ၼႂ်းလိူၼ်ၵျုၼ်ႊၼႆႉ ဝၢႆးသေ သိုၵ်းမၢၼ်ႈ သင်ႇၵၢင်ႉၵႄႇၼႂ်းဢိူင်ႇၼႂ်းဝၢၼ်ႈ ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ ႁွင်ႉၵူၼ်းမိူင်းႁူပ်ႉထူပ်းယဝ်ႉၼၼ်ႉ ၵူၼ်းၼုမ်ႇလႄႈ ၵူၼ်းၸိူဝ်းပႃးၼႂ်းသဵၼ်ႈမၢႆ တႃႇႁၢပ်ႇၵၢၼ်သိုၵ်းမၢၼ်ႈ ဢွၼ်ၵၼ်ၽူင်ႉပၢႆႈ ထႅင်ႈတင်းၼမ်။ လိူဝ်ၼၼ်ႉ ၸုမ်းပျီႇတူႉၸိတ်ႉၵေႃႈ ၽွင်းၸုမ်းသိုၵ်းမၢၼ်ႈ လူင်းၵဵပ်းသဵၼ်ႈၸိုဝ်ႈၼၼ်ႉ ယိုဝ်းၵွင်ႈလွၵ်ႇဢမ်ႇႁႂ်ႈၵဵပ်း ၼႆယဝ်ႉ။ 

ဝဵင်းမိူင်းတူၼ်ၼႆႉ မီးပွၵ်ႉယႂ်ႇ 3 ပွၵ်ႉ မိူၼ်ၼင်ႇ ပွၵ်ႉၼွင်ပႃယဵၼ်ႇ၊ ပွၵ်ႉမဵဝ်ႉမ၊ ပွၵ်ႉဝၢၼ်ႈမႂ်ႇ ဝၢၼ်ႈ ဢၼ်တိတ်းၸပ်းဝဵင်းၵေႃႈ မီးယူႇထႅင်ႈလၢႆဝၢၼ်ႈ မိူၼ်ၼင်ႇ ဝၢၼ်ႈၼႃး၊ ဝၢၼ်ႈၾၢႆၶႄႇ၊ ဝၢၼ်ႈႁွင်ႈ လိၼ် ၸဵမ်ၸိူဝ်းၼႆႉ။ သိုၵ်းမၢၼ်ႈ တဵၵ်းၸႂ်ႉႁႂ်ႈၵၢင်ႉၵႄႇ လူင်းၵဵပ်းငိုၼ်းၵဵပ်းသိုၵ်း ၸိူင်ႉၼႆ ဢမ်ႇယွမ်း 14 ပွၵ်ႈယဝ်ႉ။ ၼိုင်ႈပွၵ်ႈၼႆႉ လႆႈႁႃပၼ်သိုၵ်းမႂ်ႇ ၼိုင်ႈဝၢၼ်ႈ/ ၼိုင်ႈပွၵ်ႉ 2 – 3 ၵေႃႉ ၵူၼ်းပိုၼ်ႉတီႈ လၢတ်ႈၼင်ႇၼႆ။

ၼႂ်းပွၵ်ႉမဵဝ်ႉမၼႆႉ မီးလင်ႁိူၼ်း 300 ပၢႆ ၊ ၵူၼ်းၸိူဝ်းၶဝ်ႈၼႂ်းသႅၼ်းတႃႇႁၢပ်ႇၵၢၼ်သိုၵ်းမီး 124 ၵေႃႉ ၼႂ်းၼၼ်ႉ ပေႃးသိုၵ်းမၢၼ်ႈ ယွၼ်းၵူၼ်းမႃးမိူဝ်ႈလႂ်ၵေႃႈ တေလႆႈႁပ်ႉဢဝ်ပုၼ်ႈၽွၼ်းၵူႈၵေႃႉ တေ ဢမ်ႇလႆႈထဵင်ၶိုၼ်းၼႆ ၸုမ်းၵဵဝ်ႇၶွင်ႈၵၼ်တၢင်းသိုၵ်းမၢၼ်ႈ ပၼ်ၾၢင်ႉၵႂႃႇ မိူဝ်ႈဝၼ်းတီႈ 16/06/2025 ၼၼ်ႉ။

