သိုၵ်းမၢၼ်ႈ တင်ႈၸႂ် ၸႂ်ႉၶိူင်ႈမိၼ်တိုၵ်း Jet Fighter မႃးပွႆႇမၢၵ်ႇ ၼႂ်းၼႃႈတီႈတပ်ႉသိုၵ်းတဢၢင်း TNLA ၵုမ်းၵမ်ဝႆႉၸိူဝ်းၼၼ်ႉ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်း လူႉတၢႆ 1 ၵေႃႉ မၢတ်ႇၸဵပ်း 4 ၵေႃႉ။

မိူဝ်ႈဝႃး ဝၼ်းတီႈ 20/02/2025 ယၢမ်းၵၢင်ၶမ်ႈမွၵ်ႈ 9 မူင်း သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း မႃးပွႆႇ မၢၵ်ႇသႂ်ႇ တီႈဝၢၼ်ႈလွၵ်းၽၢၼ်း ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မၢၵ်ႇလူင် တူၵ်းသႂ်ႇႁိူၼ်းယေးၵူၼ်းမိူင်းလူႉၵွႆသေဢမ်ႇၵႃး ၸၢၵ်ႇမၢၵ်ႇတိူဝ်ႉၺႃးထဝ်ႈယိင်း ၵေႃႉၼိုင်ႈ လူႉတၢႆထင်တီႈလႄႈ တိူဝ်ႉၺႃးၵူၼ်းမၢတ်ႇၸဵပ်းထႅင်ႈ 4 ၵေႃႉ ဝႃႈၼႆ။

ၵူၼ်းပိုၼ်ႉတီႈ ဝဵင်းၼွင်ၶဵဝ် ၽူႈၸၢႆးၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ သိုၵ်းမၢၼ်ႈၶဝ် မႃးပွႆႇ မၢၵ်ႇၵၢင်ၶမ်ႈ။ မႃးပွႆႇတီႈဝၢၼ်ႈလွၵ်းၽၢၼ်းဢေႃႈ။ တီႈဝၢၼ်ႈၼၼ်ႉသမ်ႉ ၸမ်တၢင်းဝဵင်းဝႆႉ တေမီးပႃးႁူင်း ၸၢၵ်ႈလိၼ်ပုၼ် (ၽိလမျေႇ) ၸိူဝ်းၼႆႉ။ ဢၼ်သိုၵ်းမၢၼ်ႈ မႃးပွႆႇမၢၵ်ႇၼႆႉ တူၵ်းသႂ်ႇတီႈႁိူၼ်းၵူၼ်းဝၢၼ်ႈ ၵူၺ်း။ ဢၼ်တၢႆၵႂႃႇၼႆႉ ပဵၼ်ထဝ်ႈယိင်းၵေႃႉၼိုင်ႈ ပေႃးယဝ်ႉ မၢတ်ႇၸဵပ်း 4 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ ၵေႃႉၼိုင်ႈ။ ပေႃးၶဝ်မႃးပွႆႇမၢၵ်ႇၼႆ လွင်ႈတုမ်ႉတိူဝ်ႉၼႆႉ မီးၵူႈလၢႆးယဝ်ႉ ဢမ်ႇတၢႆၵေႃႈ မၢတ်ႇၼၼ်ႉ ၶႃႈယဝ်ႉ”- ဝႃႈၼႆ။

မိူၼ်ၼႆၼင်ႇၵဝ်ႇ ၼႂ်းဝၼ်းတီႈ 19/02/2025 ယၢမ်းႁူဝ်ၶမ်ႈ 8 မူင်းပၢႆ ၼၼ်ႉၵေႃႈ ဢမ်ႇမီးပၢင်တိုၵ်းသင် သေ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း Jet Fighter ပွႆႇမၢၵ်ႇသႂ်ႇ တီႈပွၵ်ႉပူႇတႃႇလႄႈ တီႈႁူင်းယႃလူင် ၼႂ်းဝဵင်းၼွင်ၶဵဝ် မၢၵ်ႇလူင်တူၵ်းသႂ်ႇသွင်လုၵ်ႈ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းလူႉတၢႆ 3 ၵေႃႉ မၢတ်ႇၸဵပ်း 4 ၵေႃႉ ၼႆ ယဝ်ႉ။

ယွၼ်ႉပၢင်ဢုပ်ႇၵုမ် သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ဢၼ်မိူင်းၶႄႇယူႇၵၢင်သေ ၸတ်း ႁဵတ်းပၼ်တီႈဝဵင်းၶုၼ်ႊမိင်ႊ မိူဝ်ႈဝၼ်းတီႈ 16-17 ပူၼ်ႉမႃးၼႆႉ ယွၼ်ႉဢမ်ႇဢွင်ႇမၢင်လႄႈ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇ ဝဵင်းၼွင်ၶဵဝ်ၼႆႉ မီးသွင်ဝၼ်းထပ်းၵၼ်ယဝ်ႉ ႁဵတ်းႁႂ်ႈၵူၼ်းမိူင်း လူႉတၢႆ 4 ၵေႃႉ မၢတ်ႇၸဵပ်း 8 ၵေႃႉ ဝႃႈၼႆ။