ၵႃးတင်းၵူၼ်းႁေႃႈ ၺႃးၼမ်ႉၼွင်းတွင်ႈလေႃႇတီႈဝဵင်းလႃႈသဵဝ်ႈၼၼ်ႉ တေႃႇထိုင်ယၢမ်းလဵဝ် ၸုမ်းတူင်ႉၼိုင်တူင်ႇဝူင်း ၵူၼ်းလႄႈ ၵူၼ်းၼုမ်ႇၼႂ်းပိုၼ်ႉတီႈ ဢွၼ်ၵၼ်သွၵ်ႈတဝ်ႁႃတူဝ် ၵူၼ်းႁေႃႈၵႃး ပႆႇထူပ်းႁၼ် ဝႃႈၼႆ။
ဝၼ်းတီႈ 28/07/2018 ယၢမ်းၵၢင်ၶမ်ႈ ၾူၼ်တူၵ်းႁၢဝ်ႈႁႅင်းသေ ၼမ်ႉႁွင်ႈဢၼ်လႆလတ်း ဝၢၼ်ႈသူႈ/ၶူဝ်လွင်း ဢၼ် မီးၼႂ်းပွၵ်ႉ 12 ၸႄႈဝဵင်းလႃႈသဵဝ်ႈၼၼ်ႉ ၼမ်ႉၼွင်းလႆႁႅင်း၊ ၽွင်းၼၼ်ႉ ၸဝ်ႈၵႃးတီႈၼႂ်းပွၵ်ႉယွမ်ႇ ႁၢမ်ႈၵူၼ်းၶၢမ်ႈ ၵႂႃႇမႃး ၵူၺ်းၵႃႈ ၸၢႆးငဵင်းၵျေႃႇသမ်ႉ ႁေႃႈၵႃးမၼ်းသေ တႆႇၶၢမ်ႈၶူဝ်ၵႂႃႇ ၶၢမ်ႈပူၼ်ႉၶူဝ်သေတႃႉ ဢမ်ႇပူၼ်ႉႁႅင်း ၼမ်ႉၼွင်းသေ လွင်ႈလႆပႃးၵႂႃႇၸွမ်းၼမ်ႉ။
ၼၢင်းႁွမ် ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈႁိမ်းၼၼ်ႉ ၵူၼ်းဝၢၼ်ႈၶဝ် ဢွၼ်ၵၼ်ႁၢမ်ႈယူႇဝႃႈ ယႃႇပေ ၶၢမ်ႈၵႂႃႇ။ ၵူၺ်းၵႃႈ မၼ်းၸၢႆးသမ်ႉ ဢိုတ်းမၢၼ်ႇၵႃးသေႁေႃႈၶၢမ်ႈ။ ၶၢမ်ႈပူၼ်ႉၶူဝ်ယူႇသေတႃႉၼမ်ႉ လႆၼွင်းႁၢဝ်ႈႁႅင်း လႄႈတွင်ႈဢဝ်ပႃးၵႃးတင်း ၵူၼ်း လႆလွင်ႈၸွမ်းၼမ်ႉၵႂႃႇ။ မိူဝ်ႈၽွင်း ၵႃးမၼ်းလႆလွင်ႈၸွမ်းၼမ်ႉၼၼ်ႉ ယင်းၵပ်း သိုပ်ႇ ႁႃၵေႃႉပဵၼ်မေးမၼ်းၸၢႆးယူႇ။ ၵႃးတႄႉထူပ်းႁၼ်ယူႇ ၵူၺ်းတူဝ်ၵူၼ်းႁေႃႈၵႃးတႄႉ ဢမ်ႇလႆႈ ႁၼ်” ဝႃႈၼႆ။
ၸၢႆးလွႆ လႃႈသဵဝ်ႈ ဢၼ်ၵႂႃႇၸွႆႈၶူၼ်ႉႁႃၼၼ်ႉ လၢတ်ႈဝႃႈ“ ၵႃးတႄႉလႆႈဢဝ်ဢွၵ်ႇမႃး မိူဝ်ႈဝႃး ယၢမ်းၵၢင်ၼႂ် ၶႃႈယဝ်ႉ။ ၵူၺ်းၵႃႈ ဢမ်ႇလႆႈထူပ်းႁၼ်ၵူၼ်းႁေႃႈမၼ်း။ မိူဝ်ႈဝႃး တင်းမိူဝ်ႈၼႆႉ လၢႆမူႇလၢႆၸုမ်း ဢွၼ်ၵၼ်သွၵ်ႈတဝ်ႁႃၵေႃႈ ဢမ်ႇႁၼ်။ မိူဝ်ႈၶမ်ႈဝႃး ၾူၼ်သမ်ႉတူၵ်းႁၢဝ်ႈႁႅင်းထႅင်ႈလႄႈ ၼမ်ႉလွင်းၼွင်းထႅင်ႈ” ဝႃႈၼႆ။
ၸၢႆးငဵင်းၵျေႃႇၼႆႉ ဢႃယု မွၵ်ႈ 30 ပီ ပဵၼ်ၵူၼ်း ပွၵ်ႉ 12 မီးလုၵ်ႈယိင်း 2 ၵေႃႉ ဝႃႈၼႆ။
ၼမ်ႉလွင်းၼႆႉပဵၼ်ၼမ်ႉႁူၺ်ႈ၊ ၼမ်ႉႁွင်ႈ ဢၼ်လုၵ်ႉတၢင်းလွႆယဵဝ်ႈလႆလူင်း၊ ၶဝ်ႈႁူမ်ႈၼမ်ႉသဵဝ်ႈသေ သိုပ်ႇၵႂႃႇႁူမ်ႈ ၼမ်ႉယၢဝ်။ မႄႈၼမ်ႉယၢဝ်သမ်ႉ လႆၶဝ်ႈၸူး ၼႂ်းၼမ်ႉတူႈ လႄႈ ယူဝ်ၶႄးတူဝ်ၵူၼ်းတၢႆ လွင်ႈလႆပူၼ်ႉထိုင် ၼမ်ႉ တူႈယဝ်ႉႁိုဝ် ဢမ်ႇႁူႉ ဝႃႈၼႆ။
