သင်ၶၸဝ်ႈလႄႈ ၵူၼ်းၼုမ်ႇတႆး ၼႂ်းၸႄႈဝဵင်းတူၼ်ႈတီး တိုၵ်းသူၼ်းၵူၼ်းမိူင်းတႆးပတ်းပိုၼ်ႉ ၽုၵ်ႇတူၼ်ႈမႆႉ တီႈၽႂ်တီႈမၼ်း ၼႂ်းဝၼ်းလဵဝ်ၵၼ်ဝႃႈၼႆသေ ဝၼ်းတီႈ 07/07/2018 ၼႆႉ ႁၢင်ႈႁႅၼ်း ၽုၵ်ႇတူၼ်ႈမႆႉ တီႈၽႂ်တီႈမၼ်း။

သင်ၶၸဝ်ႈလႄႈ ၵူၼ်းၼုမ်ႇတႆး ႁူမ်ႈၵၼ် သူင်ႇလိၵ်ႈထိုင် ၵေႃႈလိၵ်ႈလၢႆး ၵူႈၸႄႈဝဵင်းပႃးၸဵမ် ပႃႇတီႇႁူဝ်သိူဝ်၊ သိူဝ်ၽိူၵ်ႇ၊ လုမ်းၵပ်းသၢၼ်တပ်ႉသိုၵ်း RCSS , SSPP ၊ ၸုမ်းၵူၼ်းၼုမ်ႇတႆး TYO, TYN ၸိူဝ်းၼႆႉ ႁႂ်ႈၶပ်းၶိုင် ၽုၵ်ႇတူၼ်ႈမႆႉ ၼႂ်းဝၼ်းတီႈ 7/7/2018 သိုဝ်ႈၽႂ် သိုဝ်ႈမၼ်း ဝႃႈၼႆဝႆႉ။

ၸၢႆးသီမိူင်း ၸုမ်းၵူၼ်းၼုမ်ႇတႆး ဢၼ်ယူႇတီႈဝဵင်းတူၼ်ႈတီးလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၾိင်ႈၾႃႉ၊ သၽႃႇဝ၊ ထိူၼ်ႇၶိူဝ်းၼႂ်းမိူင်းတႆးႁဝ်းမိူဝ်ႈလဵဝ်ၼႆႉ လူႉလႅဝ်မႃးတိၵ်းတိၵ်းယဝ်ႉလႄႈ ၼင်ႇႁိုဝ် ပေႃးတေၸၢင်ႈ ၵႅတ်ႇၶႄႁႄႉၵင်ႈ ၊ လုမ်းလႃးၶိုၼ်းပႃႇမႆႉထိူၼ်ႇၶိူဝ်းမိူင်းတႆးႁဝ်းၼၼ်ႉ ပုၼ်ႈၽွၼ်းမီးၼိူဝ်ၵူႈၵေႃႉၶႃႈယဝ်ႉ။ ပေႃးႁဝ်းၶႃႈဢမ်ႇဢွၼ်ၵၼ်သႂ်ႇၸႂ်မႅတ်ႇပႅင်းၸိုင် လုၵ်ႈလၢၼ်ႁဝ်းမိူဝ်းၼႃႈ တေလႆႈႁပ်ႉၽွၼ်းၸႃႉမၼ်းတႄႉတႄႉ။ ၵွပ်ႈၼၼ်လႄႈ ပေႃးထိုင်မႃးဝၼ်းတီႈ 07/07/2018 ၼႆႉႁဝ်းၶႃႈမႃး ဢွၼ်ၵၼ်ၽုၵ်ႇတူၼ်ႈမႆႉ တီႈဢေႇမၼ်း ၼိုင်ႈၵေႃႉလႂ် ၼိုင်ႈတူၼ်ႈတီႈၽႂ်ႇတီႈမၼ်းသေၵမ်းၶႃႈ” ဝႃႈၼႆ။

ၼႂ်းဝၼ်းတီႈ 06/07/2018 ၼႆႉ လၢႆလၢႆပိုၼ်ႉတီႈၵေႃႈ ႁၢင်ႈႁႅၼ်းတူၼ်ႈမႆႉ တႃႇၽုၵ်ႇဝႆႉၽႂ်မၼ်း မၢင်းၸိူဝ်းၵေႃႈ ယူႇတီႈမုၵ်ႈၸုမ်းသေ ႁူမ်ႈၵၼ်ၽုၵ်ႇ မၢင်ၸိူဝ်းၵေႃႈယူႇတီႈသုၼ်ႇတူဝ်သေၽုၵ်ႇ။

