ဝၼ်းတီႈ 25/02/2025 ယၢမ်းႁူဝ်ၶမ်ႈ 3 မူင်းထိုင် 6 မူင်းၶိုင်ႈၼႆႉ ႁွင်ႈၵၢၼ် ၾၢႆႇၶူၼ်ႉၶႂႃႉ ၾိင်ႈငႄႈ ၾိင်ႈထုင်း သၢပ်ႇမႄႈၼမ်ႉၶွင် တီႈၸၼ်ႉၸွမ်မႄႈၾႃႉလူင် ၸႄႈတွၼ်ႈၵဵင်းႁၢႆး ၸိုင်ႈထႆး ၸတ်းပၢင် တႆး – ထႆးႁူပ်ႉထူပ်းဢုပ်ႇဢူဝ်းၵၼ် လူၺ်ႈႁူဝ်ၶေႃႈ “รู้จักเพื่อนบ้านและเครือญาติของเรา” ဢၼ်မီးတီႈပွင်ႇဝႃႈ ႁူႉ ၸၵ်းလွင်ႈမိူင်းႁိမ်းႁွမ်းလႄႈ ပီႈၼွင်ႉၸိူဝ်ႉၶိူဝ်းႁဝ်း ၼႆၼၼ်ႉ။

ၼႂ်းပၢင်ၼႆႉ တႆးလႆႈတိုဝ်ႉတၢင်းၶိုၼ်ႈလၢတ်ႈၵႂၢမ်းလၢတ်ႈလွင်ႈတႆး ၼႂ်းၼၼ်ႉလၢတ်ႈၵႂႃႇပႃးဝႃႈ တႆးၼႆႉ ဢမ်ႇၸႂ်ႈၶိူဝ်းလဵဝ်ၵၼ်တင်း ၸၢဝ်းမၢၼ်ႈ။ ႁႂ်ႈၸၢဝ်းထႆးလႄႈတင်း လုမ်ႈၾႃႉ လႆႈႁပ်ႉႁူႉၸႅင်ႈလႅင်း ၼႆယဝ်ႉ။

ပၢင်ႁူပ်ႉထူပ်းတႆး – ထႆး ဢၼ်ၸတ်းႁဵတ်းတီႈၸၼ်ႉၸွမ်မႄႈၾႃႉလူင်ၼၼ်ႉ တူဝ်တႅၼ်းပီႈၼွင်ႉတႆး ဢၼ်လႆႈၶဝ်ႈႁူမ်ႈၸွမ်းၵေႃႈ ဝၵ်ႉဢဝ်တိုဝ်ႉတၢင်းလီသေ ပိုၼ်ၽၢဝ်ႇႁႂ်ႈၵူၼ်းထႆးလႄႈ လုမ်ႈၾႃႉ ႁပ်ႉ ႁူႉဝႃႈ တႆးလႄႈမၢၼ်ႈ ဢမ်ႇၸႂ်ႈသၢႆၸိူဝ်ႉလဵဝ်ၵၼ်။

တႆးလႄႈထႆးၼႆႉ ၸဵမ်မိူဝ်ႈၸူဝ်ႈပူႇပၢၼ်မွၼ်ႇၵေႃႈ ယၢမ်ႈလၢတ်ႈဢွၵ်ႇမွၵ်ႇၶႆႈၵၼ်မႃးဝႃႈ ပဵၼ်ပီႈၼွင်ႉၵၼ်။ ၵူၺ်းၵႃႈ ယွၼ်ႉငဝ်းလၢႆးၵၢၼ်မိူင်းၵၢၼ်သိုၵ်း ၵူႈၸိူဝ်ႉၵူႈလွင်ႈလႅၵ်ႈလၢႆႈမႃးႁႅင်းလႄႈ ဢဝ်လွင်ႈ ၼႆႉ ၸၢင်ႁၢႆမႃးလွႆးလွႆး။

ၾၢႆႇၼိုင်ႈၵေႃႈ ထႆးသမ်ႉမီးၸိုင်ႈမိူင်းလွတ်ႈလႅဝ်းသဝ်းၶေႃႁင်းၵူၺ်း တႆးသမ်ႉ တူၵ်းယူႇတႂ်ႈမိုဝ်းမၢၼ်ႈလႄႈ ဢၼ်ယၢမ်ႈၸမ်ၸႂ်ၵၼ်မႃးၸိူဝ်းၼၼ်ႉၵေႃႈ ႁၢင်ႇႁိူၼ်သေ ယဵၼ်းပဵၼ်ပိူၼ်ႈၵႂႃႇ။  

