ၵူၼ်းမိူင်း ၼႂ်းထုင်ႉၸဵင်ႇႁွင်ႇဝၼ်းဢွၵ်ႇဝဵင်းၼမ်ႉၸၢင် လင်ႁိူၼ်းၵူၼ်းၼပ်ႉႁူဝ်ပၢၵ်ႇ လႆႈပၢႆႈၽေးသိုၵ်း သွၼ်ႈယူႇဝႆႉ ၸွမ်းႁိူၼ်းယေးပီႈၼွင်ႉၽႂ်မၼ်း လႆႈမႃးၶၢဝ်းတၢင်းဝူင်ႈပၢႆယဝ်ႉ ပႆႇႁတ်းပွၵ်ႈၶိုၼ်းႁိူၼ်းယေး ။

ဝၼ်းတီႈ 4/1/2025 ယၢမ်းႁူဝ်ၶမ်ႈ 5 မူင်း ထိုင်ၵၢင်ၶိုၼ်း 12 မူင်း သဵင်ၵွင်ႈတႅၵ်ႇ တၢင်းဝၢၼ်ႈၼမ်ႉမူဝ် ဢိူင်ႇၼွင်ႁီး ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ၵူၼ်းပိုၼ်ႉတီႈ တႃႇလင်ႁိူၼ်း 200 ၼၼ်ႉ လႆႈ ပၢႆႈၽေးသိုၵ်း။

ၼၢင်းယိင်း ဢႃယုမွၵ်ႈ 40 ပီ ၵူၼ်းဝၢၼ်ႈၼမ်ႉမူဝ် ပၢႆႈၽေးသိုၵ်း ယူႇဝႆႉတီႈဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ – “ပၢင်တိုၵ်းပဵၼ် မိူဝ်ႈသိုၼ်းမိူဝ်ႈသၢၼ်း သဵင်ၵွင်ႈတႅၵ်ႇ ၶၢဝ်းယၢမ်းႁူဝ်ၶမ်ႈ 5 မူင်းထိုင်ၵၢင် ၶိုၼ်း 12 မူင်း၊ ပၢင်တိုၵ်းၼႆႉ ဢမ်ႇပဵၼ်ၼႂ်းဝၢၼ်ႈ။ ၵူၺ်းၵႃႈ ယူႇၼႂ်းဝၢၼ်ႈသေ လႆႈငိၼ်းသဵင်လင်ဝႃႈလင်။   သဵင်မၼ်းမေႃးၸမ်ဝၢၼ်ႈမႃးလွႆးလွႆးလႄႈ ၵူၼ်းၼႂ်းဝၢၼ်ႈ တေႃႉၶူဝ်းပၢႆႈမူတ်း၊ မိူဝ်ႈၸဝ်ႉတႄႉ သိုၵ်းၶူဝ်းလၢႆး ဢဝ်ၶိူင်ႈမိၼ်ၻရူၼ်ႊ မိၼ်ၵႂႃႇပွႆႇဢွၼ်တၢင်း၊ ၽိူဝ်ႇလိုၵ်းမႃး သိုၵ်းဝႃႉ မႃးပွႆႇၶိုၼ်း၊ ၸမ်ႁႅင်းၼႃႇ တူၵ်းတၢင်းလင်ႁိူၼ်းႁဝ်း ႁိူၼ်းပေႃးသၼ်ႇ၊ သိုၵ်းဝႃႉ ၶဝ်ႈဝႅတ်ႉဝၢၼ်ႈ။ ၶူဝ်းလၢႆးသမ်ႉ ယူႇၼႂ်းဝၢၼ်ႈ” – ဝႃႈၼႆ။

ၵူၼ်းမိူင်း ဝဵင်းၼမ်ႉၸၢင်လၢတ်ႈဝႃႈ ထုင်ႉၼၼ်ႉ သိုၵ်း RCSS တူင်ႉၼိုင်ယူႇသဝ်း။ သိုၵ်းဝႃႉ ဢၼ်ၵူၼ်းဝၢၼ်ႈဝႃႈၼၼ်ႉသမ်ႉ ပဵၼ်ၵူၼ်းသိုၵ်း SSPP ဢၼ်လၢတ်ႈၵႂၢမ်းဝႃႉ (ဢမ်ႇလၢတ်ႈၵႂၢမ်းတႆး)။ ၼၼ်ႉသမ်ႉ တူင်ႉၼိုင်တၢင်း ၼွၵ်ႈဝၢၼ်ႈ ၾၢႆႇဢွၵ်ႇဝဵင်းလၢႆးၶႃႈ လူင်းမႃးတၢင်းၸၢၼ်း။

