ၸုမ်းတူင်ႇဝူင်းၸိူဝ်ႉၶိူဝ်းတႆး ႁူမ်ႈၵၼ်ၸတ်းႁဵတ်းပၢင်ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းတူၼ်ႈတီးသေ ႁူမ်ႈဝၢင်း ၽႅၼ်တႃႇႁူမ်ႈသၢင်ႈၼႃႈၵၢၼ်ပူၵ်းပွင်မိူဝ်းၼႃႈ။
ဝၼ်းတီႈ 15 – 17 /08/2018 ၸုမ်းတူင်ႇဝူင်းၸိူဝ်ႉၶိူဝ်းတႆး ႁူမ်ႈၵၼ်ၸတ်းႁဵတ်း ပၢင်ႁူပ်ႉထူပ်း သင်ၶၸဝ်ႈလႄႈ ဢုပ်ႇဢူဝ်းလွင်ႈပူၵ်းပွင်တူင်ႇဝူင်းၵူၼ်း ။ တီႈပၢင်ႁူပ်ႉထူပ်းၵၼ်ၼၼ်ႉမီးသင်ၶၸဝ်ႈ၊ ပႃႇတီႇၵၢၼ်မိူင်း၊ ၸုမ်း ၵူၼ်းၼုမ်ႇ၊ ၵေႃတႆး၊ ၸုမ်းတူင်ႉၼိုင်တူင်ႇဝူင်းၵူၼ်းဢိၵ်ႇၽူႈသူၼ် ၸႂ်ၶဝ်ႈႁူမ်ႈ 100 ပၢႆ ၸတ်းႁဵတ်းတီႈ ဝတ်ႉဝေႇလုဝၼ်ႇ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။
ၼၢင်းၶႅမ်ဝၼ်း ၽူႈၶဝ်ႈပႃးၼႂ်းၸုမ်းပွင်ၵၢၼ် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်း ဢၼ်ႁဝ်းၶႃႈ ႁူမ်ႈၵၼ်ၸတ်းႁဵတ်းၼႆႉ ပိူဝ်ႈႁႂ်ႈၵူႈၾၢႆႇၾၢႆႇ ဢမ်ႇဝႃႈသင်ၶၸဝ်ႈ၊ ၸုမ်းတူင်ႉၼိုင် တူင်ႇဝူင်းၵူၼ်း ပိူဝ်ႈႁႂ်ႈၸၢင်ႈ ႁူမ်ႈၵၼ်ႁဵတ်းသၢင်ႈၵၢၼ်မိူဝ်းၼႃႈ ၊ တႃႇၸွႆႈၵၼ်ပူၵ်းပွင်ၼမ်ႉၵတ်ႉ၊ တၢင်းယၢမ်ႈ ႁႂ်ႈၵူၼ်းမိူင်းတႆးမီးၾိင်ႈယၢမ်ႈလီၸိူဝ်းၼႆႉ” ဝႃႈၼႆ။
ၼႂ်းပၢင်ၼႆႉဢုပ်ႇဢူဝ်းၵၼ်လၢႆလွင်ႈ မိူၼ်ၼင်ႇ ပၢႆးပၺ်ၺႃ၊ ပၢႆးမၢၵ်ႈမီး၊ ၵၢၼ်ၸိူဝ်ႉၸၢတ်ႈ ၸိူဝ်ႉၶိူဝ်း ၊ၵၢၼ်ပူၵ်းပွင် ၾိင်ႈႁိတ်ႈႁွႆး ၊ သႃသၼႃ ၸိူဝ်းၼႆႉ ။ ဢၼ်ၸတ်းႁဵတ်း ပၢင်ႁူပ်ႉထူပ်း ၸိူင်ႉၼႆ ၼႆႉ ပွၵ်ႈၼႆႉပဵၼ်ပွၵ်ႈဢွၼ်တၢင်းသုတ်း မိူဝ်းၼႃႈမႃးပေႃးမီးတိုဝ်ႉတၢင်း တေၸတ်းႁဵတ်းထႅင်ႈယူႇ ဝႃႈၼႆ။