ၵူၼ်းၼုမ်ႇ မၢင်ၸိူဝ်းပႃးၼႂ်းသဵၼ်ႈၸိုဝ်ႈယူႇသေတႃႉ ယွၼ်ႉဢမ်ႇယူႇၵိုၵ်းႁိူၼ်းယဝ်ႉလႄႈ ၵၢင်ႉၵႄႇ ဢမ်ႇၸၢင်ႈႁဵတ်းၸွမ်းၼင်ႇ သိုၵ်းမၢၼ်ႈသင်ႇၵဵပ်း။

ဢိင်ၼိူဝ်ၵူၼ်းၼုမ်ႇ ဢမ်ႇမီးတီႈႁိူၼ်းယေးၼၼ်ႉသေ သိုၵ်းမၢၼ်ႈလွၵ်ႇငိုတ်ႈပႃးထႅင်ႈဝႃႈ ၽႂ်ပႃးၼႂ်း သဵၼ်ႈၸိုဝ်ႈသေ ဢမ်ႇႁၢပ်ႇၵၢၼ်သိုၵ်း တေမၢပ်ႇမႂ်ၵေႃႉပဵၼ်ပေႃႈမႄႈလႄႈ ပီႈၼွင်ႉၸိူဝ်းၵိုတ်း တၢင်း ႁိူၼ်းၼႆ ၵူၼ်းပိုၼ်ႉတီႈလၢတ်ႈ။

တႃႇႁႂ်ႈၵူၼ်းၼုမ်ႇ ၶဝ်ႈႁၢပ်ႇၵၢၼ်သိုၵ်းၼႆသေ ဝၼ်းတီႈ 16/06/2025 ၼၼ်ႉ သိုၵ်းမၢၼ်ႈ သင်ႇၵၢင်ႉ ၵႄႇလႄႈ ၾၢႆႇၽွင်းငမ်းၶဝ် ႁွင်ႉထူပ်းၵူၼ်းမိူင်း။ ၵူၺ်းၵႃႈ ၵူၼ်းမိူင်း ဢမ်ႇၵႂႃႇၸွမ်းၼင်ႇဢၼ်ႁွင်ႉဝႆႉ လႄႈ ၵၢင်ၶမ်ႈၵၢင်ၶိုၼ်းၵေႃႈ ၸုမ်းပဵၼ်ၸႂ်သိုၵ်းမၢၼ်ႈၶဝ် သွၵ်ႈတဝ်ထိုင်တီႈႁိူၼ်းယေး ၵေႃႈမီး ဝႃႈ ၼႆ။

ၼႂ်းၵႄႈဝၼ်းတီႈ 17-18/06/2025 ၼႆႉ တႃႇၵဵပ်းသဵၼ်ႈမၢႆသိုၵ်းမႂ်ႇၼႆသေ သိုၵ်းမၢၼ်ႈလႄႈ ႁွင်ႈၵၢၼ် ဢၼ်ယူႇတႂ်ႈၶဝ် လူင်းပိုၼ်ႉတီႈ တၢင်းဝၢၼ်ႈမႄႈၵႅၼ်း မိူင်းႁၢင် ဢၼ်ယူႇၼႂ်းၵႄႈ မိူင်းတူၼ်လႄႈ ထုင်ႉၼႃးၵွင်းမူး ၸိူဝ်းၼႆႉ။

