ပၢၼ်သိုၵ်းမၢၼ်ႈ ၵုမ်းၵမ် ၽွင်းငမ်းဝၢၼ်ႈမိူင်းမႃး ပၢၼ်သိုပ်ႇပၢၼ် ၵူၼ်းၼႂ်းမိူင်းတႆး ဢမ်ႇတွၼ်ႉလႆႈ ယူႇသႃႇ လူမ်ၸႂ်မႃးသေပွၵ်ႈ။ ယွၼ်ႉတုၵ်ႉယၢၵ်ႈၶၢၼ်ၸႂ်ၼႃႇလႄႈ ၸင်ႇဢွၼ် ၵၼ်ၽူင်ႉပၢႆႈ ၵႂႃႇယူႇ ၼွၵ်ႈမိူင်း တင်းၼမ်တင်းလၢႆ။ ဢၼ်ၼမ်သေပိူၼ်ႈၵေႃႈ ပၢႆႈၸူးမိူင်းထႆး။

ယၢမ်းလဵဝ် ဝၢႆးလူင်ပွင်ၸိုင်ႈမိူင်းထႆး ၸဝ်ႈၼႃႈတီႈထႆး ႁူမ်ႈမိုဝ်းၵၼ်တင်း လူင်ပွင်ၸိုင်ႈမၢၼ်ႈ ႁဵတ်း ပၼ်ဝတ်းဝႂ်ႁႅင်းၵၢၼ်ယၢၼ်မိူင်း ၵူၼ်းမိူင်းမၢၼ်ႈ ၼႂ်းမိူင်းထႆးမႃးၼႆႉ သမ်ႉဝႃႈ ၸွမ်းၼင်ႇပေႃႇလသီႇ လွင်ႈႁူမ်ႇလူမ်ႈၸိုင်ႈမိူင်းၼႆသေ  ၵူတ်ႇသွၵ်ႈလိုပ်ႈလမ်း တီႉၺွပ်းဢဝ်လိူင်ႈႁႅင်းၵၢၼ်ယၢၼ်မိူင်း ၵူၼ်း ၸိူဝ်း ဢၼ်ဢမ်ႇထုၵ်ႇၸွမ်းပိူင်။

ယၢမ်းလဵဝ် ယွၼ်ႉပိူဝ်ႈၸဝ်ႈၼႃႈတီႈထႆး ၶဵင်ႈၶႅင်ႁၢဝ်ႈႁႅင်းၼႃႇလႄႈ ႁႅင်းၵၢၼ်ယၢၼ်မိူင်းၶၢၼ် ၸႂ်ၵပ်ႉ ၵိၼ်းဝႆႉ။ တေသိုပ်ႇယူႇၵေႃႈ ၶၢၼ်ၸႂ် တေပွၵ်ႈၶိုၼ်းၵေႃႈဢမ်ႇၸၢင်ႈ ၼႆယဝ်ႉ။

ၵူၼ်းမိူင်းတႆး  ၼပ်ႉႁူဝ်လၢၼ်ႉႁူဝ်သႅၼ် ဢွၼ်ၵၼ်ၶၢႆႉပၢႆႈလႅၵ်ႈလၢႆႈတီႈယူႇတီႈသဝ်းမႃး ၸဵမ်မိူဝ်ႈလၢႆ ၸူဝ်ႈၵူၼ်းလႄႈ လွင်ႈပၢႆႈလွင်ႈၼီၼႆႉ သမ်ႉပေႃးၶႂ်ႈပဵၼ်ၾိင်ႈၵူၼ်းမိူင်းတႆးဝႆႉ ဢၼ်ၼိုင်ႈယဝ်ႉ။

