သင်သွၵ်ႈၶိုၼ်းပိုၼ်းၵူၼ်းၶိူဝ်းတႆးၼႆ ၵမ်ႈၼမ် တေလႆႈႁၼ်ဝႃႈ တႆးၼႆႉ မီးၼမ်ႉၸႂ်လီ မေႃၸွႆႈထႅမ် ၵၼ်သေဢမ်ႇၵႃး ဝႆႉၵႃႈၶၼ်ၵၼ် ယုမ်ႇယမ်ၵၼ်ၼႆ ၸိူဝ်းၼႆႉ။ ဢမ်ႇမီးလွင်ႈၵူတ်ႉငေႃး ၵိၼ်ၸိၵ်း တွၵ်ႇၸွၵ်းၼိူဝ်ၵၼ်ၼႆၵေႃႈ ယၢမ်ႈလၢတ်ႈသိုပ်ႇၵၼ်မႃး။ ၵူၺ်းၵႃႈ ၵၢပ်ႈဝၢၼ်ႈပၢၼ်မိူင်းယၢမ်းလဵဝ် ဢမ်ႇၸႂ်ႈၸိူင်ႉၼၼ်။ ၵူၼ်းမိူင်းၼင်ႇၵၼ် ဢမ်ႇၸၢင်ႈယုမ်ႇၵၼ်။ ၶၢဝ်းတၢင်းၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ယိုတ်းမိူင်းမႃးၼႆႉၵူၺ်း ၵူၼ်းလႅၼ်ၵိၼ်ၵၼ် မီးမႃးၵူႈလွၵ်းၵူႈလၢႆး။

တီႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်းၼႆႉၵေႃႈ မီးၵူၼ်းဢဝ်ငိုၼ်းတင်းၼမ်သေ ပၢႆႈပႅတ်ႈ မီးလၢႆ ၵေႃႉ ယဝ်ႉ။ ၵမ်းၼႆႉၵေႃႈ မီးၵူၼ်းဢဝ်ငိုၼ်းၵူၼ်းဝၢၼ်ႈၵူၼ်းသူၼ် ၼပ်ႉႁူဝ်ႁဵင်သႅၼ်သေ ပၢႆႈဢွၵ်ႇဝဵင်းထႅင်ႈ။

ၼႂ်းၶၢဝ်းတၢင်း သိုၵ်းမၢၼ်ႈ ယိုတ်းမိူင်းၼႆႉ ၵၢၼ်လွၵ်ႇလႅၼ်ၵိၼ်ၵၼ်ၼႂ်းဢွၼ်ႊလၢႆႊၵေႃႈ မီးတင်း ၼမ်တင်းလၢႆ။ ဢၼ်လွၵ်ႇလႅၼ်ၵိၼ်ၵၼ်ၸွမ်းဝၢၼ်ႈၸွမ်းၶူင်ႇၵေႃႈ မီးမႃးၸေး။

မၢင်ၸိူဝ်းၵေႃႈ လူင်းတိုၼ်းလၢင်းၼႂ်းၼႃႈၵၢၼ်တႃငၢၼ်းသေ ၺႃးလႅၼ် မၢင်ၸိူဝ်းၵေႃႈ ဢမ်ႇသွၼ်ႇၼႃႈ သွၼ်ႇလင်သင်သေ ယုမ်ႇဢဝ်ၵႂၢမ်းၵူၼ်းလႅၼ် ထိုင်တီႈသုမ်းငိုၼ်းသုမ်းတွင်း။ ၵမ်ႈၼမ် ၵူၼ်း ဝၢၼ်ႈၵူၼ်းသူၼ် ၸိူဝ်းႁဵတ်းၵိၼ်လူၺ်ႈၽိူၵ်ႇၸိုၼ်ႈၶၢဝ်သႂ် သမ်ႉၺႃးလႅၼ်ၼမ်။

မိူဝ်ႈၼႂ်းလိူၼ်ဢေႊပရိူဝ်ႊ 2025 ၼၼ်ႉၵေႃႈ ၼၢင်းယိင်းလၢႆးၶႃႈ ၵေႃႉၼိုင်ႈ ၸိုဝ်ႈႁွင်ႉ ၼၢင်းသႃႇလူႇ ၼၼ်ႉၵေႃႈ လႅၼ်ဢဝ်ငိုၼ်း ၵူၼ်းဝၢၼ်ႈ ဢမ်ႇယွမ်း 300 ၵေႃႉ ငိုၼ်းၼပ်ႉႁူဝ်ႁဵင်သႅၼ်သေ ပၢႆႈဝႆႉ ထိုင်ႁၢၼ်ႉၼႆႉ။

