ဝၼ်းတီႈ 7 လိူၼ်ၾႅပ်ႊပိဝ်ႊရီႊၼႆႉ ၵမ်ႈၼမ် တေႁူႉၵၼ်ဝႃႈ မၼ်းလမ်ႇလွင်ႈတႃႇမိူင်းတႆးလႄႈ တႃႇမိူင်းႁူမ်ႈတုမ်။ ယူႇတီႈ ၸဵင်ႇႁပ်ႉႁူႉၽႂ်မၼ်းသေ ဢွၼ်ၵၼ်ႁိၵ်ႈႁွင်ႉဝႃႈ ဝၼ်းၶိူဝ်းတႆး၊ ဝၼ်းမိူင်းတႆး ဢမ်ႇၼၼ် ဝၼ်းၸိူဝ်ႉၸၢတ်ႈ ၸိုင်ႈတႆး ၼႆၸိူဝ်းၼႆႉ။

ယုမ်ႇယမ်ဝႃႈ ဝၼ်းၼႆႉ လမ်ႇလွင်ႈတႃႇဝၢၼ်ႈမိူင်းၼႆသေ မီးလွင်ႈယၢပ်ႇၸိူင်ႉႁိုဝ်ၵေႃႈ ဢွၼ်ၵၼ်ဝႆႉ ၼမ်ႉၼၵ်းသေ ၽိုၼ်ႉၽူးၶိုင်ပွင်ၶုၵ်းထူပ်းၶိုၼ်းၸွမ်းၼင်ႇပွင်ပဵၼ်လႆႈ။

ပီ 2025 ၼႆႉ ပီႈၼွင်ႉတႆးထုင်ႉလိၼ်ပဵင်း ၸႄႈတွၼ်ႈတွင်ႁူႇ ၼႂ်းတိူင်းပႃႇၵိူဝ်ၵေႃႈ ဢွၼ်ၵၼ်ၸတ်း ဝၼ်းၶိူဝ်းတႆး ၶွပ်ႈတဵမ် 78 ပီ မိူၼ်ၵၼ်။ မီးလွင်ႈၶဵင်ႇတႃႉ တင်းၼမ်သေတႃႉ တႃႇလုၵ်ႈလၢၼ်တႆးတေ သိုပ်ႇႁူႉပိုၼ်း ၶူၼ်ႉၶိုၼ်းႁဵတ်းသၢင်ႈမႃးၵူႈပီ ၼႆယဝ်ႉ။

ဝၼ်းၶိူဝ်းတႆး ဢမ်ႇၼၼ် ဝၼ်းၸိူဝ်ႉၸၢတ်ႉၸိုင်ႈတႆး ၶွပ်ႈတဵမ် 78 ပီ ၼႂ်းဝၼ်းတီႈ 07/02/2025 ၼႆႉ ပီႈၼွင်ႉတႆးထုင်ႉလိၼ်ပဵင်း ၸႄႈတွၼ်ႈတွင်ႁူႇ ၽွမ်ႉလႆႈၸႂ်ၵၼ်သေ ၸတ်းႁဵတ်းတီႈဝၢၼ်ႈၼႃးႁီး ၸႄႈဝဵင်းတွင်ႁူႇ တိူင်းပႃႇၵိူဝ် မီးၽူႈၶဝ်ႈႁူမ်ႈ ဢမ်ႇယွမ်း 200 ၵေႃႉ။