ပၢႆႈယဝ်ႉၵေႃႈ ပႆႇယဝ်ႉ တိုၵ်ႉလႆႈတုၵ်ႉလႆႈယၢၵ်ႈ ပႆႇၶၢမ်ႈပူၼ်ႉလႆႈတၢင်းတုၵ်ႉၸိူဝ်းၼႆႉလႆႈ။ ၸိူဝ်းဢၼ် ပၢႆႈၶဝ်ႈမိူင်းထႆး လႆႈလီလႆႈပဵၼ်ၸိူဝ်းၼႆႉ မီးယူႇသေတႃႉၵေႃႈ ၵမ်ႈဢေႇၵူၺ်း။ ၵူၼ်းဢၼ်လႆႈၶၢမ်ႇ ပိူၼ်ႈပေႉၵိၼ်လူလၢႆ ဢၼ်ဢမ်ႇဢွၵ်ႇၸိုဝ်ႈဢွၵ်ႇသဵင် ၸိူဝ်းၼႆႉမီးတင်းၼမ်တင်းလၢႆ။

ႁႅင်းၵၢၼ် ၵမ်ႈၼမ်ၵေႃႈ ၼင်ႇႁိုဝ် တေဢမ်ႇၺႃးတီႉၺွပ်းပၼ်တူတ်ႈတၢမ်ႇၼၼ်ႉ ၶတ်းၸႂ်ဝႆႉယူႇၵူႈ လွၵ်းၵူႈလၢႆး။ မၢင်ၸိူဝ်းၵေႃႈ ႁိပ်ႈၼႅတ်ႈႁႃလၢႆးတၢင်း ႁဵတ်းဝတ်းႁဵတ်းဝႂ် တၢင်ႇဢၼ်တၢင်ႇသႅၼ်းသဵင်ႈ ငိုၼ်းၼပ်ႉႁူဝ်မိုၼ်ႇ ႁူဝ်သႅၼ် ငိုၼ်းထႆး။ သဵင်ႈငိုၼ်းႁဵတ်းဝတ်းယဝ်ႉသေတႃႉ မၢင်ၸိူဝ်းသမ်ႉ ဢမ်ႇႁူႉ ဢမ်ႇလဵပ်ႈႁဵၼ်း ပိူင်ၼႂ်းဝတ်းၼၼ်ႉ လီလီလႄႈ ထိုင်တီႈၺႃးၸဝ်ႈၼႃႈတီႈထႆး တီႉၺွပ်းဢဝ်လိူင်ႈ သုမ်းငိုၼ်းသုမ်းၶၢဝ်းယၢမ်းၸွမ်းၵေႃႈ မီးၼမ်။

မိူၼ်ၼင်ႇ မၢင်ၸိူဝ်း ယိပ်းဝႂ်ၶၢမ်ႈမိူင်း ၽတ်ႉသပွတ်ႇ (Passport) ၶဝ်ႈမႃးသေ ႁူႉဝႃႈ ၶႂ်ႈႁဵတ်းၵၢၼ် ၵူၺ်း ။ ဢမ်ႇႁူႉဝႃႈ ဝႂ်ၶၢမ်ႈမိူင်း ဢၼ်ၸဝ်ႈၵဝ်ႇၸႂ်ႉၼၼ်ႉ ၸွင်ႇႁဵတ်းၵၢၼ်လႆႈဢမ်ႇလႆႈ။ မၢင်ၸိူဝ်း ပဵၼ်ဝႂ်ၶၢမ်ႈမိူင်း ဢၼ်ၸႂ်ႉဝီႊသႃႊ တႃႇဢႅဝ်ႇလႄႇၵူၺ်း သမ်ႉမႃးႁဵတ်းၵၢၼ် – ၸိူဝ်းၼႆႉ မၼ်းၽိတ်း ပၵ်းပိူင် ဢၼ်ထႆးတမ်းဝႆႉ။