ၵမ်းၼႆႉသမ်ႉ မီးမႃးထႅင်ႈ ၼၢင်းယိင်းၵူၼ်းလၢႆးၶႃႈထႅင်ႈၼင်ႇၵဝ်ႇ ၸိုဝ်ႈႁွင်ႉ ၼၢင်းၶမ်းဢူး (ႁွင်ႉ) ၼၢင်းတီႇတႃႇ ဢႃယု 44 ပီ ၸိုဝ်ႈၽူဝ် ၸၢႆးဢွင်ႇပုၼ်ႉ မီးလုၵ်ႈလဵၵ်ႉဝႆႉဢႃယု 3 ၶူပ်ႇ ယူႇပွၵ်ႉၼွင်မိူင်း (ပွၵ်ႉ 7) ၸႄႈဝဵင်းလၢႆးၶႃႈ ၸိုင်းတႆးပွတ်းၸၢၼ်း။

ၼၢင်းၶမ်းဢူးၼႆႉ ဢွၵ်ႇႁိူၼ်းၵႂႃႇ ၸဵမ်မိူဝ်ႈ ဝၼ်းတီႈ 20/03/2025 ၊ လၢတ်ႈၵူၼ်းႁိမ်းႁွမ်းဝႃႈ တေၵႂႃႇ ႁဵတ်းၵၢၼ်ၸူဝ်ႈၵႅပ်ႉၵမ်း ယဝ်ႉၵေႃႈ တေမႃးသၢႆႈတႅၼ်းပၼ်ငိုၼ်းပၼ်ၵူႈၵေႃႉၸိူဝ်းလူဝ်ႇလႆႈၼၼ်ႉ ဝႃႈၼႆ။

မိူဝ်ႈတႄႇ မၼ်းၼၢင်းဢွၵ်ႇႁိူၼ်းၵႂႃႇတႄႉ ၸဝ်ႈၼီႈ/ ၵူၼ်းၸိူဝ်းလူဝ်ႇလႆႈငိုၼ်း ၵပ်းသိုပ်ႇၾူၼ်းၸူး လႆႈလၢတ်ႈတေႃႇၵၼ်ယူႇသေတႃႉ၊ ဝၢႆးၼႆႉသမ်ႉ ၽႂ်ၵပ်းသိုပ်ႇႁႃၵေႃႈ ဢမ်ႇလႆႈ ၊ ဢမ်ႇႁူႉၵႂႃႇယူႇ ၸွၵ်ႉ လႂ် ၸဵင်ႇလႂ်ယဝ်ႉၼႆ ၵူၼ်းပိုၼ်ႉတီႈလၢတ်ႈ။

ၸူးၸႂ် ၵူၼ်းဝၢၼ်ႈၵူၼ်းသူၼ်တႄႉ ၶႂ်ႈႁႂ်ႈမၼ်းၼၢင်းမႃး ႁပ်ႉၵႄႈလိတ်ႈ ပၼ်ႁႃၸိူဝ်းၼႆႉ ၼၢင်းထူၺ်းဢွင်ႇ ၵေႃႉလူဝ်ႇလႆႈငိုၼ်းၶိုၼ်း လၢတ်ႈၼႄဝႆႉၼင်ႇၼႆ –

“သင်ဝႃႈ မီးငိုၼ်းၼႆၵေႃႈ ႁႂ်ႈမၼ်းမႃးပၼ် ၊ သင်ဝႃႈ ဢမ်ႇမီးၼႆၵေႃႈ တေပၼ်မိူဝ်ႈလႂ် ၶိင်ႇလႂ်ၼႆၵေႃႈ ႁႂ်ႈမႃးသပ်းၸႅင်ႈၼႄပၼ် ႁပ်ႉပၢၵ်ႇပၼ်။ ႁႂ်ႈမႃးပၼ်ၶေႃႈမၼ်ႈၵႅၼ်ႇပိူၼ်ႈၶိုၼ်း။ မိူၼ်ၼင်ႇ ၸုမ်းၼၢႆးၼႃႈ ၵူၼ်းၵၢင်(ပွဲစား) ၼင်ႇၵၼ်ၸိူဝ်းၼႆႉၵေႃႈ တေဢမ်ႇႁဵတ်းသင်မၼ်း။ မိူဝ်ႈလဵဝ်ၼႆႉ ဢမ်ႇတိတ်း တေႃႇလႆႈၼႆ ၵူၼ်းယူႇတၢင်းလင်မၼ်းၼႆႉ ယၢပ်ႇၼႃႇ”။

