ဢွၼ်ႇၸၢႆးတႆး ၶဝ်ႈႁဵတ်းၵၢၼ်ၼႂ်းမိူင်းထႆး ထုၵ်ႇၼႄးဝႃႈ ပဵၼ်ၵူၼ်းလၵ်ႉဢဝ်ၶွမ်ႊ လုၵ်ႈႁဵၼ်းၸၼ်ႉၸွမ်ၵဵင်းမႆႇၼႆသေ ၺႃးၸဝ်ႈၼႃႈတီႈပလိၵ်ႈထႆး တီႉၺွပ်းသႂ်ႇၶွၵ်ႈၼၼ်ႉ ပေႃႈမႄႈပီႈၼွင်ႉဢဝ်ငိုၼ်း 20,000 ၿၢတ်ႇသေၵႂႃႇၵမ်ႉ ဢွၵ်ႇၶွၵ်ႈ။

ဝၼ်းတီႈ 23/07/2018 ၶၢဝ်းယၢမ်းၵၢင်ၶမ်ႈ 10:00 မူင်းၼၼ် ၸုမ်းၸွႆႈထႅမ်သုၼ်ႇလႆႈႁႅင်းၵၢၼ် ၵဝ်ႉငဝ်ႈပူၵ်းပူင် သုၼ်ႇလႆႈၵူၼ်း HRDF ၸွႆႈထႅမ်သေ ပီႈၼွင်ႉၸွႆႈၵၼ်ႁႃငိုၼ်း 20,000 ၿၢတ်ႇသေ ၵႂႃႇၵမ်ႉဢဝ်တူဝ်ၸၢႆးလၢဝ် ဢွၵ်ႇၶွၵ်ႈမႃး။ ၸၢႆးလၢဝ်ၼႆႉ ၺႃးၼႄးဝႃႈ လၵ်ႉၶွမ်ႊ (ၶွမ်ႊၽိဝ်ႊတိူဝ်ႊ Note Book ) လုၵ်ႈႁဵၼ်းၸၼ်ႉၸွမ်ၵဵင်းမႆႇၼႆသေ ၺႃးတီႉသႂ်ႇၶွၵ်ႈ ႁိုင် 4 လိူၼ်ပၢႆ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ပေႃႈမႄႈပီႈၼွင်ႉမၼ်းၸၢႆး ၵႂႃႇၵူႈယိုမ်ငိုၼ်းပီႈၼွင်ႉလႄႈၵူၼ်းႁူႉၸၵ်းၵမ်ႈၽွင်ႈ ၊ ၽူႈမီးၼမ်ႉၸႂ်ၸွႆႈမႃးမွၵ်ႈ 700 -800 ၿၢတ်ႇ လႆႈဢဝ်ငိုၼ်းတႃႇ 20,000 ၿၢတ်ႇၵူၼ်းထႆး 3 ၵေႃႉၵမ်ႉယၼ်ပၼ်သေ ၸင်ႇဢဝ်တူဝ်မၼ်းၸၢႆးဢွၵ်ႇ မႃးလႆႈၶႃႈဢေႃႈ။ ၵူၺ်းၵႃႈၶၻီႊဢမ်ႇပႆႇယဝ်ႉပႆႇတူဝ်ႈ တေလႆႈၵပ်းသိုပ်ႇလုမ်းတြႃးထႅင်ႈ 6 လိူၼ်ထိုင် 1 ပီ ” ဝႃႈၼႆ။

ၸၢႆးလၢဝ် လၢတ်ႈတီႈၸဝ်ႈၼႃႈတီႈၾၢႆႇမၢႆမီႈဝႃႈ -“ ၶွမ်ႊဢၼ်ၶဝ်မႃးလိုမ်းဝႆႉၼႆႉ ပေႃႈလဵင်ႉႁဝ်းၵေႃႈ ပိုၼ်ၽၢဝ်ႇ ႁႃၸဝ်ႈၶွင်မၼ်းယူႇ ၵူၺ်းၵႃႈဢမ်ႇမီးၽႂ်မႃးဢဝ်သေပွၵ်ႈ ။ မီးၵူၼ်းမႃးထၢမ်ႁႃၶွမ်ႊၽိဝ်ႊတိူဝ်ႊတီႈၶႃႈ ၵူၺ်းၵႃႈၶႃႈသမ်ႉဢမ်ႇပွင်ႇၵႂၢမ်းၶဝ်လီ ၶႃႈၵေႃႈဢဝ်ၶွမ်းၼႆႉၵႂႃႇၵဵပ်းဝႆႉတီႈလင်ႁၢၼ်ႉ တၢင်းၶၢႆၶႃႈဢေႃႈ ၶဝ်သမ်ႉၼႄၶႃႈဢဝ်သေတီႉၶႃႈသႂ်ႇၶွၵ်ႈဢေႃႈ ” ဝႃႈၼႆ။

ၸၢႆးလၢဝ်ၼႆႉ ပဵၼ်လုၵ်ႈ ၸၢႆးတီ + ၼၢင်းမိၼ်ႉၽူၺ်း ပဵၼ်ၵူၼ်းမိူင်းပွၼ် ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း ။ မီးပီႈၼွင်ႉႁူမ်ႈတွင်ႉ 6 ၵေႃႉ မၼ်းၸၢႆးပဵၼ်ၵေႃႉတီႈ 3 မႃးႁဵတ်းၵၢၼ် ၼႂ်းမိူင်းထႆးလႆႈပီပၢႆ။ ပေႃႈမႄႈႁဵတ်း ၵၢၼ်ၵေႃႇသၢင်ႈ မၼ်းၸၢႆးသမ်ႉႁဵတ်း ၵၢၼ်တီႈႁၢၼ်ႉ ၶၢႆတၢင်းၵိၼ်။ ၺႃးပလိၵ်ႈတီႉၺွပ်းမိူဝ်ႈ လိူၼ်မၢတ်ႉၶျ် 2018။