SHRF တူၵ်ႇတၵ်ႉဝႃႈ ၾၢႆမိူင်းလၢဝ်းၵူၼ်ႇ လီပဵၼ်တွၼ်ႈသွၼ်တႃႇၵၢၼ်သၢင်ႈၾၢႆမိူင်းတႆး

ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး တူၵ်ႇတၵ်ႉဝႃႈ ၾၢႆလူင်ၼႂ်းမိူင်းလၢဝ်းၵူၼ်ႇပင်း ၼမ်ႉထူမ်ႈ သူၼ်၊ ႁႆႈ၊ ၼႃး ၵူၼ်းမိူင်းၼပ်ႉႁဵင်ထူပ်းတၢင်းယၢပ်ႇ၊ ၵူၼ်းႁၢႆဝႆႉၼပ်ႉပၢၵ်ႇ ၊ ႁၼ်တူဝ်တၢႆၼပ်ႉသိပ်းၼၼ်ႉ လီပဵၼ်တွၼ်ႈသွၼ်တႃႇၵၢၼ် ၵေႃႇသၢင်ႈၾၢႆၼႂ်းမိူင်းတႆး။

Thanks to Thairath

ဝၼ်းတီႈ 25/07/2018 ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF တူၵ်ႇတၵ်ႉဝႃႈ – ၾၢႆလူင်သေႊပဵၼ်ႊ – သေႊ  ၼမ်ႉၼွႆႉ ဢၼ်တိုၵ်ႉၵေႃႇသၢင်ႈဝႆႉ မီးၼႂ်းဝူင်ႈၵၢင်မိူင်းၸမ်ႊပႃႊသၵ်ႊလႄႈ ဢတ်ႊတႃႊပိုဝ်ႊ ယူႇၼႂ်းမိူင်းလၢဝ်း   ၸဵင်ႇၸၢၼ်းဝၼ်းဢွၵ်ႇၼၼ်ႉတႅၵ်ႇ မိူဝ်ႈဝၼ်းတီႈ 23/ 07/ 2018။ ႁဵတ်းႁႂ်ႈၼမ်ႉလႆၶဝ်ႈထူမ်ႈ ဝၢၼ်ႈ၊ သူၼ်၊ ၼႃး၊ ၵူၼ်းမိူင်းၼပ်ႉႁူဝ်ႁဵင်ထူပ်းတၢင်းယၢပ်ႇၼၼ်ႉ လီဢဝ်ပဵၼ်တွၼ်ႈသွၼ်တႃႇၵၢၼ်တေသၢင်ႈၾၢႆၼႂ်းမိူင်းတႆး။

ၸၢႆးႁေႃသႅင် ၽူႈၶၢၼ်ပၢၵ်ႇၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ လွင်ႈ ဢၼ်ၾၢႆတႅၵ်ႇတီႈမိူင်းလၢဝ်းၼၼ်ႉ ၵူၼ်းဝၢၼ်ႈၵူၼ်းမိူင်းတင်းၼမ်လႆႈထူပ်းတၢင်းယၢပ်ႇ၊ တီႈၼႂ်းမိူင်းတႆးႁဝ်းၵေႃႈတေႃႈၼင်ႇၼၼ်ယဝ်ႉ မိူဝ်ႈလဵဝ်ၼႆႉ လူင်ပွင်ၸိုင်ႈႁူမ်ႈမိုဝ်းတင်း ၽူႈမၢၵ်ႈၵူၼ်းမီးၼွၵ်ႈမိူင်းၶဝ်သေ တေၶိုင်ၵေႃႇသၢင်ႈၾၢႆၼိူဝ်ၼမ်ႉၶူင်း၊ ၼမ်ႉတူႈၸိူဝ်းၼႆႉ ၊ ပေႃးပဵၼ် ၵေႃႇသၢင်ႈတႄႉၼႆၸိုင် ၵမ်ႈၼမ်တေသူင်ႇၶၢႆၼွၵ်ႈမိူင်း၊ ၵူၼ်းမိူင်းလႆႈႁပ်ႉၽွၼ်းလီဢေႇ ပေႃးၾၢႆတႅၵ်ႇ ၼမ်ႉထူမ်ႈ ၼမ်ႉၼွင်းမႃးသမ်ႉ ဢၼ်လႆႈၶၢမ်ႇၸၢၵ်ႇမၼ်း ပဵၼ်ၵူၼ်းဝၢၼ်ႈၵူၼ်းမိူင်းယဝ်ႉ။ ၵွပ်ႈၼၼ်လႄႈ ႁႂ်ႈတူၺ်းႁၼ်သၽႃႇဝၾိင်ႈတိုၼ်းမိူဝ်းၼႃႈသေ ႁႂ်ႈၵူႈပႃႈၵူႈၾၢႆႇ ၸွႆႈၵၼ်ၵႅတ်ႇၵင်ႈ မႄႈၼမ်ႉသၽႃႇဝၾိင်ႈတိုၼ်းၵႂႃႇ သေၵမ်း” ဝႃႈၼႆ။

မိူဝ်ႈလဵဝ်တၢင်းၾၢႆႇၸဝ်ႈၼႃႈတီႈ လႆႈၸွႆႈၵၼ်ၵုမ်းပိၵ်ႉၼမ်ႉတီႈၾၢႆ ၼမ်ႉဢမ်ႇလႆဢွၵ်ႇထႅင်ႈ ယဝ်ႉသေတႃႉ ၵူၺ်းၵႃႈၼမ်ႉဢၼ်လႆထူမ်ႈၼွင်းၼႂ်းဢိူင်ႇဝၢၼ်ႈၼၼ်ႉတႄႉ ယင်းပႆႇယွမ်း ။ ၵူၼ်းဝၢၼ်ႈၵူၼ်းမိူင်းဢၼ်လႆႈထူပ်းတၢင်းယၢပ်ႇမီးၵႂႃႇ 6,600 ၵေႃႉ ။ ၵူၼ်းဢၼ်ႁၢႆၵႂႃႇမီး 100 ပၢႆ လူႉတၢႆယဝ်ႉဢမ်ႇယွမ်း 20 ၵေႃႉ။
ၼႂ်းမိူင်းတႆးၵေႃႈ လူင်ပွင်ၸိုင်ႈမၢၼ်ႈၼေႇပျီႇတေႃႇတင်း မိူင်းၶႄႇ တင်ႈၽႅၼ်ႁူမ်ႈၵၼ်တေၵေႃႇသၢင်ႈၾၢႆၼိူဝ်    ၼမ်ႉၶူင်းဢမ်ႇယွမ်း 5 တီႈ ၊ ဢၼ်ႁူမ်ႈၶွမ်ႊပၼီႊတၢင်ႇဢၼ်သေ ၵေႃႇသၢင်ႈဝႆႉယဝ်ႉၼိူဝ် ၵႄးၼမ်ႉတူႈ၊ၼမ်ႉ    မၢဝ်းၵေႃႈမီးတင်းၼမ်။

ဢုပ်ႇဢူဝ်း ၽူႈတွႆႇႁွၵ်ႈ

SHARE

LEAVE A REPLY

Please enter your comment!
Please enter your name here