ၸၢႆးမွင်ႇ ထွင်းၻီး ၵေႃႉယၢမ်ႈတၢင်တူဝ် မိူင်းထႆးသေ ၵႂႃႇၶႅင်ႇႁိူဝ်းမိၼ် တီႈမိူင်းၵျပၢၼ်ႊၼၼ်ႉ လူင်ပွင်ၸိုင်ႈထႆး ယၢမ်ႈလၢတ်ႈဝႆႉဝႃႈ တေၵမ်ႉၸွႆႈပၼ်တိုၼ်းၵၢၼ်ႁဵၼ်း တေႃႇထိုင်မိူဝ်ႈလဵဝ် ပႆႇလႆႈႁပ်ႉသုၼ်ႇလႆႈသင် ဝႃႈၼႆ။

မိူဝ်ႈပူၼ်ႉမႃး 8 – 9 ပီၼၼ်ႉ ၸၢႆးမွင်ႇ ထွင်းၻီး လႆႈတၢင်တူဝ် မိူင်းထႆးသေ ၵႂႃႇၶႅင်ႇပၢင်ဢဝ်ၸေႊတူပ်ႉပဵၼ်ႁိူဝ်းမိၼ်သေ ၶႅင်ႇၵၼ် တီႈမိူင်းၵျပၢၼ်ႊ မၼ်းၸၢႆးလႆႈႁပ်ႉသူးမႃးပၼ်မိူင်းထႆး၊ ၽွင်းၼၼ်ႉၶုၼ် ဢၽိသိတ်ႊ ဝဵတ်ႊၶျ ၶျီႊဝႃႊ ပဵၼ်ၸွမ်ၽွင်းလူင်မိူင်းထႆး ။ ၸွမ်ၽွင်းလူင်မိူင်းထႆးလႄႈ ႁွင်ႈၵၢၼ်ၾၢႆႇပၢႆးပၺ်ၺႃ ယၢမ်ႈလၢတ်ႈပၼ်ၶေႃႈမၼ်ႈၵႅၼ်ႇ တီႈမၼ်းၸၢႆးဝႃႈ တေၵမ်ႉၸွႆႈပၼ် ၵၢၼ်ႁဵၼ်းတေႃႇပေႃးယဝ်ႉၸၼ်ႉ Ph.D ၊ တေႁဵတ်းပၼ်ဝႂ်ထႆး ဝႃႈၼႆသေတႃႉ ႁၢၼ်ႉတေႃႇယၢမ်းလဵဝ် ပႆႇလႆႈႁပ်ႉသုၼ်ႇလႆႈသင် ။

ၸၢႆးမွင်ႇ ထွင်းၻီး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ မိူဝ်ႈပူၼ်ႉမႃးၼၼ်ႉတႄႉ ၶဝ်လၢတ်ႈဝႃႈ တေႁဵတ်းပၼ်ဝႂ်ထႆး ၊ တေၵမ်ႉၸွႆႈႁဵၼ်းတေႃႇပေႃးယဝ်ႉၸၼ်ႉ Ph.D ၼႆၶႃႈဢေႃႈ တေႃႇထိုင်မိူဝ်ႈလဵဝ်ပႆႇလႆႈသင်သေပိူင်ၶႃႈ ။မိူဝ်ႈ လိူၼ်ပူၼ်ႉမႃးၼၼ်ႉ ၽွင်းလူင်ၾၢႆႇၼႂ်းမိူင်းၶဝ် ၵပ်းသိုပ်ႇမႃးႁႃ ၶႃႈသေ ႁႂ်ႈၶႃႈႁႃၶႅပ်းႁၢင်ႈသၢၵ်ႈသေႇလၵ်းထၢၼ် ဢၼ်ယၢမ်ႈလႆႈ ၸွႆႈၵၢၼ်တူင်ႇဝူင်းၵူၼ်းၸိူဝ်းၼႆႉ သူင်ႇပၼ်ၶဝ်ထႅင်ႈၼႆဢေႃႈ၊ တၢင်းၾၢႆႇၸၼ်ႉၸွမ် ရင်ႊသိတ်ႊ ၵေႃႈ ယိုၼ်ႈမိုဝ်းမႃးတေၵမ်ႉၸွႆႈ ပေႃးၶႃႈယဝ်ႉၸၼ်ႉသုင်ယဝ်ႉ ပေႃးတေၶိုၼ်ႈၸၼ်ႉၸွမ်မိူဝ်ႈလႂ်ၵေႃႈႁႂ်ႈၵႂႃႇၵပ်း  သိုပ်ႇၶဝ် ၼႆဢေႃႈ ။ ယၢမ်းလဵဝ်တႄႉၶႃႈႁဵၼ်းၵေႃႊသေႃႊၼေႃႊ ၵူၺ်ႊ။ ယူႇတီႈသုၼ်ႇတူဝ်ၶႃႈတႄႉ ၶဝ်တေပၼ် ၵေႃႈယဝ်ႉ ဢမ်ႇပၼ်ၵေႃႈယဝ်ႉ ဢမ်ႇလႆႈမုင်ႈမွင်းသင် ။ ၵူၺ်းၵႃႈယိၼ်းလီၸႂ်လဵၵ်ႉယူႇ ဢၼ်ၽူႈယႂ်ႇၵူၼ်းလူင်ၶဝ် လၢတ်ႈၵႂၢမ်းဢမ်ႇၸွမ်းၵႂၢမ်းၼၼ်ႉၵူၺ်းၶႃႈဢေႃႈ ” ဝႃႈၼႆ။

ၸၢႆးမွင်ႇ ထွင်းၻီးၼႆႉ ၵိူတ်ႇမိူဝ်ႈဝၼ်းတီႈ 02/05/1997 ပဵၼ်လုၵ်ႈၸၢႆး ၸၢႆးၺုၼ်ႉလႄႈ ၼၢင်းမွၼ်း မီးပီႈၼွင်ႉ  ႁူမ်ႈတွင်ႉ 2 ၵေႃႉ ပဵၼ်ၵူၼ်းၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ။ ပေႃႈမႄႈမႃးႁဵတ်း ၵၢၼ်ၼႂ်းမိူင်းထႆးသေ မၼ်းၸၢႆးၶဝ်ႈႁဵၼ်းတီႈ ႁူင်းႁဵၼ်းဝၢၼ်ႈႁူၺ်ႈသၢႆး ။ မိူဝ်ႈလဵၵ်ႉတူပ်ႉၸေႈႁဵတ်းႁၢင်ႈၶိူင်ႈမိၼ်သေၶဝ်ႈၶႅင်ႇၼႂ်းမိူင်းထႆးပေႉပိူၼ်ႈမူတ်း ။ ၽွင်းယူႇၸၼ်ႉ (ပေႃး) 4 မိူဝ်ႈဢႃယုလႆႈ 12 ပီ ၼၼ်ႉလႆႈတၢင်တူဝ်မိူင်းထႆးသေ ၵႂႃႇၶႅင်ႇႁိူဝ်းမိၼ်ၸေႈ တီႈဝဵင်းၶျီႊၿႃႊ မိူင်းၵျပၢၼ်ႊ ၸုမ်းမၼ်းၸၢႆးလႆႈႁပ်ႉသူးတီႈ 1 သုၼ်ႇတူဝ်မၼ်း ၸၢႆးလႆႈႁပ်ႉသူးရၢင်းဝလ်းတီႈ 3 ႁဵတ်းႁႂ်ႈၵူၼ်းမိူင်းထႆးႁပ်ႉႁူမ်ၸူမ်းတွၼ်ႈ။