မိူၼ်ၼင်ႇ ၽႃႇသႃႇၵႂၢမ်းလၢတ်ႈၵေႃႈ တႆးလႄႈထႆးၼႆႉ ဢၼ်မိူၼ်ၵၼ်မီးတင်းၼမ်တင်းလၢႆ။ ဢၼ် ႁဵတ်း ႁႂ်ႈၽႃႇသႃႇၵႂၢမ်းလၢတ်ႈတႆး ၼႂ်းမိူင်းထႆးလႄႈ မိူင်းတႆးပႅၵ်ႇပိူင်ႈၵၼ်မႃးၵေႃႈ ယွၼ်ႉၼမ်ႉလိၼ် ႁိၼ်ၽႃပိူင်ႈၵၼ်။ ထႆးသမ်ႉ ယူႇဢိူမ်ႈၸမ်ၸၢဝ်းၶမဵၼ်ၵေႃႈပိူင်ၼိုင်ႈလႄႈ ဢဝ်ၽႃႇသႃႇၵႂၢမ်းလၢတ်ႈ ၶမဵၼ်မႃးလေႃး။ လိူဝ်ၼၼ်ႉ ၶေႃႈၸႂ်ႉတိုဝ်းၼႂ်းပႃႇလိလႄႈ သၼ်သၵရိတ်ႇ ၸိူဝ်းၼႆႉၵေႃႈ ဢဝ်မႃး လေႃးၼမ်။ 

တႆးသမ်ႉ လႆႈယူႇထုၵ်းထူၵၼ်တင်းၸၢဝ်းမၢၼ်ႈမႃးလႄႈ ဢဝ်ၾိင်ႈမၢၼ်ႈ ၵႂၢမ်းလၢတ်ႈမၢၼ်ႈ မႃးၸိမ်သႂ်ႇၸႂ်ႉလေႃး ပီယၢဝ်းၶၢဝ်းႁိုင်။ ပေႃးဢမ်ႇၶႂ်ႈၸႅၵ်ႇလႆႈဝႃႈ ပဵၼ်ထွႆႈၵႂၢမ်းတႆးႁႃႉမၢၼ်ႈ။ လွင်ႈၼႆႉ ႁဵတ်း ႁႂ်ႈၽႃႇသႃႇတႆး – ထႆး ပိူင်ႈႁွႆႈၵၼ်မႃးတင်းၼမ်တင်းလၢႆ ထိုင်ႁၢၼ်ႉယၢမ်းလဵဝ်။

ၼင်ႇႁိုဝ် ၽႃႇသႃႇလိၵ်ႈလၢႆးၵႂၢမ်းလၢတ်ႈ ပေႃးတေၶဝ်ႈဢွၵ်ႇၵၼ်လႆႈၶိုၼ်းသေ တေၸမ်ၵၼ်လႆႈၶိုၼ်း ၼၼ်ႉ ၸင်ႇမီးပၢင်ႁူပ်ႉထူပ်းတႆး – ထႆး ဢၼ်သႂ်ႇႁူဝ်ၶေႃႈဝႆႉဝႃႈ “รู้จักเพื่อนบ้านและ เครือญาติของเรา” ဢၼ်မီးတီႈ ပွင်ႇဝႃႈ ႁူႉၸၵ်းလွင်ႈမိူင်းႁိမ်းႁွမ်းလႄႈ ပီႈၼွင်ႉၸိူဝ်ႉၶိူဝ်းႁဝ်း ၼႆႉမႃးယဝ်ႉ ၸဝ်ႈၶိုၼ်းသႂ် ၸႂ်ယဵၼ် ၽူႈၵေႃႇတင်ႈ ၸုမ်းၶၢဝ်ႇၽူႈတွႆႇႁွၵ်ႈ လၢတ်ႈၼႄဝႆႉၼင်ႇၼႆ –

