ၽူႈၵွၼ်းၸႄႈတွၼ်ႈမႄႈႁွင်ႈသွၼ်လႄႈ ၾၢႆႇၵဵဝ်ႇၶွင်ႈႁွင်ႈၵၢၼ်ၾၢႆႇၼႂ်းမိူင်းမွပ်ႈယိုၼ်ႈဝႂ်ထႆးပၼ် တီႈလုၵ်ႈလၢၼ် ၸၢဝ်းၶိူဝ်း ၸိူဝ်းၵိူတ်ႇၼႂ်းမိူင်းထႆး 100 ၵေႃႉပၢႆ။
ဝၼ်းတီႈ 05/07/2018 ၸၢႆးသိုပ်ႇသၵ်ႇ ဢဵမ်ႇဝိၸၢရ်ႊ ၽူႈၵွၼ်းၸႄႈတွၼ်ႈ မႄႈႁွင်ႈသွၼ်လႄႈ ၸဝ်ႈၼႃႈတီႈ ၾၢႆႇၵဵဝ်ႇၶွင်ႈ မွပ်ႈယိုၼ်ႈဝႂ်ၵပ်းတူဝ်ထႆး ပၼ်လုၵ်ႈဢွၼ်ႇ (ယၢင်း၊ တႆး၊ ဢိၵ်ႇတၢင်ႇ ၸၢဝ်းၶိူဝ်း) ၼႂ်းမႄႈႁွင်ႈသွၼ် တႃႇ 123 ၵေႃႉ တီႈလုမ်းၾၢႆႇၽွင်းငမ်း ဝဵင်းမႄႈႁွင်ႈသွၼ်။
ၸၢႆးဝေႊၼိသ်ႊ ၵေႃႉဢၼ်လႆႈႁပ်ႉဝတ်းထႆးလၢတ်ႈဝႃႈ – “ မီးတၢင်းၸူမ်းသိူဝ်းတႄႉတႄႉ ယိၼ်းၸူမ်းထိုင် ၽူႈၵွၼ်းၸႄႈတွၼ်ႈမႄႈႁွင်ႈသွၼ်လႄႈ ၸဝ်ႈၼႃႈတီႈဢၼ်ၵဵဝ်ႇၶွင်ႈ တီႈၸွႆႈထႅမ် ႁႂ်ႈၶႃႈပေႃးလႆႈ ဝတ်းထႆး၊ ၶႃႈပၼ်ၶေႃႈမၼ်ႈၵႅၼ်ႇဝႃႈ တေပဵၼ်ၵူၼ်းဝူၼ်ႉလီ၊ ႁဵတ်းလီ ပိူဝ်ႈတွပ်ႇတႅၼ်း ၵုင်ႇမုၼ် ၽႅၼ်လိၼ် ” ဝႃႈၼႆ။
ၽူႈၸိူဝ်းဢၼ်လႆႈႁပ်ႉဝႂ်ထႆးၼၼ်ႉ ၵၢဝ်ႇၵိၼ်ႇပၼ်ၶေႃႈမၼ်ႈၵႅၼ်ႇဝႃႈ တေႁၵ်ႉလႄႈ ၼပ်ႉယမ် ၵုင်ႇမုၼ် ၸဝ်ႈမုၼ်ယႂ်ႇၶုၼ်ႁေႃၶမ်း တေပဵၼ်ၵူၼ်းလီၼႂ်းတူင်ႇဝူင်းၵူၼ်းလႄႈ ဝၢၼ်ႈမိူင်းၵႂႃႇ။
ၽူႈၵွၼ်းၸႄႈဝဵင်းမႄႈႁွင်ႈသွၼ်သိုပ်ႇလၢတ်ႈဝႃႈ- “ ဝတ်းဝႂ်ထႆးဢၼ်မွပ်ႈပၼ်ၼႆႉ မီးသုၼ်ႇလႆႈသုၼ်ႇ ပဵၼ်ၽဵင်ႇပဵင်းၵၼ်တင်းၵူၼ်းထႆး ဢမ်ႇဝႃႈသုၼ်ႇၵၢၼ်ၶဝ်ႈယူတ်းယႃတူဝ် တီႈႁူင်းယႃ လူင်ပွင်ၸိုင်ႈ ၸိူဝ်းၼႆႉ မိူဝ်ႈလဵဝ်ၼႆႉၵူၼ်းၼႂ်းမိူင်းမႄႈႁွင်ႈသွၼ် ၸိူဝ်းဢမ်ႇပႆႇမီးဝတ်းဝႂ် ယင်းၵိုတ်းယူႇထႅင်ႈ 37,573ၵေႃႉ ” ဝႃႈၼႆ။
မိူဝ်ႈဝၼ်းတီႈ 07/02/2018 ၼၼ်ႉၵေႃႈ မွပ်ႈယိုၼ်ႈပၼ် မၢႆၾၢင်(ဝႂ်)ထႆးပၼ်လုၵ်ႈဢွၼ်ႇ 417 ၵေႃႉ ၸိူဝ်းပဵၼ်လုၵ်ႈလၢၼ်ၸၢဝ်းၶိူဝ်း ဢၼ်ၵိူတ်ႇၼႂ်းမိူင်းထႆး တီႈလုမ်းၾၢႆႇၽွင်းငမ်းၸႄႈဝဵင်းမိူင်း ၸႄႈတွၼ်ႈ မႄႈႁွင်ႈသွၼ် မိူင်းထႆးတွၼ်ႈၼိူဝ် ။ မီးပူႇၵၢင်ႉပူႇၵႄႇဝၢၼ်ႈလႄႈ ၽူႈယႂ်ႇၵူၼ်းလူင် ၼႂ်းဢိူင်ႇဝၢၼ်ႈ ၶဝ်ႈႁူမ်ႈႁူႉႁၼ်ၸွမ်း ။