တႃႇပဵၼ်မႃးပၢင်ၵႅဝ်ႈၼႆႉ ယူႇတီႈ ၸုမ်းၵူၼ်းၼုမ်ႇတႆး ၸႄႈတွၼ်ႈတွင်ႁူႇ ဢွၼ်ႁူဝ်ၼမ်းၼႃႈ။ ဢၼ်လႆႈၸတ်းဝၼ်း ၶိူဝ်းတႆးမႃး တီႈဝဵင်းတွင်ႁူႇ တိူင်းပႃႇၵိူဝ်ၼႆႉ ပေႃးပႃးပီၼႆႉ ပဵၼ်ပွၵ်ႈၵမ်း 8 ။ ၵွပ်ႈသင် လႄႈလႆႈၸတ်းဝၼ်းၶိူဝ်းတႆး မႃး ၵူႈပီပီၼႆၼၼ်ႉ ၸၢႆးၵွၼ်းၶိူဝ်း ၵႅမ်ႁူဝ်ပဝ်ႈ ၸုမ်းၵူၼ်းၼုမ်ႇတႆး ၸႄႈတွၼ်ႈတွင်ႁူႇ လၢတ်ႈၼႄဝႆႉၼင်ႇၼႆ –

“ယိူင်းဢၢၼ်းတႄႉၵေႃႈ ၶႂ်ႈႁႂ်ႈၼေႃႇတႅၼ်းၶိူဝ်း လုၵ်ႈမႄႈတႆးႁဝ်းၶဝ် ႁႂ်ႈလႆႈႁူႉၸၵ်း ဝၼ်းၶိူဝ်းတႆး ပဵၼ်ၸိူင်ႉႁိုဝ် မီးၸိူင်ႉႁိုဝ်။ ယဝ်ႉၵေႃႈ ၶူဝ်းၼုင်ႈတၢင်းဝႆလႄႈ ၾိင်ႈငႄႈၾိင်ႈထုင်း ၸိူဝ်းၼႆႉ ႁႂ်ႈၶဝ်ပေႃးႁူႉႁၼ် ၵႂႃႇလီလီငၢမ်းငၢမ်း။ ၵွပ်ႈသင်ၼႆ ၾၢႆႇတၢင်းႁဝ်းၶႃႈၼႆႉ ဢၼ်ႁူႉၾိင်ႈငႄႈၾိင်ႈထုင်း ၶူဝ်းၼုင်ႈ တၢင်းဝႆတႆးၼႆႉ မၼ်းႁႅင်းဢေႇဝႆႉဢေႃႈ။ ၶႂ်ႈႁႂ်ႈ ၼေႃႇတႅၼ်းၶိူဝ်းႁဝ်း မေႃႁၵ်ႉသႃ မေႃႁူႉႁၼ်လႄႈ ၸင်ႇလႆႈႁဵတ်းသၢင်ႈၵႂႃႇ”- ဝႃႈၼႆ။

ဢၼ်မႃးၶဝ်ႈႁူမ်ႈပၢင်ပွႆးဝၼ်းၶိူဝ်းတႆး ၸႄႈဝဵင်းတွင်ႁူႇၼႆႉ မီးဝၢၼ်ႈတႆး 4 ဝၢၼ်ႈ ၼႂ်းၼၼ်ႉ ဝၢၼ်ႈပွၵ်ႉၶူဝ် ဝၢၼ်ႈသဵၵ်ႉၽူးတွင်ႇ ဝၢၼ်ႈႁူၵ်းလၵ်း ဝၢၼ်ႈပျွင်းသျွင်း မီးထႅင်ႈလၢႆဝၢၼ်ႈယူႇသေတႃႉ ဢိင်ၼိူဝ်ငဝ်းလၢႆးဝၢၼ်ႈမိူင်းသေ မီးလွင်ႈၶွင်ႈၶမ် ဢမ်ႇၸၢင်ႈမႃးၶဝ်ႈႁူမ်ႈၸွမ်း။

