ၶၢဝ်းယၢမ်းဝၢၼ်ႈမိူင်းလူႉ ယွၼ်ႉသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းၼႆႉ ၵူၼ်းမိူင်းႁဵတ်းၵၢၼ် ႁႃ ၵိၼ်လဵင်ႉတွင်ႉယၢပ်ႇ၊ မီးၵူၼ်းၸိူဝ်းၸူးငၢႆႈ ႁႃငိုၼ်းလူၺ်ႈဢမ်ႇထုၵ်ႇၸွမ်းမၢႆမီႈၼမ်မႃး။

မိူၼ်ၼင်ႇ ဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇ ၼႆႉၵေႃႈ – ယႃႈမဝ်းၵမ် လိူင်ႇၼမ်၊ ၽူႈလၵ်ႉၸၵ်ႉၶုတ်ႈ လိူင်ႇၼမ်၊ ၸၵ်ႉၸူၼ်ၵၼ်ၵေႃႈ လိူင်ႇၼမ်၊ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ။ ၶၢဝ်းတၢင်း သိုၵ်းမၢၼ်ႈ ယိုတ်းမိူင်းမႃး 3 ပီပၢႆၼႆႉ ၵူၼ်းမိူင်းၺႃးလၵ်ႉ ၺႃးၸူၼ်ယူႇၵူႈဝၼ်း။

ဝဵင်းတႃႈၶီႈလဵၵ်းၼႆႉ မိူဝ်ႈၽွင်းဝၢၼ်ႈမိူင်းလီ ၵၢၼ်ငၢၼ်းၵေႃႈလိူင်ႇ ငိုၼ်းၵေႃႈလႆႈလီ။ သမ်ႉပဵၼ် ဝဵင်း ဢၼ်တိတ်းၸပ်းလႅၼ်လိၼ်လႄႈ ၶဝ်ႈပႃးၼႂ်းဝဵင်း ဢၼ်ၵူၼ်းၵိုၼ်းငိုၼ်းၶွၼ်ႈ ဝဵင်းၼိုင်ႈ။ ဝၢႆးသိုၵ်း မၢၼ်ႈ ယိုတ်းဢႃႇၼႃႇ ၸိုင်ႈမိူင်းယဝ်ႉၵေႃႈ ၵူၼ်းတၢင်ႇတီႈသီႇလႅၼ် ယိင်ႈၶႅၼ်းဢွၼ်ၵၼ်မႃးထင် သဝ်းၼမ်။ ၼႂ်းၼၼ်ႉ ၸိူဝ်းမႃးႁႃၵိၼ်လဵင်ႉတွင်ႉ လူၺ်ႈသိုဝ်ႈယူဝ်း ၵေႃႈမီး မၢင်ၸိူဝ်းတင်ႈၸႂ်မႃးၵေႃႇ ၵၢၼ်ႁၢႆႉ။

