ၸွမ်ၸိုင်ႈမႂ်ႇ မိူင်းဢမေႊရိၵၼ်ႊ ၻူဝ်ႊၼေႃႊ ထရမ်ႉ ဢၼ်ၶိုၼ်ႈႁပ်ႉပုၼ်ႈၽွၼ်း မိူဝ်ႈႁၢင်လိူၼ်ၵျႅၼ်ႊၼိဝ်ႊရီႊ 2025 ပူၼ်ႉမႃးၼၼ်ႉသေ ထိုင်မႃးၼႂ်းလိူၼ်ၾႅပ်ႊပိဝ်ႊရီႊၼႆႉ ၵိုင်ႉၵၢင်ႉသင်ႇၸုမ်းၸဝ်ႈတႃႇၼ မိူင်းဢမေႊရိၵၼ်ႊ ဢၼ်ပၼ်တၢင်းၸွႆႈထႅမ်ယူႇ တင်းလုမ်ႈၾႃႉၼၼ်ႉ ႁႂ်ႈတတ်းၶၢတ်ႇလွင်ႈၸွႆႈထႅမ်သေ ၶဝ်ႈမႃးၸွႆႈထႅမ်ပူၵ်းပွင်ၸိုင်ႈမိူင်းဢမေႊရိၵၼ်ႊၶိုၼ်း။   

လွင်ႈၼႆႉ ႁဵတ်းႁႂ်ႈ ၸုမ်းႁဵတ်းၵၢၼ်တူင်ႇၵူၼ်း NGO, CSO တွၼ်ႈတႃႇ ၵူၼ်းမိူင်းႁူမ်ႈတုမ်မၢၼ်ႈၵူၺ်းဢမ်ႇၵႃး ၸိုင်ႈမိူင်းဢၼ်လႆႈ တၢင်းၸွႆႈထႅမ် ၸိူဝ်းၼၼ်ႉ ယၢပ်ႇၽိုတ်ႇတႃႇသိုပ်ႇပၼ်ႇၵၢၼ်တႄႉတႄႉ။ ၵၢၼ်တူင်ႇၵူၼ်းၼႂ်းမိူင်းမၢၼ်ႈလႄႈ ၸုမ်းၸိူဝ်းႁဵတ်းၵၢၼ် တႃႇမိူင်းမၢၼ်ႈ – ဢမ်ႇမီးငိုၼ်းလိူၼ် တႃႇပၼ်ၽူႈႁၢပ်ႇၵၢၼ်လႄႈ ထိုင်တီႈလႆႈၵိုတ်းၵၢၼ် ဝႆႉၵေႃႈမီး။

ၼႂ်းၼၼ်ႉ ၵူၼ်းၼုမ်ႇၸိူဝ်းၺႃးတတ်းငိုၼ်းထုၼ်းၵၢၼ်ႁဵၼ်း scholarship ၸိူဝ်းၼႆႉၵေႃႈၼမ်။ ပႃးၸဵမ်ၵူၼ်းၼုမ်ႇ ၼႂ်းမိူင်းတႆး ၸိူဝ်းႁဵၼ်းဝႆႉတၢင်ႇၸိုင်ႈမိူင်းၵေႃႈ ၺႃးတတ်းငိုၼ်းၵမ်ႉၸွႆႈလႄႈ ယၢပ်ႇၽိုတ်ႇတႃႇသိုပ်ႇႁဵၼ်း။ တိုၵ်ႉလႆႈ ၸိုၼ်ႇသေ ႁႃလွၵ်းလၢႆးယူႇလွတ်ႈဝႆႉ။

