ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇဢွင်ႈတီႈပၢင်သဝ်း ၵူၼ်းပၢႆႈၽေးသိုၵ်းယၢင်းလႅင် တိူဝ်ႉၺႃးၵူၼ်းမၢတ်ႇၸဵပ်း။
မိူဝ်ႈဝႃး ဝၼ်းတီႈ 1/1/2025 ယၢမ်းႁူဝ်ၶမ်ႈ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇ ၾၢႆႇလင် ဢွင်ႈတီႈ ပၢင်သဝ်းၵူၼ်းပၢႆႈၽေးသိုၵ်း ဢၼ်မီးတီႈဝဵင်းတီႇမေႃးသူဝ်ႇ။
ၵူၼ်းၸၢႆး ပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝႃး သိုၵ်းမၢၼ်ႈ ဢဝ်ၶိူင်ႈမိၼ်ပွႆႇမၢၵ်ႇ။ မႃးပွႆႇၵူႈဝၼ်း ယဝ်ႉ၊ မၢင်တီႈ ဢမ်ႇမီးသၼ်ယႃး (လႅင်းၾူၼ်း)လႄႈ ဢမ်ႇႁူႉၸွမ်းၶၢဝ်ႇၶိုတ်းတၼ်းၵူၺ်း။ သိုၵ်းမၢၼ်ႈ ဢဝ်ဢွင်ႈတီႈၵူၼ်းပၢႆႈၽေးသိုၵ်း ႁဵတ်းပဵၼ်ပဝ်ႉမၢႆၵၢၼ်သိုၵ်းသေ ယိုဝ်းသႂ်ႇ။ ၵူၼ်းမိူင်း မၢတ်ႇၸဵပ်းၵေႃႈ မီး လူႉတၢႆၵေႃႈမီး ၵူၺ်းၵႃႈ ဢမ်ႇႁူႉႁူဝ်ၼပ်ႉတႅတ်ႈတေႃး”- ဝႃႈၼႆ။
မိူဝ်ႈဝၼ်းတီႈ 31/12/2024 ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်ပွႆႇမၢၵ်ႇ ၾၢႆႇတၢင်းဢွၵ်ႇဝဵင်းလွႆၶေႃ ဢွင်ႈတီႈၵူၼ်းပၢႆႈၽေးသိုၵ်းယူႇသဝ်း ၵူၼ်းပၢႆႈၽေးသိုၵ်း လူႉတၢႆ 3 ၵေႃႉ၊ မၢတ်ႇၸဵပ်း 1 ၵေႃႉ ဝႃႈၼႆ။
ၼၢင်းယိင်း ၵူၼ်းပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ မႃးပွႆႇမၢၵ်ႇတီႈဢၼ်ၵူၼ်းပၢႆႈၽေး သိုၵ်းယူႇသဝ်း၊ ၵူၼ်းတၢႆ 3 ၵေႃႉ ၊ မၢတ်ၸဵပ်း 1 ၵေႃႉ ၊ သိုၵ်းမၢၼ်ႈဢဝ် မၢၵ်ႇသႅၼ်းၼမ်ႉၼၵ်း 200 ပွင်ႇ မႃးပွႆႇ 3 လုၵ်ႈ ၊ ၵူၼ်း ဢၼ်မၢတ်ႇၸဵပ်းတႄႉ ယၢမ်းလဵဝ် ယူတ်းယႃတူဝ်ဝႆႉ တီႈႁူင်းယႃ”- ဝႃႈၼႆ။
ယၢမ်းလဵဝ် သိုၵ်းမၢၼ်ႈၵႆႉ ဢဝ်ၶိူင်ႈမိၼ်ပွႆႇမၢၵ်ႇဢွင်ႈတီႈ ၵူၼ်းပၢႆႈၽေးသိုၵ်း ယူႇသဝ်းတီႈလႅၼ်လိၼ်တႆး – ယၢင်းလႅင်လႄႈ ၵူၼ်းပိုၼ်ႉတီႈပဵၼ်ဢၼ်မႆႈၸႂ်၊ ၸုမ်းသိုၵ်းၵႅတ်ႇၶႄၵူၼ်းမိူင်းယၢင်းလႅင် KNDF ၵေႃႈ ပိုၼ်ၽၢဝ်ႇဝႃႈ ႁႂ်ႈၾၢင်ႉယူႇ ၾၢင်ႉၵိၼ် ဝႃႈၼႆ။
ၽွင်းၸုမ်းဢူၺ်းလီပွတ်းႁွင်ႇသၢမ်ၸုမ်း ႁူမ်ႈၵၼ်သေ ပိုၼ်ၽၢဝ်ႇၽႅၼ်ယၼ်ႇသိုၵ်း 1027 ပိုတ်းယိုဝ်း သိုၵ်းမၢၼ်ႈ တီႈမိူင်းတႆးပွတ်းႁွင်ႇၼၼ်ႉ ၸုမ်းၽွမ်ႉႁူမ်ႈမိူင်းယၢင်းလႅင်ၵေႃႈ ႁူမ်ႈၵၼ်ပိုၼ်ၽၢဝ်ႇ ၽႅၼ် ယၼ်ႇသိုၵ်း 1111 သေ ပိုတ်းယိုဝ်းသိုၵ်းမၢၼ်ႈတီႈမိူင်းယၢင်းလႅင်။
သိုၵ်းယၢင်းလႅင် ဢွင်ႇပေႉသိုၵ်းမၢၼ်ႈသေ ယိုတ်းလႆႈလၢႆလၢႆတီႈ၊ တႄႇပၼ်ႇၵၢၼ်ၽွင်းငမ်းႁင်းၶေႃဝႆႉယူႇ လၢႆလၢႆတီႈယဝ်ႉ။ ၼႃႈတီႈပုၼ်ႈၽွၼ်းပလိၵ်ႈၵေႃႈ ၵူၼ်းမိူင်းၶိုၼ်ႈမႃးယိပ်းဝႆႉ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