ၶၢဝ်းၾူၼ် ပီၼႆႉ ၼမ်ႉၼွင်းလုပ်ႇထူမ်ႈႁႅင်းသေ လွင်ႈလူႉသုမ်းၵူၼ်းမိူင်းၵေႃႈ မီးၼမ် တႃႇတေမႄး ၵုမ်း လုမ်းလႃး ႁႂ်ႈမိူၼ်ၵဝ်ႇၼၼ်ႉ တေလႆႈၸႂ်ႉၶၢဝ်းယၢမ်းႁိုင်။ ၽွင်းဝၢၼ်ႈမိူင်းတိုၵ်ႉလူႉ ယူႇၸိူင်ႉၼႆ ၵူၼ်းမိူင်းသမ်ႉ လႆႈၵူဝ်ၽူႈလၵ်ႉ ၸၵ်ႉၶုတ်ႈထႅင်ႈ။ ၶူဝ်းၼႂ်းႁိူၼ်းၼွၵ်ႈႁိူၼ်း ပေႃးပဵၼ်သႅၼ်း ဢၼ် သိုပ်ႇၶၢႆလႆႈၼၼ်ႉ ၺႃးလၵ်ႉမူတ်းၼႆ ၼၢင်းယိင်း ၵူၼ်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“မီးလိူင်ႇၼႃႇ ၵူၼ်းလၵ်ႉၼႆႉ တေႃႈၼင်ႇၾႆးသူဝ်ႊလႃႊ ဢၼ်ဝႆႉၸွမ်းတၢင်း ၼႃႈႁိူၼ်းၵူၺ်းယင်းဢမ်ႇၵိုတ်း။ ယွၼ်ႉဝႃႈ ၵူၼ်းလၵ်ႉၵူၼ်းၸူၼ်ၼမ်ၼႃႇလႄႈ ပၵ်းသဝ်ၾႆးဝႆႉတၢင်းၼွၵ်ႈႁိူၼ်း ၸွမ်း တၢင်းၸိူဝ်းၼႆႉ။ ၼၼ်ႉၵေႃႈ ႁၵ်းပႃး သဝ်မၼ်းဢဝ်ၵႂႃႇၶႃႈဢေႃႈ။ ၵမ်းၼႆႉတႄႉ ဢမ်ႇသိုဝ်ႉဝႆႉ တၢင်း ၼွၵ်ႈႁဵတ်းၼၼ်ယဝ်ႉ။ ဝႆႉၼႂ်းႁိူၼ်းၵူၺ်းယဝ်ႉ။ တေႃႈမိူဝ်ႈဝႃး – မိူဝ်ႈသိုၼ်း လၵ်ႉရူတ်ႉၶိူင်ႈၵေႃႈ ၵူၼ်းဝၢၼ်ႈၺွပ်းၵမ်းၼိုင်ႈယဝ်ႉ။ ပိူဝ်ႈဝႃႈ ၸဝ်ႈၼႃႈတီႈ ဢမ်ႇသင်ပၼ်လႆႈလႄႈ ၵူၼ်းဝၢၼ်ႈၵေႃႈ ႁဵတ်းႁင်း ၵူၺ်းၼၼ်ႉၼႃႇ။ ရူတ်ႉၶိူင်ႈၼႆႉ ဢၼ်ႁၢႆမၼ်းၵူႈဝၼ်း ၸိူဝ်းဢမ်ႇလူင်းၶၢဝ်ႇ ဢမ်ႇတၢင်ႇၼိူဝ် ဢွၼ်ႊ လၢႆႊၵူၺ်းယဝ်ႉ”- ဝႃႈၼႆ။

တီႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼႆႉ သိုၵ်းမၢၼ်ႈ တိုၵ်ႉၽွင်းငမ်းဝႆႉယူႇ။ ၵူၺ်းၵႃႈ ပဵၼ်ဝဵင်းဢၼ်ႁႃၵိၼ်လဵင်ႉတွင်ႉငၢႆႈ ပဵၼ်ဝဵင်းၵူၼ်းၵိုၼ်းငိုၼ်းၶွၼ်ႈ မႃးပၢၼ်သိုပ်ႇပၢၼ်လႄႈ ၸူဝ်ႈသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၶၢဝ်းတၢင်း 3 ပီပၢႆၼႆႉ တီႈဝဵင်းတႃႈၶီႈလဵၵ်း ၵူၼ်းယိင်ႈၶႅၼ်း ၵိုၼ်းလိူဝ်ၵဝ်ႇလၢႆပုၼ်ႈ။ ၸဵမ်ၵူၼ်းမိူင်းတၢင်းမိူင်းထႆးၵေႃႈ ၶဝ်ႈမႃးသွၼ်ႈယူႇႁဵတ်းၵၢၼ်၊ ဢၼ်ပၢႆႈဢမုၶတီးသေ ၶဝ်ႈမႃးယူႇဝႆႉၵေႃႈ မီးၼမ်။

ၵွပ်ႈၼႆ မၢႆမီႈၸိုင်ႈမိူင်း ဢမ်ႇသုမ်ႇငမ်းပၼ်ႁူမ်ႇလူမ်ႈ ၵူၼ်းမိူင်းလႆႈတူဝ်ႈထိုင်။ ၵူၼ်းၸိူဝ်းလၵ်ႉၸၵ်ႉၶုတ်ႈ ႁဵတ်းၽိတ်း ပၵ်းပိူင်ၸိုင်ႈမိူင်းၵေႃႈ ဢမ်ႇမီးၽႂ်ဢဝ်လိူင်ႈလၢဝ်းပၼ်ႁႂ်ႈထိုင်တီႈ။ ဢၼ်ႁၢႆႉႁႅင်းတႄႉ ရူတ်ႉၶိူင်ႈၵူၼ်းမိူင်း ၺႃးလၵ်ႉ ၼိုင်ႈဝၼ်း ဢမ်ႇယွမ်း 10 လမ်း။ လွင်ႈလၵ်ႉၸူၼ် ၶႂ်ႈဝႃႈမီးၵူႈ ဝၼ်း။ 

