ႁၢင်လိူၼ်ၵျူႊလၢႆႊၼႆႉ ၾူၼ်တူၵ်းထပ်းၵၼ် ႁၢဝ်ႈႁႅင်း လၢႆဝၼ်းသေ ၼမ်ႉလုပ်ႇၼွင်းထူမ်ႈ သူၼ်ႁႆႈၼႃး ၵူၼ်းမိူင်း သၢတ်ႇ မီးလွင်ႈလူႉသုမ်း ဢမ်ႇယွမ်း 70 ဢေႊၶိူဝ်ႊ။

တႄႇဢဝ် ဝၼ်းတီႈ 23-29/07/2018 ၼႆႉမႃး ၾူၼ်တူၵ်းထပ်းၵၼ်ႁၢဝ်ႈႁႅင်း လၢႆဝၼ်းလႄႈမႄႈၼမ်ႉၵူၵ်း ၼွင်း ထူမ်ႈတူင်ႈႁႆႈၼႃးၵူၼ်းဝၢၼ်ႈသၢႆးၶၢဝ်၊ ဝၢၼ်ႈမႂ်ႇ ပၢင်ႁႆး ၼႂ်းဢိူင်ႇသၢႆးၶၢဝ် ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ဝႃႈၼႆ။

ၸၢႆးလူင် ၵူၼ်းပိုၼ်ႉတီႈမိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ တေလႆႈဝႃႈသူၼ်ႁႆႈၼႃး ၵူၼ်းမိူင်းလူႉသုမ်း ယႂ်ႇၼမ်။ ၼႃးၵူၼ်းမိူင်း ဢၼ်ၺႃးၼမ်ႉလုပ်ႇၼွင်းထူမ်ႈသမ်ႉ တင်းမူတ်း မီး 56 ဢေႊၶိူဝ်ႊ။ သူၼ်သမ်ႉ 13 ဢေႊၶိူဝ်ႊ ႁူမ်ႈၵၼ်တင်းမူတ်း 69 ဢေႊၶိူဝ်ႊပၢႆ” ဝႃႈၼႆ။

တူင်ႈၼႃး ဢၼ်ၺႃးၽေးၼမ်ႉၼႆႉပဵၼ်ၼႃး ၵူၼ်းဝၢၼ်ႈ ဝၢၼ်ႈသၢႆးၶၢဝ် ၸဝ်ႈၼႃႈ 30 ၵေႃႉ ၼႃး 41 ဢေႊၶိူဝ်ႊပၢႆ။ ၼႃးၵူၼ်းဝၢၼ်ႈမႂ်ႇပၢင်ႁႆးသမ်ႉ တင်းမူတ်း လႆႈလူႉသုမ်းၵႂႃႇ 15 ဢေႊၶိူဝ်ႊ ၸဝ်ႈၼႃး 9 ၵေႃႉ။ လိူဝ်ၼၼ်ႉ သူၼ်ဢၼ် လႆႈလူႉသုမ်းထႅင်ႈ 13 ဢေႊၶိူဝ်ႊ ႁူမ်ႈၵၼ် တင်းမူတ်း 69 ဢေႊၶိူဝ်ႊပၢႆ ဝႃႈၼႆ။

လုင်းၸၢႆးၸိင်ႇ ၸဝ်ႈၼႃး ၵူၼ်းမိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ ၼႃးႁဝ်းၶႃႈ ဢမ်ႇၸၢင်ႈၽုၵ်ႇသွမ်ႈ ၶိုၼ်းယဝ်ႉ။ ယွၼ်ႉၶီႈလိၼ် ၵူမ်ႇသၢႆး လႄႈ တုမ်မႆႉ လႆၼွင်းထူမ်ႈ ၼႂ်းတူင်ႈၼႃးတင်းၼမ်။ မိူဝ်ႈပီပူၼ်ႉၵေႃႈ ၼမ်ႉ လုပ်ႇၼွင်းထူမ်ႈၸိူင်ႉၼႆၼင်ႇၵဝ်ႇ။ ပီၼႆႉၵေႃႈ ပဵၼ်ထႅင်ႈ။ မိူဝ်ႈပီပူၼ်ႉ ႁဝ်းၶႃႈလႆႈႁပ်ႉငိုၼ်းၵႃႈသၢႆႈတႅၼ်း 1 ဢေႊ ၶိူဝ်ႊလႂ် 800 ပျႃး။ ၵူၺ်းၵႃႈ ပီၼႆႉ ႁဝ်းၶႃႈ လႆႈၵဵပ်းသဵၼ်ႈမၢႆလွင်ႈလူသုမ်းတင်းမူတ်းသေ တၢင်ႇၸူးတီႈ ၽူႈတႅၼ်း သၽႃးယဝ်ႉ။ ယုမ်ႇယမ်ဝႃႈ တေလႆႈၵႃႈသၢႆႈတႅၼ်းၼမ်လိူဝ်ပီပူၼ်ႉယူႇ။ ယွၼ်ႉဝႃႈ 1 ဢေႊၶိူဝ်ႊလႂ် သၢႆႈတႅၼ်းပၼ် 800 ပျႃးၵူၺ်းတႄႉ ၵႃႈၶဝ်ႈသွႆးဝၢၼ်ႇၼိုင်ႈၵေႃႈဢမ်ႇလႆႈ” ဝႃႈၼႆ။