သိုၵ်းမၢၼ်ႈ တီႉၺွပ်း ၵူၼ်းၸၢႆးၵေႃႉၼိုင်ႈ တီႈဝၢၼ်ႈၶႂၢင် ထုင်ႉပူင်း ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း။

ဝၼ်းတီႈ 7/1/2025 ယၢမ်းၵၢင်ၼႂ် ပလိၵ်ႈဝၢၼ်ႈယဵၼ်ႇ (ဘန်းယဉ်) တႂ်ႈသိုၵ်းမၢၼ်ႈ ၼႄးဝႃႈ ၵူၼ်းဝၢၼ်ႈၵေႃႉၼိုင်ႈ ၸွႆႈထႅမ်ဢူၼ်းငိုၼ်းပၼ် လုၵ်ႈၸုမ်းၵႅတ်ႇၶႄၵူၼ်းမိူင်း PDF ၼႆသေ တီႉၺွပ်းၵႂႃႇ။ 

ၵူၼ်းၸၢႆးထုင်ႉပူင်း လၢတ်ႈၽူႈတွႆႇႁွၵ်ႈဝႃႈ -“ၶဝ်ၼႄးဝႃႈ ဢူၼ်းငိုၼ်းပၼ် PDF ၶဝ်ၼႆသေ။ တေႃႈလဵဝ်တႄႉ ၶဝ်သူင်ႇၵႂႃႇၶင်ဝႆႉတီႈႁူဝ်ပူင်းယဝ်ႉ”- ဝႃႈၼႆ။

ၵူၼ်းၸၢႆး ဢၼ်ထုၵ်ႇတီႉၺွပ်းၵႂႃႇၼၼ်ႉပဵၼ် ၸၢႆးသႅင်လိူၼ် ဢႃယု 30 ပီ။ ၵဵဝ်ႇၵပ်းလွင်ႈ ၸၢႆးသႅင်လိူၼ် ဢူၼ်းငိုၼ်းပၼ် ၸုမ်း PDF တႄႉယူႇႁႃႉ ဢမ်ႇၸႂ်ႈႁႃႉ ၼႆၼၼ်ႉတႄႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ဢမ်ႇလႆႈၶေႃႈယိုၼ်ယၼ်။

သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ၶဝ်လိုပ်ႈလမ်းတီႉၺွပ်း ၵူၼ်းဢၼ်သၢၼ်ၶတ်းၶဝ်သေ တဵၵ်းဢဝ်မႃးႁၢပ်ႇၵၢၼ်သိုၵ်း၊ ႁဵတ်းႁႂ်ႈၵူၼ်းမိူင်းဢွၼ်ၵၼ်ပၢႆႈ ဢွၵ်ႇဝၢၼ်ႈဢွၵ်ႇမိူင်းတင်းၼမ်တင်းလၢႆ။

ၼႂ်းၶၢဝ်းတၢင်း ပီ 2024 ၼႆႉ သိုၵ်းမၢၼ်ႈ ယိုတ်းမိူင်း ၶႃႈႁႅမ်ၵူၼ်းမိူင်းမၢၼ်ႈပတ်းပိုၼ်ႉတၢႆ မွၵ်ႈ 1,800 ၵေႃႉ၊ တီႉၺွပ်း 28,000 ပၢႆၼႆ ၸုမ်းၸွႆႈထႅမ်ၵူၼ်းတူၵ်းၶွၵ်ႈ ၵၢၼ်မိူင်း AAPP ၵဵပ်းၶေႃႈမုလ်းႁၢႆးငၢၼ်းဝႆႉ ၼႂ်းဝၼ်းတီႈ 9/1/2025 ၼႆႉ ၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)