ၵူၼ်းၸိူဝ်းယိပ်းၽတ်ႉသပွတ်ႇ ပပ်ႉသီလႅင်လႄႈ သီႊဢၢႆႊ (CI) ပပ်ႉသီၶဵဝ် ၸိူဝ်းၼႆႉၵေႃႈ ႁဵတ်းၵၢၼ် လႆႈယူႇ ဝႃႈၼႆသေတႃႉ ဢၼ်ထႆးတတ်းမၵ်းဝႆႉပၼ် ႁဵတ်းလႆႈၵၢၼ် 4 သႅၼ်းၵူၺ်း။ မိူၼ်ၼင်ႇ ၵၢၼ် တမ်ႇငႃႈ ၊ ၵၢၼ်ၵေႃႇသၢင်ႈ (ၵေႃႇၵၢႆႇ)၊  ၵၢၼ်မႄႈဝၢၼ်ႈ ႁဵတ်းၸွမ်းႁိူၼ်းယေးလႄႈ ၵၢၼ်ႁဵတ်းလွင်ႈ မူတ်းသႂ် ၸွမ်းႁူင်းၵၢၼ်ၶွမ်ႊပၼီႊ ၸဵမ်ၸိူဝ်းၼႆႉ။ ပေႃးလိူဝ်သေၼၼ်ႉ ပႆႇမီးၶႂၢင်ႉတႃႇတေၵႂႃႇႁႃ ႁဵတ်း။ ၵမ်ႈၽွင်ႈ ၼႂ်းဝတ်းဝႂ်တႅမ်ႈဝႆႉဝႃႈ ႁဵတ်းၵၢၼ်သူၼ်ၵၢၼ်ၼႃး သမ်ႉၵႂႃႇပႂ်ႉႁၢၼ်ႉပႂ်ႉသႅင်ႇၼႆၵေႃႈ ၸၢင်ႈၺႃးၸဝ်ႈၼႃႈတီႈ ဢဝ်လိူင်ႈပၼ်တၢမ်ႇလႆႈ ၼႆယဝ်ႉ။

ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ယၢၼ်မိူင်း MAP Foundation လၢတ်ႈၽူႈတွႆႇႁွၵ်ႈဝႃႈ –“မိူၼ်ၸိူင်ႉၼင်ႇ ၶၢႆၶူဝ်းၶၢႆၶွင် ၸိူဝ်းၼၼ်ႉ ႁႂ်ႈၾၢင်ႉသတိၵၼ် ယႃႇပေႃးဢွၵ်ႇၼႃႈဢွၵ်ႇတႃႁႅင်းၼႃႇ။ ႁဝ်းဢမ်ႇႁူႉလႆႈဝႃႈ ပိူၼ်ႈတေမႃးၵူတ်ႇထတ်းႁဝ်းမိူဝ်ႈလႂ်။ ဢၼ်ႁဝ်းပိုတ်ႇႁၢၼ်ႉပိုတ်ႇသႅင်ႇၸိူင်ႉၼႆ ၵူၼ်းႁၵ်ႉႁဝ်းၵေႃႈ တေမီးၵူၼ်းၸင်းႁဝ်းၵေႃႈ တေမီး။ ပေႃးမီးၵူၼ်းဢမ်ႇႁၢၼ်ႉၸႂ်ၼိူဝ်ႁဝ်း ၵူဝ်ပိူၼ်ႈ ၵႂႃႇၸႅင်ႈသေ ပိူၼ်ႈမႃးႁႃႁဝ်း။ ပေႃးသႅင်ႇႁဝ်းၵႃႉၶၢႆလီၼႃႇၵေႃႈ ၵူဝ်ၵူၼ်းႁိမ်းႁွမ်းႁဝ်း ဢမ်ႇၼၼ်ၵေႃႈ ၵူဝ်ၵူၼ်းထႆးၶဝ် ဢမ်ႇၼႃႇလူဝ်ႇသေ ၵူဝ်ၶဝ်ၸႅင်ႈၸဝ်ႈၼႃႈတီႈၶဝ်ႈမႃး ႁႂ်ႈၾၢင်ႉဝႆႉၼမ်ၼမ်”- ဝႃႈၼႆ။