ၵူၼ်းမိူင်းဝဵင်းတႃႈၶီႈလဵၵ်း လၢတ်ႈဝႃႈ – ဢၼ်လၵ်ႉၶူဝ်းၶွင်ၵၼ်ၼႆႉ ဢမ်ႇလႅပ်ႈၸႂ်ႈၵူၼ်းပိုၼ်ႉတီႈ။ ၵၢပ်ႈယၢမ်းလဵဝ် ၸိူဝ်းၽွတ်ႈပဵၼ်ၸုမ်းသေ ႁႃလၵ်ႉႁႃၸူၼ် ၵေႃႈမီး။ ၼၢင်းယိင်း ၵူၼ်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ၵူၼ်းပိုၼ်ႉတီႈတႄႉ တေဢမ်ႇၸႂ်ႈ၊ ၵူၼ်းပိုၼ်ႉတီႈတႄႉ ပိူၼ်ႈမီးတီႈယူႇတီႈၼွၼ်း မီးပီႈၼွင်ႉပိူၼ်ႈယူႇၼႃႇ။ ယွၼ်ႉ ၼၼ် ၵူၼ်းပိုၼ်ႉတီႈလၵ်ႉတႄႉ ဢမ်ႇပေႃးပဵၼ်လႆႈ။ တေလႅပ်ႈပဵၼ်မၢၼ်ႈ မတုပ်း မတၢပ်ႇ။ ၵူၼ်းသူႇသမ်းၵိၼ်ယႃႈ ၸိူဝ်းၼႆႉသေ။ တေဝႃႈ ၵူၼ်းပၢႆႈၽေး မႃးယူႇဝႆႉ ၸိူဝ်းၼႆႉၵေႃႈ ဢမ်ႇလႅပ်ႈၸႂ်ႈၶဝ်။ ၵူၼ်းပၢႆႈၽေးၵေႃႈ ၵူဝ်ယူႇယၢပ်ႇ ၽႂ်တေဢမ်ႇႁတ်းႁဵတ်းၼင်ႇၵဝ်ႇ။ တေပဵၼ်ၵူၼ်း ဢၼ်ႁၢမ်းႁိူၼ်းယေး ပဵၼ်ၵူၼ်းၸွမ်းၶၢင်ႈတၢင်း ၸိူဝ်းၼႆႉဢေႃႈ။ ပဵၼ်ၼႆမႃး ၸဵမ်မိူဝ်ႈသိုၵ်းမၢၼ်ႈ ယိုတ်းဢႃႇၼႃႇ မႃးၼႆႉ။ ဝၢႆးလင် ၼမ်ႉထူမ်ႈၼႆႉ ႁၢင်ႈႁၢႆႉလိူဝ်ၵဝ်ႇ”- ဝႃႈၼႆ။

ဝၢႆးလင် ၼမ်ႉၼွင်းထူမ်ႈႁႅင်းယဝ်ႉ ႁိူၼ်းၵူၼ်းမိူင်း တႃႈၶီႈလဵၵ်းလူႉၵွႆၼမ် ႁိူၼ်းမၢင်လင် ၽၵ်းတူ မၼ်းၵွႆသေ ၶမ်ဢုင်ၶမ်ၵူမ်ႇဝႆႉလႄႈ ထိုင်မိူဝ်ႈလဵဝ် ပႆႇၸၢင်ႈမႄးၵုမ်းလုမ်းလႃး။ ယွၼ်ႉၼၼ်လႄႈ ၵူၼ်းလၵ်ႉၵေႃႈ ၶဝ်ႈလၵ်ႉၶူဝ်းႁိူၼ်းယေးလႆႈငၢႆႈၼႆ ၵူၼ်းပိုၼ်ႉတီႈလၢတ်ႈ။

တေဝႃႈတူၺ်း CCTV ၼႆၵေႃႈ မိူၼ်ၼင်ႇ ၸွမ်းၵၢတ်ႇတႃႈလေႃႉ၊ ပွၵ်ႉပုင်းထုၼ် ၸိူဝ်းၼႆႉသမ်ႉ ၼမ်ႉထူမ်ႈလႄႈ ၵွႆမူတ်း။ တၢင်ႇပွၵ်ႉၵေႃႈ ယွၼ်ႉၼမ်ႉၼွင်းသေ ဢၼ်လူႉဢၼ်ၵွႆမၼ်းၵေႃႈ တိုၵ်ႉၼမ်။ မၢင်ဢွင်ႈတီႈ ၾႆးၾႃႉဢမ်ႇမႃး မီးၼပ်ႉထိုင်လိူၼ်လႄႈ တႃႇဝႃႈတေတူၺ်းၵွင်ႈထၢႆႇ CCTV သေ တီႉၺွပ်း ၽူႈလၵ်ႉဢၼ်ဝႃႈၼၼ်ႉ တေယၢပ်ႇ။

