မၢႆႊတၢႆႊသိၼ်ႇ (Mike Tyson) ၽူႈတွႆႇမူၺ်း ၸိုဝ်ႈလိုဝ်းလင်ၼႂ်းလုမ်ႈၾႃႉ ဢၼ်ယၢမ်ႈပိုၼ်ၽၢဝ်ႇဝႆႉဝႃႈ ယင်ႉၵိုတ်းလွင်ႈ ၶႅင်ႇတွႆႇမူၺ်းၼႆၼၼ်ႉ တေၶႅင်ႇတွႆႇမူၺ်းၶိုၼ်း ဝႃႈၼႆ။
မၼ်းၸၢႆးၼႆႉ တေၶႅင်ႇတွႆႇမူၺ်းတင်း ၵျဵၵ်ႉပေႃးလ် ၽူႈၸတ်းလၢႆးၵၢၼ်တီႈယူႊထုပ်ႉ(YouTube) သေ ၶဝ်ႈမႃးၼႂ်းတူင်ႇဝူင်းတွႆႇမူၺ်း။ ပၢင်ၶႅင်ႇတွႆႇမူၺ်း ၶႃသွင်ၵေႃႉၼႆႉ တေပဵၼ်ၼႂ်းဝၼ်းတီႈ 15/11/2024 တီႈပၢင်ႇမၢၵ်ႇၼင် Dallas Cowbays ၶွင်ၸုမ်းမၢၵ်ႇၼင် NFL ဢမေႊရိၵၼ်ႊ ဢၼ်မီးတီႈဝဵင်းဢႃႊလိၼ်ႊတႅၼ်ႊ ၸႄႈမိူင်းတၢၵ်ႉၵသႅတ်ႉ မိူင်းဢမေႊရိၵၼ်ႊ တေလႆႈၶႅင်ႇထုပ်ႉၵၼ် 2 မိၼိတ်ႉ 8 ႁွပ်ႈ ဝႃႈၼႆ။
မၢႆႊတၢႆႊသိၼ်ႇၼႆႉ ဢႃယုမီး 58 ပီ ၸိုဝ်ႈသဵင်လိုဝ်းလင်ၸွမ်း ၸိုဝ်ႈ Iron Mike (လဵၵ်းမၢႆႉၶ်)။ မၼ်းၸၢႆးၼႆႉ ယၢမ်ႈၶႅင်ႇတွႆႇမူၺ်းမႃး 56 ပၢင်သေ ပေႉ 50 ပၢင် ပဵၼ်ၽူႈတွႆႇမူၺ်း ၸၼ်ႉႁႄႊဝီႊဝိတ်ႊ ၵေႃႉၼိုင်ႈ၊ ဝၢႆးလင်ပီ 2005 ယင်ႉၵိုတ်းဝႆႉလွင်ႈတွႆႇမူၺ်းသေ ႁိုင်မႃးၶၢဝ်းတၢင်း 19 ပီ ၽွင်းဢႃယုၸမ်တဵမ် 60 ၼႆႉ တေၶိုၼ်းၶဝ်ႈမႃးၼႂ်းတူင်ႇဝူင်း ၵၢၼ်ၶႅင်ႇတွႆႇမူၺ်း။ ၽူႈတေၶႅင်ႇတွႆႇမူၺ်း ၵျဵၵ်ႉပေႃးလ်ၼႆႉသမ်ႉ ယၢမ်ႈတွႆႇ (ထုပ်ႉ) 10 ပၢင် ၼႂ်းၼၼ်ႉပေႉ 9 ပၢင် သုမ်း 1 ပၢင် – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။
ပိုၼ်းၵႅပ်ႈ မၢႆႊတၢႆႊသႅၼ်ႇ (Mike Tyson) –
မၢႆႊတၢႆႊသႅၼ်ႇၼႆႉ ပဵၼ်ၵူၼ်းၸၢဝ်းၽိဝ်ၼိူဝ်ႉလမ် ၵိူတ်ႇမိူဝ်ႈဝၼ်းတီႈ 30/06/1966 တီႈပွၵ်ႉပရုတ်ႊၵလိၼ်း ဝဵင်းၼိဝ်းယွၵ်ႉ မိူင်းဢမေႊရိၵၼ်ႊ။
