ၶွမ်ႊပၼီႊ ႁဵတ်းႁိူဝ်း ၸိုဝ်ႈသဵင်လိုဝ်းလင် ဢၼ်ၼိုင်ႈ ၼႂ်းမိူင်း UK ၺႃးလုမ်းတြႃးတႅပ်းတတ်း ပၼ်တၢမ်ႇမႂ်ငိုၼ်းပွၼ်ႊ (သတႃႊလိၼ်ႊပွင်ႊ) 3 သႅၼ်ပၢႆလႄႈ ႁုပ်ႈသိမ်းပႃးၶူဝ်းၶွင် ယွၼ်ႉသိုဝ်ႉၸႂ်ႉတိုဝ်း မႆႉသၵ်း ဢၼ်ဢွၵ်ႇတီႈမိူင်းမၢၼ်ႈ ဢၼ်ၶဝ်ႈပႃးၼႂ်းသႅၼ်း ႁႄႉႁၢမ်ႈဝႆႉၼၼ်ႉ ဝႃႈၼႆ။

ၶွမ်ႊပၼီႊ Sunseeker International ၼႆႉ ပၵ်းလုမ်းဝႆႉတီႈဝဵင်း Poole (ဝဵင်းၾင်ႇပၢင်ႇလၢႆႇ) ဢၼ်မီးၼႂ်းၸႄႈတွၼ်ႈ Dorset မိူင်း UK ၸဵင်ႇၸၢၼ်းဝၼ်းတူၵ်း။

ယွၼ်ႉပူၼ်ႉပႅၼ်ပၵ်းပိူင်မၢႆမီႈ တေႃႉတၢင်ႇၶူဝ်းၵုၼ်ႇၼႆသေ တေၺႃးတၢမ်ႇမႂ်ငိုၼ်း 240,000 ပွၼ်ႊ တေႁုပ်ႈသိမ်းပႃးၶူဝ်းၶွင် ဢၼ်ၵိုင်ႇငိုၼ်း ႁိမ်းၸမ် 67,000 ပွၼ်ႊ၊ ၵႃႈဢဝ် လိူင်ႈၸွႆးတြႃး 5,100 ပွၼ်ႊလႄႈ ၵႃႈလူႉသုမ်း 190 ပွၼ်ႊ ဝႃႈ ၼႆ။

လွင်ႈၼႆႉ လုမ်းတြႃးလႆႈတႅပ်းတတ်း ပၼ်တၢမ်ႇတၢင်းၽိတ်းၵႂႃႇ ၼႂ်းဝၼ်းတီႈ 22 ပူၼ်ႉမႃးၼႆႉ ၸုမ်းၾၢႆႇထိင်းသိမ်း သၽႃႇဝသိင်ႇဝႅတ်ႉလွမ်ႉ (EIA) ဢၼ်ပၵ်းလုမ်းတီႈဝဵင်းလၼ်ႊတၼ်ႊ ပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 25/11/2024 ၼႆယဝ်ႉ။

ၵဵဝ်ႇလူၺ်ႈလိူင်ႈ သိုဝ်ႉတေႃႉတၢင်ႇၸႂ်ႉတိုဝ်း မႆႉသၵ်း ၼႂ်းမိူင်းမၢၼ်ႈ လူၺ်ႈဢမ်ႇမႅၼ်ႈတၢင်းၵၢၼ်ၼႆႉသေ ၸုမ်း EIA လႆႈတႄႇဢဝ်လိူင်ႈမႃး ၸဵမ်မိူဝ်ႈပီ 2008 ။

ၾၢႆႇၶွမ်ႊပၼီႊ Sunseeker ၵေႃႈ ယွမ်းႁပ်ႉဝႆႉဝႃႈ ဝၢႆးသေ မိူင်းပရိတ်ႇထဵင်ႇ (UK) ၽၢတ်ႇဢွၵ်ႇ ၼႂ်းၸုမ်း EU ယဝ်ႉ လႆႈႁဵတ်းၽိတ်းပူၼ်ႉပႅၼ် မၢႆမီႈပၵ်းပိူင်ဢၼ်မီးဝႆႉ။ ယူႇတီႈ ၶွမ်ႊပၼီႊ လႆႈသိုဝ်ႉၸႂ်ႉတိုဝ်းမႆႉသၵ်း ၼႂ်းမိူင်းမၢၼ်ႈ ပႃး ၸဵမ်မႆႉသႅၼ်း ၼိူဝ်ႉၵႅၼ်ႇ ၼႂ်းၵုၼ်ဢႅပ်ႊၾရိၵ ၸိူဝ်းၼႆႉ ၵိုင်ႇငိုၼ်း 60,000 ပွၼ်ႊ ဝႃႈၼႆ။

လုမ်းတြႃးလႆႈ ဢိင်ဢဝ်ၶေႃႈယိုၼ်ႈတၢင်ႇ 11 ၶေႃႈသေ တႅပ်းတတ်းပၼ်တၢမ်ႇၵႂႃႇ။ ယူႇတီႈ ၶွမ်ႊပၼီႊ ၸၢင်ႈပူၼ်ႉပႅၼ် ၼမ်လိူဝ်သေၼႆႉ ၽူႈထတ်းသိၼ် လၢတ်ႈၼင်ႇၼႆ။

ၶွမ်ႊပၼီႊ Sunseeker International ၼႆႉ မီးၽူႈႁၢပ်ႇၵၢၼ် 2,000 ၵေႃႉ။ ပဵၼ်ၶွမ်ႊပၼီႊ ဢၼ်ပၼ်ၵၢၼ်ငၢၼ်း ၵူၼ်းၼႂ်းပိုၼ်ႉတီႈ Dorset ဝႆႉလႆႈၼမ်လိူဝ်ပိူၼ်ႈ။ ပဵၼ်ၶွမ်ႊပၼီႊ ဢၼ်ပိုၼ်ၽၢဝ်ႇၶၢႆ ႁိူဝ်းဢွၼ်ႇ ၶႅမ်ႉလိူဝ်ပိူၼ်ႈ ၼႂ်းလုမ်ႈၾႃႉ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။