ၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းမူႇၸေႊ ဢွၼ်ႁူဝ်သေ ၸတ်းႁဵတ်းပွႆးလူင်းပၢင်သွၼ်လိၵ်ႈတႆးၶၢဝ်းမႆႈ မီးၵူၼ်းမိူင်းၶဝ်ႈႁူမ်ႈပၼ်ႁႅင်း 6 ပၢၵ်ႇပၢႆ။
ဝၼ်းတီႈ 15/07/2018 ယၢမ်းဝၢႆးဝၼ်း 2 မူင်း ထိုင် 5 မူင်း ႁူဝ်ၶမ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းမူႇ ၸေႊ ဢွၼ်ႁူဝ်ၼမ်းၼႃႈသေ ၸတ်းႁဵတ်းပွႆးလူင်းပၢင်သွၼ်လိၵ်ႈတႆးၶၢဝ်းမႆႈ တီႈႁူင်းလုၵ်းတၢတ်ႇၼၢႆးၽွင် ပွၵ်ႉ တူဝ်ႇယွတ်ႈ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးလၢဝ်လႅင်းပၢင်ႇ ၵႅမ်ၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ၼႂ်ႈၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်သွၼ်လိၵ်ႈတႆးၶၢဝ်းမႆႈ 2018 ၼႆႉ ၵေႃလိၵ်ႈလၢႆးဝဵင်းမူႇၸေႊ ဢွၼ်ႁူဝ်သေပိုတ်ႇမႃး တင်းမူတ်း 17 ပွၵ်ႈ လုၵ်ႈႁဵၼ်းတင်းမူတ်း မီး 1000 ပၢႆ၊ မေႃသွၼ်တင်းမူတ်း မီး 108 ၵေႃႉ။ ၶၢဝ်းတၢင်း သွၼ်ႁဵၼ်းတႄႉ ႁိမ်း 2 လိူၼ်” ဝႃႈၼႆ။
ပွႆးလူင်းပၢင်သွၼ်လိၵ်ႈတႆးၶၢဝ်းမႆႈၼႆႉ မီးၵူၼ်းမိူင်းၶဝ်ႈႁူမ်ႈပၼ်ႁႅင်း 6 ပၢၵ်ႇပၢႆ။ လုၵ်ႈႁဵၼ်းဢၼ်လႆႈႁပ်ႉ သူးရၢင်း ဝလ်း ၸၼ်ႉငဝ်ႈ 54 ၵေႃႉ။ ၸၼ်ႉၼိုင်ႈ 35 ၵေႃႉ ဝႃႈၼႆ။
ပၢင်သွၼ်လိၵ်ႈတႆးၶၢဝ်းမႆႈၼႆႉ တႄႇပိုတ်ႇသွၼ်ပၼ် ၸၼ်ႉငဝ်ႈတင်း ၸၼ်ႉၼိုင်ႈ တႄႇဢဝ် ဝၼ်းတီႈ 23/03/2018 ထိုင် ဝၼ်းတီႈ 30/04/2018 ဝႃႈၼႆ။
လိူဝ်ၼၼ်ႉ ယူႇတီႈၵေႃလိၵ်ႈလၢႆး ၸႄႈဝဵင်းမူႇၸေႊ တေပိုတ်ႇပူင်သွၼ်ပၼ် လိၵ်ႈတႆး ၶၢဝ်းၼႂ်းဝႃႇ 3 လိူၼ် တႃႇလုၵ်ႈႁဵၼ်းဢွင်ႇပူၼ်ႉၸၼ်ႉသိပ်း 2018 တေတႄႇ ဝၼ်းတီႈ 28/07/2018 ၵႂႃႇ ဝႃႈၼႆ။
Photo FB – Sai Lao Hlaing Pan
