တႄႇႁူဝ်လိူၼ်ၵျူႊလၢႆႊၼႆႉမႃး ၾူၼ်တူၵ်းႁၢဝ်ႈႁႅင်း ႁဵတ်းႁႂ်ႈၼမ်ႉၼွင်း လုပ်ႇထူမ်ႈသႂ်ႇ ႁိူၼ်းယေး တိူၵ်ႇႁႆႈလွၵ်းၼႃးၵူၼ်းမိူင်းလူႉၵွႆ ၼႂ်းၸိုင်ႈတႆးပွတ်းႁွင်ႇ။

မိူဝ်ႈဝၼ်းတီႈ 4 လိူၼ်ၵျူႊလၢႆႊ ၵေးၼမ်ႉမၢဝ်းၵိုင်ႉၵၢင်ႉၼွင်းၶိုၼ်ႈမႃး လုပ်ႇထူမ်ႈသႂ်ႇႁိူၼ်းယေးၵူၼ်းမိူင်း ၾၢႆႇႁွင်ႇဝဵင်းၼမ်ႉၶမ်း မိူၼ်ၼင်ႇ ဝၢၼ်ႈၵုၼ်ႁႆး၊ ဝၢၼ်ႈၼွင်ၶမ်း၊ ဝၢၼ်ႈၼွင်မႃႉတႃႊ၊ မၢၼ်ႈၵုၼ်(တႂ်ႈ)၊ မၢၼ်ႈသွၼ်း၊ ဝၢၼ်ႈၵုၼ်ၵႅင်း၊ ဝၢၼ်ႈၵွင်းၼွင် ၸိူဝ်းယူႇ ၸပ်း သၢပ်ႇၼမ်ႉမၢဝ်း မီးတိတ်းၸပ်းၵၼ်တင်း လႅၼ်လိၼ်မိူင်းၶႄႇ- မိူင်းတႆးၼႆ ၵူၼ်းမိူင်းဝဵင်းၼမ်ႉၶမ်း ၵေႃႉၼိုင်ႈလၢတ်ႈၼႄၼင်ႇၼႆ။

“ၵူႈပီၵေႃႈ ၼမ်ႉၼမ်ယူႇ ၵူၺ်းဢမ်ႇထူမ်ႈမိူၼ်ၸိူင်ႉၼႆ။ ပီၼႆႉသမ်ႉ ယွၼ်ႉၾူၼ်တူၵ်းထပ်းၵၼ်ၵေႃႈပိူင်ၼိုင်ႈ၊ တီႈမိူင်းၶႄႇၵေႃႈ ၶဝ်ပိုတ်ႇၾၢႆ ဢၼ်မီးၼိူဝ်ၼမ်ႉမၢဝ်းၼႆႉ လူင်းမႃးၵေႃႈပိူင်ၼိုင်ႈလႄႈ ၼမ်ႉမၢဝ်း ၸင်ႇယိုင်ႈၶိုၼ်ႈမႃးဝႆးၸိူင်ႉၼႆ။ ၵူႈပီၼႆႉ ပေႃးၼမ်ႉၶိုၼ်ႈၵေႃႈ 2-3 ဝၼ်းၵွႆး ယွမ်းလူင်းၵႂႃႇၶိုၼ်းယဝ်ႉ။ မိူဝ်ႈလဵဝ်ၼႆႉသမ်ႉ တေႃႇထိုင်ဝၼ်းမိူဝ်ႈၼႆႉ 10 /7/2025 ၵေႃႈ ၼမ်ႉပႆႇယွမ်းလူင်း ယင်းတိုၵ်ႉယိုင်ႈၶိုၼ်ႈမႃးထႅင်ႈတိၵ်းတိၵ်းယူႇ။”

လႆႈႁူႉဝႃႈ ယၢမ်းလဵဝ် ၵူၼ်းမိူင်းၸိူဝ်းၺႃးၼမ်ႉထူမ်ႈဝၢၼ်ႈႁိူၼ်းယေး တိူၵ်ႇႁႆႈလွၵ်းၼႃး ႁူပ်ႉတၢင်းယၢပ်ႇလွင်ႈၵိၼ်ယႅမ်ႉ။ တႃႇတေသိုဝ်ႉ ၼမ်ႉမၼ်း၊ ၵိူဝ်၊ ၽွင်ဝၢၼ်၊ ၽၵ်းမီႇၸိူဝ်းၼႆႉ ဢမ်ႇၸၢင်ႈဢွၵ်ႇႁိူၼ်းၵႂႃႇသိုဝ်ႉ။ ၼမ်ႉထူမ်ႈႁွပ်ႈဝၢၼ်ႈဝႆႉလႄႈ ထူမ်ႈပႃးသူၼ်ၽၵ်းၶဵဝ်- ၵူၼ်းမိူင်းပဵၼ်ဢၼ်ယၢပ်ႇၽိုတ်ႇ ဝႃႈၼႆ။

သင်ဝႃႈ ၽူႈလႂ်ၽႂ်ၶႂ်ႈၵမ်ႉၸွႆႈတႃႇ ပီႈၼွင်ႉတႆး ၸိူဝ်းႁူပ်ႉၺႃးၽေးၼမ်ႉ ၼႂ်းၸႄႈဝဵင်းၼမ်ႉၶမ်းၸိုင် ၵပ်းသိုပ်ႇတိတ်းတေႃႇလႆႈတီႈ ၸၢႆးသၢႆၵွၼ်း ပွၵ်ႉႁူဝ်ၼွင် ၸုမ်းၵူၼ်းၼုမ်ႇတႆး ဝဵင်းၼမ်ႉၶမ်းလႆႈယူႇ ဝႃႈၼႆ။

တီႈၵပ်းသိုပ်ႇ

ၸုမ်းၵူၼ်းၼုမ်ႇတႆး ဝဵင်းၼမ်ႉၶမ်း

ၸၢႆးသၢႆၵွၼ်း ပွၵ်ႉႁူဝ်ၼွင်

မၢႆၾူၼ်း လႄႈ Kpay – 09766538401

တႅမ်ႈ-ၽူၺ်းၼုမ်ႇ