Halloween ၼႆ့ၸတ်းႁဵတ်းၼႂ်း ဝၼ်းတီႈ 31 လိူၼ် October ၵူႈပီ ။ ဝၼ်း Halloween ၼႆ့ ၵူၼ်းဢွၼ်ၵၼ်ႁွင်ႉဝႃႈ ပဵၼ်ဝၼ်းၽီဝႃႈၼႆသေတႃႉ တီႈတႄႉမၼ်းဢမ်ႇ ၵဵဝ်ႇၵပ်းၵၼ်တၢင်း ၽီႇၽဵတ်ႇ ၼင်ႇၵူၼ်းၵူႈၵေႃႉဝူၼ်ႉဝႆႉ။
ပဵၼ်ဝၼ်းသင်တႄႉတႄႉ – ၵူႈၵေႃႉတေၶႂ်ႈႁူႉမိူၼ်ၵၼ်ဢမ်ႇႁၢင်ႉ။ တီႈတႄႉမၼ်း ၾိင်ႈထုင်းဢၼ်ၼႆ့ တႄႇလုၵ့်မႃးတီႈမိူင်း Scotland ။မိူဝ်ႈၽွင်းၶၢဝ်းမႆႈၸမ်သဵင်ႈသေ တေၶဝ်ႈၼႂ်းၶၢဝ်းၵတ်း( ၾိင်ႈၾႃႉရႃႇသီႇမိူင်းၶဝ်) ၼၼ့် ၵူၼ်းၶိူဝ်း Celtic ၶဝ်ၸတ်းႁဵတ်းပၢင်ပွႆး Samhain (ပွႆးဢဝ်ၶဝ်ႈမႂ်ႇၼမ့်မႂ်ႇ ထိုင်ႁေႃထိုင်းႁိူၼ်း) ။ Halloween ၵေႃႈတႄႇလုၵ့်တီႈၼၼ့်သေ ပဵၼ်မႃး ။ ယွၼ့်ၶဝ်ယုမ်ႇယမ်ဝႃႈ ဝၼ်းတီႈ 31 လိူၼ် October ၼႆ့ပဵၼ်ဝၼ်းဢၼ် ဝိၺဵၼ်ႇၶႂၼ်ငဝ်း ၵူၼ်းၸိူဝ်းလူ့တၢႆၵႂႃႇၸိူဝ်းၼၼ်ႉ ပွၵ်ႈမႃးၶိုၼ်းမိူင်းၵူၼ်း – ဝႃႈၼႆ ။
ၶမ်ႈၶိုၼ်း ၵွၼ်ႇပႆႇထိုင် ဝၼ်းပွႆးဢဝ်ၶဝ်ႈမႂ်ႇၼမ့်မႂ်ႇ ဢမ်ႇၼၼ် ဝၼ်းပီမႂ်ႇ (ဝၼ်းတီႈ 1 ၼူဝ်ႊဝႅမ်ႊပိူဝ်ႊ) ၼၼ့် ႁွင့်ဝႃႈ Halloween Night ။
မိူဝ်ႈၽွင်းႁူဝ်ပၢၵ်ႇပီ 8 ၼၼ့် မုၼ်ၸဝ်ႈ Gregory III မၵ်းမၼ်ႈပၼ်ဝႃႈ ဝၼ်းတီႈ 1 လိူၼ် November ၼႆ့ပဵၼ်ဝၼ်း All Saint Day ။ ၶမ်ႈဝၼ်းတီႈ 31 လိူၼ် October ၼၼ့်သမ့်မၵ်းမၼ်ႈ ပၼ်ပဵၼ်ဝၼ်းပွႆးၾိင်ႈထုင်း ၵူၼ်းၼႂ်း ပိုၼ့်တီႈ ဢၼ်ႁွင့်ဝႃႈ Hallow’s Eve ၼႆယဝ့်။
Halloween ၼႆပဵၼ်ၶေႃႈၵႂၢမ်းတူဝ်ပွတ်းဢၼ်လုၵ့်မႃးတီႈ All Hallow Eve ။ မီးတီႈပွင်ႇဝႃႈ ၵွၼ်ႇတေထိုင်ဝၼ်း All Hallow Day ၼိုင်ႈဝၼ်း ၼႆယဝ့် ။ ၶေႃႈၵႂၢမ်း Hallow ၼႆ့ လုၵ့်မႃးတီႈ ၶေႃႈၵႂၢမ်းၵဝ်ႇ ဢိင်းၵလဵတ်ႈပၢၼ်မိူဝ်ႈၵွၼ်ႇ ဢၼ်ႁွင့်ဝႃႈ Halloween ။ မီးတီႈပွင်ႇၶႂ်ႈငၢႆးမိူၼ်ၵၼ် တၢင်းၶေႃႈၵႂၢမ်းဢၼ်ဝႃႈ Holy ၼႆယဝ့်။
