လုမ်းၽွင်းတၢင်သိုၵ်းမၢၼ်ႈ ႁႄႉႁၢမ်ႈဢမ်ႇပၼ်ၵူၼ်းမိူင်းမၢၼ်ႈ ဢၼ်မီးဝႆႉၼႂ်းမိူင်းၵူဝ်ႊရီႊယိူဝ်ႊၸၢၼ်းၼၼ်ႉ ၵႂႃႇတေႃႇဝႂ်ၶၢမ်ႈမိူင်း(Passport) လူၺ်ႈဢမ်ႇမႅၼ်ႈတၢင်းၵၢၼ်လႄႈ တေဢဝ်သႂ်ႇၵႂႃႇၼႂ်း blacklist ဝႃႈၼႆ။
ၵူၼ်းမိူင်းမၢၼ်ႈ ၼႂ်းမိူင်းၵူဝ်ႊရီႊယိူဝ်ႊၸၢၼ်း ၵမ်ႈၽွင်ႈ ၵႂႃႇတေႃႇဝႂ်ၶၢမ်ႈမိူင်း လူၺ်ႈၸုမ်ႈပွမ် ဢၼ်ဢမ်ႇမႅၼ်ႈတၢင်း ၵၢၼ်။ လွင်ႈၼႆႉ ၼင်ႇႁိုဝ် တေၸၢင်ႈဢဝ်လိူင်ႈပၼ်တၢင်းၽိတ်းၵႂႃႇ ၸွမ်းၼင်ႇမၢႆ မီႈပၵ်းပိူင် မိူင်းၵူဝ်ႊရီႊယိူဝ်ႊၸၢၼ်း မီးဝႆႉၼၼ်ႉ လႆႈဢုပ်ႇဢူဝ်းငူပ်ႉငီႉၵၼ်တၢင်း ႁွင်ႈၵၢၼ် ၾၢႆႇ ၵဵဝ်ႇၶွင်ႈဝႆႉယူႇၼႆ – လုမ်းၽွင်းတၢင်သိုၵ်းမၢၼ်ႈ ဢၼ်မီးတီႈဝဵင်း Seoul မိူင်းၵူဝ်ႊရီႊယိူဝ်ႊၸၢၼ်ႊ ပိုၼ်ၽၢဝ်ႇၵႂႃႇ ၼႂ်းဝၼ်းတီႈ 09/11/2024 ၼႆႉၼင်ႇၼႆ။
ပူၼ်ႉမႃး ၼႂ်းဝၼ်းတီႈ 15/10/2024 ၼၼ်ႉၵေႃႈ သိုၵ်းမၢၼ်ႈ ပိုၼ်ၽၢဝ်ႇဝႆႉဝႃႈ ၵူၼ်းမိူင်းမၢၼ်ႈ ၸိူဝ်းယိပ်းဝႂ်ၶၢမ်ႈမိူင်း ၼၼ်ႉ သင်ပူၼ်ႉပႅၼ်ပၵ်းပိူင်မၢႆမီႈၸိုင် တေၺႃးဢဝ်တၢင်းၽိတ်း လူၺ်ႈမၢႆမီႈပၵ်း ပိူင်မိူင်းမၢၼ်ႈလႄႈ မိူင်းၵူဝ်ႊရီႊယိူဝ်ႊၸၢၼ်း ဝႃႈၼႆ။
ၵူၼ်းမိူင်းမၢၼ်ႈ ၼႂ်းမိူင်းၵူဝ်ႊရီႊယိူဝ်ႊၸၢၼ်း ၵမ်ႈၽွင်ႈလၢတ်ႈဝႃႈ လုမ်းတူဝ်တႅၼ်းလူင်ပွင်ၸိုင်ႈ ၽွမ်ႉႁူမ်ႈၸိူဝ်ႉၸၢတ်ႈ (NUG) တေႃႇပၼ်ဢႃယု ဝႂ်ၶၢမ်ႈမိူင်း(Passport) လူၺ်ႈဢမ်ႇဢဝ်ငိုၼ်း။ လွင်ႈၼႆႉ လူင်ပွင်ၸိုင်ႈမိူင်းၵူဝ်ႊရီႊယိူဝ်ႊၸၢၼ်းၵေႃႈ ႁပ်ႉႁွင်းယူႇ – ဝႃႈၼႆ။
ၸွမ်းၼင်ႇ ၶေႃႈလႆႈၸႂ် တၢင်းသွင်ၸိုင်ႈမိူင်းသေ ၵူၼ်းမိူင်းမၢၼ်ႈ ၼႂ်းမိူင်းၵူဝ်ႊရီႊယိူဝ်ႊၸၢၼ်း မီး 7 မိုၼ်ႇပၢႆ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