မိူဝ်ႈၵေႃႉလဵၵ်ႉၼၼ်ႉ မၼ်းၸၢႆး ဢမ်ႇလႆႈသွၼ်ႁဵၼ်းလိၵ်ႈလီလီ ထိုင်တီႈၺႃးသူင်ႇႁူင်းႁဵၼ်း ၾၢႆႇပူၵ်းပွင် ၵူၼ်းၼုမ်ႇ။ ပေႃႉၸတီးဝႅပ်ႉ ၽူႈၵိူဝ်းၵုမ်ႁူင်းႁဵၼ်း ႁၼ်လီၼမ်ႉၵတ်ႉတၢင်းႁတ်းႁၢၼ်မၼ်းၸၢႆးသေ လႆႈသူင်ႇၵႂႃႇၾိုၵ်းပၢင်သွၼ်တွႆႇမူၺ်း တီႈၵၢသ်ႉတီႊဢမႃႊတူဝ်ႇ။ ၵၢသ်ႉတီႊဢမႃႊတူဝ်ႇၼႆႉ ပဵၼ်ၶူးလၢႆးၸိုဝ်ႈ လိုဝ်းလင် ယၢမ်ႈၾိုၵ်းသွၼ်ပၼ်မႃး ၽူႈတွႆႇမူၺ်း ၸိုဝ်ႈလိုဝ်းလင် ၽလွႆႉပႅတ်ႊတႃႊသိၼ်ႊ (1956 – 1959) လႄႈ ႁူဝ်ႊသေႊတေႃႊရႅသ်ႉ (1965 – 1966)။
မိူဝ်ႈပီ 1984 မၢႆႊတၢႆႊသႅၼ်ႇ ယၢမ်ႈၵႂႃႇၶဝ်ႈၶႅင်ႇတွႆႇမူၺ်း တႃႇပဵၼ်ၽူႈတွႆႇမူၺ်း တီႈပၢင်ၶႅင်ႇတွႆႇမူၺ်းလုမ်ႈၾႃႉ တီႈဝဵင်းလေႃႉဢႅင်ႊၵျလိသ်ႉ၊ ၵူၺ်းၵႃႈ သုမ်းၵၢၼ်ႉၵႂႃႇ။ ထိုင်ပီ 1985 မၼ်းၸၢႆး ၶဝ်ႈမႃးၼႂ်းတူင်ႇဝူင်း ၵိၼ်ၸၢင်ႈတွႆႇမူၺ်း။
ၼႂ်းပီ 1985 လႆႈတွႆႇမူၺ်းၶႅင်ႇၵၼ် 18 ပၢင်ပေႉတင်း 18 ပၢင်။ ၼႂ်းၼၼ်ႉ တႃႇ 12 ပၢင်ၼႆႉ ယင်းဢမ်ႇထိုင် 3 မိၼိတ်ႉ ထုပ်ႉပေႉၽူႈၶႅင်ႇသေ ဢွင်ႇပေႉမႃး။ ပီ 1986 သမ်ႉ ထုပ်ႉပေႉ ထရေႊပႃႊပႃးပိသ်ႉ ၶျႅၼ်ႊပီႊယႅၼ်ႊ တွႆႇမူၺ်း ၶွင်ႊ ၸီႊတွႆႇမူၺ်းလုမ်ႈၾႃႉ WBC ။
ဝၢႆးၼၼ်ႉ ပဵၼ်မႃးၽူႈတွႆႇမူၺ်း ၵိၼ်ၸၢင်ႈၶျႅၼ်ႊပီႊယႅၼ်ႊ ႁႄႊဝီႊဝိတ်ႉ ဢႃယုလဵၵ်ႉသုတ်း ဝႃႈၼႆ။ မိူဝ်ႈၼၼ်ႉ မၢႆႊတၢႆႊသိၼ်ႇ တိုၵ်ႉမီးဢႃယု 20 ပီ 4 လိူၼ်ပၢႆ 22 ဝၼ်း – ၶေႃႈမုလ်းၼႆႉ လႆႈပိုင်ႈဢိင်မႃးတီႈ my.wikipedia.org ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