ၼႂ်းမိူင်း Scotland လႄႈ Canada မၢင်တီႈတႄ့ဢွၼ်ၵၼ်ႁွင့် Halloween ဝႃႈ All Hallowmas ၼႆယဝ့်။ မီးတီႈပွင်ႇဝႃႈ ဝၼ်းဢၼ်ၶုၵ်းၶူၼ့်ဝူၼ့်ထိုင်ၶိုၼ်း ၵူၼ်းၸိူဝ်းဢၼ်ထွတ်ႈမျႅတ်ႈ (All Hallow’s) ဝႃႈၼႆ။ ၼႂ်းဝၼ်းၼၼ့် တေဢွၼ်ၵၼ်ႁဵတ်းၵၢၼ်တၢင်းလီ ၵုသူဝ်ႇလ် လႄႈ ပၢင်ပွႆး ယွၼ်းသူး ၸဵမ်ၸိူဝ်းၼႆ့ ။
လွင်ႈယုမ်ႇယမ်ဢၼ်ၵဵဝ်ႇၸွမ်းဝၼ်း Halloween Day ဢၼ်ၼိုင်ႈ ၸွမ်းၼင်ႇၸိူင်းပိုၼ်း မိူင်းဝၼ်းတူၵ်း
ၶဝ်ဢွၼ်ၵၼ်ယုမ်ႇယမ်ဝႃႈ ၽီၽဵတ်ႇဢၼ်မီးၸိုဝ်ႈဝႃႈ Samhain ၼႆ့ မီးၶႂၢင့်ၶဝ်ႈမႃးတီႈၼႂ်း မိူင်းၵူၼ်း ၼႂ်းၶမ်ႈၶိုၼ်းၶၢဝ်းၵတ်း ၶမ်ႈဢွၼ်တၢင်းသုတ်းသေ မႃးလွၵ်ႇၵူၼ်း ။
ၵွပ်ႈၼၼ် ၶၢဝ်းယၢမ်း ၵၢင်ၶမ်ႈ 6 မူင်းတေႃႇထိုင် ၵၢင်ၶိုၼ်း 12 မူင်းၼၼ့် ပဵၼ်ၶၢဝ်းဢၼ် ၽီၽဵတ်ႇ ၊ ၽီၽိူဝ့် ၊ သြႃႇမေႃၽီၶဝ် ပျေႃႇမူၼ်ႈသိူဝ်းၼႆ့လႄႈ ၼင်ႇႁိုဝ်ၽီၸိူဝ်းဢၼ်ဢမ်ႇ လီၶဝ် တေဢမ်ႇတွင်းလႆႈၼၼ့် ၸိူဝ်းပဵၼ်ၵူၼ်းၵေႃႈလႆႈဢွၼ်ၵၼ်သႂ်ႇၼႃႈၵၢပ်ႇ ၊ ဢဝ်ၽဝ်ႇတဝ်ႈမႃး ယွမ့်သီတႃးၼႃႈ လႅၵ်ႈလၢႆႈႁၢင်ႈၽၢင်ၽႂ်မၼ်းဝႆ့ ။
မိူဝ်ႈၽွင်းၽီဢမ်ႇလီ ဢမ်ႇၼၼ့် သြႃႇမေႃၽီၶဝ် ႁွတ်ႈၽႅဝ်မႃးၾၢႆႇၼႃႈႁိူၼ်းၸဝ်ႈၵဝ်ႇၼၼ့် ၼင်ႇႁိုဝ်ၶဝ်တေဢမ်ႇမႃး ႁဵတ်းၶဵၼ်တေႃႇၼၼ့် ဢွၼ်ၵၼ်ဢဝ်တၢင်းၵိၼ် ၊ မၢၵ်ႇမႆ့မၢၵ်ႇတွၵ်ႇ ၸိူဝ်းၼႆ့သေပၼ် ။ လိူဝ်ၼၼ့် ၼင်ႇႁိုဝ်တေလိုပ်ႇၽီၸိူဝ်းဢၼ်ဢမ်ႇလီ ဢွၵ်ႇပၢႆႈၼႆသေ ဢွၼ်ၵၼ် တႆႈဝႆ့ပႃးပူင်းၾႆး Jack o’ Lantern တၢင်းၶိုၼ်း ။