ဝၢႆးသေ မိူင်းဢမေႊရိၵၼ်ႊ ၸတ်းပၢင်လိူၵ်ႈတင်ႈ ၼႂ်း 2024 ယဝ်ႉၼၼ်ႉ ၸွမ်ၸိုင်ႈၵဝ်ႇ Donald Trump ဢွင်ႇပေႉ။ ဝၼ်းတီႈ 20/01/2025 ၼၼ်ႉ ႁပ်ႉတၼ်းႁဵင်း ၶိုၼ်ႈပဵၼ်ၸွမ်ၸိုင်ႈမိူင်းဢမေႊရိ ၵၼ်ႊၵေႃႉထူၼ်ႈ 47 ။ ယူႇဢမ်ႇႁိုင် မၼ်းၸၢႆးၶၢၼ်ပၢၵ်ႇလၢတ်ႈဝႃႈ တေလႅၵ်ႈလၢႆႈၵၢၼ်မိူင်း ဢၼ်ၽႂ်ဢမ်ႇယၢမ်ႈႁၼ်မႃးသေပွၵ်ႈ- ဝႃႈၼႆ။

ၸုမ်းလူင်ပွင်ၸိုင်ႈမႂ်ႇ မိူင်းဢမေႊရိၵၼ်ႊၼႆႉ ၶိုၼ်ႈမႃးဢမ်ႇတၼ်းႁိုင်ၵေႃႈ ပိုၼ်ၽၢဝ်ႇငဝ်း လၢႆးၶိုၵ်ႉၶၵ်ႉသေ သူင်ႇတူဝ်ၵူၼ်း ၸိူဝ်းယူႇသဝ်းၼႂ်းမိူင်းဢမေႊရိၵၼ်ႊ ဢၼ်ဢမ်ႇၸႂ်ႈတၢင်းၵၢၼ်ၼၼ်ႉ ပွၵ်ႈ မိူင်းၶိုၼ်း။

ထိုင်မႃး ၼႂ်းဝၼ်းတီႈ 29/01/2025 ၼႆႉၵေႃႈ ၻူဝ်ႊၼေႃႊ ထရမ်ႉ Donald Trump ပိုၼ်ၽၢဝ်ႇ ပဵၼ်တၢင်းၵၢၼ်ထႅင်ႈဝႃႈ တေၵိုတ်းၵၢၼ်ၵမ်ႉထႅမ် ပတ်းပိုၼ်ႉၼႂ်းလုမ်ႈၾႃႉ။ ၼႂ်းၼၼ်ႉ ဢၼ်တုမ်ႉတိူဝ်ႉ ႁႅင်းသုတ်းၵေႃႈ ပဵၼ်ၾၢႆႇႁုၼ်ႈမုၼ်း တူင်ႇၵူၼ်းၵူႈၸိုင်ႈမိူင်း USAID (United States Agency for International Development) လႄႈ ၸုမ်း IRC (International Rescue Committee) ။ လွင်ႈၼႆႉ ႁဵတ်းႁႂ်ႈတုမ်ႉတိူဝ်ႉထိုင် ၾၢႆႇတူၺ်းလူပၢႆးယူႇလီ ၼႂ်းပၢင်သဝ်း ၵူၼ်းပၢႆႈၽေးတူဝ်ႈလုမ်ႈၾႃႉ ပႃးၸဵမ် ပၢင် သဝ်းၵူၼ်းပၢႆႈၽေး ဢၼ်မီးၼႂ်းၵႄႈလႅၼ်လိၼ်ထႆး – မၢၼ်ႈဢၼ်လႆႈငိုၼ်းထုၼ်းတီႈ IRC ၸိူဝ်းၼႆႉ ၵေႃႈ ၺႃးတတ်းလွင်ႈၵမ်ႉၸွႆႈလႄႈ ၸိူဝ်းလႆႈၶၢႆႉ ၵူၼ်းပဵၼ်ၵႂႃႇဝႆႉတၢင်ႇတီႈ ၵေႃႈမီး။