မိူဝ်ႈၵွၼ်ႇ ထုင်ႉၼၼ်ႉ ၵႆႉငိၼ်းသဵင်ၵွင်ႈတႅၵ်ႇယူႇသေတႃႉ သဵင်မေႃးၼႂ်းထိူၼ်ႇ တီႈၵႆဝၢၼ်ႈၵူၺ်း။ ႁိုင်ႁိုင် ၸင်ႇတႅၵ်ႇ ၼိုင်ႈပွၵ်ႈ၊ ယဝ်ႉၵေႃႈ တႅၵ်ႇၸူဝ်ႈၵႅပ်ႉၵမ်းၵူၺ်း။ ဢၼ်တႅၵ်ႇၵမ်းၼႆႉတႄႉ တႅၵ်ႇႁိုင်တႅၵ်ႇယႂ်း၊ ၸမ်ဝၢၼ်ႈလႄႈ ႁဵတ်းႁႂ်ႈ ၵူၼ်းဝၢၼ်ႈ ဢမ်ႇႁတ်းယူႇၼႂ်းဝၢၼ်ႈ – ၵူၼ်းမိူင်းဝဵင်းၼမ်ႉၸၢင် လၢတ်ႈၼင်ႇၼႆ။

ၵူၼ်းပိုၼ်ႉတီႈ ဝၢၼ်ႈၼမ်ႉမူဝ် လၢတ်ႈၽူႈတွႆႇႁွၵ်ႈဝႃႈ -“ပၢင်တိုၵ်းတႄႉ ပဵၼ်တီႈတၢင်းၶႅပ်ႇဝၢၼ်ႈၼမ်ႉမူဝ် ပဵၼ်မႃးႁိုင် ၼႃႇယဝ်ႉ၊ ၵူၺ်းဢမ်ႇပဵၼ်ႁႅင်း။ မိူဝ်ႈသိုၼ်းမိူဝ်ႈသၢၼ်းၼႆႉတႄႉ ပဵၼ်ႁႅင်းလႄႈ ၵူၼ်းဝၢၼ်ႈ ဢွၼ်ၵၼ်ပၢႆႈၵႂႃႇယူႇ ၼႂ်းဝဵင်းၼမ်ႉၸၢင်လႄႈ လၢႆးၶႃႈ ၸိူဝ်းၼႆႉ။ ၸိူဝ်းဢမ်ႇမီးပီႈၼွင်ႉတႄႉ ဢွၼ်ၵၼ် ပၢႆႈၵႂႃႇယူႇတီႈၵျွင်းမုၼ်ၸဝ်ႈ ဝၢၼ်ႈၼမ်ႉမူဝ်။ ၵူဝ်မၢၵ်ႇတူၵ်းတိူဝ်ႉႁိူၼ်းယေးလႄႈ ပၢႆႈဝႆႉၸူဝ်ႈၶၢဝ်းၵူၺ်း”- ဝႃႈၼႆ။

ၸိူဝ်းဢၼ်လႆႈပၢႆႈဢွၵ်ႇဝၢၼ်ႈၼႆႉ တေပဵၼ်ဝၢၼ်ႈႁူဝ်ၶူဝ်၊ ၵုၼ်သၢႆး၊ ဝၢၼ်ႈပၢင်ႇ၊ ၼမ်ႉဢုတ်ႇ ၸိူဝ်းပဵၼ် တႂ်ႈဢိူင်ႇၼွင်ႁီး – ၸိူဝ်းၼႆႉ။ မၢင်ၸိူဝ်း ပၢႆႈၶဝ်ႈဝဵင်း၊ မၢင်ၸိူဝ်း ပၢႆႈၵႂႃႇထိုင်မိူင်းထႆးပုၼ်ႉ။ ပီၼွင်ႉယၢင်းလမ် ယၢင်းလၢႆးၶဝ်တႄႉ ပၢႆႈၵႂႃႇတင်းဝၢၼ်ႈၵုင်းလၢင်း၊ ၼမ်ႉမေႃႇၶဝ်ႈသဵၼ်ႈ ၸိူဝ်းၼႆႉ – ၼၢင်းယိင်း ၵူၼ်းပၢႆႈၽေးသိုၵ်း လၢတ်ႈၼႄၼင်ႇၼႆ။ 

