ၵူၼ်းၵဵပ်းတဝ်ႈၼမ်ႉ(ၶူတ်ႇပဝ်ႇ) 2 ၵေႃႉ ထူပ်းႁၼ် တူဝ်တၢႆ ၸၢႆးငဵင်းၵျေႃႇ ဢၼ်လႆလွင်ႈၸွမ်းၵႃး တီႈၶူဝ်ၼမ်ႉလွင်း ၸႄႈဝဵင်းလႃႈသဵဝ်ႈ မိူဝ်ႈဝၼ်းသဝ်ၼၼ်ႉ။
မိူဝ်ႈၼႆႉ ဝၼ်းတီႈ 31/07/2018 ယၢမ်းၵၢင်ၼႂ် 8 မူင်းပၢႆ ၵူၼ်းၵဵပ်းတဝ်ႈၼမ်ႉ 2 ၵေႃႉ ၵႂႃႇထူပ်းႁၼ် တူဝ်တၢႆ ၸၢႆး ငဵင်းၵျေႃႇ ႁိမ်းၾၢႆႇတေႃႇၼိူဝ်ၼမ်ႉသဵဝ်ႈ ၾၢႆႇဢွၵ်ႇပွၵ်ႉ12 ဝဵင်းလႃႈသဵဝ်ႈ လူင်ၸိုင်ႈတႆးပွတ်းႁွင်ႇ ဝႃႈၼႆ။
ၵူၼ်းၼႂ်းၼႃႈႁိူၼ်း ၸၢႆးငဵင်းၵျေႃႇ လၢတ်ႈဝႃႈ “ ႁဝ်းၶႃႈ တင်း ၸုမ်းၸွႆႈထႅမ် လႆႈၵႂႃႇဢဝ်တူဝ်တၢႆမႃးသေ ယဝ်ႉၵေႃႈ သူင်ႇၵႂႃႇတီႈႁူင်းယႃလႃႈသဵဝ်ႈ။ ဝၼ်းမိူဝ်ႈၼႆႉ ႁဝ်းၶႃႈ တေဢွၼ်ၵၼ်ပူၼ်ႉၶၢပ်ႈတူဝ်ၵႂႃႇၵမ်းလဵဝ်ၶႃႈယဝ်ႉ” ဝႃႈၼႆ။
ၸၢႆးငဵင်းၵျေႃႇ ၵူၼ်းႁေႃႈၵႃး ဢၼ်ၸူမ်ၼမ်ႉတၢႆၼၼ်ႉ ဢမ်ႇမေႃလုၺ်းၼမ်ႉၵေႃႈတေပႃး ဝႃႈၼႆ။
ဝၼ်းတီႈ 28/07/2018 ယၢမ်းၵၢင်ၶမ်ႈ ၾူၼ်တူၵ်းႁၢဝ်ႈႁႅင်းသေ ၼမ်ႉႁွင်ႈဢၼ်လႆလတ်း ဝၢၼ်ႈသူႈ/ၶူဝ်လွင်း ဢၼ် မီးၼႂ်းပွၵ်ႉ 12 ၸႄႈဝဵင်းလႃႈသဵဝ်ႈၼၼ်ႉ ၼမ်ႉၼွင်းလႆၸႅဝ်ႈႁႅင်း၊ ၽွင်းၼၼ်ႉ ၸဝ်ႈၵႃးတီႈၼႂ်းပွၵ်ႉယွမ်ႇ ႁၢမ်ႈၵူၼ်းၶၢမ်ႈ ၵႂႃႇမႃး ၵူၺ်းၵႃႈ ၸၢႆးငဵင်းၵျေႃႇသမ်ႉ ႁေႃႈၵႃးမၼ်းသေ တႆႇၶၢမ်ႈၶူဝ်ၵႂႃႇ ၶၢမ်ႈပူၼ်ႉၶူဝ်သေတႃႉ ဢမ်ႇပူၼ်ႉႁႅင်း ၼမ်ႉၼွင်းသေ လွင်ႈလႆပႃးၵႂႃႇၸွမ်းၼမ်ႉ။
ၸၢႆးငဵင်းၵျေႃႇၼႆႉ ဢႃယု မွၵ်ႈ 30 ပီ ပဵၼ်ၵူၼ်း ပွၵ်ႉ 12 မီးလုၵ်ႈယိင်း 2 ၵေႃႉ ဝႃႈၼႆ။
ၼမ်ႉလွင်းၼႆႉပဵၼ်ၼမ်ႉႁူၺ်ႈ၊ ၼမ်ႉႁွင်ႈ ဢၼ်လုၵ်ႉတၢင်းလွႆယဵဝ်ႈလႆလူင်း၊ ၶဝ်ႈႁူမ်ႈၼမ်ႉသဵဝ်ႈသေ သိုပ်ႇၵႂႃႇႁူမ်ႈ ၼမ်ႉယၢဝ် ဢၼ်ၵႂႃႇႁူမ်ႈမႄႈၼမ်ႉတူႈ ဝႃႈၼႆ။