“ဝၢႆးသိုၵ်းမၢၼ်ႈ ယိုတ်းမိူင်းၼႆႉ ၵူၼ်းၼႂ်းမိူင်းႁူမ်ႈတုမ်ၵေႃႈ ၶဝ်ႈၼႂ်းမိူင်းထႆးၼမ်လႄႈ ၸိူဝ်းပဵၼ်ၸဝ်ႈ ႁိူၼ်း မိူၼ်ၼင်ႇ ၵူၼ်းထႆးၼႆႉ လူဝ်ႇႁူႉၸၵ်းၶဝ်လီလီ။ ပေႃးႁဝ်းႁူႉၸၵ်းလီလီၵေႃႈ ၵူၼ်းတေႃႇၵူၼ်း ၸၢင်ႈဢီးလူ တေၸၢင်ႈမေႃႁၼ်ၸႂ်ၵၼ် ႁဝ်းၸၢင်ႈၸွႆႈထႅမ်ၵၼ်။ ပေႃးဢမ်ႇႁူႉလွင်ႈမၼ်းလီလီၵေႃႈ ထႆးၶဝ်တေဢွၼ်ၵၼ်ဝႃႈ မိူင်းထႆးၵေႃႈ ပေႃးတုၵ်ႉၶၼႃႇယဝ်ႉ ႁဵတ်းသင်လႄႈ ၶဝ်ႈမႃးမိူင်းထႆးတိၵ်း တိၵ်း တေဝႃႈၼႆ။ ယွၼ်ႉၼၼ် ၸင်ႇၸတ်းပၢင်ဢၼ်ၼႆႉ ႁႂ်ႈၸမ်ၸႂ်ၵၼ်ၼၼ်ႉၼႃႇ။ ပၢင်ဢုပ်ႇဢူဝ်း ၼႆႉ ၵွပ်ႈသင်လႄႈ ဢဝ်တႆးမႃးဢုပ်ႇဢွၼ်တၢင်းပိူၼ်ႈလႃႇၼႆၸိုင် ယွၼ်ႉဝႃႈတႆးၼႆႉ ၸမ်ထႆးသေပိူၼ်ႈ သုတ်းၼၼ်ႉၵႂႃႈ”- ဝႃႈၼႆ။

ၸူးၸႂ်တႄႉ တႆးႁဝ်းၵေႃႈ ၶႂ်ႈႁႂ်ႈမၼ်းမိူၼ် မိူင်းလၢဝ်းလႄႈ မိူင်းထႆး လၢတ်ႈတေႃႇၶဝ်ႈဢွၵ်ႇၵၼ်လႆႈ လူၺ်ႈဢမ်ႇလူဝ်ႇၵူၼ်းယူႇၵၢင်(လၢမ်ႈ)သေ ပိၼ်ႇၽႃႇသႃႇ။ ဝၢၼ်ႈမိူင်းႁဝ်းဢမ်ႇၸႂ်ႈ ဢၼ်လဵဝ်ၵၼ် သေတႃႉ ၽႃႇသႃႇၵႂၢမ်းလၢတ်ႈတႄႉ လူဝ်ႇယုၵ်ႉမုၼ်းႁႂ်ႈပွင်ႇၸႂ်ၶဝ်ႈဢွၵ်ႇၵၼ်ငၢႆႈၼႆ ၸဝ်ႈၶိုၼ်းသႂ် ၸႂ်ယဵၼ် သိုပ်ႇလၢတ်ႈ။

မိူဝ်ႈဢိင်းၵလဵတ်ႈၶဝ် တႄႇၶဝ်ႈမႃးတတ်းလႅၼ်လိၼ်ၼႆႉ တႆးလႄႈထႆး တိုၵ်ႉၶဝ်ႈဢွၵ်ႇၵႂႃႇ မႃးၸူးၵၼ် ငၢႆႈငၢႆႈ မိူၼ်ၸိုင်ႈမိူင်းလုၵ်ႈလဵဝ်ၵၼ် ဢမ်ႇလူဝ်ႇၸႂ်ႉဝႂ်ၶၢမ်ႈမိူင်း ပၢတ်ႉသၽွတ်ႇ မိူၼ်ၵၢပ်ႈယၢမ်းလဵဝ်။

