တီႈၸႄႈဝဵင်းၽႃၵၢၼ်ႉ ၸႄႈမိူင်းၶၢင် ၼမ်ႉမၼ်းၸိူဝ်ႉၾႆးၶၢတ်ႇလၢႆတီႈ ႁူင်းၵၢၼ် ၾၢႆႇ ၶုတ်းသႅင် ဢမ်ႇၸၢင်ႈပၼ်ႇၵၢၼ်လႆႈ မၢင်ၸိူဝ်း လႆႈယင်ႉၵိုတ်းဝႆႉလႄႈ ႁဵတ်းႁႂ်ႈၵူၼ်းမိူင်း ဢမ်ႇမီးၵၢၼ်ယၢပ်ႇ ၽိုတ်ႇ တႃႇႁႃၵိၼ်လဵင်ႉတွင်ႉ ဝႃႈၼႆ။

ယၢမ်းလဵဝ် ၼမ်ႉမၼ်းၶိူင်ႈ (ဢိၼ်ႇၵျိၼ်ႇဝၢႆႇ) လႄႈ ၼမ်ႉမၼ်းၶိူင်ႈ ႁၢႆႊတရေႃႊလိတ်ႉ ၸိူဝ်းၼႆႉ  ၶၢတ်ႇဝႆႉ၊ ၶွမ်ႊပၼီႊ ၵမ်ႈၽွင်ႈ ယင်ႉၵိုတ်းဝႆႉၵၢၼ်ၶုတ်းသႅင်၊ ၵူၼ်းမိူင်း ၸိူဝ်းဢိင်ပိုင်ႈၵၢၼ်ၶုတ်းသႅင်သေ ႁႃၵိၼ်လဵင်ႉတွင်ႉယူႇၼၼ်ႉ ထူပ်းတၢင်းယၢပ်ႇၽိုတ်ႇႁႅင်းဝႆႉ ဝႃႈၼႆ။

လွင်ႈၼႆႉ ပဵၼ်ယွၼ်ႉပိၵ်ႉဢိုတ်းဝႆႉ ၵဵတ်ႉလၢၼ်ႇ လႅၼ်လိၼ် မိူင်းၶၢင် – မိူင်းၶႄႇ၊ သဵၼ်ႈတၢင်းဢၼ် လုၵ်ႉတီႈမိူင်းမၢၼ်ႈ ပွတ်းတႂ်ႈတေႃႇၶိုၼ်ႈမိူင်းၶၢင် ၼၼ်ႉၵေႃႈ ၾၢႆႇသိုၵ်းမၢၼ်ႈ တင်ႈၵဵတ်ႉလၢၼ်ႇ တီႈလႅၼ်လိၼ် မိူင်းၶၢင် – တိူင်းၸႄႈၵႅင်းသေ ၵူတ်ႇထတ်းႁႄႉႁၢမ်ႈ ႁၢဝ်ႈႁႅင်းၼႆ ၵူၼ်းပိုၼ်ႉတီႈ ၽႃၵၢၼ်ႉ ၵေႃႉၼိုင်ႈလၢတ်ႈ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။