ယူႇၼႂ်းငဝ်းလၢႆး ၵၢၼ်ဝၢၼ်ႈၵၢၼ်မိူင်းသုၵ်ႉယုင်ႈ ၸိူင်ႉၼႆသေ တႃႇတေၸတ်းဝၼ်းလမ်ႇလွင်ႈ ဢၼ်ၵိုၵ်းၶိူဝ်း ၵိုၵ်းမိူင်းသေပၢင်ပၢင်ၵေႃႈ ဢမ်ႇငၢႆႈ။ ယွၼ်ႉတႆးထုင်ႉၼႆႉ လႆႈယူႇၼႂ်းၵႄႈတၢင်ႇၸၢဝ်းၶိူဝ်းၼမ်လႄႈ သင်ဢမ်ႇၶတ်းၸႂ်ၸတ်းပွင် ၾိင်ႈထုင်းတႆး ပိုၼ်းတႆးၸၢင်ႈႁၢႆငၢႆႈ၊ ၾၢႆႇၼိုင်ႈၵေႃႈ တႃႇႁႂ်ႈ ပိူၼ်ႈတေႁူႉၸၵ်းလႄႈ သူၼ်ၸႂ်လွင်ႈတႆးၵေႃႈ တေ ဢမ်ႇမီးၼႆ  ၸၢႆးၵွၼ်းၶိူဝ်း သိုပ်ႇလၢတ်ႈၼႄတၢင်း ယၢပ်ႇၽိုတ်ႇဝႆႉၼင်ႇၼႆ –

“သၢႆငၢႆဝၢၼ်ႈမိူင်းသမ်ႉ ဢမ်ႇလီ ဢမ်ႇၵတ်းယဵၼ်၊ ငိုၼ်းၵွင်ၵၢင် ၸုမ်းႁဝ်းၶႃႈၵေႃႈ ဢမ်ႇတဵမ်ထူၼ်ႈ။ ယူႇၼႂ်းၵႄႈလွင်ႈယၢပ်ႇၽိုတ်ႇၼႆႉသေ ၸင်ႇလႆႈၶတ်းၸႂ်ႁဵတ်း ၵႂႃႇႁႂ်ႈပဵၼ်မႃးပၢင်ဝၼ်းၶိူဝ်းတႆးၼႆႉ။ ယၢပ်ႇၸိူင်ႉႁိုဝ်ၵေႃႈ လႆႈၶတ်းသၢင်ႈမႃးၵူႈပီပီလႄႈ လွင်ႈၶိုပ်ႈၼႃႈတႃႇၸိူဝ်ႉၶိူဝ်းတႄႉ မီးၼမ်ယူႇၶႃႈ။ တၢင်းထုင်ႉလိၼ်ပဵင်းၼႆႉ မီးၵူၼ်းသူၼ်ၸႂ်လွင်ႈတႆး ၼမ်မႃးယူႇ။ ၵွပ်ႈပိူဝ်ႈလႆႈယူႇၼႂ်းၵႄႈတၢင်ႇ ၸၢဝ်းၶိူဝ်းလႄႈ တႃႇႁၵ်ႉသႃၾိင်ႈၶိူဝ်းၸဝ်ႈၵဝ်ႇၼႆႉ ယၢပ်ႇယဵၼ်းတႄႉတႄႉ ၶႃႈ”- ဝႃႈၼႆ။

ၼႂ်းၶပ်ႉမၢႆပၢင်ပွႆးတႄႉ လိူဝ်သေ မီးၶပ်ႉမၢႆၼႄၾိင်ႈငႄႈၾိင်ႈထုင်းတႆးယဝ်ႉ သႂ်ႇပႃးၶပ်ႉမၢႆတွၼ်ႈသူးရၢင်းဝလ်း ၽူႈၶဝ်ႈ ၶေႉၶဵင်ႇလိၵ်ႈပွင်ႈ ၸၼ်ႉငဝ်ႈ ၸၼ်ႉၵၢင် ၸၼ်ႉသုင် ၸိူဝ်းၼႆႉ။ ၼင်ႇႁိုဝ် ပေႃးတေၸၼ်ၸႂ်ပီႈၼွင်ႉတႆး ၸိူဝ်းမႃးၶဝ်ႈ ႁူမ်ႈၼၼ်ႉ သႂ်ႇပႃးၶပ်ႉမၢႆ လဵၼ်ႈၸိူင်းၶုၼ်သၢမ်လေႃးလႄႈတင်း ဢူဝ်ႈပဵမ်ႇထႅင်ႈလူးၵွၼ်ႇ ၼႆယဝ်ႉ။

