ၾၢႆႇၸဝ်ႈၼႃႈတီႈထႆး သင်ႇတပ်ႉပၢင်သဝ်းသိုၵ်းဝႃႉ ၸိူဝ်းဢၼ်မီးဝႆႉ ၸွမ်းလႅၼ်လိၼ်ထႆး မိူၼ်ၼင်ႇ ၼႂ်းပိုၼ်ႉတီႈလွႆၼွင်လူင်၊ လွႆႁူဝ်မႃႉ ဢၼ်တိတ်းၸပ်းၵၼ်တင်း မိူင်းပၢႆး ၸႄႈဝဵင်းမႄႈႁွင်ႈသွၼ် ၸိုင်ႈထႆး။ ၶၢဝ်းတၢင်းၶေႃႈသင်ႇတဵမ်လိူၼ် ၼႂ်းဝၼ်းတီႈ 18/12/2024 ၼႆႉ ႁႂ်ႈဝႆႉပဵၼ်ဝၼ်းလိုၼ်းသုတ်းသေ ထွႆထွၼ်ဢွၵ်ႇႁႂ်ႈယဝ်ႉတူဝ်ႈ ဝႃႈၼႆ။ 

ထိုင်မႃးၶၢဝ်းယၢမ်း တဵမ်လိူၼ်ယဝ်ႉ ပႆႇငိၼ်းၾၢႆႇသိုၵ်းဝႃႉ ယိုၼ်ယၼ်လၢတ်ႈဝႃႈ တေဢွၵ်ႇပိုၼ်ႉတီႈ။ ဢိင်ၼိူဝ်လွင်ႈၼႆႉ ငဝ်းလၢႆးပဵၼ်ဝႆႉၸိူင်ႉႁိုဝ်၊ လႅပ်ႈတေပဵၼ်ႁိုဝ်မႃး ၼႆၼၼ်ႉ – ၸဝ်ႈၶိုၼ်းသႂ် ၸႂ်ယဵၼ် ၽူႈၵေႃႇတင်ႈ ၸုမ်းၶၢဝ်ႇၽူႈတွႆႇႁွၵ်ႈ၊ ၽူႈလူင်ႉလႅၼ်ႇ လွင်ႈၸုမ်းသိုၵ်းၸၢဝ်းၶိူဝ်းလႄႈ ၽူႈႁူႉငဝ်းလၢႆး လွင်ႈငမ်းယဵၼ်ၼႂ်းမိူင်းႁူမ်ႈတုမ် ထတ်းသၢင်လၢတ်ႈၼႄဝႆႉၼင်ႇၼႆ။

ဝၼ်းတီႈ 18-19/11/2024  ၸဝ်ႈၼႃႈတီႈထႆးမွၵ်ႇႁွင်ႉလႄႈ ၽူႈမီးၸၼ်ႉၼႂ်းၸုမ်း UWSA 6 ၵေႃႉ ၵႂႃႇ ထိုင် ဝဵင်းၵဵင်းမႂ်ႇ ၸိုင်ႈထႆး ႁူပ်ႉထူပ်းဢုပ်ႇဢူဝ်းၵၼ် တႃႇၽဵဝ်ႈမူၺ်ႉယႃႈမဝ်းၵမ်၊ ပၼ်ႁႃလႅၼ်လိၼ်။ တီႈပၢင်ထူပ်းၵၼ်ၼႆႉ ၾၢႆႇထႆး ၸီႉသင်ႇႁႂ်ႈသိုၵ်းဝႃႉ ထွႆထွၼ်ဢွၵ်ႇလႅၼ်လိၼ်။ လွင်ႈၼႆႉ ၾၢႆႇတၢင်း သိုၵ်းဝႃႉ လၢတ်ႈဝႃႈ ႁႂ်ႈၽူႈၼမ်း သွင်ၸိုင်ႈမိူင်း ဢုပ်ႇဢူဝ်းၵၼ် ပဵၼ်တၢင်းၵၢၼ်။