မိူဝ်ႈဢွၼ်တၢင်း ၸဝ်ႈၾႃႉမိူင်းတႆးလႄႈ မိူင်းထႆး ၸမ်ၸႂ်ၵၼ် မိူၼ်ပီႈၼွင်ႉၶိူဝ်းလဵဝ်ၵၼ်။ မိူဝ်ႈၼၼ်ႉ ၸဝ်ႈၾႃႉတင်းသွင်ၾၢႆႇ ယင်းဢဝ်လုၵ်ႈလၢၼ်လိၼ်ၵူပ်ႉၵူႈပဵၼ်ႁိူၼ်းၵၼ်လူးၵွၼ်ႇ။ မိူၼ်ၼင်ႇ ၸဝ်ႈ ၾႃႉၵဵင်းတုင်လႄႈ ၸဝ်ႈၾႃႉလမ်းပၢင်း၊ ၸဝ်ႈၾႃႉ ၵဵင်းမႆႇ ၸဵမ်ၸိူဝ်းၼႆႉ။

ၵၢပ်ႈယၢမ်းလဵဝ် ယွၼ်ႉငဝ်းလၢႆးလၢႆလွင်ႈသေ ယႃႇဝႃႈတေၸမ်ၸႂ်ၶဝ်ႈဢွၵ်ႇၵၼ် ယိင်ႈၶႅၼ်းႁၢင်ႇၵႆ ၵၼ်ၵႂႃႇတိၵ်းတိၵ်းယဝ်ႉ။

ႁွင်ႈၵၢၼ် ၾၢႆႇၶူၼ်ႉၶႂႃႉၾိင်ႈငႄႈၾိင်ႈထုင်း ၸၢဝ်းၶိူဝ်းသၢပ်ႇမႄႈၼမ်ႉၶွင်ၼႆႉ လႆႈတူင်ႉၼိုင်မႃး ၶၢဝ်း တၢင်း 27 ပီ။ တၢင်းယိူင်းဢၢၼ်းတႄႉ ၶႂ်ႈႁႂ်ႈၵူႈၸၢဝ်းၶိူဝ်းၸိူဝ်းယူႇၸွမ်းသၢပ်ႇမႄႈၼမ်ႉၶွင် ၽိုၼ်ႉၽူး ၶိုၼ်းၾိင်ႈငႄႈၾိင်ႈထုင်းၸဝ်ႈၵဝ်ႇ။ ႁႂ်ႈၵူႈၸၢဝ်းၶိူဝ်းႁတ်းၼႄဝႃႈၸဝ်ႈၵဝ်ႇပဵၼ်ၶိူဝ်းသင် ၼႆၸိူဝ်းၼႆႉ။ ယွၼ်ႉငဝ်းလၢႆးလၢႆလွင်ႈသေ ၸိူဝ်းၶဝ်ႁၢမ်းသုၼ်ႇ ႁၢမ်းၸိုင်ႈမိူင်းဝႆႉလႄႈ လူဝ်ႇပၼ်ႁႅင်းပူၵ်းပွင်ပၼ် ၶိုၼ်း ၼႆယဝ်ႉ။

ၸဝ်ႈၶိုၼ်းသႂ် ၸႂ်ယဵၼ် သိုပ်ႇလၢတ်ႈၼႄဝႃႈ – “ထႆးၼႆႉ ပေႃးႁၼ်တႆးၵေႃႈဝႃႈ ပဵၼ်ၽမႃႉ ပဵၼ်မၢၼ်ႈၼႆ တိၵ်းတိၵ်း။ တီႈတႄႉမၼ်းဢမ်ႇၸႂ်ႈ။ ႁဝ်းလူဝ်ႇပၼ်တၢင်းႁူႉလွင်ႈၼႆႉ ၼမ်ၼမ်။ တႆးႁဝ်းၶႃႈၵေႃႈ မႃး ယူႇမိူင်းပိူၼ်ႈၵေႃႈ ယူႇႁူမ်ႈပိူၼ်ႈ ယႃႇႁၵ်းၽိူဝ်။ ၼင်ႇႁိုဝ် တႆးႁဝ်းတေမီးတၢင်းႁူႉၼၼ်ႉ ႁဝ်းၵေႃႈ လူဝ်ႇမေႃဢွၼ်ၵၼ်ၶတ်းၸႂ်သွၼ်ပွၼ်ႈၵၼ်။ ယႃႇပေၼႄးၵၼ်။ ယႃႇပေႁႂ်ႈပိူၼ်ႈဝႃႈ မႃးယူႇမိူင်းပိူၼ်ႈ သေ ဢဝ်ၸိုဝ်ႈပိူၼ်ႈလူႉ။ တႆးတင်းထႆးၼႆႉ ႁႂ်ႈမိူၼ်ၼင်ႇ ၼမ်ႉလေႃးၼူမ်းၼၼ်ႉ။ ၼမ်ႉတင်းၼူမ်းၼႆႉ ပေႃးလေႃးၵၼ် ယႅၵ်ႈဢမ်ႇဢွၵ်ႇသေဢိတ်းယဝ်ႉလူး။ ယႃႇပေႁႂ်ႈမိူၼ် ၼမ်ႉတင်းၼမ်ႉမၼ်းလေႃး ၵၼ်”- ဝႃႈၼႆ။  