သွၵ်ႈတဝ်ထိုင် ၼႂ်းႁိူၼ်းၼႂ်းယေး ၵူၼ်းဝၢၼ်ႈပႃႇသၵ်း (ဢၼ်ၵူၼ်းပိုၼ်ႉတီႈႁွင်ႉၵၼ်ဝႃႈ ဝၢၼ်ႈလႃး ႁူႇ (ႁိုဝ်) ဝၢၼ်ႈဢူးတိၼ်ႇဝုၼ်း) ဝၢၼ်ႈၼႆ ပဵၼ်ဝၢၼ်ႈဢၼ် ၸုမ်းပျီႇတူႉၸိတ်ႉၵဝ်ႇၵႄႇယူႇ ၸွမ်းၵၼ် ၼမ်။ မိူဝ်ႈၸုမ်းသိုၵ်းမၢၼ်ႈၶဝ် ၶဝ်ႈၵဵပ်းသဵၼ်ႈမၢႆၼၼ်ႉ ၵူၼ်းဝၢၼ်ႈၶဝ်လၢတ်ႈဝႃႈ ၼႂ်းဝၢၼ်ႈၼႆႉ ပဵၼ် ၸုမ်းပျီႇတူႉၸိတ်ႉတင်းဝၢၼ်ႈၼႆၵေႃႈ ၾၢႆႇသိုၵ်းမၢၼ်ႈဢမ်ႇထွမ်ႇလႄႈ ၸင်ႇမီးလွင်ႈ လၼ်ႇၵွင်ႈယိုဝ်း လွၵ်ႇၵၼ်ၼႆ ၵူၼ်းၼုမ်ႇပိုၼ်ႉတီႈ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“သိုၵ်းမၢၼ်ႈၶဝ် ၵႂႃႇထတ်းၵူၼ်းၼႂ်းဝၢၼ်ႈ ႁဵတ်းၼၼ်သေ တီႈဝၢၼ်ႈပႃႇသၵ်းၼၼ်ႉ တေမီးဢူးတိၼ်ႇ ဝုၼ်းၼႆ ၵေႃႉၼိုင်ႈ မၼ်းသမ်ႉၶဝ်ႈဝႆႉၼႂ်းပျီႇတူႉၸိတ်ႉ။ မၼ်းၵေႃႈ လၢတ်ႈၼႄၸုမ်းၸိူဝ်းဢၼ်မႃး ၵဵပ်းသဵၼ်ႈမၢႆၼၼ်ႉဝႃႈ တင်းဝၢၼ်ႈၼႆႉ ပဵၼ်ပျီႇတူႉၸိတ်ႉ မူတ်းယဝ်ႉ။ ၵူၺ်းၵႃႈ ၼႂ်းသဵၼ်ႈမၢႆတႄႉ တႄႉ ဢၼ်သိုၵ်းမၢၼ်ႈ မီးဝႆႉၼၼ်ႉသမ်ႉ သဵၼ်ႈဢၼ်ပႃးၼႂ်းပျီႇတူႉၸိတ်ႉ မီး 10 ၵေႃႉၵူၺ်း။ ႁဵတ်းၼၼ်သေ ဢူးတိၼ်ႇဝုၼ်းၸင်ႇၸႂ်လမ်သေ ဢဝ်ၵွင်ႈယိုဝ်းၶိုၼ်ႈၾႃႉ ၼႆဢေႃႈ” – ဝႃႈၼႆ။  

ၽွင်းမိူဝ်ႈၸုမ်းသိုၵ်းမၢၼ်ႈၶဝ် မိူဝ်းၵဵပ်းသဵၼ်ႈမၢႆၼၼ်ႉ ပဵၼ်ၶၢဝ်းယၢမ်းလူဝ်ႇလပ်း လူဝ်ႇၼွၼ်းၵေႃႈ ပိူင်ၼိုင်ႈ ၾၢႆႇသိုၵ်းမၢၼ်ႈၶဝ် ဢမ်ႇၵဵင်ၸႂ် ဢမ်ႇတူၺ်းႁၼ်ထိုင် ၵၢင်ၸႂ်ၵူၼ်းမိူင်းသေ ၶဝ်ႈသွၵ်ႈထိုင် ႁိူၼ်းၵေႃႈ ပိူင်ၼိုင်ႈလႄႈ ၸုမ်းၸိူဝ်းဢၼ်ပဵၼ်ပျီႇတူႉၸိတ်ႉၸိူဝ်းၼႆႉ ၸင်ႇလၼ်ႇၵွင်ႈၶိုၼ်ႈၾႃႉသေ ယိုဝ်းလွၵ်ႇၼႆ ၵူၼ်းပိုၼ်ႉတီႈသိုပ်ႇလၢတ်ႈ။