ၼၢင်းယိင်းတႆး ၵူၼ်းဝဵင်းတွင်ႁူႇ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ – “ၸိုဝ်ႈပႃႈႁွင်ႉ ပႃႈမူဝ်ႇ ယူႇဝၢၼ်ႈၼႃးႁီး။ ဢႃယုပႃႈလႆႈ 56 ပီ။ ပႃႈယိၼ်းၸူမ်းတႄႉဢေႃႈ ဢၼ်ၵူၼ်းၼုမ်ႇတႆး ထုင်ႉလိၼ်ႉပဵင်းႁဝ်း မႃးဢွၼ်ၼမ်းၸတ်းပၢင်ပွႆးဝၼ်း ၶိူဝ်းတႆးႁဵတ်းၼႆ။ ႁဝ်းၶႃႈ တင်းသူၼ်တင်းဝၢၼ်ႈ ယိၼ်းၸူမ်းဢဝ်ၵုင်ႇ မုၼ်တႄႉယဝ်ႉ”- ဝႃႈၼႆ။

ၼႂ်းပၢင်ၵႅဝ်ႈဝၼ်းၶိူဝ်းတႆး ဝဵင်းတွင်ႁူႇၼႆႉ ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA ၸွမ်သိုၵ်းလူင် ယွတ်ႈသိုၵ်းၵေႃႈ တႅမ်ႈၽိုၼ်လိၵ်ႈယိုၼ်ႈထိုင် ဢဝ်ၵုင်ႇမုၼ်ၸွမ်း ယူႇ။

ၼႂ်းၽိုၼ်လိၵ်ႈယိုၼ်ႈထိုင်ၼၼ်ႉ ပႃးဝႆႉဝႃႈ – “တိုၵ်းသူၼ်း ၵူၼ်းမိူင်းတႆး ၵူၼ်းၶိူဝ်းတႆး ၵူႈၸၢဝ်းၶိူဝ်း ၵူႈမူႇၵူႈၸုမ်း ၼႂ်း ၸိုင်ႈတႆးတင်းသဵင်ႈဝႃႈ ႁႂ်ႈႁဝ်းၶႃႈ တူၺ်းလွင်ႈလီၵၼ်သေ ႁႂ်ႈလႆႈဢုပ်ႇဢူဝ်းၵႄႈ လိတ်ႈပၼ်ႁႃၵၼ်သေၵမ်း”- ဝႃႈ ၼႆ။

ဝဵင်းတွင်ႁူႇၼႆႉ မီးၼႂ်းတိူင်းပႃႇၵိူဝ် ပၵ်းယူႇႁိမ်းသဵၼ်ႈတၢင်းလူင်မၢႆၼိုင်ႈ ဝဵင်းတႃႈၵုင်ႈလႄႈ ဝဵင်းလိူဝ်ႇ ယၢၼ်ၵႆတၢင်းဝဵင်းတႃႈၵုင်ႈ 175 လၵ်း။

ပီႈၼွင်ႉတႆးထုင်ႉပဵင်း ၸႄႈဝဵင်းတွင်ႁူႇ တိူင်းပႃႇၵိူဝ်ၼႆႉ ၵႂၢမ်းလၢတ်ႈပဵၼ်ၵႂၢမ်းတႆးယူၼ်း ၵမ်ႈၼမ် ဝၢႆးၼႆႉ လေႃးၵႂၢမ်းတႆးလူင်မႃးဢိတ်းဢီႈ မူႇဝၢၼ်ႈတႆး မီး 11 ဝၢၼ်ႈ ႁူဝ်ၵူၼ်းပီၼွင်ႉတႆးမီးႁိမ်း 7 ႁဵင် ၽုၵ်ႇႁႆႈသွမ်ႈၼႃး ႁဵတ်းသူၼ်ႁဵတ်း ႁိူၵ်ႈသေ ႁႃၵိၼ်လဵင်ႉတွင်ႉမႃးပၢၼ်သိုပ်ႇပၢၼ်။

