ပလိၵ်ႈထႆး ယိုၼ်ယၼ်လၢတ်ႈဝႃႈ ၼုမ်ႇၸၢႆးမိူင်းမၢၼ်ႈ ဢႃယု 33 ပီ ၵေႃႉၼိုင်ႈ ဢၼ်လုၵ်ႉတီႈဝဵင်းၼိဝ်ႊယွၵ်ႊ မိူင်း ဢမေႊရိၵၼ်ႊသေ ၵႂႃႇဢႅဝ်ႇလႄႇပၢင်ႇလၢႆႇ တီႈဝဵင်းၽူးၵဵတ်ႇ မိူင်းထႆးၼၼ်ႉ ယွၼ်ႉၾႆးၾႃႉသျွတ်ႉသေ လူႉတၢႆၵႂႃႇ မိူဝ်ႈဝၼ်းတီႈ 5 ပူၼ်ႉမႃးၼႆႉ ဝႃႈၼႆ။

ၼုမ်ႇၸၢႆးၵေႃႉၼႆႉ ၸိုဝ်ႈႁွင်ႉ ၵူဝ်ႇၵျေႃႇတူႇရ လုၵ်ႉမိူင်းဢမေႊရိၵၼ်ႊသေ မႃးထူပ်းၵေႃႉႁၵ်ႉမၼ်းၸၢႆး ဢၼ်ယၢၼ် ၵၼ်မႃး ၶၢဝ်းတၢင်း 5 ပီ တီႈဝဵင်းၽူးၵဵတ်ႇ မိူင်းထႆး လွင်ႈၼႆႉပဵၼ်ၵႂႃႇ ၽွင်းၶဝ်သွင်ၵေႃႉ တေဢွၵ်ႇၵႂႃႇၵိၼ်ၶဝ်ႈၶမ်ႈၸွမ်းၵၼ် ဝႃႈၼႆ။

မၼ်းၸၢႆး လႆႈလူႉတၢႆၵႂႃႇ ၽွင်းၵၢင်ၶမ်ႈ 9 မူင်းၶိုင်ႈ တီႈႁၢၼ်ႉတၢင်းၵိၼ် ဢၼ်ၼိုင်ႈ၊ ဢၼ်မီးၼိူဝ်သဵၼ်ႈတၢင်း Don Chom Tao ၊ ပွၵ်ႉ Thalang ဝဵင်းၽူးၵဵတ်ႇ မိူင်းထႆး။ မၼ်းၸၢႆး ၵႂႃႇယဵပ်ႇၺႃး ထၢတ်ႈၾႆးၾႃႉ ဢၼ်ၸိုမ်းဢွၵ်ႇမႃးတီႈသဝ်ၾႆး ဢၼ်လူမ်ႉဝႆႉၼၼ်ႉ ဝႃႈၼႆ။

ၽွင်းၺႃးၾႆးၾႃႉသျွတ်ႉသေ လိုမ်းတူဝ်ဝႆႉယူႇၼၼ်ႉ ၾၢႆႇၸွႆႈထႅမ်ၽေးၵိုင်ႉၵၢင်ႉၶဝ် မႃးၸွႆႈထႅမ်ဢဝ်ၵႂႃႇ ယူတ်းယႃတူဝ် တီႈႁူင်းယႃဝဵင်းၽူးၵဵတ်ႇယူႇသေတႃႉ လႆႈလူႉတၢႆၵႂႃႇၼႆ – ပလိၵ်ႈထႆး ပိုၼ်ၽၢဝ်ႇဝႆႉၼင်ႇၼႆ။

ဢၢင်ႈဢိင် – VOA