မိူဝ်ႈၸဝ်ႈၶိုၼ်းသႂ် ၸႂ်ယဵၼ်  ၶိုၼ်ႈႁွတ်ႈမွၵ်ႇလၢတ်ႈၶေႃႈၵႂၢမ်း ၼႂ်းပၢင်ၼၼ်ႉ မၼ်းၸဝ်ႈလၢတ်ႈပႃး လွင်ႈတူဝ်ထူပ်းမၼ်းၸဝ်ႈလႄႈ လၢတ်ႈပႃးလွင်ႈတႆး – ထႆး။ လၢတ်ႈပႃးဝႃႈ ၵႃႈၼမ်ႉၶူင်းဢမ်ႇႁႅင်ႈ တႆး လႄႈထႆး တိုၵ်ႉပဵၼ်သၢႆၸိူဝ်ႉႁိူဝ်ႇငိူၼ်ႈၶိူဝ်းလဵဝ်ၵၼ်ယူႇ။ ယွၼ်ႉၼၼ် တႃႇတင်းသွင်ၾၢႆႇ တေယူႇ လွတ်ႈၵႂႃႇလႆႈၵတ်းၵတ်းယဵၼ်ၼၼ်ႉ လမ်ႇလွင်ႈတီႈသုတ်း ဝႃႈၼႆ။

ၼႂ်းပၢင်ၼႆႉ မီးၶူးပူင်သွၼ်လူင် တွၵ်ႊတိူဝ်ႊၽူၼ်ႊလ်ဝတ်ႉ ပရၽတ်ႊထွင်ႊ ၸၼ်ႉၸွမ်မႄႈၾႃႉလူင် ၾၢႆႇပၢႆးမွၼ်း ผู้อำนวยการสำนักวิชาศิลปศาสตร์ လႄႈ ၸၢႆးၶိူဝ်းလိူၼ် တုင်းၶမ်း ၽူႈၵိူဝ်းၵုမ်ၾၢႆႇလိၵ်ႈလၢႆးတႆး – ႁိၼ်တႅၵ်ႇ ၶဝ်ၸဝ်ႈၵေႃႈ မွၵ်ႇလၢတ်ႈၶေႃႈၵႂၢမ်း။

လိူဝ်ၼၼ်ႉ ၼၢႆႊသိုပ်ႇသၵုၼ်ႊ ၵိတ်ႇၼုၵွၼ်ႊ ၶူးပူင်သွၼ်လူင် ၾၢႆႇယုၵ်ႉမုၼ်းတူင်ႇၵူၼ်း ၸၼ်ႉၸွမ် မႄႈၾႃႉလူင်လႄႈ ၽူႈၵေႃႇတင်ႈၸုမ်းၸွႆႈထႅမ်ႁႅင်းၵၢၼ်၊ တွၵ်ႊတိူဝ်ႊ သီရတႃႊ ၶေမႃႊၼိတ်ႊထႃထႆႊ ၶူးပူင်သွၼ်ၾၢႆႇၵၢၼ်မိူင်း Political Science ၊ ၸၢႆးယွတ်ႈမိူင်း ၽူႈလဵပ်ႈႁဵၼ်းၾၢႆႇၸၼ်ႁၢင်ႈ ဝၢၼ်ႈပူင်ႇၼွႆႉ လႄႈ လုၵ်ႈႁဵၼ်း ၸၼ်ႉၸွမ်ရတ်ႉၶျၽတ်း ဢိၵ်ႈတင်းၸုမ်းၸၢဝ်းတႆး ၸိူဝ်းယူႇ ၵဵင်းႁၢႆး ၵဵင်းမႆႇ မႄႈႁွင်ႈသွၼ် ၸိူဝ်းၼႆႉမႃးၶဝ်ႈႁူမ်ႈ။

