ႁူင်းႁဵၼ်းထမ်မသႅၼ်ဝီ ၵူတ်ႉၶၢႆႁူမ်ႈၵၼ်ၽုၵ်ႇတူၼ်ႈမႆႉ တီႈလွႆသၢမ်သိပ်း

သင်ၶၸဝ်ႈ ၊ ၶူးသွၼ်လႄႈ လုၵ်ႈႁဵၼ်း ႁူင်းႁဵၼ်းထမ်မ ႁူမ်ႈၵၼ်ၽုၵ်ႇတူၼ်ႈမႆႉ တီႈလွႆသၢမ်သိပ်း ၸႄႈဝဵင်းၵူတ်ႉ ၵူတ်ႉၶၢႆ။

ဝၼ်းတီႈ 02/07/2018 ၸုမ်းႁူင်းႁဵၼ်းထမ်မ ၸႄႈဝဵင်းၵူတ်ႉၶၢႆလႄႈ သႅၼ်ဝီဢဵၼ်ႁႅင်း 100 ပၢႆ ႁူမ်ႈၵၼ်ၽုၵ်ႇတူၼ်ႈမႆႉ တီႈတိၼ်လွႆပုမ်ႇၶဝ်ႈ တိၼ်လွႆသၢမ်သိပ်း ဢၼ်မီးၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး   ပွတ်းႁွင်ႇ။

တူၼ်ႈမႆႉဢၼ်ၽုၵ်ႇၼၼ်ႉမီးမိူၼ်ၼင်ႇ မႆႉသၵ်း၊ မႆႉၶဵတ်ႉလႃး၊ မႆႉမွၵ်ႇသပ်ႈပေႇလႄႈ မႆႉလူမ်း ၸိူဝ်းၼႆႉ တင်းမူတ်း 108 တူၼ်ႈ ။

ၸဝ်ႈဝိၸေႇယ ႁူဝ်ပဝ်ႈၵေႃပွင်ၵၢၼ်ႁူင်းႁဵၼ်းထမ်မ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- “ ယိူင်းဢၢၼ်းဢၼ်    ႁဝ်းၶႃႈမႃးၽုၵ်ႇၼႆႉ ပိူဝ်ႈႁႂ်ႈပဵၼ်တီႈမၢႆတွင်း ဢၼ်ႁူင်းႁဵၼ်းထမ်မ တူင်ႇဝဵင်းသႅၼ်ဝီလႄႈ ၵူတ်ၶၢႆမႃးႁူမ်ႈၵၼ် ။   ၸဝ်ႈတူၼ်ၶူးလူင်Dr.ၶမ်းမၢႆထမ်မသႃမိၵေႃႈ ၶႂ်ႈႁႂ်ႈၽုၵ်ႇတူၼ်ႈမႆႉ ၸွမ်းသၢပ်ႇလွႆ၊ ၾၢႆႇၼိုင်ႈၵေႃႈႁႂ်ႈပဵၼ်တီႈမၢႆတွင်း ၸဝ်ႈၶူးဝႃးဝုၼ်းၸုမ်ႉမႃးတႄႇၵွင်းမူး လႄႈၶႂ်ႈႁႂ်ႈသၽႃႇဝၾိင်ႈတိုၼ်းပဵၼ်မိူင်းတႆးႁၢင်ႈလီၶဵဝ်ၸမ်ႉၼမ်ႉလိူင်ႇ ၸိူဝ်းၼႆႉလႄႈ ႁဝ်းၶႃႈၸင်ႇဢွၼ်ၵၼ်မႃးၽုၵ်ႇ” ၶႃႈဢေႃႈ။

မိူဝ်ႈဝၼ်းတီႈ 28/06/2018 ၼၼ်ႉၵေႃႈ ၵူၼ်းၼုမ်ႇတႆး မူႇၸေႊ၊ ပၢင်ႇၶမ်း၊ ပၢင်ႇသၢႆးလႄႈ ၸေႊလၢၼ်ႉ ႁူမ်ႈၵၼ် ၽဵဝ်ႈယုၵ်းယၵ်း လုၵ်ႉဢဝ် တိၼ်လွႆထိုင် ၼိူဝ်လွႆသၢမ်သိပ်း ၼႂ်းၸႄႈ ဝဵင်း ၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဝႃႈၼႆ။