ယၢမ်းလဵဝ် ထိုင်ၶၢဝ်းပၢတ်ႇၶဝ်ႈ ၽွင်းဢဝ်ၶဝ်ႈမႂ်ႇထိုင်ႁိူၼ်းလႄႈ ၼႂ်းပီၼႆႉ ယွၼ်ႉၾူၼ်တူၵ်းႁႅင်း ၼမ်ႉၼွင်းလုပ်ႇထူမ်ႈတူင်ႈၼႃး ႁဵတ်းႁႂ်ႈတူၼ်ႈၶဝ်ႈၼဝ်ႈပႅတ်ႈၼမ် ၵွပ်ႈၼႆလႄႈ ၸဝ်ႈၼႃး ၼႂ်းဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း လႆႈသုမ်းတိုၼ်းလၢင်းၼမ်။
ၼၢင်းၸၢမ်ပဝ်း ၸဝ်ႈၼႃး မိူင်းၵိုင် လၢတ်ႈၽူႈတွႆႇႁွၵ်ႈဝႃႈ – “ၶဝ်ႈၼႃး ၶႃႈၶဝ်ပီၼႆႉ ဢမ်ႇလႆႈၶွၼ်ႈၶႃႈ။ ၶဝ်ႈလူႉသုမ်းတင်းၼမ်ဢေႃႈ ပီၼႆႉ။ မၼ်းႁဵတ်းႁိုဝ်လႄႈသုမ်းၼႆ ပီၼႆႉ ၼမ်ႉလုပ်ႇထူမ်ႈတူင်ႈၼႃး ၼမ် ပီၼႆႉၵူၺ်း ဢမ်ႇယွမ်းသွင်ပွၵ်ႈယဝ်ႉ။ ၼႃးၶႃႈၼႆႉ မိူဝ်ႈၼမ်ႉလုပ်ႇပွၵ်ႈၵမ်းသွင်ၼၼ်ႉ တူၼ်ႈ ၶဝ်ႈၵွႆၼမ်ၼႃႇၶႃႈ။ ၵွပ်ႈၼႆလႄႈ လူႉသုမ်းၼမ် ဢေႃႈ”- ဝႃႈၼႆ။
လိူဝ်သေ ၼမ်ႉလုပ်ႇထူမ်ႈတူင်ႈၼႃးယဝ်ႉ မူင်ႈမႅင်းသမ်ႉ ၶူပ်းၵဝ်းယႃႉထႅင်ႈ ၵွပ်ႈၼႆလႄႈ ႁဵတ်းႁႂ်ႈဢမ်ႇ လႆႈၶွၼ်ႇၶဝ်ႈ ၼမ် မိူၼ်ၵူႈပီ ပူၼ်ႉမႃး ဝႃႈၼႆ။
ပႃးၼၢင်းလိုၼ်း ၸဝ်ႈၼႃး မိူင်းၵိုင် လၢတ်ႈၽူႈတွႆႇႁွၵ်ႈဝႃႈ – “ၶဝ်ႈပီၼႆႉ ဢမ်ႇပေႃးလႆႈၶွၼ်ႈၶႃႈ။ ၶႅမ်ႉၵေႃႈ ဢမ်ႇပေႃးၶႅမ်ႉ။ ယွၼ်ႉပိူဝ်ႈပီၼႆႉ ၼမ်ႉၵမ်းၵမ်းထူမ်ႈၶႃႈၼႃႇ။ ၽိူဝ်ႇထိုင်ၶၢဝ်း ပၢတ်ႇမၼ်းမႃး မူင်ႈမႅင်းသမ်ႉၵဝ်းထႅင်ႈ။ ပေႃးမႃးတူၺ်းၶဝ်ႈသၢမ်ပုၼ်ႈၼႆ တေလႆႈၼိုင်ႈပုၼ်ႈၵူၺ်းယဝ်ႉ ပီၼႆႉ။ လွင်ႈ ၽုၵ်ႇသွမ်ႈ ပီၼႆႉ ၶဝ်ႈသမ်ႉဢမ်ႇလႆႈၶႅမ်ႉ မိူဝ်ႈလႆႈလူင်းတိုၼ်းလၢင်းသမ်ႉ လႆႈလူင်းၵႃႈယႂ်ႇၼႃႇ ၶူဝ်း ၵုၼ်ႇၵေႃႈၵႃႈ တႃႇၸၢင်ႈၵူၼ်းႁဵတ်းၵၢၼ်ၵေႃႈၵႃႈ ပီၵၢႆ ၸၢင်ႈၵၼ်ဝၼ်း 7,500 ပျႃး။ ပီၼႆႉ 15,000 ပျႃး ယင်းႁႃၵူၼ်းယၢပ်ႇ။ ပီၼႆႉ ႁဵတ်းၼႃးၵေႃႈ ပဵၼ်ဢၼ်ၵိၼ်းတႄႉ ၵိၼ်းဝႃႈ ဢေႃႈ”- ဝႃႈၼႆ။