တႃႇႁႂ်ႈၵူၼ်းၼုမ်ႇ လုၵ်ႈဢွၼ်ႇပၢၼ်မႂ်ႇ တေႁူႉလိၵ်ႈလၢႆးတႆးၼႆသေ ၸုမ်းၵေႃလိၵ်ႈလၢႆးတႆး ဝဵင်းတွင်ႁူႇၵေႃႈ ၶတ်းသၢင်ႈပူင်သွၼ်လိၵ်ႈတႆး ၶၢဝ်းမႆႈ မႃးၵူႈပီပီ။ ၶၢဝ်းတၢင်း သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းၼႆႉသမ်ႉ ဢဵၼ်ႁႅင်းမေႃသွၼ်ၵေႃႈ ႁႃယၢပ်ႇ ဢွင်ႈတီႈသွၼ်လိၵ်ႈၵေႃႈ ဢမ်ႇပေႃး ထၢင်ႇႁၢင်ႈမိူၼ် မိူဝ်ႈမိူင်းၼိမ်ယဝ်ႉလႄႈ မီးလွင်ႈၶွင်ႈၶမ်ဝႆႉ လၢႆလွင်ႈ။

ဝဵင်းတွင်ႁူႇၼႆႉ ယၢၼ်ၵႆၵၼ်တၢင်း မိူင်းသၼ်လွႆၸိုင်ႈတႆးသေတႃႉ တႆးတိုၵ်ႉသိုပ်ႇပဵၼ်တႆးယူႇ။ မိူဝ်ႈပီ 2019 ၼၼ်ႉ ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး တိူင်းပႃႇၵိူဝ်တင်း ငဝ်ႈငုၼ်း ၵေႃလိၵ်ႈလၢႆး ပတ်းပိုၼ်ႉ ႁူမ်ႈၵၼ်ဢွၼ်ႁူဝ် ၸတ်းႁဵတ်းပၢင်ၵုမ်လူင် ငဝ်ႈငုၼ်းတီႈႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး တီႈဝဵင်းၼွင်ၵႂၢႆးထိူၼ်ႇ (တေႃးၵျွႆးဢိၼ်း) တိူင်းပႃႇၵိူဝ် ၼၼ်ႉမႃးယူႇ။

လႆႈဢုပ်ႇဢူဝ်းတႅပ်းတတ်းၵၼ် ၵႂႃႇလၢႆလၢႆလွင်ႈ မိူၼ်ၼင်ႇ တႃႇတေတမ်းပိူင်ၶွတ်ႇၽွတ်ႈငဝ်ႈငုၼ်း၊ မိၵ်ႈမၢႆ (Logo) လႄႈ လွင်ႈတေၸတ်းႁဵတ်းၶွၼ်ႊၾရႅၼ်ႊတႆးယူၼ်း ၸိူဝ်းၼႆႉ။ မီးတူဝ်တႅၼ်းၵေႃ လိၵ်ႈလၢႆး ပီႈၼွင်ႉတႆး ၼႂ်းမိူင်းၶၢင်၊ မိူင်းယၢင်း၊ တႃႈၵုင်ႈ၊ ဝဵင်းလိူဝ်ႇ၊ ၸႄႈၵႅင်း၊ ပျီႇ၊ ၼႂ်းမိူင်းတႆး ဢိၵ်ႇထႅင်ႈလၢႆလၢႆတီႈ ၶဝ်ႈႁူမ်ႈႁူပ်ႉထူပ်းဢုပ်ႇဢူဝ်း ၵၼ်ၵႂႃႇ။