ဝၼ်းတီႈ 11/02/2025 ၼႆႉ ႁွင်ႈၵၢၼ် ၾၢႆႇႁႅင်းၵၢၼ် ၼႂ်းၸိုင်ႈထႆး ပိုၼ်ၽၢဝ်ႇတေၵႂၢတ်ႇလၢင်ႉ ၵူၼ်း ၸိူဝ်းၶဝ်ႈမိူင်း ဢမ်ႇထုၵ်ႇၸွမ်းပၵ်းပိူင်။ ၵူၼ်းၸိူဝ်းယိပ်းဝႂ် ႁဵတ်းၵၢၼ်ၵူႈသႅၼ်းသႅၼ်း မိူၼ်ၼင်ႇ MOU လႄႈ Visa ႁဵတ်းၵၢၼ် ၸိူဝ်းဢႃယုမူတ်းၵႂႃႇ မိူဝ်ႈဝၼ်းတီႈ 13/02/2025 ၼႆႉ ပဵၼ်ၸုပ်ႈလိုၼ်းသုတ်း ယဝ်ႉလႄႈ –  တႄႇဢဝ်ၼႆႉၵႂႃႇၼႃႈ ၵူၼ်းၸိူဝ်းဢမ်ႇမီးၼႂ်းသဵၼ်ႈၸိုဝ်ႈ ဢၼ်တေႃႇဝတ်းဝႂ် ၸိူဝ်းၼႆႉ တေမၵ်းမၼ်ႈ ပဵၼ်ႁႅင်းၵၢၼ် ဢၼ်ဢမ်ႇထုၵ်ႇၸွမ်းပၵ်းပိူင်။ သင်ဝႃႈ ၸဝ်ႈၼႃႈတီႈ သွၵ်ႈႁၼ်ၺႃး ၵေႃႈ တေၸၢင်ႈၺႃးတီႉၺွပ်း သူင်ႇမိူဝ်းၶိုၼ်းဝၢၼ်ႈၵဝ်ႇမိူင်းလင်။

ၵူၼ်းၸိူဝ်းမီးသဵၼ်ႈၸိုဝ်ႈ တႃႇတေႃႇဝတ်းဝႂ်တႄႉ မီးၶႂၢင်ႉယူႇလႆႈၼႂ်းမိူင်းထႆး တႃႇၶၢဝ်းတၢင်း 6 လိူၼ် ( 14/02/2025- 13/08/2025) ။ သင်ဝႃႈ ၼႂ်းၶၢဝ်းတၢင်း 6 လိူၼ်ၼႆႉ ၶႂ်ႈပွၵ်ႈမိူဝ်းၸႂ်းႁိူၼ်း ၼႂ်းမိူင်းတႆး ၸိုင် တၵ်းလူဝ်ႇဢဝ်သဵၼ်ႈၸိုဝ်ႈ Name List ဢၼ်တေႃႇဢႃယုဝတ်းလႄႈပပ်ႉၵဝ်ႇ ၽတ်ႉသပွတ်ႇ ပႃး တင်းဝတ်းသီၶွင်ႇၼၼ်ႉသေ ၵႂႃႇယွၼ်းဝႂ်ႁပ်ႉႁွင်း တီႈလုမ်းၽွင်းတၢင်မၢၼ်ႈ (သထၢၼ်ထုတ်ႉ) ၼၼ်ႉ ယဝ်ႉ ၸင်ႇတေၶဝ်ႈဢွၵ်ႇမိူင်းလႆႈ။ ၼၼ်ႉၵေႃႈ မိူဝ်းၸႂ်းလႆႈ 15 ဝၼ်း ဢွၵ်ႇမိူင်းတၢင်းလႂ်ၵေႃႈ တၵ်း တေလႆႈၶဝ်ႈမိူင်းၶိုၼ်းတၢင်းၼၼ်ႉ ဝႃႈၼႆ။