ၽူႈလၵ်ႉၸၵ်ႉၶုတ်ႈ လိူင်ႇၼမ်ၼႃႇၼႆသေ ၵူၼ်းတႃႈၶီႈလဵၵ်း ဢမ်ႇယွမ်း 10 ၵေႃႉ ၶွတ်ႇၽွတ်ႈပဵၼ် ၸုမ်းတႃႇၵႅတ်ႈၶႄ ပၼ်ၼႂ်းဝၢၼ်ႈဢိူင်ႇၽႂ်မၼ်း။ တေဢၢၼ်းပႂ်ႉ ဢဝ်လွင်ႈႁူမ်ႇလူမ်ႈပၼ် ၼႂ်းပွၵ်ႉၼႂ်းဢိူင်ႇ ၶၢဝ်းယၢမ်း 12 မူင်း ၵၢင်ၶိုၼ်း တေႃႇထိုင် 4 မူင်း ၵၢင်ၼႂ်။ ၽႂ်ၶႂ်ႈၶဝ်ႈၸုမ်းသေ ႁူမ်ႈမိုဝ်းၸွႆႈၵေႃႈ လႆႈ တၵ်ႉမႃးလႆႈတီႈ မၢႆၾူၼ်း 09 7777 890 19 ၾူၼ်းၶွင် ဢွင်ႇၸူဝ်းမူဝ်းၼႆသေ ၾဵတ်ႉသ်ပုၵ်ႉ ဢၼ် မီးၸိုဝ်ႈဝႃႈ Sma Sma တၢင်ႇၶႅပ်းႁၢင်ႈသေ တႅမ်ႈတၢင်ႇဝႆႉ ဝၼ်းတီႈ 10/11/2024 ၼၼ်ႉ။

ၼႂ်းၶႅပ်းႁၢင်ႈၼၼ်ႉ ပႃးၵူၼ်းၸၢႆးမွၵ်ႈ 12 ၵေႃႉ ယိပ်းပႃးၶိူင်ႈၵွင်ႈၵၢင်ႇ ၼုင်ႈၶူဝ်းမိူၼ်ၵၼ် ပဵၼ်ၸုမ်းဝႆႉ။ တႃႇႁူႉလွင်ႈယွႆႈယႅမ်းလႄႈ တႃႇယိုၼ်ယၼ်လႆႈၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး မၢႆၾူၼ်းလႄႈ ၸဝ်ႈၶွင်ၾဵတ်ႉသ်ႉ ၼၼ်ႉသေတႃႉ ပႆႇမီးလွင်ႈတုမ်ႉတွပ်ႇသင်မႃး။

ယၢမ်းလဵဝ် တီႈဝဵင်းတႃႈၶီႈလဵၵ်းၼႆႉ ၽူႈလၵ်ႉၸၵ်ႉၶုတ်ႈ လိူင်ႇၼမ်ၵူၺ်းဢမ်ႇၵႃး ၵူၼ်းယွၼ်းၵေႃႈၼမ် မႃးႁႅင်း။

မိူဝ်ႈဝၼ်းတီႈ 05/09/2024 ယၢမ်းၵၢင်ဝၼ်း ၵူၼ်းပိုၼ်ႉတီႈ၊ ၸုမ်းတူင်ႉၼိုင်တူင်ႇဝူင်းၵူၼ်းလႄႈ ၸဝ်ႈၼႃႈ တီႈၽူႈမီးပုၼ်ႈၽွၼ်း ၾၢႆႇႁူမ်ႇလူမ်ႈ ႁူမ်ႈၵၼ် ႁွင်ႉဢဝ်ၵူၼ်းယွၼ်း ၸိူဝ်းမီးၼႂ်းဝဵင်းတႃႈၶီႈလဵၵ်း ၸိူဝ်းၼၼ်ႉ မႃးတွင်ႈထၢမ် ၵဵပ်းၶေႃႈမုလ်းသေ ၸွႆႈဢဝ်တၢင်ႇၵႃး သူင်ႇပွၵ်ႈၶိုၼ်းဝၢၼ်ႈ ၽႂ်မိူင်းမၼ်း။ လွင်ႈၽဵဝ်ႈလၢင်ႉၵူၼ်းယွၼ်း တီႈဝဵင်းတႃႈၶီႈလဵၵ်းၼႆႉ မီးပွၵ်ႈၵမ်း 3 ယဝ်ႉ – ၵူၼ်းပိုၼ်ႉတီႈလၢတ်ႈ။