ၸၢႆးၶျိတ်ႉငူၺ်ႇ ၸၢႆးမႃႇၶႅင်ႇႁႅင်းၵိုမ်းတႆးလၢတ်ႈတီႈၽူႈတွႆႇႁွၵ်ႈဝႃႈ- “ မိူဝ်ႈၼႆႉၶႃႈႁဝ်းၵေႃႈ ႁၢင်ႈႁႅၼ်းတူၼ်ႈမၢၵ်ႇ ထူဝ်းပတ်ႉ၊ မွၵ်ႇၵွၼ်၊ တူၼ်ႈႁႆးၸိူဝ်းၼႆႉဢေႃႈ” ဝႃႈၼႆ။

တၢင်းၸိုင်ႈတႆးပွတ်းႁွင်ႇၵေႃႈ ဢုပ်ႇဢူဝ်းတင်းၵူၼ်းဝၢၼ်ႈဢိၵ်ႇၽူႈမီးပုၼ်ႈၽွၼ်းသေ တေႁူမ်ႈၵၼ် ၽုၵ်ႇၵႂႃႇ ၵူႈဝဵင်းၼင်ႇၵဝ်ႇဝႃႈၼႆ။

ၸၢႆးၼေႃႇသႅင် ဝဵင်းၼမ်ႉၶမ်း လၢတ်ႈဝႃႈ – “ ႁဝ်းၶႃႈၸတ်းပၢင်ၵုမ်ဢုပ်ႇဢူဝ်းၵၼ် ယွၼ်းတၢင်း ႁူမ်ႈမိုဝ်း တၢင်း ၾၢႆႇၸဝ်ႈၼႃႈတီႈလၢႆၾၢႆႇ ၶဝ်ၵေႃႈႁၼ်းလီၶႃႈဢေႃႈ ႁဝ်းလႆႈၸႂ်ၵၼ်ဝႃႈ တေၽုၵ်ႇတၢင်းၶဝ်ႈဝဵင်း၊ ႁူင်းႁဵၼ်း ၸၼ်ႉၵၢင်၊ ႁူင်းယႃၸိူဝ်းၼႆႉ။ ပိူင်လူင်မၼ်းႁဝ်းၶႃႈ တေၽုၵ်ႇတူၼ်ႈမွၵ်ႇၵွၼ် လိူဝ်ၼၼ်ႉၵေႃႈ တေမီးမႆႉပႅၵ်ႇလႄႈ တူၼ်ႈမၢၵ်ႇထူဝ်းပတ်ႉၸိူဝ်းၼႆႉၵမ်ႈၽွင်ႈ” ဝႃႈၼႆ။

မိူဝ်ႈႁူဝ်လိူၼ်ၵျုၼ်ႊ ပူၼ်ႉမႃးၼႆႉ ၾူၼ်တူၵ်းလၢႆဝၼ်းထပ်းၵၼ်။ ၼမ်ႉထူမ်ႈလုပ်ႇ ဝဵင်းၼမ်ႉလၼ်ႈ သူၼ်၊ ႁႆႈၼႃး ႁိူၼ်းယေးၵူၼ်းဝၢၼ်ႈလုၵွႆ ၊ ၵူၼ်းမိူင်းလင်ႁိူၼ်း 1200 ပၢႆ ႁူဝ်ၵူၼ်း 3 ႁဵင်ပၢႆ ၺႃးၽေးၼမ်ႉ ။ ဢၼ်ၵူၼ်းၼမ်ႉလၼ်ႈ ၺႃးၽေးၼမ်ႉၼၼ်ႉ ၵမ်ႈၼမ်ယုမ်ႇယမ်ဝႃႈ ပဵၼ်ၵွပ်ႈၵူၼ်းမိူင်းတႅပ်းတူၼ်ႈမႆႉ ယႃႉပႃႇထိူၼ်ႇ ႁဵတ်းသူၼ်ၶဝ်ႈၵၢပ်ႇ တင်းႁူၺ်ႈတင်းၵုင်း၊ ၵွပ်ႈဢမ်ႇမီးတူၼ်ႈမႆႉတူၼ်ႈတွၵ်ႇ တတ်းႁႄႉ ႁႅင်းၼမ်ႉၾူၼ်လႄႈ ၸင်ႇၺႃးၽေးၼမ်ႉထူမ်ႈၼႆ ၵမ်ႈၼမ်ယွမ်းႁပ်ႉယုမ်ႇယမ်ၼင်ႇၼႆ ။