မိူၼ်ၼင်ႇ သိုဝ်ႇၶၢဝ်ႇၸိုဝ်ႈယႂ်ႇၼႂ်းမိူင်းထႆး လၢႆၸုမ်းၵေႃႈ ၶဝ်ႈႁူမ်ႈလဵပ်ႈႁဵၼ်းသေ ပိုၼ်ၽႄႈၶေႃႈမုလ်း လွင်ႈတႆးဝႆႉ လၢႆဢၼ်။

ၸၢႆးၶိူဝ်းလိူၼ် တုင်းၶမ်း ၽူႈၵိူဝ်းၵုမ်ၾၢႆႇလိၵ်ႈလၢႆးတႆးႁိၼ်တႅၵ်ႇ (ႁိုဝ်) ဝၢၼ်ႈထိူတ်ႉထႆး လၢတ်ႈၼႂ်း ပၢင်ၼႆႉဝႃႈ – တႆးလႄႈထႆးၼႆႉ ယၢမ်ႈၵမ်ႉၸွႆႈၵၼ်မႃးပၢၼ်သိုပ်ႇပၢၼ်လႄႈ တႆးၵေႃႈ ၼပ်ႉယမ်ၸဝ်ႈ ၾႃႉထႆးၵူႈၸဝ်ႈၵူႈတူၼ်။ ၼမ်ႉၸႂ်တႆးၼႆႉ ယူႇမိူင်းလႂ်ၵေႃႈ ၸွႆႈထႅမ်မိူင်းၼၼ်ႉ။ ယွၼ်ႉၼၼ် ၶႂ်ႈႁႂ်ႈ ၸၢဝ်းထႆးႁူႉပွင်ႇဝႃႈ ၵူၼ်းတႆးၼႆႉ ဢမ်ႇၸႂ်ႈၸၢဝ်းမၢၼ်ႈ။ တႆးယၢမ်ႈမီးဝၢၼ်ႈမိူင်း ဢၼ်ၸဝ်ႈၾႃႉ ၽွင်း ငမ်းမႃးႁင်းၶေႃယူႇ ဝႃႈၼႆ။

တွၵ်ႊတိူဝ်ႊ သီရတႃႊ ၶေမႃႊၼိတ်ႊထႃထႆႊ Political Science လၢတ်ႈၼႄၵႂႃႇၼႂ်းပၢင်ၼၼ်ႉဝႃႈ – ဝၢႆးသိုၵ်း မၢၼ်ႈ ယိုတ်းဢၢမ်းၼၢတ်ႈယဝ်ႉ ၵူၼ်းမိူင်းတႆးလႄႈတၢင်ႇၸႄႈမိူင်း မီးလွင်ႈတုမ်ႉတိူဝ်ႉၼမ်။ ၸဵမ်မိူဝ်ႈ ပၢၼ်သိုပ်ႇပၢၼ်ၵေႃႈ သိုၵ်းမၢၼ်ႈၼႆႉ ၵမ်ၵိၼ်းၸၢဝ်းၶိူဝ်းမႃး။ သိုၵ်းမၢၼ်ႈ ဢွၵ်ႇပိူင်ပေႃႇလသီႇ ဢၼ် ၼိုင်ႈယဝ်ႉဢၼ်ၼိုင်ႈသေ ႁဵတ်းႁႂ်ႈပၼ်ႁႃၼႂ်းမိူင်းတႆးၼႆႉ ၵႄႈယၢပ်ႇမႃးလိူဝ်ၵဝ်ႇ။ ပေႃးတူၺ်းၼႂ်းမိူင်း တႆး ယိင်ႈၶႅၼ်းယုင်ႈယၢင်ႈမႃးလိူဝ်ၵဝ်ႇ ယွၼ်ႉဝႃႈ မီးၸၢဝ်းၶိူဝ်းလၢၵ်ႇလၢႆ ဢၼ်ၾိင်ႈဢမ်ႇမိူၼ်ၵၼ်။ ထႅင်ႈလွင်ႈၼိုင်ႈၵေႃႈ တပ်ႉသိုၵ်းတႆး 2 ၸုမ်းၵေႃႈ ဢမ်ႇမႅၼ်ႈၵၼ် တိုၵ်ႉၸႅၵ်ႇၵၼ်ပွတ်းႁွင်ႇ ပွတ်း ၸၢၼ်းယူႇ။ ၸုမ်းလုၵ်ႉၽိုၼ်ႉ ၵူႈၸုမ်းၸုမ်းၼႆႉ တေႃႇသူႈတႃႇပဵၼ်မိူင်းတီႊမူဝ်ႊၶရေႊသီႊ ဢၼ်ၼႆႉ လမ်ႇလွင်ႈတႃႇမိူင်းတႆးတႄႉတႄႉ။

