ၵူၼ်းမဝ်းယႃႈ ၵေႃႉၼိုင်ႈ ၶဝ်ႈၼႂ်းဝၢင်းႁိူၼ်းၵူၼ်းယူႇႁိမ်းၸမ်သေ လၢၵ်ႈၽႃႉၾၼ်းသွင်ၵေႃႉၽူဝ်မေး မၢတ်ႇၸဵပ်း ႁၢဝ်ႈႁႅင်းသေ လႆႈသူင်ႇယူတ်းယႃတူဝ်တီႈဝဵင်းလိူဝ်ႇ ဝႃႈၼႆ။

တီႈဝၢၼ်ႈပွၵ်ႉ 12 ၸႄႈဝဵင်းလႃႈသဵဝ်ႈ မီးၽူႈၸၢႆး ၵေႃႉၼိုင်ႈ ၸိုဝ်ႈႁွင်ႉ ၸၢႆးဢိူဝ်ဢေး ဢႃယု 40 ပီ မဝ်းယႃႈသေ ၶဝ်ႈၼႂ်းဝၢင်းႁိူၼ်း ၸၢႆးသၢင်ႇပၢင်ႇ လႄႈ ၼၢင်းၶမ်းၸၢမ် ဢဝ်မိတ်ႈၾၼ်းသႂ်ႇ ၼၢင်းၶမ်းၸၢမ်သေ ၵေႃႉပဵၼ် ၽူဝ် ၸၢႆးသၢင်ႇပၢင်ႇ ၼႅတ်ႈလႅၼ်ႈမႃးႁၢမ်ႈလႄႈ ၺႃးၾၼ်းပႃးၸွမ်း တင်း 2 ၽူဝ်မေး ဝႃႈၼႆ။

ၸၢႆးလႅင်း ၵႅမ်ႁူဝ်ပဝ်ႈ ပႃႇတီႇႁူဝ်သိူဝ် SNLD ၸႄႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵေႃႉပဵၼ်မေးၼၢင်း ၸၢႆးသၢင်ႇပၢင်ႇတႄႉ မၢတ်ႇၸဵပ်းႁၢဝ်ႈႁႅင်းသေ လႆႈသူင်ႇၵႂႃႇယႃတီႈ ဝဵင်းလိူဝ်ႇ။ တီႈဢၼ်ၺႃးတိူဝ်ႉမၢတ်ႇၸဵပ်းၼၼ်ႉ တီႈၵွၵ်းႁူဝ်ၾၢႆႇသၢႆႉ – ၾၢႆႇၶႂႃ။ မိုဝ်းၵေႃႈတိူဝ်ႉၺႃး။ တီႈဢၼ်လႆႈမၢတ်ႇၸဵပ်းႁၢဝ်ႈႁႅင်းၼၼ်ႉ ပဵၼ်တီႈၵွၵ်းႁူဝ် တေလႆႈဝႃႈ ပဵၼ်ဢၼ်မႆႈၸႂ်ၸွမ်းတႄႉတႄႉ။ ၵေႃႉပဵၼ်ၸၢႆးသၢင်ႇပၢင်ႇသမ်ႉ လႆႈၶိုၼ်ႈႁူင်းယႃ တီႈလႃႈသဵဝ်ႈၵူၺ်း။ ၵေႃႉပဵၼ်ၽူဝ်ၵေႃႈ တိူဝ်ႉၺႃးတီႈၵွၵ်းႁူဝ် တင်းသွင်ၾၢႆႇၼင်ႇၵၼ်။ ၵေႃႉဢၼ်ၾၼ်းၶႃပူႇဢွၵ်ႇၼၼ်ႉ မဝ်းယႃႈ ဝႃႈၼႆဢေႃႈ” ဝႃႈၼႆ။

ၼၢင်းၼူႉ ၵူၼ်းပွၵ်ႉ 12 ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝဵင်းလႃႈသဵဝ်ႈႁဝ်းၶႃႈၼႆႉ ယႃႈမဝ်းၵမ်သိုဝ်ႉ သူႇသမ်းၵိၼ်ငၢႆႈၼႃႇ။ မိူၼ်ၸၢႆးဢိူဝ်ဢေးၼႆႉၵေႃႈ မဝ်းလဝ်ႈ၊ မဝ်းယႃႈသေ ဢမ်ႇႁၢမ်ႈၸႂ်လႆႈလႄႈ ၸင်ႇၵႂႃႇၾၼ်း။ ၵွပ်ႈၼၼ်လႄႈ ၵေႃႉပဵၼ်မေးၼၢင်းလႄႈ လုၵ်ႈဢွၼ်ႇ ၸၢႆးဢိူဝ်ဢေးၼၼ်ႉတႄႉ ဢမ်ႇယူႇၸွမ်းလႆႈသေ ဢွၼ်ၵၼ် ပၢႆႈပႅတ်ႈမၼ်းမူတ်းယဝ်ႉ” ဝႃႈၼႆ။

ၸၢႆးလႅင်း လၢတ်ႈဝႃႈ “ မိူင်းလႃႈသဵဝ်ႈႁဝ်းၼႆႉ တွၼ်ႈတႃႇၵူၼ်းသူႇ သမ်းယႃႈမဝ်းၵမ်ၼႆႉ မိူၼ်ပဵၼ်ၵၢတ်ႇၶၢႆၽၵ်းၶဵဝ် သိုဝ်ႉငၢႆႈ ၵိၼ်ငၢႆႈၼႃႇၶႃႈယဝ်ႉ။ ထႅင်ႈလွင်ႈၼိုင်ႈၵေႃႈ မႆႈၸႂ်ၸွမ်း ၵူၼ်းၼုမ်ႇႁုၼ်ႈသႅၼ်းမႂ်ႇ ဢၼ်တေၶိုၼ်ႈမႃးၸိူဝ်း ၼၼ်ႉၵူၺ်းယဝ်ႉ” ဝႃႈၼႆ။

ပၵ်းပိူင်မၢႆမီႈယႃႈမဝ်းၵမ်ဢွၵ်ႇမႂ်ႇၼႆႉသမ်ႉ ၵမ်ႈၼမ် တေတီႉၺွပ်း ၵူၼ်းၶၢႆမၼ်းၵူၺ်း။ ၵူၼ်းၵိၼ်/ သူႇသမ်ႉ ဢမ်ႇဝႆႉပဵၼ်တၢင်းၽိတ်းၼၵ်း ယွၼ်ႉၼၼ်လႄႈ ၵူၼ်းသူႇသမ်းၵိၼ်လိူင်ႇ။ သၢင်ႈပၼ်ႁႃတေႃႇႁိမ်းႁွမ်း ၶႂ်ႈ ဝႃႈမီးယူႇၵူႈဝၼ်း ဝႃႈၼႆ။

တေႃႈလဵဝ် ယူႇတီႈၾၢႆႇၸဝ်ႈၼႃႈတီႈပလိၵ်ႈမၢၼ်ႈ လႆႈၵုမ်းၶင် တူဝ်ၸၢႆးဢိူဝ်ဢေးၼႆႉဝႆႉ တီႈႁူင်းပလိၵ်ႈၸႄႈဝဵင်း လႃႈသဵဝ်ႈဝႆႉယဝ်ႉ။