သိုၵ်းလူင်ပွင်ၸိုင်ႈမၢၼ်ႈ တပ်ႉမ 99 ၶဝ်ႈသွၵ်ႈတဝ် ဢဝ်လၢႆၶူဝ်းၶွင်ၵူၼ်းဝၢၼ်ႈ တီႈဢိူင်ႇမိူင်းၵႅတ်ႈ ၵူၼ်းမိူင်းထူပ်းတၢင်းယၢပ်ႇ မႆႈၸႂ်လွင်ႈႁူမ်ႇလူမ်ႈ။
မိူဝ်ႈႁူဝ်လိူၼ်ၵျူႊလၢႆႊ 2018 ပူၼ်ႉမႃးၼၼ်ႉ သိုၵ်းလူင်ပွင်ၸိုင်ႈမၢၼ်ႈ တပ်ႉမ 99 ဢၼ်ပၵ်းပၢင်သဝ်းဝႆႉတီႈ ဢိူင်ႇမိူင်းၵႅတ်ႈၼၼ်ႉ ၵူၼ်းသိုၵ်းၶဝ် 4 – 5 ၵေႃႉ ၶဝ်သွၵ်ႈတဝ်ဢဝ်လၢႆၶူဝ်းၶွင်ၵူၼ်းဝၢၼ်ႈ တီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ။
သိုၵ်းလူင်ပွင်ၸိုင်ႈမၢၼ်ႈၼႆႉ မႃးဢဝ်ၵႆႇၵူၼ်းဝၢၼ်ႈၵႂႃႇၵိၼ် ၵႃႈၶၼ်ၼပ်ႉႁူဝ်မိုၼ်ႇၵျၢတ်ႉ။ ပဵၼ်ၵႆႇလုင်းၶႅင်ႇ ဢၢႆႈထုၼ်း လႄႈ ဢၢႆႈၵေႃႇၵူၼ်းဝၢၼ်ႈၼမ်ႉလိၼ်းၶၢၼ်လႄႈဝၢၼ်ႈလူင်။
ၸၢႆးပၢၼ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ တီႈဝၢၼ်ႈႁဝ်းၶႃႈၼႆႉ ပၢႆးမၢၵ်ႈမီးဢမ်ႇၶႅမ်ႉ တႃႇႁႃၵိၼ်လဵင်ႉ တွင်ႉၵေႃႈယၢပ်ႇ ၊ ၵမ်ႉပျီႇၸိတ်ႉမႃးယွၼ်းဝႃႇ ၊ သိုၵ်းမၢၼ်ႈမႃးယွၼ်းဝႃႇ ႁဵတ်းၼႆယူႇတိၵ်းတိၵ်း ၵူၼ်းဝၢၼ်ႈၵူၼ်းမိူင်းတႄႉထူပ်းတၢင်းယၢပ်ႇတႄႉၶႃႈ ” ဝႃႈၼႆ။
ပူၼ်ႉမႃးမိူဝ်ႈဝၼ်းတီႈ 13 ၼၼ်ႉၵေႃႈတပ်ႉမ 99 ၼႆႉၵႂႃႇဢဝ်ထူဝ်ႈ ၼၢႆးၼၢင်း ၵူၼ်းဝၢၼ်ႈလူင်မႃးၸႂ်ႉတၢင်ႇၶူဝ်း ၼၵ်းသေ ထူဝ်ႈလႃႈၵျီႈၵွႆ ၵူၺ်းၵႃႈသိုၵ်းမၢၼ်ႈ ဢမ်ႇၸွႆႈထႅမ်ပၼ်ၶိုၼ်းသင်ၼႆ ၸၢႆးပၢၼ်းလၢတ်ႈ။
တပ်ႉမ 99 ၼႆႉမႃးပၵ်းတီႈမိူင်းၵႅတ်ႈမိူဝ်ႈၽွင်းပီ 2014 ၊ ၵူၼ်းဝၢၼ်ႈၵႆႉလႆႈၺႃးၶျေႃး ၵႂႃႇၸွႆႈထႅမ်ႁဵတ်းပၼ်ၵၢၼ်ၶဝ် ဝႃႈၼႆ။
တီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈၼႆႉ မီးသိုၵ်းလူင်ပွင်ၸိုင်ႈမၢၼ်ႈလႄႈ ပျီႇတူႉၸိတ်ႉမၢၼ်ႈပၢင်ႇတူင်ႉၼိုင်ၵႂႃႇမႃးၼႆယဝ်ႉ။
