ၵႃးတင်း လူတ်ႉၶိူင်ႈ ၽႃႇတမ်ၵၼ် တီႈၼႃးၵွင်းမူး ၸႄႈဝဵင်းမိူင်းတူၼ် ၵူၼ်းႁေႃႈလူတ်ႉၶိူင်ႈ လႆႈလူႉတၢႆ ထင်တီႈ ပလိၵ်ႈမၢၼ်ႈ တီႉၺွပ်းၵူၼ်းႁေႃႈၵႃး လႆႈပႃးၵွင်ႈပွတ်း လဝ်းၼိုင်ႈတင်း မၢၵ်ႇၵွင်ႈထႅင်ႈ ဝႃႈၼႆ။
ဝၼ်းတီႈ 14/07/2018 ယၢမ်းၵၢင်ၼႂ်မွၵ်ႈ 4:30 မူင်းၼၼ်ႉ ၸိုဝ်ႈႁွင်ႉလၢဝ်ႇဢေး ဢႃယု 41 ပီ ႁေႃႈၵႃးဝႆးသေ လေႃႇတမ်ၽႃႇသႂ်ႇ ၼၢင်းမူၼ်း ဢႃယု 32 ပီ တီႈၼႃးၵွင်းမူး ၼိူဝ်သဵၼ်ႈတၢင်း မိူင်းတူၼ် – ပုင်ႇပႃႇၶႅမ် ၸႄႈဝဵင်းမိူင်းတူၼ် ၸႄႈတွၼ်ႈ မိူင်းသၢတ်ႇ ၸိုင်ႈတႆးပွတ်းဢွၵ်ႇ။ ၵေႃႉပဵၼ်ၼၢင်းမူၼ်းတႄႉ လႆႈလူႉတၢႆထင်တီႈ ဝႃႈၼႆ။
ၸၢႆးသႅင် ၵူၼ်းၼႃးၵွင်းမူး လၢတ်ႈဝႃႈ “ဢၼ်ၶႃႈႁဝ်းႁူႉတႄႉ ၼၢင်းမူၼ်းၼႆႉ လုၵ်ႉတီႈၼႃႈၵွင်းမူးသေ တေၵႂႃႇၸၢႆႇ ၵၢတ်ႇ ၽိူဝ်ႇတေထိုင်တီႈႁိမ်းၵၢတ်ႇၼၼ်ႉ ၵႃးသမ်ႉလုၵ်ႉတၢင်း ပုင်ႇပႃႇၶႅမ် မႃးတၢင်း ၼႃႈၵွင်းမူး ႁေႃႈဝႆးသေ ဢမ်ႇ ၵုမ်းလႆႈႁႅင်းလူတ်ႉ လႆႈလေႃႈပုင်ႈတမ်ၽႃႇသႂ်ႇ ၼၢင်းမူၼ်းၼၼ်ႉ လူႉတၢႆၵႂႃႇ”ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၼႃႈတီႈၶဝ် လႆႈမႃးၵူတ်ႇထတ်း ၵုမ်းၶင် တူဝ်ၸဝ်ႈၵႃးဝႆႉသေ လႆႈၵူတ်ႇထတ်းႁၼ် ပႃးထႅင်ႈ တီႈၼႂ်းၵႃးၼၼ်ႉ မီးၵွင်ႈပွတ်း 1 လဝ်းလႄႈ မၢၵ်ႇၵွင်ႈထႅင်ႈ ဝႃႈၼႆ။
တေႃႈလဵဝ် ယူႇတီႈၸဝ်ႈၼႃႈတီႈပလိၵ်ႈ ၼႃးၵွင်းမူး လႆႈၵုမ်းၶင်တူဝ် ၵူၼ်းႁေႃႈၵႃး ၸိုဝ်ႈႁွင်ႉ လၢဝ်ႇဢေးဝႆႉ တီႈႁူင်းပလိၵ်ႈၼႃးၵွင်းမူး၊ တေသူင်ႇတူဝ်မၼ်းၸၢႆး ၵႂႃႇမိူင်းတူၼ်/ မိူင်းသၢတ်ႇ ဝႃႈၼႆ။