ပွတ်းတၢင်းမိူင်းတူၼ် မႄႈၵႅၼ်း ၊ မွၵ်ႇၸလီႇ ၊ မိူင်းႁၢင် ၊ ၼႃးၵွင်းမူးၼႆႉ မီးၸုမ်းပျီႇတူႉၸိတ်ႉ ၼမ်ယူႇ သေတႃႉ သိုၵ်းမၢၼ်ႈတိုၵ်ႉ ယိူင်းၸူးၵူၼ်းမိူင်းသေ ၶဝ်ႈႁႃၵဵပ်းသိုၵ်းမႂ်ႇထႅင်ႈ။ လွင်ႈၼႆႉ မိူၼ်တင်းၶႂ်ႈ ပၼ်တၢင်းယၢပ်ႇၸႂ် ၵူၼ်းမိူင်းၵူၺ်း။ ၸူးၸႂ်တႄႉ ၶႂ်ႈႁႂ်ႈပျီႇတူႉၸိတ်ႉ ဢၼ်မီးယူႇၼႂ်းဢိူင်ႇၼႂ်းဝၢၼ်ႈ ၸိူဝ်းၼၼ်ႉ ၵႂႃႇႁၢပ်ႇၵၢၼ်သိုၵ်းမၢၼ်ႈပၼ်ဢွၼ်တၢင်း။ ယွၼ်ႉဝႃႈ ၶဝ်မီးတူဝ်ထူပ်း ၼႂ်းၵၢၼ်ၾိုၵ်း သိုၵ်းဝႆႉလီငၢမ်းယဝ်ႉၼႆ ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ –

“ပျီႇတူႉၸိတ်ႉ ပွတ်းတၢင်းၼႆႉ တေဝႃႈႁႂ်ႈဢဝ်လွင်ႈႁူမ်ႇလူမ်ႈ ပၼ်ၵူၼ်းမိူင်းဢိူဝ်ႈၼႆၵေႃႈ ဢမ်ႇမီးသင်။ ၸွမ်းတႃႈၸွမ်းတၢင်းၸိူဝ်းၼႆႉ မီးၶီႈယႃႈသွၵ်ႈတဝ်။ ၽူႈလၵ်ႉၵေႃႈလိူင်ႇ လွင်ႈ ၸိူဝ်းၼႆႉၵေႃႈ ၶဝ်ဢမ်ႇၵႄႈၶႆပၼ်။ ႁႂ်ႈၶဝ်ဢဝ်ႁူမ်ႇလူမ်ႈပၼ်ၼႆၵေႃႈ ဢမ်ႇႁဵတ်း။ ပေႃးဝႃႈ ပဵၼ်ပွႆးပၢင်လွင်းၸိူဝ်းၼႆႉတႄႉ ၵႂႃႇဢဝ်လွင်ႈႁူမ်ႇလူမ်ႈပၼ်ႁေ လႆႈငိုၼ်းႁဵတ်းၼၼ်ၵူၺ်း။ ႁႂ်ႈဝႃႈဢဝ်လွင်ႈႁူမ်ႇလူမ်ႈပၼ်ၵူၼ်းဝၢၼ်ႈ ႁႂ်ႈၵူၼ်းဝၢၼ်ႈလွတ်ႈၽေးၼႆသမ်ႉ ဢမ်ႇမီးၼင်ႇ ၵဝ်ႇ”- ဝႃႈၼႆ။