ဢိင်ၼိူဝ်လွင်ႈၼႆႉသေ တင်းသွင်ၾၢႆႇၶဵင်ႈၶႅင်ၵၢၼ်သိုၵ်း တေႃႇၵၼ်ဝႆႉ ႁင်းၽႂ်ႁင်းမၼ်း တေႃႇထိုင်ဝၼ်းမိူဝ်ႈၼႆႉၵေႃႈ ပႆႇမီးၶၢဝ်ႇငၢဝ်းဝႃႈ ၾၢႆႇတၢင်းသိုၵ်းဝႃႉ တေထွႆထွၼ်ႁိုဝ် ဢမ်ႇထွႆထွၼ်။

ဢွၼ်တၢင်းသုတ်း မၼ်းလူဝ်ႇလႆႈၶႆႈၶိုၼ်း လွင်ႈဢၼ်ပဵၼ်မႃးၵွၼ်ႇ ၾၢႆႇထႆးလႆႈၽိတ်ႈမွၵ်ႇသေလႄႈ တူဝ်တႅၼ်းၸုမ်းသိုၵ်းဝႃႉ UWSA ၼႃႈလိၼ် 171 ဢၼ် “တႃႉထင်” ဢွၼ်ႁူဝ်ၼၼ်ႉ ၸင်ႇလႆႈၵႂႃႇထူပ်း ဢုပ်ႇဢူဝ်းၵၼ်။ ၾၢႆႇထႆး ၸင်ႇသင်ႇႁႂ်ႈသိုၵ်းဝႃႉ ၸွမ်းလႅၼ်လိၼ်တႆး – ထႆးၼၼ်ႉ ထွႆဢွၵ်ႇပၼ်၊ တေ ပၼ်ၶၢဝ်းယၢမ်း တႃႇၼိုင်ႈလိူၼ်ၼႆလႄႈ မၼ်း ၵေႃႈပွင်ႇဝႃႈ ဝၼ်းတီႈ 18 လိူၼ်ၼႆႉ ႁႂ်ႈထွၼ်။ တၢင်း ၾၢႆႇထႆးၵေႃႈ ထတ်းသၢင်ႁၢင်ႈပွင် တႃႇႁႂ်ႈဝႃႉထွႆထွၼ်ၼႆႉ ဢမ်ႇလၢႆးၼိုင်ႈၵေႃႈ လၢႆးၼိုင်ႈ ၶဝ်တိုၼ်း တေလႆႈႁဵတ်းၼႆယူႇ။

ၵမ်းၼႆႉ ၾၢႆႇတၢင်းဝႃႉၵေႃႈ လၢတ်ႈဝႃႈ – “လွင်ႈၼႆႉ ပဵၼ်မႃးႁိုင်ယဝ်ႉ။ ဢမ်ႇႁူႉဝႃႈ ယူႇၼႂ်းလႅၼ်လိၼ် ထႆးႁႃႉ လႅၼ်လိၼ်မၢၼ်ႈ။ ႁဝ်းၶႃႈႁူႉဝႃႈ မၼ်းပဵၼ်တီႈယူႇၵဝ်ႇ ၶွင် MTA ဢၼ်ဝၢင်းၶိူင်ႈၵႂႃႇမိူဝ်ႈ 1996 ၼၼ်ႉ။ ႁဝ်းမႃးယူႇတႅၼ်း ၵႃႈၼၼ်ႉၵူၺ်း။ ၵဵဝ်ႇၵပ်းလွင်ႈလႅၼ်လိၼ်ၼႆႉ မၼ်းပဵၼ်ၵၢၼ်လူင်ပွင်ၸိုင်ႈ 2 ၾၢႆႇ လူဝ်ႇလၢတ်ႈတေႃႇၵၼ်။ ၼင်ႇ ဢၼ်ၶေႃႈတႅပ်းတတ်း လူင်ပွင်ၸိုင်ႈထႆးလႄႈ မၢၼ်ႈမီးၼၼ်ႉ တႄႉ တေၸွမ်းယူႇ”- ဝႃႉၶဝ်လၢတ်ႈ ၸိူင်ႉၼႆ။

