Toyota ၶွမ်ႊပၼီႊရူတ်ႉၵႃး ဢၼ်ယႂ်ႇလိူဝ်ပိူၼ်ႈၼႂ်းလုမ်ႈၾႃႉ ပိုၼ်ၽၢဝ်ႇဝႃႈ တေလူင်းတိုၼ်းလၢင်း ၼႂ်း Interstellar Technologies (IST) ဢၼ်တေႁဵတ်းဢွၵ်ႇ ၼူၾႆးတင်းၼမ်တင်းလၢႆသေ တေတိူဝ်းၶႂၢၵ်ႈၵၢၼ်ငၢၼ်းၵႂႃႇ တီႈၼႂ်းၶၵ်ႉတွၼ်ႈဢႃႇၵႃႇသ (ၸၵ်ႉၵျႃႉဝလႃႇ) ဝႃႈၼႆ။
လွင်ႈၼႆႉ ႁူဝ်ပဝ်ႈၶွမ်ႊပၼီႊ တူဝ်ႊယူဝ်ႊတိူဝ်ႊ Akio Toyoda ပိုၼ်ၽၢဝ်ႇလၢတ်ႈၵႂႃႇ တီႈၼႂ်းပၢင်ပၢႆးၼႄ ပၢႆးၶိူင်ႈၸၢၵ်ႈ (CES) ဢၼ်ၸတ်းႁဵတ်းတီႈဝဵင်း Las Vegas မိူင်းဢမေႊရိၵၼ်ႊ။ ၶွမ်ႊပၼီႊၽႄ ဢၼ်ယူႇၾၢႆႇတႂ်ႈ တူဝ်ႊယူဝ်ႊတိူဝ်ႊ Woven by Toyota တေလူင်းတိုၼ်းလၢင်းၵႂႃႇ တီႈၼႂ်း IST တႃႇငိုၼ်းၵျပၼ်ႊ 7 ပီႊလီႊယၼ်ႊ ယၢၼ်း(Yen) ဝႃႈၼႆ။
ၶွမ်ႊပၼီႊ တူဝ်ႊယူဝ်ႊတိူဝ်ႊ ပၵ်းၸႂ်ၼိူဝ်ၵၢၼ်ႁဵတ်းဢွၵ်ႇၼူၾႆးသေ ႁၢင်ႈႁႅၼ်းတႃႇတေႁဵတ်းဢွၵ်ႇ ၶိူင်ႈၸၢၵ်ႈ ဢၼ် ၵူၼ်းၸၢင်ႈတေႃႉဢဝ်ၵႂႃႇၸွမ်းသေ ၵႂႃႇလူင်းၸွတ်ႇလႆႈ တီႈၼိူဝ်လုၵ်ႈလိူၼ် ဝႃႈၼႆ။
ယွၼ်ႉၶွမ်ႊပၼီႊ SpaceX ၶွင် ဢီႊလုၼ်ႊမၢၵ်ႉသ် ႁဵတ်းႁႂ်ႈၵၢၼ်ၶေႉၶဵင်ႇ ၼႂ်းၵၢၼ်ဢႃႇၵႃႇသ လိုဝ်းလင် ၶိုၼ်ႈမႃးလႄႈ ၸိူဝ်းပဵၼ်ၶွမ်ႊပၼီႊ သုၼ်ႇလဵဝ် ၸင်ႇဢွၼ်ၵၼ်ၶေႉၶဵင်ႇၵၼ် ၵႂႃႇလူင်းတိုၼ်းလၢင်း ၼႂ်းၵၢၼ်ႁဵတ်းဢွၵ်ႇၼူ ၾႆးတင်း လၢဝ်ထဵမ်း (ဂြိုဟ်တု) ၼမ်မႃး။
ၶွမ်ႊပၼီႊ IST ဢၼ်တူဝ်ႊယူဝ်ႊတိူဝ်ႊ တေလူင်းတိုၼ်းလၢင်းၼႆႉ ပဵၼ်ၶွမ်ႊပၼီႊသုၼ်ႇလဵဝ် ဢၼ်ပွႆႇၼူၾႆး ၶိုၼ်ႈၵႂႃႇတီႈၼႂ်းဢႃႇၵႃႇသ ဢွၼ်တၢင်းသုတ်း ၼႂ်းမိူင်းၵျပၼ်ႊ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