ၵူၼ်းၸိူဝ်းယိပ်းဝႆႉ ဝတ်းပိုၼ်ႉတီႈသုင် (ဝတ်းသိပ်းပီ) ၸိူဝ်းၼၼ်ႉၵေႃႈ ၵမ်ႈၼမ် ဢမ်ႇပွင်ႇၸႂ်ၼိူဝ် ပၵ်းပိူင်လႄႈ သုၼ်ႇလႆႈ လွင်ႈဝတ်းဝႂ်ၸဝ်ႈၵဝ်ႇတႄႉတႄႉ။ သုၼ်ႇပဵၼ်ၸဝ်ႈၶွင်ၵၢၼ်ငၢၼ်း ၵမ်းသိုဝ်ႈ ၼႆႉ လူင်ပွင်ၸိုင်ႈထႆး ပၼ်ဝႆႉၵၢၼ်  29 သႅၼ်းၵူၺ်း။ ႁႂ်ႈမၼ်းလီတႄႉ လူဝ်ႇဢွၼ်ၵၼ်ၶိုၼ်းတူၺ်း ဝႂ် ႁဵတ်းၵၢၼ်ၸဝ်ႈၵဝ်ႇလႄႈ ထတ်းတူၺ်းၶေႃႈမုလ်းၸဝ်ႈၵဝ်ႇလီလီ ဝႃႈမီးသုၼ်ႇႁဵတ်းၵၢၼ်သင် တီႈလႂ် ႁႂ်ႈမၼ်းပဵၼ်တၢင်းၵၢၼ် ၸဵမ်ၸိူဝ်းၼႆႉ။ သင်ၸိူဝ်ႉ ႁဵတ်းၵၢၼ်ၽိတ်းတီႈၵေႃႈ ၸၢင်ႈၺႃး ပလိၵ်ႈ တီႉ ၺွပ်းဢဝ်လိူင်ႈလႆႈ မိူၼ်ၵၼ် ဝႃႈၼႆ။

ၼွၵ်ႈလိူဝ်ၼႆႉ ၸိုဝ်ႈပေႃႈလဵင်ႉၼၢႆးၸၢင်ႈၵေႃႈ လမ်ႇလွင်ႈမိူၼ်ၵၼ်။ ၼႂ်းဝႂ်သမ်ႉ တႅမ်ႈဝႆႉၸိုဝ်ႈပေႃႈ လဵင်ႉၼၢႆးၸၢင်ႈ ၵေႃႉၼိုင်ႈ ၊ ၾၢႆႇၼွၵ်ႈသမ်ႉ ပဵၼ်ထႅင်ႈၵေႃႉၼိုင်ႈၼႆတႄႉ ဢမ်ႇလွတ်ႈမိူၼ်ၵၼ်ၼႆ  ၸဝ်ႈၼႃႈတီႈထႆး ပိုၼ်ၽၢဝ်ႇလၢတ်ႈဝႆႉ။ ယွၼ်ႉၼၼ် ဝၢၼ်ႈမိူင်းႁဝ်းတုၵ်ႉၵိၼ်းၵႃႈႁိုဝ်ၵေႃႈ သင်ဝႃႈ တိုၵ်ႉယိူၼ်ႉယူႇလႆႈ ယူႇဝႆႉသေၵွၼ်ႇ ယႃႇၽုမ်ႈၶဝ်ႈမိူင်းထႆး ၵၢပ်ႈယၢမ်းလဵဝ်ၼႆႉ – ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ယၢၼ်မိူင်း MAP Foundation လၢတ်ႈၼႄဝႆႉၼင်ႇၼႆ –

“သင်ဝႃႈ မိူင်းႁဝ်းတိုၵ်ႉႁႃၵိၼ်လႆႈယူႇ။ ဝၢၼ်ႈႁဝ်းမိူင်းႁဝ်း ပေႃးတိုၵ်ႉမီးႁိူၼ်းမီးယေးယူႇတႄႉၵေႃႈ ႁႃၵိၼ်မိူင်းၼၼ်ႉဝႆႉၵွၼ်ႇ။ ႁႃၸဝ်ႉၵိၼ်ၶမ်ႈၵေႃႈ ယိူၼ်ႉယူႇဝႆႉၵွၼ်ႇ။ တေၶၢမ်ႇသဵင်ႈငိုၼ်းသဵင်ႈတွင်း သေ ၶဝ်ႈမႃးမိူင်းထႆးၵေႃႈ မႃးယၢပ်ႇၽိုတ်ႇၵူၺ်းယဝ်ႉ။ ပေႃးႁဝ်းဢမ်ႇမီးဝတ်းမီးဝႂ်သေၶဝ်ႈမႃး ယိင်ႈ ၶႅၼ်းႁႃၵိၼ်ယၢပ်ႇ။ မႃးယူႇမိူင်းထႆးၵေႃႈ ႁဵတ်းၵၢၼ်ႁႃၸဝ်ႉၵိၼ်ၶမ်ႈမိူၼ်ၵၼ်ၵူၺ်း။ သမ်ႉပၢႆလႆႈသဵင်ႈ ပႃးၵႃႈၵိၼ်ၵႃႈယူႇ ၵႃႈၼမ်ႉၵႃႈၾႆး ၵႃႈဝတ်းၵႃႈဝႂ် ၸိူဝ်းၼႆႉသဵင်ႈသဵင်ႈ ဢမ်ႇမီးသင်လိူဝ်ၶႃႈ။ ပေႃးဢမ်ႇ ၸမ်ပဵၼ် ဢမ်ႇလမ်ႇလွင်ႈၼႃႇ ယႃႇပေၶႂ်ႈၶဝ်ႈမႃးမိူင်းထႆး။ ပဵၼ်ႁိုဝ်ၵေႃႈ ယိူၼ်ႉယူႇဝႆႉၵွၼ်ႇ” – ဝႃႈၼႆ။