ဢၼ်တုမ်ႉတိူဝ်ႉႁႅင်းလႄႈ ႁၼ်ထၢင်ႇၸႅင်ႈသေပိူၼ်ႈၵေႃႈ ပဵၼ်ၵၢၼ်ၵမ်ႉၸွႆႈပၢႆးပၺ်ႇၺႃႇလႄႈ ပၢႆးယူႇလီ။ ငိုၼ်းၵမ်ႉၸွႆႈ တူင်ႇၵူၼ်းၼႂ်းလုမ်ႈၾႃႉ တႃႇၼိုင်ႈပီၼႆႉ ပေႃးတူၺ်း သဵၼ်ႈမၢႆ ၼႂ်းပီ 2023 ၼၼ်ႉသေလၢတ်ႈၸိုင် မီးႁိမ်း 70,000 လၢၼ်ႉတေႃႊလႃႊ။ လႆႈဝႃႈ ပဵၼ်ငိုၼ်းၵမ်ႉၸွႆႈဢၼ်ယႂ်ႇသေ ပိူၼ်ႈၼႂ်းလုမ်ႈၾႃႉ။

ၵၢၼ်တူင်ႇၵူၼ်း ၼႂ်းမိူင်းႁူမ်ႈတုမ်မၢၼ်ႈၼႆႉၵေႃႈ လႆႈၸႂ်ယႂ်ႇငိုၼ်းၸွႆႈတီႈ USAID လႄႈ IRC ၵမ်ႈၼမ်။ တီႈတႄႉမၼ်း မိူင်းဢမေႊရိၵၼ်ႊ ၵမ်ႉထႅမ်တူင်ႇၵူၼ်းတင်း လုမ်ႈၾႃႉၼႆႉ မီးမႃးၸဵမ်မိူဝ်ႈ ပီ1961။ ယၢမ်းလဵဝ် ၵိုင်ႉၵၢင်ႉမႃးတတ်းၶၢတ်ႇၸိူင်ႉၼႆလႄႈ ႁဵတ်းႁႂ်ႈၵူၼ်းမိူင်း ဢမ်ႇတၼ်းလႆႈႁၢင်ႈႁႅၼ်းတင်ႈ တူဝ်သင်လႄႈ ပဵၼ်ဢၼ်တူၵ်းၸႂ်။

ဢၼ်ၸုမ်းလူင်ပွင်ၸိုင်ႈၵဝ်ႇ ဢမေႊရိၵၼ်ႊ ႁၢင်ႈႁႅၼ်းဝႆႉငိုၼ်းတေႃႊလႃႊ 45 လၢၼ်ႉ တႃႇၵမ်ႉၸွႆႈ လုၵ်ႈႁဵၼ်းမွၵ်ႈ 800 ၵေႃႉ ၼႂ်းၶၢဝ်းတၢင်း 5 ပီ ၼၼ်ႉၵေႃႈ ထုၵ်ႇသင်ႇၵိုတ်းဝႆႉမူတ်း။ ၼႂ်းၼၼ်ႉ လုၵ်ႈႁဵၼ်းၼႂ်းမိူင်းႁူမ်ႈတုမ်မၢၼ်ႈ ဢၼ်လႆႈႁပ်ႉ scholarship တႃႇ 400 ၵေႃႉၼၼ်ႉၵေႃႈ သုမ်းသုၼ်ႇဝႆႉ တင်းသဵင်ႈ။

လုၵ်ႈႁဵၼ်း ၸိူဝ်းလႆႈႁပ်ႉသူးၵမ်ႉၸွႆႈသေ ၶိုၼ်ႈႁဵၼ်းဝႆႉတီႈၸၼ်ႉၸွမ် မိူင်းၵမ်ႇပူးၶျႃး၊ ဢိၼ်ႊတီႊယိူဝ်ႊ၊ ဢိၼ်ႊတူဝ်ႊၼီႊသျႃႊ၊ မိူင်းၾိလိပ်ႉပိၼ်းလႄႈ မိူင်းထႆး ၸိူဝ်းၼႆႉၵေႃႈ တူၵ်းၵိၼ်းဝႆႉ။