ၵူၼ်းၸၢႆးယူႇဝၢၼ်ႈ ၵၢတ်ႇလိူဝ်ႇၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “သိုၵ်းဝႃႉတင်း သိုၵ်း SSPP ယိုဝ်းၵၼ် တင်းသိုၵ်းၶူဝ်းလၢႆး RCSS ၊ ဢၼ်ၶဝ်ယိုဝ်းၵၼ်တၢင်းထုင်ႉၼႆႉတႄႉ ႁိုင်ယဝ်ႉ။ ၸဵမ်မိူဝ်ႈ သိုၵ်းမၢၼ်ႈတႄႇ ယိုတ်းမိူင်း၊ ဢၼ်ပဵၼ်ႁၢဝ်ႈႁႅင်းတႄႉ တေပဵၼ်ပီၵၢႆလႄႈ ပီၼႆႉ။ ၶႅၼ်ၼႃႈတီႈၵၼ်သေ ယူႇယူႇၵႆႉယိုဝ်းၵၼ်၊ ၼႂ်း 2 ဝၼ်း3 ဝၼ်းၼႆႉတႄႉ သဵင်ၵွင်ႈယိၼ်းႁႅင်းၼႃႇ၊ ၵူၼ်းဝၢၼ်ႈၼမ်ႉမူဝ်လႄႈ ဝၢၼ်ႈႁိမ်းႁွမ်းတႄႉ ပၢႆႈႁိုင်ၼႃႇယဝ်ႉ၊ မၢင်ၸိူဝ်းၵေႃႈ ပၢႆႈပၢႆႈပွၵ်ႈပွၵ်ႈ၊ တူၺ်းငဝ်းလၢႆးသေ မၢင်ၸိူဝ်းၵေႃႈ မိူဝ်းၽုၵ်ႇမိူဝ်းသွမ်ႈၶိုၼ်းယူႇ”- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈတွႆႇႁွၵ်ႈ ၵပ်းသိုပ်ႇၸူးတူၺ်းၽူႈၶၢၼ်ပၢၵ်ႇ တင်းသွင်ၾၢႆႇၵေႃႈ ၵပ်းသိုပ်ႇဢမ်ႇလႆႈ။

တေႃႇထိုင်ဝၼ်းမိူဝ်ႈၼႆႉ သဵင်ၵွင်ႈဢမ်ႇပႆႇယဵၼ်လႄႈ ၵူၼ်းဝၢၼ်ႈၼမ်ႉမူဝ် ဢမ်ႇႁတ်းမိူဝ်းဢဝ်မၢၵ်ႇၶဝ်ႈတဝ်ႈၼမ်ႉ ၶိုၼ်း။ ပဵၼ်ဢၼ်ယၢပ်ႇၽိုတ်ႇတႃႇလဵင်ႉလူၵၼ် ဝႃႈၼႆ။

ၸဝ်ႈသူၼ် ထူဝ်ႇႁႄႉဝၢၼ်ႈၼမ်ႉမူဝ် လၢတ်ႈၽူႈတွႆႇႁွၵ်ႈဝႃႈ -“ပႂ်ႉတူၺ်းငဝ်းလၢႆးၵူၺ်းၼႆႉ၊ ပေႃးသဵင်ၵွင်ႈ ယဵၼ်ၵေႃႈ ဢၢင်ႈမိူဝ်းဢဝ်ၶိုၼ်း ထူဝ်ႇႁႄႉ၊ ပေႃးဢမ်ႇမိူဝ်းဢဝ်ၵေႃႈ သေလၢႆ လႆႈလူင်းတိုၼ်းလၢင်းၼမ်။ ပေႃးဢမ်ႇႁဵတ်းၵိၼ် ၵၢၼ်ၽုၵ်ႇသွမ်ႈၼႆႉၵေႃႈ ဢမ်ႇၸၢင်ႈႁဵတ်းၵိၼ်ၵၢၼ်သင် ႁႃၵိၼ်လဵင်ႉတွင်ႉၵေႃႈ ယၢပ်ႇၼႃႇ”- ဝႃႈၼႆ။

ဝၢၼ်ႈၼမ်ႉမူဝ်ၼႆႉ ယၢၼ်ၵႆၵၼ်တၢင်း ဝဵင်းၼမ်ႉၸၢင် 13 လၵ်း၊ မီးၾၢႆႇႁွင်ႇဝဵင်းၼမ်ႉၸၢင်၊ ၾၢႆႇၸၢၼ်းဝဵင်းလၢႆးၶႃႈ။ ပဵၼ်ပီႈၼွင်ႉတႆးလႄႈ ပီႈၼွင်ႉယၢင်းလၢႆး ယူႇႁူမ်ႈၵၼ်။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)