ၼႂ်းလိူၼ်ထူၼ်ႈ 2 ပီ 2025 ၼႆႉ ယူႇတီႈႁွင်ႈၵၢၼ် ၾၢႆႇၵူတ်ႇထတ်းၵူၼ်းၶဝ်ႈမိူင်းလႄႈ ဢိၵ်ႇပႃး ၸဝ်ႈ ၼႃႈတီႈထႆး လၢႆမူႇလၢႆၸုမ်း ႁူမ်ႈၵၼ်လူင်းပိုၼ်ႉတီႈၵူတ်ႇထတ်းတီႉၺွပ်းဢဝ်လိူင်ႈ ၵူၼ်းႁဵတ်းၵၢၼ် လႄႈ ပေႃႈလဵင်ႉၼၢႆးၸၢင်ႈ ၸိူဝ်းဢမ်ႇထုၵ်ႇၸွမ်းမၢႆမီႈၼမ်မႃးၶိူဝ်းယႂ်း။

ဝၼ်းတီႈ 20/02/2025 ၼၼ်ႉ ၸဝ်ႈၼႃႈတီႈထႆး လၢႆၾၢႆႇႁူမ်ႈၵၼ်သေ လူင်းပိုၼ်ႉတီႈ ၵူတ်ႇထတ်း ၸွမ်းဢွင်ႈတီႈႁႅင်းၵၢၼ်ၶၢတ်ႈယူႇသဝ်း ၼႂ်းၸႄႈဝဵင်းသၼ်သၢႆး ၸႄႈတွၼ်ႈၵဵင်းမႂ်ႇ ၸိုင်ႈထႆး တီႉ ၺွပ်းလႆႈႁႅင်းၵၢၼ် ၶဝ်ႈမိူင်းဢမ်ႇပဵၼ်တၢင်းၵၢၼ် (ၽိတ်းမၢႆမီႈ) 8 ၵေႃႉ။

ပူၼ်ႉမႃး ဝၼ်းတီႈ 18/02/2025 ယၢမ်းၵၢင်ၶမ်ႈ ၼၼ်ႉၵေႃႈ ၸဝ်ႈၼႃႈတီႈထႆး ႁူမ်ႈၵၼ်လူင်းပိုၼ်ႉ တီႈ ၵူတ်ႇထတ်းၼႂ်းႁၢၼ်ႉၵရႃႊဢူဝ်ႊၶႄႊ (Karaoke) တီႈၼိုင်ႈ ဢၼ်ပိုတ်ႇဝႆႉ ၼႂ်းၸႄႈဝဵင်းသၼ်ၵမ်း ၽႅင်း ၸႄႈတွၼ်ႈၵဵင်းမႂ်ႇ တီႉၺွပ်းလႆႈႁႅင်းၵၢၼ်မိူင်းႁူမ်ႈတုမ် ၽိတ်းမၢႆမီႈ 6 ၵေႃႉ ႁူမ်ႈလူၺ်ႈ ၼၢႆး ၸၢင်ႈ (ပေႃႈလဵင်ႉ/ မႄႈလဵင်ႉ) ထႅင်ႈ 2 ၵေႃႉ ဝႃႈၼႆ။