လုၵ်ႈႁဵၼ်း ၸိူဝ်းလႆႈငိုၼ်းၵမ်ႉၸွႆႈဝႆႉတီႈ ၸုမ်း DISP – Diversity and Inclusion Scholarship Program ဢၼ်ယူႇတီႈၸုမ်း USAID ၵမ်ႉၸွႆႈဝႆႉၸိူဝ်းၼၼ်ႉၵေႃႈ ၵိုတ်းၵၢၼ်ၵမ်ႉငိုၼ်းတွင်းယဝ်ႉလႄႈ ပႃးၸဵမ်ၵူၼ်းၼုမ်ႇမိူင်းတႆး ၸိူဝ်းၶိုၼ်ႈႁဵၼ်းဝႆႉတီႈၸၼ်ႉၸွမ် ၽႃႊယပ်ႊ Payap ၵဵင်းမႂ်ႇ ၸိုင်ႈထႆးၵေႃႈ ၺႃးတတ်းငိုၼ်း ၵမ်ႉၸွႆႈၵၢၼ်ႁဵၼ်း မိူၼ် ၵၼ်။

ၼၢင်းသႂ်သႂ်ၼုမ်ႇၶမ်း လုၵ်ႈႁဵၼ်းၸၼ်ႉၸွမ် ၽႃႊယပ်ႊ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ႁဝ်းၶႃႈ လႆႈဝႆႉသူးၵၢၼ် ႁဵၼ်းၼႆႉ တၼ်းလႆႈမီးသုၼ်ႇၸႂ်ႉ ၶိုင်ႈပီၵၢၼ်ႁဵၼ်းၵူၺ်းၶႃႈဢေႃႈ။ ၸုမ်းႁဝ်းၶႃႈ ဢၼ် လႆႈလွင်ႈၵမ်ႉၸွႆႈ တီႈၸၼ်ႉၸွမ်ၽႃႊယပ်ႊၼႆႉ လႆႈဝႃႈ ပဵၼ်ၸုပ်ႈထိၼိုင်ႈ။ ၽိူဝ်ႇဝႃႈ ၻူဝ်ႊၼေႃႊ ထရမ်ႉ ၶိုၼ်ႈမႃးၵေႃႈ ၺႃးတတ်းၸိူင်ႉၼႆ။ တီႈ ၽႃႊယပ်ႊၼႆႉ မီးၵူၼ်းၼုမ်ႇတႆး 6 ၵေႃႉ ဢၼ်လႆႈငိုၼ်း ၵမ်ႉၸွႆႈ scholarship ၼႆႉ။ ဢၼ်ၺႃးတတ်းငိုၼ်း မိူၼ်ႁဝ်းၶႃႈၵေႃႈ မီးၸၢဝ်းမၢၼ်ႈ 2 ၵေႃႉလႄႈ ၸၢဝ်း  မွၼ်း 9 ၵေႃႉ။ ယၢမ်းလဵဝ်ၵေႃႈ ဢွၼ်ၵၼ်ႁႃလၢႆးတၢင်း တႃႇယူႇလွတ်ႈ ၽႂ်မၼ်းဝႆႉယူႇၶႃႈ”- ဝႃႈၼႆ။

ၸုမ်း DISP ၵမ်ႉၸွႆႈငိုၼ်းလုၵ်ႈႁဵၼ်းဝႆႉ မိူၼ်ၼင်ႇ ၵႃႈၸႂ်ႉၸၢႆႇတႃႇဢွၵ်ႇၶၢဝ်းတၢင်း၊ ၵႃႈၸႂ်ႉၸၢႆႇၼႂ်း ၵၢၼ်ႁဵၼ်း၊ ၵႃႈၸႂ်ႉၸၢႆႇတႃႇယူႇၵိၼ် ၸဵမ်ၸိူဝ်းၼႆႉ။ ၼိုင်ႈပီလႂ် ၵမ်ႉၸွႆႈငိုၼ်းထႆး 6 မိုၼ်ႇ ထိုင် 7 မိုၼ်ႇ ဢိင်ၼိူဝ် ၽႃႇသႃႇၵၢၼ်ႁဵၼ်းၽႂ်မၼ်းသေ မီးလွင်ႈပိူင်ႈၵၼ်ဢိတ်းဢီႈသေတႃႉ ပဵၼ်တၢင်းၵမ်ႉၸွႆႈ ယႂ်ႇလူင် တႃႇလုၵ်ႈႁဵၼ်းတႄႉတႄႉ။ ယၢမ်းလဵဝ် ၺႃးတတ်းၸိူင်ႉၼႆလႄႈ လုၵ်ႈႁဵၼ်းၵေႃႉလႂ်ၵေႃႈ ပဵၼ် ၸႂ်ဢမ်ႇလီ ၼႆယဝ်ႉ။