ယၢမ်းလဵဝ် ၼႂ်းမိူင်းတႆးသမ်ႉ ပဵၼ်ပၢင်တိုၵ်းသိုၵ်းသိူဝ်၊ ဝၢၼ်ႈမိူင်းသုၵ်ႉယုင်ႈ ဢမ်ႇၼိမ်သဝ်း။ သိုၵ်းမၢၼ်ႈသမ်ႉ ၵူတ်ႇထတ်းပိၵ်ႉဢိုတ်းသဵၼ်ႈတၢင်း ၵႂႃႇမႃးထႅင်ႈလႄႈ တႃႇၵႃႉၶၢႆၶဝ်ႈၵေႃႈ လႆႈထူပ်းလွင်ႈ ယၢပ်ႇတင်းၼမ်။ ယွၼ်ႉၼၼ် ၸဝ်ႈၼႃးၶဝ် ဢွၼ်ၵၼ်မုင်ႈမွင်း ႁႂ်ႈၸၢင်ႈၵႂႃႇမႃးႁႃၵိၼ်ငၢႆႈ ၼႆယဝ်ႉ။
ပႃႈၼၢင်းၺုၼ်ႉ ၸဝ်ႈၼႃး မိူင်းၵိုင် – “မဵဝ်းႁဝ်းပေႃႈမႄႈၵူၼ်းမိူင်း ၸိူဝ်းႁဵတ်းၵိၼ်ၵၢၼ်ႁႆႈၼႃး ၵၢၼ်ဝၢၼ်ႈၵၢၼ်သူၼ်တႄႉ မုင်ႈမွင်းၶႂ်ႈႁႂ်ႈဝၢၼ်ႈမိူင်း ၵတ်းၵတ်းယဵၼ်ယဵၼ် ယႃႇႁႂ်ႈမီး ပၢင်တိုၵ်း ပၢင်ယိုဝ်းၵၼ် ယဝ်ႉၵေႃႈ ႁႂ်ႈၵႂႃႇငၢႆႈမႃးငၢႆႈ ပေႃးဝႃႈ ႁဝ်းၽုၵ်ႇသွမ်ႈၽၵ်းၶဵဝ်ၼႆၵေႃႈ ႁႂ်ႈပေႃးသိုဝ်ႉငၢႆႈၶၢႆၶၢတ်ႇ ၼၼ်ႉၶႃႈယဝ်ႉ။ ပေႃးဝၢၼ်ႈမိူင်းဢမ်ႇသုၵ်ႉသၵ်ႉတႄႉ ငၢႆႈၸႂ်ဢေႃႈ။ မုင်ႈမွင်းၶႂ်ႈႁႂ်ႈဝၢၼ်ႈမိူင်းၵတ်း ယဵၼ်ဢေႃႈ”- ဝႃႈၼႆ။
ၼွၵ်ႈလိူဝ် တီႈဝဵင်းမိူင်းၵိုင်ယဝ်ႉ ပီၼႆႉ ယွၼ်ႉၼမ်ႉလုပ်ႇထူမ်ႈၼွင်းလႄႈ မိူၼ်ၼင်ႇ – တၢင်းဝဵင်းလၢင်းၶိူဝ်း၊ မိူင်းၼၢႆး၊ မိူင်းတူၼ် ပႃးၸဵမ် ထုင်ႉပူင်း၊ သီႇသႅင်ႇ ၸိူဝ်းၼႆႉၵေႃႈ မီးလွင်ႈလူႉသုမ်းတင်းၼမ်။ ယွၼ်ႉၼၼ် ၸဝ်ႈၼႃးၶဝ် မႆႈၸႂ် တႃႇလူင်းတိုၼ်းလၢင်း ၽုၵ်ႇၶဝ်ႈသွမ်ႈၼႃးထႅင်ႈ ပီၼႃႈ။ လိူဝ်ၼၼ်ႉ ယင်းမႆႈၸႂ်ပႃး ၵူဝ်လႆႈႁႃသိုဝ်ႉၶဝ်ႈသၢၼ်ယၢပ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