသၢင်းၵျူဝ်ႇၵႂႃႇမိူဝ်ႈဝၼ်းတီႈ 19/08/2018။

ၸၢႆးသၢႆဝၼ်း ၽူႈၼင်ႈၸိုင်ႈၵေႃႁူမ်ႈသၢင်ႈၸိူဝ်ႉၸၢတ်ႈတႆး လၢတ်ႈဝႃႈ- “ ၶဝ်သွင်ၵေႃႉၽူဝ်မေးၼႆႉၶဝ်ႈမႃးႁဵတ်း ၵၢၼ်တီႈသူၼ်ၼၼ်ႉလႆႈမွၵ်ႈပီပၢႆ ၸိူဝ်းၶဝ်ၶႂ်ႈႁဵတ်းဝတ်းဝႂ်ယူႇသေတႃႉ ပေႃႈလဵင်ႉဝႃႈ ဢမ်ႇႁဵတ်းၵေႃႈလႆႈၼႆလႄႈ ပေႃႈလဵင်ႉၶဝ်ဢမ်ႇဢွၼ်ၵႂႃႇႁဵတ်းၶဝ် ၵေႃႈဢမ်ႇၸၢင်ႈႁဵတ်းၸိူင်ႉႁိုဝ်၊ ပေႃးပဵၼ်လႆႈပီႈၼွင်ႉတႆး ၸိူဝ်းမႃးႁဵတ်း ၵၢၼ်ၼႂ်းမိူင်းထႆး လူဝ်ႇၶတ်းၸႂ်ႁႃႁဵတ်းၵၢၼ်ၼႂ်းဝဵင်း ၶဝ်ႈႁႃၸုမ်းတူင်ႉၼိုင်တူင်ႇဝူင်းၵူၼ်းၼမ်ၼမ်ၶႃႈ ၼင်ႇႁိုဝ်ပိူၼ်ႈတေဢမ်ႇ ၸၢင်ႈလူလၢႆပေႉ ၵိၼ်ႁဝ်း” ဝႃႈၼႆ။

ၸၢႆးသၢင်ႇယဵၼ်ႇၼႆႉ ဢႃယုလႆႈ 40 ပၢႆ ပဵၼ်ၵူၼ်းဝၢၼ်ႈမိူင်းလီ ၸႄႈဝဵင်းသႅၼ်ဝီ ၸႄႈတွၼ်ႈ လႃႈသဵဝ်ႈ။