ႁဵတ်းၼၼ်သေ ၶဝ်ၵေႃႈ ပွၵ်ႈမိူဝ်းၵႂႃႇသေယဝ်ႉ။ ဝၼ်းတီႈ 25/11/2024 ဢွၵ်ႇမႃးၼႂ်းၶၢဝ်ႇထႆး ၼႂ်းသိုဝ်ႇ ၵူႈတီႈ လိုဝ်းလင်ၵႂႃႇဝႃႈ ၾၢႆႇတၢင်းထႆးၼႆႉ ႁၢင်ႈႁႅၼ်းသိုၵ်း တႃႇတေယိုဝ်းဝႃႉ ၼႆယူႇ။ ပေႃးဝႃႈၼၼ် ၵေႃႈ ၵူၼ်းမိူင်းဢၼ်ယူႇတင်းသွင်ၾင်ႇၼႆႉၵေႃႈ ဢွၼ်ၵၼ်တူၵ်းၸႂ်။ ၵွပ်ႈဝႃႈ ၵူၼ်းမိူင်းတင်းသွင်ၾင်ႇၼႆႉ ယူႇႁူမ်ႈၵၼ် မႃးၵတ်းၵတ်းယဵၼ်ယဵၼ်လႄႈ ၶဝ်ၵေႃႈ ဢမ်ႇၶႂ်ႈႁႂ်ႈမၼ်းမီးလွင်ႈတၢင်း ၸိူဝ်း ၼႆႉ။

ယဝ်ႉၵေႃႈ မၼ်းပဵၼ်ၶၢဝ်းၵတ်းလႄႈ ၵူၼ်းလႄႇမိူင်း ၵေႃႈၼမ် လူင်ပွင်ၸိုင်ႈထႆးၵေႃႈ ၶႂ်ႈႁႂ်ႈၵူၼ်းမႃးၼမ် ၵွပ်ႈဝႃႈ ငိုၼ်းၶဝ်ႈမိူင်းၵေႃႈ တေမီး။ မိူၼ်ၼင်ႇ ၾၢႆႇတွင်ႈတဵဝ်း ၼွၵ်ႈမိူင်း ၸိူဝ်းၼႆႉမီးၼမ်လႄႈ ၶဝ်ဢမ်ႇၶႂ်ႈႁႂ်ႈမၼ်းယုင်ႈ။ ယွၼ်ႉၼၼ် ထိုင်တီႈၸၼ်ႉလူင်ပွင်ၸိုင်ႈထႆး ၶဝ်ယင်းမႃးၸတ်း ပၢင်ၵုမ်လူင် – လူင်ပွင်ၸိုင်ႈၶဝ် တီႈၵဵင်းမႂ်ႇယူႇ။