ပျီႇတူႉၸိတ်ႉ ပွတ်းတၢင်းမိူင်းတူၼ် ဢၼ်မီးဝႆႉယူႇၸိူဝ်းၼႆႉၵေႃႈ ၵမ်ႈၼမ် ဢမ်ႇလႆႈတိုၵ်း သိုၵ်း ၊ ႁဵတ်းၵၢၼ်ပၢႆးမၢၵ်ႈမီးသုၼ်ႇတူဝ်သေ ယူႇၵိၼ်ၵႂႃႇၵူႈဝၼ်းဝၼ်းၵူၺ်း။ ယွၼ်ႉၼၼ် ၶႂ်ႈႁႂ်ႈတူၺ်းထိုင်လူလွမ်ပၼ်ၵူၼ်းမိူင်းၽွင်ႈၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈၼင်ႇၼႆ။

ဢမ်ႇၵွမ်ႉၵူၺ်း တီႈမိူင်းတူၼ် တီႈမိူင်းသၢတ်ႇ ဢၼ်ယၢၼ်ၵၼ်တင်းမိူင်းတူၼ်  40 လၵ်းပၢႆ ၼၼ်ႉၵေႃႈ သိုၵ်းမၢၼ်ႈ တဵၵ်းႁႂ်ႈၵူၼ်းဝၢၼ်ႈၵူၼ်းသူၼ် ၶဝ်ႈပၢင်ၵုမ် ဢၼ်ႁွင်ႈၵၢၼ် ၾၢႆႇ ၽွင်းငမ်းလႄႈ ၵၢင်ႉၵႄႇဢွၼ်ၸတ်းၼၼ်ႉ။

သင်ၽႂ်ဢမ်ႇၶဝ်ႈႁူမ်ႈၵေႃႈ သင်ဝႃႈ ပႃးသဵၼ်ႈမၢႆဝႆႉယဝ်ႉၼႆၸိုင် ၾၢႆႇၵဵဝ်ႇၶွင်ႈၶဝ် တေၸူၵ်း ၶႅပ်းမႄးတႅၼ်းတၢင်သေ သင်ပႃးၸိုဝ်ႈၵေႃႈ တေလႆႈႁၢပ်ႇၵၢၼ်သိုၵ်း ၸွမ်းၼင်ႇ တမ်းပိူင်ဝႆႉ ၵူၺ်းၼႆ ၼႂ်းၽိုၼ်လိၵ်ႈမွၵ်ႇၼၼ်ႉ ပႃးဝႆႉၼင်ႇၼႆ။

မိူဝ်ႈလဵဝ် ၵူၼ်းၼုမ်ႇ ၼပ်ႉႁူဝ်သိပ်း မၢင်ၸိူဝ်း ဢွၼ်ၵၼ် ပၢႆႈၶဝ်ႈႁၢပ်ႇၵၢၼ်ၼႂ်းတပ်ႉသိုၵ်း RCSS/ SSA မၢင်ၸိူဝ်းၵေႃႈ ပၢႆႈသွၼ်ႈဝႆႉ တၢင်ႇတီႈသီႇလႅၼ်။

တေယူႇတီႈႁိူၼ်းၵေႃႈ ဢမ်ႇထၢင်ႇႁၢင်ႈ ႁဵတ်းၵၢၼ်ႁႃၵိၼ်လဵင်ႉတွင်ႉ ဢမ်ႇမီးလၢႆးတၢင်းႁႃ ငိုၼ်းလႄႈ တႃႇတေလဵင်ႉလူၼႂ်းၼႃႈႁိူၼ်းၵူၺ်းၵေႃႈ ဢမ်ႇၵုမ်ႇထူၼ်ႈ။ ၵူဝ်လႆႈႁဵတ်းသိုၵ်း လႄႈ ပၢႆႈၵေႃႈ သမ်ႉယၢပ်ႇယဵၼ်း တီႈယူႇတီႈၵိၼ် ၊ ယႃႇဝႃႈ တေလႆႈႁႃငိုၼ်း ဢၼ်မီးဝႆႉၵူၺ်း ၵေႃႈ ဢမ်ႇၵိုတ်းလိူဝ်သင်ယဝ်ႉၼႆ ပေႃႈႁိူၼ်းၼုမ်ႇမိူင်းသၢတ်ႇ ၵေႃႉၼိုင်ႈ လၢတ်ႈၼင်ႇၼႆ။