ႁိူဝ်းတၢင်ႇၵူၼ်း လမ်းၼိုင်ႈ ပိၼ်ႈငူပ်ႉၸူမ်ၵႂႃႇ ႁိမ်းၵုၼ်ပႃႊလီႊ မိူင်းဢိၼ်ႊတူဝ်ႊၼီႊသိူဝ်ႊ မီးၵူၼ်းလူႉတၢႆ 4 ၵေႃႉ ႁၢႆဝႆႉထႅင်ႈ 38 ၵေႃႉ။

ႁိူဝ်းတၢင်ႇၵူၼ်းၼၼ်ႉ ပိၼ်ႈငူပ်ႉၸူမ်ၵႂႃႇ ၼႂ်းဝၼ်းတီႈ 02/07/2025 ယၢမ်းၵၢင်ၶိုၼ်း ႁိမ်းၵုၼ်ႁၢတ်ႇသၢႆးပႃႊလီႊ၊ ၼိူဝ်ႁိူဝ်းၼၼ်ႉ မီးၵူၼ်းပႃးၵႂႃႇၸွမ်း 65 ၵေႃႉ၊ ဝၢႆးႁိူဝ်းပိၼ်ႈယဝ်ႉ ၽူႈမီးပုၼ်ႈၽွၼ်းၶဝ် ၸွႆႈလႆႈၵူၼ်း 23 ၵေႃႉ ထူပ်းႁၼ်ၶၢပ်ႈတူဝ် 4 ၵေႃႉ ႁၢႆဝႆႉ 38 ၵေႃႉ။

ဢိင်ၼိူဝ်လွင်ႈၼႆႉ ၸွမ်ၸိုင်ႈဢိၼ်ႊတူဝ်ႊၼီႊသိူဝ်ႊ ၸီႉသင်ႇဝႆႉတီႈၽူႈမီးပုၼ်ႈၽွၼ်းၼႂ်းပိုၼ်ႉတီႈ ႁႂ်ႈထႅမ်ႁႅင်းၵူၼ်းၸတ်းၵၢၼ်ၵွပ်ႇၵူႈၸွႆႈထႅမ် ဝႃႈၼႆ။

ပူၼ်ႉမႃး မိူဝ်ႈလိူၼ်မၢတ်ႊၶျ်ၼၼ်ႉၵေႃႈ ႁိူဝ်းတၢင်ႇၵူၼ်း 16 ၵေႃႉ ယၢမ်ႈပိၼ်ႈငူပ်ႉ ႁိမ်းၵုၼ်ႁၢတ်ႇသၢႆးပႃႊလီႊၼႆႉ မိူဝ်ႈၼၼ်ႉ မီးၵူၼ်းလူႉတၢႆၼိုင်ႈၵေႃႉ မၢတ်ႇၸဵပ်းၼိုင်ႈၵေႃႉ။

မိူင်းဢိၼ်ႊတူဝ်ႊၼီႊသိူဝ်ႊၼႆႉ မီးဝႆႉၵုၼ်ႁၢတ်ႇသၢႆးတင်းၼမ်သေ လႆႈၸႂ်ယႂ်ႇသၢႆၼမ်ႉဝႆႉၵမ်ႈၼမ်။ ၵူၺ်းၵႃႈ ယွၼ်ႉၵူၼ်းႁဵတ်းၸွမ်းမၢႆမီႈ ၾၢႆႇႁူမ်ႇလူမ်ႈႁႅင်းဢေႇ၊ ယွၼ်ႉၾိင်ႈၾႃႉရႃႇသီႇ ႁၢႆႉႁႅင်းမႃးသေ လွင်ႈႁိူဝ်းပိၼ်ႈငူပ်ႉၵေႃႈ တိုၵ်ႉမီးဝႆႉထႅင်ႈယူႇ – သိုဝ်ႇၶၢဝ်ႇ AFP ဢွၵ်ႇဝႆႉၼင်ႇၼႆ။