မိူဝ်ႈဝၼ်းတီႈ 26/11/2024 လႆႈငိၼ်းဝႃႈ ႁွင်ႈၵၢၼ် ၾၢႆႇၵႅတ်ႇၶႄလႄႈ ၾၢႆႇတပ်ႉသိုၵ်းထႆးၼႆႉ ၶဝ်ၵေႃႈ ႁဵတ်းပၢင်ၵုမ်။ ႁူဝ်ယွႆႈမၼ်း မီးၸိူင်ႉႁိုဝ်တႄႉၵေႃႈ ဢမ်ႇႁူႉ။ ဝၢႆးပၢင်ၵုမ်ၶၢဝ်ႇယဝ်ႉ တၢင်းၾၢႆႇတပ်ႉ သိုၵ်းၼႆႉ ပိုၼ်ၽၢဝ်ႇဢွၵ်ႇမႃး ၵဵဝ်ႇၵပ်းလွင်ႈ ၵူၼ်းယူႇၸွမ်းလႅၼ်လိၼ်ၸိူဝ်းၼႆႉ။ ဢမ်ႇတၢပ်ႈလူဝ်ႇမႆႈ ၸႂ်သင် ၵၢၼ်ငၢၼ်း ဢၼ်လူဝ်ႇႁႃၵိၼ်လဵင်ႉတွင်ႉၵူႈဝၼ်းၼႆႉ ႁဵတ်းၵႂႃႇမိူၼ်ၵူႈပွၵ်ႈလႃႈ။ ၾၢႆႇတပ်ႉ သိုၵ်းၵေႃႈ တိုၼ်းဝႃႈ ႁပ်ႉပုၼ်ႈၽွၼ်းတဵမ်တီႈ။ ပုၼ်ႈတႃႇတေၵႅတ်ႇၶႄ ႁႄႉၵင်ႈ လွင်ႈဢၼ်တေပဵၼ်  မႃးၼႆႉ ယူႇတီႈ ၽူႈၵွၼ်းတပ်ႉသိုၵ်း ၸွမ်သိုၵ်းလူင် ၽၼ်ႊၼႃႊ ပိုၼ်ၽၢဝ်ႇလၢတ်ႈၵႂႃႇ ၸိူင်ႉၼႆ။ ယွၼ်ႉၼၼ် ႁဝ်းၵေႃႈထၢင်ႇဝႃႈ လိူင်ႈမၼ်းတေယဝ်ႉ ၵူၺ်းၵႃႈ ဢမ်ႇယဝ်ႉ မီးၵၢၼ်ဢွၵ်ႇၶၢဝ်ႇမႃးထႅင်ႈ။

ၶၢဝ်ႇလိုဝ်းဢွၵ်ႇဝႃႈ တၢင်းၾၢႆႇထႆးၼႆႉ ႁၢင်ႈႁႅၼ်း တေယိုဝ်းယူႇယဝ်ႉ တၢင်းၾၢႆႇဝႃႉၵေႃႈ ၶွၼ်ႈႁႅင်းသေ တေၵႅတ်ႇၶႄ ႁႄႉၵင်ႈယူႇယဝ်ႉၼႆ မၼ်းၵေႃႈ ဢွၵ်ႇၶၢဝ်ႇမႃးတိၵ်းတိၵ်း။ ၾၢႆႇလႂ်ၸိုဝ်ႈ ၸႂ်ႈႁဝ်းၵေႃႈ ဢမ်ႇႁူႉ။ ၵွပ်ႈဝႃႈ ၸွမ်းလႅၼ်လိၼ်ႁဝ်းၵေႃႈ ဢမ်ႇလႆႈၵႂႃႇႁၼ်တႂ်ႈတႃ။ တၢင်းၾၢႆႇထႆးၼႆႉတႄႉ ႁဝ်း လႆႈငိၼ်းဝႃႈ ၸဝ်ႈၼႃႈတီႈၾၢႆႇပႃႇမႆႉ တီႈမႄႈ ဢၢႆၼၼ်ႉၵေႃႈ ပိုၼ်ၽၢဝ်ႇလၢတ်ႈဝႃႈ မိူဝ်ႈလဵဝ်ၼႆႉ မီး ၶၢဝ်ႇဝႃႈ တပ်ႉသိုၵ်းမၢၼ်ႈၼႆႉ တေမႃးတိုၵ်းတေႃး ၽဵဝ်ႈမူၺ်ႉ တပ်ႉသိုၵ်းၸိုင်ႈတႆး RCSS လႄႈ တပ်ႉသိုၵ်းဝႃႉ ဝႃႈၸိူင်ႉၼင်ႇၼႆ။ ယွၼ်ႉပိူဝ်ႈၼၼ်လႄႈ ဢၼ်ပဵၼ်သူၼ်မွၵ်ႇ ဢၼ်မီးတီႈမႄႈဢၢႆ ၸိူဝ်း ၼၼ်ႉၵေႃႈ ပိၵ်ႉဝႆႉမူတ်း ဢမ်ႇပၼ်ၽႂ်မႃးလႄႇ ဝႃႈဝႆႉၼင်ႇၼၼ်။

