ပႃႇတီႇႁူဝ်သိူဝ် တင်း ပႃႇတီႇမွၼ်း တေႁူမ်ႈၵၼ် ၸတ်းႁဵတ်းပၢင်သွၼ်ၵဵဝ်ႇၵပ်းၾႅတ်ႊတရႄႊ တီႈၼႃးၵွင်းမူး တေမွၵ်ႇထိုင် ၵူႈပႃႇတီႇလႄႈ ၵူႈၸၢဝ်းၶိူဝ်းမႃးၶဝ်ႈႁူမ်ႈ ဝႃႈၼႆ။

ပၢင်သွၼ်ၾႅတ်ႊၻရႄႊၼႆႉ တေၸတ်းႁဵတ်းတႃႇၶၢဝ်းတၢင်း 2 ဝၼ်း ဝၼ်းတီႈ 03-04/07/2018 ယၢမ်းၵၢင်ၼႂ် 9:00 မူင်း ထိုင် 4:30 မူင်းဝၢႆးဝၼ်း တေၸတ်းႁဵတ်းတီႈႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး ဢိူင်ႇၼႃးၵွင်းမူး ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။ ယူႇတီႈပႃႇတီႇႁူဝ်သိူဝ် ၸႄႈဝဵင်းမိူင်းတူၼ်လႄႈ ၼၢႆႇၶျၢၼ်းၻွႆႇၵႅမ်ႁူဝ်ပဝ်ႈပႃႇတီႇတီႊမူဝ်ႊၶရႅတ်ႉတိၵ်ႉမိူင်းမွၼ်း တေႁူမ်ႈၵၼ်သေ ၸတ်းႁဵတ်းၵႂႃႇ ဝႃႈၼႆ။

ၽူႈမီးပုၼ်ႈၽွၼ်း ပႃႇတီႇႁူဝ်သိူဝ် ၸႄႈဝဵင်းမိူင်းတူၼ်လၢတ်ႈဝႃႈ “ ပၢင်သွၼ်(Workshop) ၼႆႉ တေၸတ်းႁဵတ်း 2 ဝၼ်း။ ၸုမ်းဢၼ်တေမႃးပၼ်ပၢင်သွၼ်သမ်ႉ ပဵၼ်ၵႅမ်ႁူဝ်ပဝ်ႈပႃႇတီႇမွၼ်းၼၢႆးၶျၢၼ်းၻွႆႇ။ ဢၼ်ၶဝ်တေမႃးပၼ် ၼၼ်ႉ မိူၼ်ၼင်ႇဝႃႈ မႃးၵဵပ်းၶေႃႈမုလ်းၼၼ်ႉယဝ်ႉ။ တေယႅၵ်ႈပဵၼ်လၢႆၸုမ်းသေ ပၼ်ႁူဝ်ၶေႃႈဝႆႉ ႁႂ်ႈႁဝ်းဢုပ်ႇၵၼ် သေ တႅမ်ႈလူင်း ဝႃႈၾႅတ်ႊတရႄႊဢၼ်ဝႃႈၼၼ်ႉ တေဢွၵ်ႇမႃးၸိူင်ႉႁိုဝ်။ ၵူၼ်းမိူင်းႁဝ်းၶႂ်ႈလႆႈသမ်ႉ ပဵၼ်ၸိူင်ႉႁိုဝ် ၸဵမ်ၸိူဝ်းၼႆႉ” ဝႃႈၼႆ။

ပၢင်သွၼ်ၼႆႉ တေမွၵ်ႇထိုင် ၵူႈပႃႇတီႇ လႄႈ ၵူႈၸၢဝ်းၶိူဝ်း၊ လိူဝ်ၼၼ်ႉ ၼိုင်ႈၸုမ်းလႂ်သမ်ႉ ႁႂ်ႈၶိုၼ်ႈႁွတ်ႈ 3 ၵေႃႉ ဝႃႈၼႆ။