မိူဝ်ႈမၼ်းၼၢင်းတႄႇပၢႆႈၵႂႃႇတႄႉ ၶၢဝ်ႇလိုဝ်းဝႃႈ ၵႂႃႇမီးတၢင်း မျႃႉဝတီႇ သူၺ်ႇၵူၵ်ႉၵူဝ်ႇ တၢင်းမိူင်းယၢင်းၽိူၵ်ႇ ၊ ဝၢႆးၼႆႉသမ်ႉ မႃးႁွင်ႉဢဝ်ပႃးလုၵ်ႈလႄႈ တင်းၽူဝ်မၼ်းၼၢင်း ၵႂႃႇၸွမ်း။

တီႈႁိူၼ်းၵေႃႈ သမ်ႉၵိုတ်းၵေႃႉပဵၼ်မႄႈၵူၺ်း – ၽွင်းမိူဝ်ႈၸဝ်ႈၼီႈ မိူဝ်းထိုင်တီႈႁိူၼ်းၼၼ်ႉ ၵေႃႉပဵၼ် မႄႈမၼ်း ၼၢင်းလၢတ်ႈဝႃႈ –“ၼၢင်းၶမ်းဢူး ဢမ်ႇယူႇတီႈႁိူၼ်းလူၺ်ႈၵၼ်ႁိုင်ယဝ်ႉ ၸဵမ်မိူဝ်ႈမၼ်း ၼၢင်း တႄႇၼႃႈႁိူၼ်းမႂ်ႇၼႆႉသေ လူင်းႁိူၼ်းၵႂႃႇယူႇတၢင်ႇတီႈ ဢမ်ႇလႆႈၵပ်းသိုပ်ႇၵၼ်သင်ယဝ်ႉ ၼႂ်းဝႂ်မုင်ႉႁေႃႁိူၼ်းၵေႃႈ ဢမ်ႇမီးၸိုဝ်ႈ မၼ်းယဝ်ႉ။ ယွၼ်ႉ ၼၼ် တေဢမ်ႇၸၢင်ႈဢဝ်ပုၼ်ႈၽွၼ်းသင်ပၼ် လႆႈ”- ဝႃႈၼႆ။

ၸဝ်ႈသူၼ်လႄႈ ၵူၼ်းၸိူဝ်းလူဝ်ႇလႆႈငိုၼ်းတီႈၼၢင်းၶမ်းဢူးၼႆႉ ဢွၼ်ၵၼ်မိူဝ်းထိုင်တီႈႁိူၼ်းတီႈယေး သေဢမ်ႇၵႃး ၵႂႃႇတိူင်ႇလၢတ်ႈပႃး ၵၢင်ႉၵႄႇ ၼႂ်းဢိူင်ႇၼွင်မိူင်းဝႆႉပႃးယဝ်ႉ ဝႃႈၼႆ။

မိူဝ်ႈမၼ်းတႄႇပၢႆႈဢွၵ်ႇဝဵင်းၼၼ်ႉတႄႉ ၽႂ်ထူဝ်းထၢမ် ထူဝ်းလၢတ်ႈၵေႃႈ မၼ်းႁပ်ႉလၢတ်ႈတေႃႇယူႇ သေတႃႉ ဝၢႆးမႃး မၼ်းၼၢင်းဢမ်ႇႁပ်ႉတွပ်ႇလၢတ်ႈသင်သေဢမ်ႇၵႃး ပိၵ်ႉၶိူင်ႈမိုဝ်းထိုဝ်မၼ်းပႃး။

မိူဝ်ႈမၼ်းႁပ်ႉသၢႆတွပ်ႇပၼ်တႄႉ လၢတ်ႈဝႃႈ ဢၼ်မၼ်းဢွၵ်ႇႁိူၼ်းၵႂႃႇၼႆႉ ဢမ်ႇၸႂ်ႈဝႃႈ တေပၢႆႈပႅတ်ႈ တေမႃးသၢႆႈတႅၼ်းပၼ်ၶိုၼ်းၵူႈၵေႃႉ တေဢမ်ႇႁႂ်ႈယွမ်းသေပႅၵ်ႉသေပျႃး ၊ ဝႃႈၼႆသေတႃႉ ယၢမ်းလဵဝ် ၶၢဝ်းယၢမ်းပူၼ်ႉမႃး 2 လိူၼ်ပၢႆယဝ်ႉ ပႆႇႁၼ်ပွၵ်ႈမႃးၶိုၼ်း။

မၼ်းၼၢင်း ႁဵတ်းၵၢၼ် ၼၢႆႈၼႃႈ(ပွဲစား) ၼႆႉမႃး ၼပ်ႉလၢႆသိပ်းပီယဝ်ႉသေတႃႉ ဢမ်ႇတွၼ်ႉႁဵတ်း ၽိတ်းပိူင်ႈၸိူင်ႉၼႆသေပွၵ်ႈၼႆ ၼၢင်းထူၺ်းဢွင်ႇ လၢႆးၶႃႈ လၢတ်ႈၼင်ႇၼႆ –

“မိူဝ်ႈဢွၼ်တၢင်း မၼ်းဢမ်ႇလႅၼ်ၼင်ႇၵဝ်ႇ ပေႃးသိုဝ်ႉၽၵ်းမီႇတီႈမၼ်း 7 လမ်းဢိူဝ်ႈၼႆၵေႃႈ မၼ်းပၼ်တၢင်း 7 လမ်း ၊ ၶဝ်ႈၶႄႇၼႆၵေႃႈ မၼ်းပၼ်ပိူၼ်ႈမူတ်း။ ႁဵတ်းသင် ပီၼႆႉသမ်ႉ ၶၢႆတႄႉၶၢႆဝႃႈသေ ၽိူဝ်ႇၶၢဝ်းပိူၼ်ႈဢဝ်ၶဝ်ႈၶႄႇမႃး မၼ်းသမ်ႉပၢႆႈပႅတ်ႈၼၼ်ႉၼႃႇ၊ ပႅတ်ႉပႅတ်ႉလႅၼ်လႅၼ်ပိူၼ်ႈတႄႉ ဢမ်ႇတွၼ်ႉမီး သမ်ႉႁဵတ်းပႃးၵၢၼ်ၽြႃး တြႃးသေၼႆၵေႃႈ ႁဝ်းၸင်ႇၵွႆႈယုမ်ႇမၼ်းၼၼ်ႉၼႃႇ”- ဝႃႈၼႆ။

ၵူၼ်းဝၢၼ်ႈၵူၼ်းသူၼ်ၼႂ်းလၢႆးၶႃႈ ၸိူဝ်းလူဝ်ႇလႆႈငိုၼ်း တီႈၼၢင်းၶမ်းဢူးၼႆႉ ပဵၼ်ၵူၼ်းဝၢၼ်ႈပၢင်ႇ ဝၢၼ်ႈၸၼ်ႇ ၼွင်မိူင်း ၸိူဝ်းၼႆႉၵူၺ်းဢမ်ႇၵႃး  ၵူၼ်းပၢင်လူင်ၵေႃႈ ယင်းၺႃးလႅၼ် မိူၼ်ၵၼ်။

မိူၼ်ၼင်ႇ တီႈပၢင်ၵၢတ်ႇပျီႇလူင်းၶျၢၼ်းတႃႇ(ပွဲရုံ) ၼၼ်ႉ မၼ်းၼၢင်းၶၢႆၶဵဝ် ၶဝ်ႈၵၢပ်ႇဝႆႉ 1,500 ထူင် ၽၵ်းမီႇ 10,000 ၸွႆႉ (ၼိုင်ႈၸွႆႉလႂ် 1,500 ပျႃး)  ၸိူဝ်းၼႆႉၵေႃႈ သုမ်းပႃး။ ပေႃးႁူမ်ႈၵၼ် တင်းသဵင်ႈ ဢၼ်ၼၢင်း ၶမ်းဢူး လူဝ်ႇသၢႆႈတႅၼ်းငိုၼ်းတၢင်းထုင်ႉလၢႆးၶႃႈပၢင်လူင်ၼႆႉ သႅၼ်ႁွမ်းတေမီး 17,800 သႅၼ်ပျႃး ၼႆ ၵူၼ်းပိုၼ်ႉတီႈလၢတ်ႈ။

ထိုင်ၶိင်ႇထိုင်ၶၢဝ်းမၼ်းၵေႃႈ ၵူၼ်းဝၢၼ်ႈၵူၼ်းသူၼ် ဢမ်ႇပႆႇလႆႈငိုၼ်းၶိုၼ်းလႄႈ ၸိူဝ်းလူဝ်ႇလူင်း ထုၼ်းထႅင်ႈ ၸိူဝ်းလူဝ်ႇပၼ်ထႅင်ႈလၢႆတေႃႇလၢႆတႃၵေႃႈ ယၢပ်ႇယဵၼ်းဝႆႉ။ မၢင်ၸိူဝ်း ယွၼ်ႉငိုၼ်းတွင်း ၵပ်းၵိၼ်းႁႅင်းၼႃႇလႄႈ သမ်ႉပေႃးတုမ်ႉတိူဝ်ႉပၢႆးယူႇလီ၊ မၢင်ၵေႃႉ ထိုင်တီႈလႆႈၶိုၼ်ႈႁူင်းယႃ ၵေႃႈမီးယဝ်ႉၼႆ ၵူၼ်းလၢႆးၶႃႈၵေႃႉၼိုင်ႈလၢတ်ႈ။