ၸွမ်းၼင်ႇ သဵၼ်ႈမၢႆႁူဝ်ၼပ်ႉၵူၼ်းမိူင်းမၢၼ်ႈ ဢၼ်ၵဵပ်းၼႂ်းပီ 2024 ၼႆႉသေ တင်းမူတ်းမီး 51,316,756 ၵေႃႉၼႆ – ႁွင်ႈၵၢၼ်ၽွင်းလူင် ၾၢႆႇဢဵၼ်ႁႅင်းၵူၼ်း တႂ်ႈသိုၵ်းမၢၼ်ႈၵုမ်းၵမ် ပိုၼ်ၽၢဝ်ႇဝႆႉ ၼႂ်းဝၼ်းတီႈ 31/12/2024 ၼႆႉၼင်ႇၼႆ။
သဵၼ်ႈမၢႆႁူဝ်ၼပ်ႉၵူၼ်း ဢၼ်ၵဵပ်းလႆႈဝႆႉတႄႉတႄႉၼၼ်ႉ မီး 32,191,407 ၵေႃႉ ။ တႃႇ 19,125,349 ၵေႃႉ တႄႉ ပဵၼ် ဢၼ်ၶၢတ်ႈလၢမ်းဝႆႉ ဝႃႈၼႆ။
မိူဝ်ႈၽွင်းလူင်းၵဵပ်းသဵၼ်ႈမၢႆႁူဝ်ၼပ်ႉၵူၼ်း တူဝ်ႈမိူင်းႁူမ်ႈတုမ်ပတ်းပိုၼ်ႉၼၼ်ႉ ၸွမ်းၼင်ႇငဝ်းလၢႆး လွင်ႈႁူမ်ႇလူမ်ႈသေ ၼႂ်း 330 ၸႄႈဝဵင်းၼၼ်ႉ ဢၼ်ၵဵပ်းလႆႈႁူဝ်ပၢၵ်ႇတဵမ် မီး 145 ၸႄႈဝဵင်း၊ ဢၼ်ၵဵပ်း လႆႈမၢင်ပိုၼ်ႉတီႈသမ်ႉ မီး 127 ၸႄႈဝဵင်း၊ ဢၼ်ဢမ်ႇၵဵပ်းလႆႈသေဢိတ်းသမ်ႉမီး 58 ၸႄႈဝဵင်း ဝႃႈၼႆ။
သဵၼ်ႈမၢႆႁူဝ်ၼပ်ႉၵူၼ်းမိူင်းမၢၼ်ႈ ဢၼ်ၵဵပ်းဝႆႉ ၼႂ်းပီ 2014 ပူၼ်ႉမႃးၼၼ်ႉၵေႃႈ မီး 51,486,253 ၵေႃႉ။ ၵူၺ်းၵႃႈ ႁူဝ်ၼပ်ႉၵူၼ်းမိူင်းမၢၼ်ႈ ၼႂ်းပီ 2024 ၼႆႉ ယွမ်းၵႂႃႇလိူဝ်သေ မိူဝ်ႈပီ 2014 ႁိမ်းၸမ် 2 သႅၼ် (169,497) ၵေႃႉ – ဝႃႈၼႆ။
မိူဝ်ႈၽွင်းသိုၵ်းမၢၼ်ႈ လူင်းၵဵပ်းသဵၼ်ႈမၢႆႁူဝ်ၼပ်ႉၵူၼ်းၼၼ်ႉ ယွၼ်ႉမႆႈၸႂ်လွင်ႈႁူမ်ႇလူမ်ႈလႄႈ ၶေႃႈမုလ်း မၢင်လွင်ႈ ၵူၼ်းမိူင်းတေဢမ်ႇတွပ်ႇလၢတ်ႈဝႆႉတႅတ်ႈတေႃး။ ၵွပ်ႈၼၼ်ႉ သဵၼ်ႈမၢႆႁူဝ်ၼပ်ႉၵူၼ်း ဢၼ် သိုၵ်းမၢၼ်ႈၵဵပ်းၼႆႉ တေ ဢမ်ႇမၢၼ်ႇမႅၼ်ႈလႆႈႁူဝ်ပၢၵ်ႇတဵမ် – ၽူႈလဵပ်ႈႁဵၼ်းၶဝ် ၵမ်ႈၽွင်ႈ ထတ်းသၢင်ဝႆႉ ၼင်ႇၼႆ။
ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈဝႆႉ မိူဝ်ႈဝၼ်းတီႈ 1 လိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼၼ်ႉဝႃႈ – သဵၼ်ႈမၢႆႁူဝ်ၼပ်ႉၵူၼ်းၸိူဝ်းၼႆႉ တေဢဝ်ၵႂႃႇၸႂ်ႉ တႃႇၶႅပ်းၵၢင်ၸႂ်တေမီးလွင်ႈမၢၼ်ႇမႅၼ်ႈ ၼႂ်းပၢင်လိူၵ်ႈ တင်ႈ ဢၼ်တေၸတ်းႁဵတ်း ၼႂ်းပီ 2025 ၼႆႉ ဝႃႈၼႆ။
ၾၢႆႇၼိုင်ႈၵေႃႈ ၸုမ်းၵဵပ်းသဵၼ်ႈမၢႆႁူဝ်ၼပ်ႉၵူၼ်း ၾၢႆႇတႂ်ႈသိုၵ်းမၢၼ်ႈ ၵုမ်းၵမ် ၺႃးတီႉၺွပ်း တိုၵ်းတေႃးၶႃႈႁႅမ် ၽွင်းလူင်းၵဵပ်းသဵၼ်ႈမၢႆႁူဝ်ၼပ်ႉၵူၼ်း ၼႂ်းတိူင်းတႃႈၵုင်ႈ၊ တိူင်းၸႄႈၵႅင်း၊ တိူင်းဝဵင်းလိူဝ်ႇ၊ တိူင်းတၼၢဝ်းသီလႄႈ ၸႄႈမိူင်းၶျၢင်း ၸိူဝ်းၼႆႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