ဢိင်ၼိူဝ် လႆႈငိုၼ်းၵမ်ႉၸွႆႈပိူင်ႈၵၼ်သေ လွင်ႈတုမ်ႉယွၼ်ႈ ၸုမ်းၼိုင်ႈလႄႈ ၸုမ်းၼိုင်ႈ ဢမ်ႇမိူၼ် ၵၼ်။ ၸုမ်းဢၼ်လႆႈႁပ်ႉငိုၼ်းၵမ်ႉၸွႆႈ ဝႆႉတီႈ USAID ဝႆႉ 100 % သေ ပၼ်ႇၵၢၼ်ဝႆႉတႄႉၵေႃႈ ပေႃး ဝႃႈၺႃးတတ်းၸိူင်ႉၼႆ တိုၼ်းဝႃႈ တေဢမ်ႇၸၢင်ႈသိုပ်ႇႁဵတ်းၵၢၼ်ထႅင်ႈ။ ၼၢင်းၶႂၢၼ်လဵၵ်း ၽူႈၶူၼ်ႉ ၶႂႃႉၾၢႆႇၵၢၼ်မိူင်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“တေလႆႈဝႃႈ ဢၼ်ၺႃးတတ်းငိုၼ်းၵႂႃႇပွၵ်ႈၼႆႉ ဢဝ်ပဵၼ်တွၼ်ႈသွၼ်လႆႈယူႇ။ ယွၼ်ႉဝႃႈ လုမ်ႈၾႃႉ လူင်ၼႆႉ မၼ်းမေႃလႅၵ်ႈလၢႆႈ။ တၢင်းမိူင်းပွတ်းတူၵ်းၼႆႉ ၶဝ်ပဵၼ်မိူင်းယႂ်ႇ ၶဝ်မီးဢႃႇၼႃႇႁူမ်ႇငမ်းၼိူဝ် ၸိုင်ႈမိူင်းတင်းၼမ်။ ၶဝ်ၵေႃႈ မီးလွင်ႈၶဵင်ႇတႃႉလၢႆလွင်ႈ ဢမ်ႇဝႃႈၵၢၼ်ပၢႆးမၢၵ်ႈမီးႁႃႉ ၵၢၼ်မိူင်းႁႃႉ ၼႆ ၸိူဝ်းၼႆႉ။ ႁဝ်းတေႁူႉလႆႈဝႃႈ ႁဝ်းတေၵႂႃႇပိုင်ႈဢိင် တၢင်ႇမိူင်းၵူၺ်းဢမ်ႇလႆႈ။ မိူၼ်ၼင်ႇ မိူင်းႁူမ်ႈတုမ် ႁဝ်းၼႆႉ ႁဝ်းလူဝ်ႇပိုင်ႈဢိင်တူဝ်ၵဝ်ႇ ႁႂ်ႈလႆႈၼၼ်ႉၼႃႇ ၼေႃႈ” – ဝႃႈၼႆ။

