သိုၵ်းရၶႅင်ႇ ယိုဝ်းၶိူင်ႈမိၼ်သိုၵ်းမၢၼ်ႈတူၵ်း တီႈဝဵင်းဢမ်း

ပူၼ်ႉမႃး မိူဝ်ႈဝၼ်းတီႈ 10/11/2024 ၼႆႉ သိုၵ်းရၶႅင်ႇ AA ယိုဝ်းၶိူင်ႈမိၼ် သိုၵ်းမၢၼ်ႈတူၵ်း တီႈၸႄႈဝဵင်းဢမ်း ၸႄႈမိူင်းရၶႅင်ႇ ဝႃႈၼႆ။

ယၢမ်းလဵဝ် တႃႇတေယိုတ်းၵုမ်းလႆႈ ဝဵင်းဢမ်းၼၼ်ႉ သိုၵ်းရၶႅင်ႇ AA  လေႃႇတိုၵ်း တပ်ႉသိုၵ်းမၢၼ်ႈ ဝႆႉႁၢဝ်ႈႁႅင်းသေ ယိုတ်းၵုမ်းလႆႈဝႆႉၼႃႈတီႈဝဵင်းတင်းၼမ်၊ ၾၢႆႇသိုၵ်းမၢၼ်ႈၵေႃႈ ၸႂ်ႉပႃးၶိူင်ႈမိၼ်တိုၵ်း မႃးယိုဝ်းၸွႆႈႁၢဝ်ႈႁႅင်း။

ၼႂ်းဝၼ်းဢႃးတိတ်ႉပူၼ်ႉမႃးၼႆႉ ၶိူင်ႈမိၼ်တိုၵ်း သိုၵ်းမၢၼ်ႈ 4 လမ်း မႃးထိုင်တီႈၸႄႈဝဵင်းဢမ်း၊ ၾၢႆႇသိုၵ်းရၶႅင်ႇ ယိုဝ်းသႂ်ႇတိူဝ်ႉၶိူင်ႈမိၼ် သိုၵ်းမၢၼ်ႈလမ်းၼိုင်ႈၼႆ ၽူႈလဵပ်ႈႁဵၼ်း ၵၢၼ်သိုၵ်းမိူင်း ရၶႅင်ႇ ယိုၼ်ယၼ်လၢတ်ႈဝႆႉ တီႈသိုဝ်ႇၶၢဝ်ႇ VOA ၼင်ႇၼႆ။

ၶူင်ႇႁိူဝ်းမိၼ် တီႈၸႄႈဝဵင်းဢမ်းၼႆႉ သိုၵ်းရၶႅင်ႇၶဝ် ယိုတ်းၵုမ်းလႆႈဝႆႉ။ ယွၼ်ႉၼၼ် တႃႇထႅမ်ႁႅင်းသိုၵ်း ႁႅင်းၵွင်ႈၵၢင်ႇ ၼၼ်ႉ ၶိူင်ႈမိၼ်သိုၵ်းမၢၼ်ႈ လႆႈလူင်းတီႈပၢင်ႇမၢၵ်ႇၼင် ၼႂ်းငဝ်ႈငုၼ်းတိူင်း သိုၵ်းပွတ်းတူၵ်း၊ ဝၢႆးၶိူင်ႈမိၼ် မိၼ်ၶိုၼ်ႈ ၶိုၼ်းၼၼ်ႉ ၺႃးသိုၵ်းရၶႅင်ႇ ယိုဝ်းတူၵ်းလမ်းၼိုင်ႈ ဝႃႈၼႆ။

ဢိင်ၼိူဝ်လွင်ႈၼႆႉ ၾၢႆႇသိုၵ်းမၢၼ်ႈတႄႉ ပႆႇပိုၼ်ၽၢဝ်ႇပဵၼ်တၢင်းၵၢၼ်။ ၼႂ်းဝၼ်းတီႈ 11 ၼႆႉ တပ်ႉလူမ်းသိုၵ်းမၢၼ်ႈလႄႈ ႁူင်းပလိၵ်ႈမၢၼ်ႈ တီႈဝဵင်းမဵတ်ႉထီႇလႃႇ ၺႃးၸုမ်းလုၵ်ႉၽိုၼ်ႉ ၸႂ်ႉၶိူင်ႈၵွင်ႈ ယႂ်ႇယိုဝ်းသႂ်ႇ လၢႆလၢႆၵမ်း ၼႆႉယဝ်ႉ။

လိူဝ်ၼၼ်ႉ ယူႇတီႈ တပ်ႉသိုၵ်းရၶႅင်ႇ AA ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 13/11/2024 ၼႆႉဝႃႈ ယူႇတီႈ သိုၵ်းရၶႅင်ႇသေ ယိုတ်းၵုမ်းလႆႈ တပ်ႉပၢင်သဝ်းသိုၵ်းမၢၼ်ႈ တီႈဝဵင်းဢမ်းၼႆႉ 8 ဢွင်ႈတီႈယဝ်ႉ ဝႃႈၼႆ။