သိုဝ်ႇၶၢဝ်ႇ Chiangmai News ဢွၵ်ႇဝႆႉတႄႉ – ႁႅင်းၵၢၼ်မိူင်းႁူမ်ႈတုမ် 6 ၵေႃႉ ဢၼ်တီႉၺွပ်းလႆႈၼၼ်ႉ ပဵၼ်ႁႅင်းၵၢၼ် ဢမ်ႇမီးဝႂ်ၶႂၢင်ႉႁဵတ်းၵၢၼ် 5 ၵေႃႉ။ ထႅင်ႈၵေႃႉၼိုင်ႈသမ်ႉ ပဵၼ် ႁႅင်းၵၢၼ် လၵ်ႉၶဝ်ႈမိူင်း ၽိတ်းမၢႆမီႈ 1 ၵေႃႉ။ တႃႇၼၢႆးၸၢင်ႈ 2 ၵေႃႉၼၼ်ႉသမ်ႉ ၺႃးတီႉၺွပ်းလူၺ်ႈပၼ်ၶႂၢင်ႉႁႅင်းၵၢၼ် ႁဵတ်း ၵၢၼ် တီႈဢမ်ႇမီးသုၼ်ႇႁဵတ်း။ ႁႅင်းၵၢၼ် ဢၼ်ၺႃးတီႉ 6 ၵေႃႉၼႆႉ လႆႈႁပ်ႉၵႃႈၸၢင်ႈ တေႃႇဝၼ်း 200 – 300 ဝၢတ်ႇ တိုၵ်ႉၶဝ်ႈမႃးႁဵတ်းၵၢၼ်မီးမွၵ်ႈ 2 လိူၼ်ၼႆႉၵူၺ်း ၼႆယဝ်ႉ။

လိူဝ်သေၵဵင်းမႂ်ႇယဝ်ႉ ထႅင်ႈလၢႆလၢႆၸႄႈဝဵင်း ၼႂ်းမိူင်းထႆးၵေႃႈ ၸဝ်ႈၼႃႈတီႈထႆး တိုၼ်းလူင်းၵူတ်ႇ ထတ်းႁၢဝ်ႈႁႅင်းမိူၼ်ၵၼ်လႄႈ ၶၢဝ်းၽွင်းၼႆႉ ႁႂ်ႈႁႅင်းၵၢၼ်ယၢၼ်မိူင်းၵူႈၵေႃႉ မေႃၾၢင်ႉယူႇၾၢင်ႉၵိၼ် သင်ဢမ်ႇလမ်ႇလွင်ႈၼႃႇဢႃးလႃး ဢမ်ႇၶဝ်ႈဢွၵ်ႇ ၵႂႃႇမႃးတၢင်းလႂ် တေတိူဝ်းလီ။ ယွၼ်ႉဝႃႈ ႁႅင်းၵၢၼ် ၵေႃႉလႂ်ၵေႃႈ တိုၵ်ႉယူႇၼႂ်းငဝ်းလၢႆးတေႃႇဢႃယုဝတ်းဝႂ်သေ ပႆႇမီးဝတ်းဝႂ်သင်ဝႆႉ ၼႂ်းမိုဝ်းၸဝ်ႈၵဝ်ႇ။

သင်လူဝ်ႇၵႂႃႇမႃးတႄႉတႄႉၵေႃႈ ႁႂ်ႈၼႄလႆႈဝႂ်ႁပ်ႉႁွင်းသေဢၼ်ဢၼ်။ သင်ဝႃႈ တေႃႇဢႃယုဝတ်းဝႆႉ ၼႆၵေႃႈ ႁႂ်ႈယွၼ်းဝႆႉပႃးဝႂ် Name List ၸဝ်ႈၵဝ်ႇ တီႈၶွမ်ႊပၼီႊ ဢၼ်ႁဝ်းၵႂႃႇတေႃႇဝတ်းဝႂ်ဝႆႉၼၼ်ႉ တႃႇၸႂ်ႉၼႂ်းငဝ်းလၢႆးၶိုၵ်ႉၶၵ်ႉၼႆႉ ဝႃႈၼႆ။