ဝၢႆးၼႆႉမႃး ယူႇထႅင်ႈသွင်ဝၼ်းၵေႃႈ ငဝ်းလၢႆးၼႆႉၵေႃႈ လႆႈဢုပ်ႇဢူဝ်းၵၼ်ၶိုၼ်းသေ လႆႈၸႂ်ၵၼ်ဝႃႈ မၼ်းဢမ်ႇလူဝ်ႇပိၵ်ႉယဝ်ႉ လူဝ်ႇလႆႈၽုၺ်ႇ။ ထႅင်ႈၾၢႆႇၼိုင်ႈသမ်ႉဝႃႈ ဢမ်ႇမႆႈၸႂ်သင်၊ ထႅင်ႈၾၢႆႇၼိုင်ႈ သမ်ႉဝႃႈ လူဝ်ႇမင်ဢိူဝ်ႈ လူဝ်ႇယိုဝ်းဢိူဝ်ႈၼႆသေ ၶၢဝ်ႇၵေႃႈ တိုၵ်ႉလိုဝ်းယူႇထိုင်မိူဝ်ႈလဵဝ်။

လႆႈႁူႉၶၢဝ်ႇဝႃႈ တၢင်းၾၢႆႇထႆးၵေႃႈ သူင်ႇၵႂႃႇၽူႈတႅၼ်းတီႈၶၢႆးလူင် လႅၼ်လိၼ်တႆး – ထႆး ဢၼ်မီးႁိမ်း လွႆတႆးလႅင်း မၼ်းပဵၼ်တီႈတပ်ႉၸုမ်း 778 ၶဝ်ၵႂႃႇဢုပ်ႇၵၼ် ၼွၵ်ႈသေၼၼ်ႉ ၵူၺ်းဢမ်ႇၵႃး ပူၼ်ႉမႃး ဝၼ်းတီႈ 06/12/2024 ၼႆႉ ယူႇတီႈၸွမ်သိုၵ်း ၾၢႆႇတပ်ႉၶိုၵ်ႉတွၼ်းထႆး လႆႈၵႂႃႇတီႈတႃႈၶီႈလဵၵ်း လႆႈႁူပ်ႉ ထူပ်းၵၼ်တင်း “တႃႉသၢမ်ရူင်း” ဢၼ်ပဵၼ် ၽူႈၵွၼ်းၼႃႈလိၼ်သိုၵ်း 171 ၶဝ်ၵိၼ်ၶဝ်ႈႁူမ်ႈမူႇၵၼ်။ ႁူဝ်ယွႆႈၶဝ် တေဢုပ်ႇသင်ၼႆတႄႉ ဢမ်ႇႁူႉ။ ၵူၺ်းၵႃႈ ၶဝ်လႅပ်ႈမိုတ်ႈၵိုဝ်းၸမ်ၸႂ်ၵၼ်ဝႆႉ။

ဝၼ်းတီႈ 11/12/2024 ၼၼ်ႉ ယူႇတီႈ ၽူႈၵွၼ်းတိူင်းသၢမ်ၸဵင်ႇ လႆႈႁူႉဝႃႈ မႃးလႄႇတီႈ တႃႉသၢမ်ရူင်း ထႅင်ႈ။ ၶၢဝ်ႇမၼ်းတႄႉၵေႃႈ ဢွၵ်ႇဝႃႈ ၶဝ်ဢုပ်ႇၵၼ် လွင်ႈလႅၼ်လိၼ်ၼႆႉ လူင်ပွင်ၸိုင်ႈမၢၼ်ႈတင်း ထႆး တေၵႄႈလိတ်ႈၵူၺ်း ဝႃႈၸိူင်ႉၼင်ႇၼႆ။