ၻူဝ်ႊၼေႃႊ ထရမ်ႉၼႆႉ ၶၢၼ်ပၢၵ်ႇလၢတ်ႈဝႆႉၸဵမ်မိူဝ်ႈပႆႇပေႉပၢင်လိူၵ်ႈတင်ႈဝႃႈ တေဝႆႉၵၢၼ်ၸိူဝ်ႉၶိူဝ်းပဵၼ်ယႂ်ႇ၊ ၵွၼ်ႇတေၵႂႃႇၸွႆႈထႅမ်တၢင်ႇမိူင်းၼၼ်ႉ တေၸွႆႈထႅမ်ပူၵ်းပွင်ၵူၼ်းမိူင်းဢမေႊရိၵၼ်ႊ တေဝႆႉမိူင်းဢမေႊရိၵၼ်ႊပဵၼ်လမ်ႇလွင်ႈ၊ ငိုၼ်းၵွင်ၵၢင်ဢၼ်လႆႈမႃးၵူႈၶၵ်ႉတွၼ်ႈၼၼ်ႉ တိုၼ်းဝႃႈ တေၸွႆႈၶိုၼ်းၵူၼ်း ၼႂ်းမိူင်းဢမေႊရိၵၼ်ႊၵူၺ်းၼႆသေ ၸင်ႇတတ်းပႅတ်ႈ ငိုၼ်းတွင်း ဢၼ်တေၵမ်ႉၸွႆႈတူင်ႇၵူၼ်းတၢင်ႇၸိုင်ႈမိူင်း ၸိူဝ်းၼၼ်ႉ။

ၸၢႆးယွတ်ႈလၢဝ် ၽူႈႁဵတ်းၵၢၼ်ၾၢႆႇဢၢႆႊထီႊ ၸူဝ်ႈၶၢဝ်းဢမေႊရိၵၼ်ႊ လၢတ်ႈၼႄဝႆႉၼင်ႇၼႆ –

“ၸုမ်းဢၼ် မီးၼႂ်းမိူင်းမၢၼ်ႈၼႆႉ ၵမ်ႈၼမ် ဢၼ်ၵၢင်းယၢၼ်ၵၼ်တင်း ဢမေႊရိၵၼ်ႊဢမ်ႇသူႈမီး။ ၼမ်လႄႈဢေႇ မၼ်းၵေႃႈ မီးလွင်ႈၵွင်ႉၵၼ်တင်းဢမေႊရိၵၼ်ႊ။ ဢၼ်တိူဝ်ႉႁႅင်းႁႅင်းသုတ်းၼႆႉ ယင်း ပႆႇၸႂ်ႈမိူင်းမၢၼ်ႈၵွၼ်ႇ။ မိူၼ် ၼင်ႇ မိူင်းဢႃႇၽရိၵ ၸိူဝ်းၼႆႉ တေၶႅၼ်းၼႃႇလိူဝ်ႁဝ်းၵွၼ်ႇ။ မၼ်းတိူဝ်ႉ တၢင်းလုမ်ႈၾႃႉယဝ်ႉ။ မၼ်းဢမ်ႇၵွမ်ႉ ၵူၼ်း ၾၢႆႇၼွၵ်ႈၵူၺ်း မိူၼ်ၼင်ႇ ၵူၼ်းဢၼ်ဢမေႊရိၵၼ်ႊ ၶဝ် ၶၢတ်ႈမႃးႁဵတ်းၵၢၼ်ဝႆႉၸိူဝ်းၼႆႉၵေႃႈ ယၢမ်းလဵဝ်တူၵ်းၵၢၼ် ၼပ်ႉႁူဝ်မိုၼ်ႇ”- ဝႃႈၼႆ။

ဢမ်ႇၵႃး ၼႂ်းၵၢၼ်ပၢႆးပၺ်ႇၺႃႇၵူၺ်း ဢၼ်တုမ်ႉတိူဝ်ႉယွၼ်ႉ ဢမေႊရိၵၼ်ႊ တတ်းလွင်ႈၵမ်ႉၸွႆႈၼႆႉ။ ပႃးၸဵမ်လွင်ႈပၢႆးယူႇလီ၊ ၸုမ်းတူင်ႉၼိုင်တႃႇတီႊမူဝ်ႊၶရေႊသီႊ ၸိူဝ်းၼႆႉၵေႃႈ တုမ်ႉတိူဝ်ႉမူတ်း။

