လူမ်းလႅင်ႉတၢႆႊၾူၼ်ႊ မၢၼ်ႊယီႊ (တိုင်ဖွန်းမုန်တိုင်း မန်ရီ) ဢၼ်ၽတ်ႉပဝ်ႇယူႇ တီႈၼႂ်းမိူင်းၾိလိပ်ႉပိၼ်းသ်ၼၼ်ႉ ၼႂ်းမိူင်းတႆးပွတ်းၸၢၼ်း မိူင်းယၢင်းလႅင် တၢင်းတွၼ်ႈပွတ်းၸၢၼ်း မိူင်းမၢၼ်ႈလႄႈ ဢိၵ်ႇထႅင်ႈလၢႆပိုၼ်ႉတီႈ ၾူၼ်ၸၢင်ႈတူၵ်းၼႆ ႁွင်ႈၵၢၼ် ၾၢႆႇၾိင်ႈၾႃႉရႃႇသီႇ ပိုၼ်ၽၢဝ်ႇဝႆႉ ၼင်ႇၼႆ။
ဝၼ်းတီႈ 18/11//2024 ၼႆႉ ၾူၼ်တူၵ်း ၼႂ်းမိူင်းတႆး ပွတ်းၸၢၼ်း၊ မိူင်းယၢင်းလႅင်၊ မိူင်းမွၼ်း၊ မိူင်းယၢင်းၽိူၵ်ႇ၊ တိူင်းတၼၢဝ်းသီ၊ တိူင်းတႃႈၵုင်ႈလႄႈ တိူင်းပႃႇၵိူဝ်။ ၼႂ်းတိူင်းတၼၢဝ်းသီသမ်ႉ လိူဝ်သေၾူၼ်တူၵ်းယဝ်ႉ ၸၢင်ႈမီးပႃးလူမ်းၽတ်ႉပဝ်ႇႁႅင်း၊ ၾႃႉၾႃႇ ၾႃႉလင်လႄႈ မၢၵ်ႇႁဵပ်းတူၵ်း ဝႃႈၼႆ။
ၼႂ်းဝၼ်းတီႈ 18 ယၢမ်းၵၢင်ၼႂ်ၼႆႉ လူမ်းလႅင်ႉမၢၼ်ႊယီႊ ဢၼ်လတ်းၽၢၼ်ႇၽတ်ႉပဝ်ႇ ၼႂ်းမိူင်းၾိလိပ်ႉပိၼ်းသ် (Philippines) ႁွတ်ႈထိုင်ဝႆႉတီႈၼႂ်းပၢင်ႇလၢႆႇၶႄႇ ပွတ်းၸၢၼ်းသေ တေသိုပ်ႇၽတ်ႉပဝ်ႇ ၶၢႆႉၵႂႃႇပွတ်းၸဵင်ႇႁွင်ႇဝၼ်းတူၵ်း။
ၼႂ်းဝၼ်းတီႈ 18 – 19 ၼႆႉ ၾူၼ်တေသိုပ်ႇတူၵ်း ၼႂ်းၸိုင်ႈတႆးပွတ်းၸၢၼ်း၊ မိူင်းယၢင်းလႅင် ဢၼ်ပဵၼ်မိူင်းမၢၼ်ႈ ပွတ်း ၸၢၼ်းထႅင်ႈလႄႈ ၸဝ်ႈသူၼ်ႁႆႈၼႃး ၸိူဝ်းပၢတ်ႇၶဝ်ႈႁႆႈၶဝ်ႈၼႃးၶဝ် ႁႂ်ႈဢွၼ်ၵၼ်ၾၢင်ႉသတိၵၼ်ၼႆ တိုၵ်းသူၼ်းပႃးဝႆႉၼင်ႇၼႆ။
လိူဝ်ၼၼ်ႉ ၼႂ်းၶၢဝ်းတၢင်းထႅင်ႈသွင်ဝၼ်း ၾူၼ်တေၸၢင်ႈတူၵ်း ပဵၼ်တီႈထႅင်ႈ ၼႂ်းမိူင်းတႆး၊ မိူင်းယၢင်းလႅင်၊ ယၢင်း ၽိူၵ်ႇ၊ တိူင်းၼေႇပျီႇတေႃႇ၊ တိူင်းတႃႈၵုင်ႈ၊ တိူင်းတႃႈလိူဝ်ႇ၊ တိူင်းပႃႇၵိူဝ်၊ တိူင်းၼမ်ႉၵဵဝ်၊ တိူင်းတၼၢဝ်းသီလႄႈ မိူင်းမွၼ်း ၸိူဝ်းၼႆႉ ႁွင်ႈၵၢၼ် ၾၢႆႇၾိင်ႈၾႃႉရႃႇသီႇ ပိုၼ်ၽၢဝ်ႇဝႆႉၼင်ႇၼႆ။
ဢၢင်ႈဢိင် – RFA
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