ဢၼ်ႁဝ်းဢမ်ႇပွင်ႇၸႂ်ၼႆႉ ပဵၼ်ယွၼ်ႉသင်လႄႈ ၶၢဝ်ႇဢၼ်ဝႃႈ တေယိုဝ်းၵၼ်ၼႆၼၼ်ႉ ႁဵတ်းသင်လႄႈ သမ်ႉတိုၵ်ႉ ဢွၵ်ႇၶၢဝ်ႇယူႇတိၵ်းတိၵ်း။ ၵမ်ႈၽွင်ႈၵေႃႈဝႃႈ မၼ်းပဵၼ်ပၼ်ႁႃ ၾၢႆႇၼႂ်းၵူၼ်းလူင် ၸိၵ်းၸွမ်ၼႂ်းထႆးၵူၺ်း။ ၶဝ်ၶႂ်ႈႁဵတ်း ႁႂ်ႈဝၢၼ်ႈမိူင်းယုင်ႈယၢင်ႈသေ လူင်ပွင်ၸိုင်ႈ မိူဝ်ႈလဵဝ်ၼႆႉ ႁႂ်ႈမၼ်း တူၵ်းၵႂႃႇ။

ၵမ်ႈၽွင်ႈၵေႃႈဝႃႈ ၼွၵ်ႈလိူဝ်သေ ၵူၼ်းလူင်ထႆးၼင်ႇၵၼ် ၵဝ်းၵၼ်ၼႆႉ တၢင်းၾၢႆႇမၢၼ်ႈၵေႃႈ ၵဝ်းၵၼ်။ တၢင်းၾၢႆႇမၢၼ်ႈၼႆႉ ၶဝ်ၵေႃႈ ၶႂ်ႈၽဵဝ်ႈမူၺ်ႉဝႃႉ ၵွပ်ႈပိူဝ်ႈဝႃႈ ပဵၼ်မႃးပၢင်ယၼ်ႇသိုၵ်း 1027 ၼႆႉ မၼ်းတိုၼ်းပႃးဝႃႉ၊ ပေႃးဝႃႈဝႃႉ ဢမ်ႇပၼ်ႁႅင်းတိုၼ်းဢမ်ႇပဵၼ်ၼႆယူႇ။ ယွၼ်ႉၼၼ် ၶႂ်ႈၽဵဝ်ႈပႅတ်ႈဝႃႉ ၵူၺ်းၵႃႈ သိုၵ်းမၢၼ်ႈသမ်ႉ ယႃႇဝႃႈတေတိုၵ်းၽဵဝ်ႈပႅတ်ႈဝႃႉလႃႈ တေႃႈၼင်ႇ ဢၼ်တိုၵ်းၶဝ်ယူႇ မိူဝ်ႈလဵဝ်ၼႆႉ ၶဝ်သမ်ႉ ဢမ်ႇၽဵဝ်ႈလႆႈ ဢမ်ႇၸႂ်ႈႁိုဝ်။

ယွၼ်ႉၼၼ် မၢၼ်ႈၵေႃႈ ၸႂ်ႉလၢႆးလိင်ႉသေ မႃးယိမ်မိုဝ်းထႆး တႃႇတေယိုဝ်းဝႃႉ ဢိူဝ်ႈၼႆၵေႃႈ ၵမ်ႈၽွင်ႈ ဝႃႈၸိူင်ႉၼႆ။ သမ်ႉမီးထႅင်ႈဝႃႈ ၵူၼ်းလူင်ထႆး ၸိူဝ်းၶႂ်ႈပူတ်းပႅတ်ႈလူင်ပွင်ၸိုင်ႈထႆးလႄႈ ၵူၼ်းလူင်မၢၼ်ႈ ၸိူဝ်းဢၼ်ၶႂ်ႈၽဵဝ်ႈဝႃႉ ၸိူဝ်းၼႆႉ ၶဝ်ၶႂ်ႈႁူမ်ႈမိုဝ်းၵၼ်ဢိူဝ်ႈ ၼႆၵေႃႈဝႃႈ။