မေႃယႃယိင်း ၵူၼ်းမိူင်းတႆး ဢၼ်ႁဵတ်း CDM ဝႆႉၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – ယၢမ်းလဵဝ် သိုၵ်းမၢၼ်ႈၵေႃႈ ဢမ်ႇၸွႆႈထႅမ်ပၼ်ၵူၼ်းမိူင်းသင်သေလွင်ႈ။ ဢမေႊရိၵၼ်ႊသမ်ႉ မႃးတတ်းလွင်ႈၸွႆႈထႅမ်ထႅင်ႈ ၸိူင်ႉၼႆတႄႉ မႆႈၸႂ်တႃႇ ၵူၼ်း ၸိူဝ်းယူႇပိၵ်ႇထိူၼ်ႇႁၢင်ၶိူဝ်း၊ ၸွမ်းဝၢၼ်ႈၼွၵ်ႈၼႃးပၢင်ႇ ၸိူဝ်းၼႆႉ တေဢွၼ်ၵၼ်ၸပ်းတၢင်းပဵၼ်ငၢႆႈ၊ မႄႈမၢၼ်း ၸိူဝ်းၼႆႉ ပေႃးဢမ်ႇလႆႈႁပ်ႉတၢင်းၸွႆႈ – တေတၢႆတေႁၢႆ။ တၢင်းပဵၼ် ၸိူဝ်းဢၼ်မေႃတိတ်းၸပ်းလၢမ်းၽႄႈ တေလိူင်ႇၼမ် – ပဵၼ်ဢၼ်လီမႆႈၸႂ်လူင်လၢင် – ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵေႃႈတင်ႈ ၵေႃၶၢဝ်ႇၽူႈတွႆႇႁွၵ်ႈၵေႃႈ ယၢမ်ႈထတ်းသၢင်လၢတ်ႈၼႄဝႃႈ – သင်ၸိူဝ်ႉဢမေႊရိၵၼ်ႊ တတ်းၶၢတ်ႇလွင်ႈၵမ်ႉၸွႆႈ တေႃႇလုမ်ႈၾႃႉ ၸိူင်ႉၼႆတႄႉ – မၼ်းတေမိူၼ် ၸိုင်ႈမိူင်း ဢၼ်ၽၢတ်ႇဢွၵ်ႇလုမ်ႈ ၾႃႉၵႂႃႇသေ ၶႄႇတေၶိုၼ်ႈမႃး ပဵၼ်ၽူႈယိင်ႉယႂ်ႇၼႂ်းလုမ်ႈၾႃႉ ၵေႃႉလဵဝ် ၵူၺ်းယဝ်ႉ – ဝႃႈၼႆ။

တီႈတႄႉမၼ်း ၵၢၼ်ၸွႆႈထႅမ် တေႃႇတူင်ႇၵူၼ်းၵူႈၸိုင်ႈမိူင်းၼႆႉ ဢမ်ႇၸႂ်ႈဝႃႈ ပဵၼ်လွင်ႈၸႂ်ႉၸၢႆႇငိုၼ်း ဢမ်ႇမီးလွင်ႈမီးတၢင်းမၼ်း၊ မၼ်းပဵၼ်ၵၢၼ် ဢၼ်မီးၵႃႈၶၼ် တေႃႇၸိုင်ႈမိူင်း ၸဝ်ႈၵဝ်ႇယူႇ။ သင်ဝႃႈ မိူင်းၼိုင်ႈလႄႈ မိူင်းၼိုင်ႈ ၸွႆႈထႅမ်ၵၼ် ၼႆၸိုင် တေႁဵတ်းႁႂ်ႈမီးလွင်ႈယုမ်ႇယမ် ၸမ်ၸႂ်ၵၼ်မႃးလိူဝ်ၵဝ်ႇ။ လွင်ႈၵမ်ႉၸွႆႈၵူၼ်းတေႃႇၵူၼ်းၼႆႉ ယင်းတေ ႁဵတ်းႁႂ်ႈဢမေႊရိၵၼ်ႊၵတ်းယဵၼ်ၼိမ်တဵင်ႈ ယူႇလွတ်ႈ ၵႂႃႇၶၢဝ်းယၢဝ်းလူးၵွၼ်ႇၼႆ ၽူႈထတ်းသၢင်ၵၢၼ်မိူင်း – မိူင်းထႆးၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇ Thairath Plus ဝႆႉၼင်ႇၼႆ။