ပဵၼ်ႁိုဝ်မႃးၵေႃႈ ၸၢဝ်းၶိူဝ်းၼႂ်းမိူင်းတႆး တိုၼ်းလူဝ်ႇဢုပ်ႇဢူဝ်းၵႄႈလိတ်ႈၵၼ်ၵႂႃႇ။ သင်ဝႃႈ တိုၵ်ႉတေ လေႃႇတိုၵ်းၵၼ်ယူႇၵေႃႈ ၵူၼ်းမိူင်းတႆးၵူၺ်း တေတုမ်ႉတိူဝ်ႉတူၵ်းသုမ်း – ဝႃႈၼႆ။

ပၢင်ႁူပ်ႉထူပ်း ဢၼ်ယူႇတႂ်ႈႁူဝ်ၶေႃႈဢၼ်ဝႃႈ ႁူႉၸၵ်းမိူင်းႁိမ်းႁွမ်းလႄႈ ပီႈၼွင်ႉၸိူဝ်ႉၶိူဝ်းႁဝ်းၼႆႉ တေဢမ်ႇၸႂ်ႈတႃႇတႆးၵူၺ်း မိူၼ်ၼင်ႇ ၸၢဝ်းၶိူဝ်းတၢင်ႇဢၼ် ၸၢဝ်းယၢင်းလႅင်၊ ယၢင်းၽိူၵ်ႇ၊ မွၼ်း  ၸိူဝ်းၼႆႉၵေႃႈ တေမီးမႃးပၢင်ႁူပ်ႉထူပ်းၵၼ်ထႅင်ႈ။ ဢၼ်ၸတ်းမိူဝ်ႈလဵဝ်ၼႆႉ လႆႈဝႃႈ ပဵၼ်တႃႇၸၢဝ်း တႆးလႄႈထႆး ပဵၼ်တွၼ်ႈၼိုင်ႈ။ ပေႃးတွၼ်ႈသွင်မႃး တေၸၢင်ႈပဵၼ်ထႅင်ႈ တၢင်ႇၸၢဝ်းၶိူဝ်းႁူပ်ႉထူပ်း ၵၼ်။ ပၢင်ႁူပ်ႉထူပ်း ပွၵ်ႈၼႆႉ မီးၵူၼ်းၶဝ်ႈႁူမ်ႈ 100 ပၢႆ ။

ၼႂ်းၶပ်းမၢႆပၢင်ႁူပ်ႉထူပ်းပွၵ်ႈၼႆႉ ၸၢဝ်းၶိူဝ်းတႆး လႆႈသုၼ်ႇလီ လႆႈၼႄၾိင်ႈငႄႈၾိင်ႈထုင်း မိူၼ်ၼင်ႇ ၵႃႈၼူၵ်ႉ ၵႃႈလၢႆးလႅဝ်း တၢင်းၵႃႈတႆးၵူႈသႅၼ်းသႅၼ်းလႄႈ လဵၼ်ႈၸိူင်းၼႄလွင်ႈၵူၼ်းမိူင်းႁူမ်ႈတုမ် တုၵ်ႉၸွမ်းသိုၵ်းသိူဝ်သေ လႆႈပၢႆႈလႆႈၼီၸိူဝ်းၼႆႉ။

လိူဝ်ၼၼ်ႉၵေႃႈ မီးၶပ်းမၢႆလဵင်ႉပႃးၶဝ်ႈၽၵ်းၸၢဝ်းၶိူဝ်းတႆးလႄႈ တၢင်းၵိၼ်ပိုၼ်ႉတီႈ မိူင်းၸိုင်ႈထႆး တွၼ်ႈၼိူဝ်။ ၼႆႉၵေႃႈၼႄလႆႈဝႃႈ တၢင်းၵိၼ်တႆးလႄႈထႆး ဢမ်ႇပေႃးပိူင်ႈသင်ၵၼ်။