ပဵၼ်ႁိုဝ်ၵေႃႈ ယွၼ်ႉၶၢဝ်ႇၼႆႉသေ ၵူၼ်းမိူင်းၸိူဝ်းယူႇၸွမ်းလႅၼ်လိၼ်တႄႉ ပဵၼ်ဢၼ်မႆႈၸႂ်တူၵ်းၸႂ် ၵၼ်ဝႆႉယူႇ။ ၾၢႆႇထႆးတႄႉ ပိုၼ်ၽၢဝ်ႇဝႃႈ ယႃႇမႆႈၸႂ်ၼႆသေတႃႉၵေႃႈ ၶၢဝ်ႇမၼ်းဢမ်ႇႁႅင်းပဵင်း ဢၼ်ဝႃႈ တေယိုဝ်းၵၼ်။ ဢၼ်သေႃႇသူၼ်းဝႃႈ မင်ဢိူဝ်ႈ – မင်ဢိူဝ်ႈ ၼႆၼၼ်ႉသမ်ႉ မၼ်းႁႅင်းလိူဝ်။ ဢၼ်သဵင် ၾၢႆႇၸဝ်ႈၼႃႈတီႈထႆး ဢမ်ႇလင်ၼႆႉၵေႃႈ ပဵၼ်ယွၼ်ႉၶဝ်ၼင်ႇၵၼ် မီးလွင်ႈထိင်းၵၼ်ဝႆႉႁိုဝ်ၼႆၵေႃႈ ဝႃႈလႆႈ။ ယွၼ်ႉၼၼ် ငဝ်းလၢႆးဢၼ်ၼႆႉ ႁဝ်းတေလႆႈပႂ်ႉတူၺ်းယူႇ။ ၼႂ်းလၢႆဝၼ်းၼႆႉၵူၺ်း တေဢမ်ႇပဵၼ်သင်လႆႈ။

ႁဝ်းထၢင်ႇတႄႉ တေႃႇထိုင်ပီသဵင်ႈၼႆႉ မၼ်းၵေႃႈ တိုၼ်းဢမ်ႇပဵၼ်ပၢင်တိုၵ်း။ တီႈဢေႇသုတ်း ဝၼ်းတီႈ 19 လႄႈ ဝၼ်းတီႈ 20 ၼႆႉသမ်ႉ တၢင်းထႆးၵေႃႈ လႆႈၽိတ်ႈမွၵ်ႈတၢင်းမိူင်းမၢၼ်ႈ မႃးဢုပ်ႇဢူဝ်းလွင်ႈ ငမ်းယဵၼ် တႃႇထႆးတေ ၸွႆႈ။ ထႆးသမ်ႉဝႃႈ တေၸွႆႈလွင်ႈငမ်းယဵၼ် မိူင်းမၢၼ်ႈၼႆသေ ပၼ်ႁႃၵၼ်တင်း ဝႃႉၼႆႉ ၸွင်ႇတေၸၢင်ႈပဵၼ်လႆႈ။ တေႃႇထိုင်မိူဝ်ႈလဵဝ် ႁဝ်းၵေႃႈထၢမ် ၵူၼ်းၸမ်ၸႂ် တပ်ႉသိုၵ်းထႆးယူႇ ၶဝ်ၵေႃႈလၢတ်ႈဝႃႈ ယင်းပႆႇႁၼ်တၢင်းၾၢႆႇထႆး တူင်ႉၼိုင်ႁၢင်ႈႁႅၼ်းသင် ႁၢဝ်ႈႁႅင်း။

ႁဝ်းၵေႃႈ မုင်ႈမွင်းဝႃႈ လွင်ႈၼႆႉ တေၵႄႈလိတ်ႈၵႂႃႇလူၺ်ႈလွင်ႈလီ ၵတ်းၵတ်းယဵၼ်ယဵၼ်ယူႇ။ ၵူၼ်းမိူင်းႁဝ်း တုၵ်ႉၶ ၼႃႇယဝ်ႉ ယႃႇပေႁႂ်ႈတုၵ်ႉၶထႅင်ႈ။ မိူဝ်ႈလဵဝ်မိူင်းတႆးၼႆႉ ဢၼ်ၵတ်းယဵၼ် ယူႇၼႆႉ မီးပွတ်းၸၢၼ်းလႄႈ ပွတ်းဢွၵ်ႇ ၵူၺ်းယဝ်ႉ။ ပေႃးဝႃႈ လွင်ႈသိုၵ်းဝႃႉၼႆႉ ပေႃႇမႃးယဝ်ႉၼႆတႄႉ မၼ်းၵေႃႈ တေပဵၼ်ၽိုၼ်းပဵၼ်ၾႆးယဝ်ႉ။ ယွၼ်ႉၼၼ် မုင်ႈမွင်းဝႃႈ ၶဝ်တေၵႄႈလိတ်ႈလႆႈလီယူႇ။

ၸဝ်ႈၶိုၼ်းသႂ် ထတ်းသၢင်ဝႃႈ – ပၼ်ႁႃလႅၼ်လိၼ်တႆး – ထႆးၼႆႉ  ၸၢင်ႈယိုတ်ႈယၢဝ်း ၵႂႃႇထိုင်ၼႂ်းပီၼႃႈ ပီလိုၼ်းယူႇ။ တေႃႇသိုပ်ႇၵႂႃႇၼႆႉ တေပဵၼ်ႁိုဝ်မႃးထႅင်ႈၼႆ တၵ်းလႆႈပႂ်ႉတူၺ်း ဝႃႈၼႆ။

ၾၢႆႇတၢင်းသိုၵ်းထႆး ဢဝ်ႁူမ်ႇလူမ်ႈလႅၼ်လိၼ် မိူင်းထႆးတႄႉ ပိုၼ်ၽၢဝ်ႇဝႃႈ တပ်ႉပၢင်သဝ်းသိုၵ်းဝႃႉ ၸွမ်းလႅၼ်လိၼ်တႆး – ထႆး တင်ႈတႄႇ ပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ် ၶိုၼ်ႈၵႂႃႇတၢင်း ၵဵင်းလၢဝ်၊ ပဵင်းလူင် ၸႄႈတွၼ်ႈၵဵင်းမႂ်ႇလႄႈ ၸႄႈတွၼ်ႈၵဵင်းႁၢႆး ၸိူဝ်းၼႆႉ တင်းမူတ်းမီး 80 တီႈ ဝႃႈၼႆ။

ၵူၺ်းၵႃႈ ဢၼ်ပဵၼ်ပၼ်ႁႃ ၵၼ်တင်းမိူင်းထႆး ယူႇယၢမ်းလဵဝ်ၼႆႉ ပဵၼ်တပ်ႉပၢင်သဝ်း 8 ဢၼ် ၸိူဝ်းမီး ၼိူဝ်သဵၼ်ႈလႅၼ်လိၼ် ၼႂ်းဢိူင်ႇပၢင်မၢၵ်ႇၽႃႈ ဢိူင်ႇမိူင်းပၢႆး ၸႄႈတွၼ်ႈမႄႈႁွင်ႈသွၼ်။ ဢၼ်ပူၼ်ႉ ပႅၼ်ၶဝ်ႈၼႃႈလိၼ်ထႆးၼႆႉ ပဵၼ်ပၢင်သဝ်း 3  ဢၼ်၊ ဢၼ်မီးၼႂ်းဝၢၼ်ႈလွႆႁူဝ်မႃႉလႄႈ ဝၢၼ်ႈၼွင်လူင် ၶဝ်ႈမီးၼႂ်းလိၼ်ထႆး။

ပၢင်သဝ်းထႅင်ႈဢၼ်ၼိုင်ႈတႄႉ မီးၼႂ်းလိၼ်မိူင်းတႆး ႁၢင်ႇယၢၼ်ၵၼ်တင်း လႅၼ်လိၼ်မွၵ်ႈ 10 ၵီႊလူဝ်ႊမီႊတႃႊ။ ပၢင်သဝ်း 9 ဢၼ်ၼႆႉ သိုၵ်းထႆး လူင်ပွင်ၸိုင်ႈထႆး သင်ႇႁႂ်ႈထွႆထွၼ်ဢွၵ်ႇ ပိုၼ်ႉတီႈႁႂ်ႈယဝ်ႉ ၼႂ်းဝၼ်းတီႈ 18/12/2024 ၼႆႉ ။