ၼႂ်းဢပုမ်ႇ ၵူၼ်းၶိူဝ်းဢိင်းၵလဵတ်ႈ မိူဝ်ႈပၢၼ်ၵွၼ်ႇၼၼ့်မီးဝႆ့ဝႃႈ ၽူႈလၵ့်ၸိုဝ်ႈႁွင့်ဝႃႈ Jack ၼႆၼၼ့် ၺႃးၵူၼ်းဝၢၼ်ႈၶဝ် ဢွၼ်ၵၼ်လမ်းတီ့ၺွပ်းမၼ်း ။ မၼ်းပၢႆႈသေ ၵႂႃႇထူပ်းၺႃး Satan (ၽီႁၢႆ့ဢၼ်သၢၼ်ၶတ်းၽြႃးပဵၼ်ၸဝ်ႈ ၼႂ်းလွင်ႈယုမ်ႇယမ်ၸၢဝ်းၶိူဝ်းၵျူး လႄႈ ၶရိတ့်ယၼ်ႇ) သေ လႆႈႁဵတ်းၶေႃႈလႅၵ်ႈလၢႆႈ ၵၼ်ဢၼ်ၼိုင်ႈ ။
Jack လၢတ်ႈၼေ ၽီ Satan ဝႃႈ ႁႂ်ႈၽီ Satan ၽၢၼ်ႇပွမ်ႁဵတ်းပဵၼ် ၶႅပ်းတႅင်းၵႃးၶမ်း ။ ပေႃး ယဝ့်မၼ်း တေဢဝ်ၶႅပ်းတႅင်းၵႃးၶမ်းသေ ၵႂႃႇၸၢႆႇၵႃႈၶူဝ်းၶွင် ဢၼ်မၼ်း လၵ့်မႃးၼၼ့်။ ႁဵတ်းၼၼ်သေ သင်ဝႃႈ ၶႅပ်းတႅင်းၵႃးၶမ်းႁၢႆၵႂႃႇပႅတ်ႈၸိုင် ၵူၼ်းဝၢၼ်ႈ ၸိူဝ်းမီးၸႂ်လေႃးၽၼၼ့် တေဢွၼ် ၵၼ်ထၢင်ႇထိူမ်ၵၼ်သေ ၶႃႈႁႅမ်ၵၼ်တၢႆ ။ ၵူၺ်းၵႃႈ Jack တူၵ်းယွၼ်းႁႂ်ႈ ၽီ Satan ပၼ်ၵႂၢမ်း မၼ်ႈဝႃႈ တေဢမ်ႇလႆႈထွတ်ႇဢဝ် ဝိၺဵၼ်ႇမၼ်း ၼႆယဝ့်။
ၽီ Satan ဢၼ်ၶႂ်ႈႁၼ် ၵူၼ်းတေၶႃႈႁႅမ်ၽိတ်းမေႃးၵၼ်ၼၼ့်ၵေႃႈ ၸင်ႇၽွမ့်တူၵ်းလူင်း လႆႈၸႂ် ႁဵတ်းၸွမ်း ၽႅၼ်ၵၢၼ် Jack (ၽူႈလၵ့်) ။
ၵူၺ်းၵႃႈ Jack ပဵၼ်ၵူၼ်းဢၼ်မီး ၺၢၼ်ႇလၵ်းလိင်းၼမ် ။ ဝၢႆးသေၽီ Satan လၢႆႈႁၢင်ႈပွမ်တူဝ် ပဵၼ် ၶႅပ်းတႅင်းၵႃးၶမ်းၵႂႃႇယဝ့်ၼၼ့် မၼ်းၸင်ႇၵဵပ်းဢဝ်မႃးသႂ်ႇၼႂ်းထူင်ငိုၼ်းမၼ်း ၊ ဢဝ်ၶႅပ်း ဢၢင်း (လက်ဝါးကပ်တိုင်) ပႃ့သႂ်ႇသေ ၶင်ၽီ Satan ၼၼ့်ဝႆ့ ။ ၽီ Satan ၵေႃႈလႆႈယူႇတီႈ ၼႂ်း ထူင်ငိုၼ်းၼၼ့် တေႃႇ ထိုင်ၶၢဝ်းယၢမ်း Jack ပေႃးလူ့တၢႆ ။
မိူဝ်ႈၽွင်း Jack တၢႆၵႂႃႇၼၼ့် ယွၼ့်မၼ်းပဵၼ်ၽူႈလၵ့်ၵေႃ့ၼိုင်ႈလႄႈ Saint Peter ဢမ်ႇၸၢင်ႈ ပၼ်ၶႂၢင့် ႁႂ်ႈမၼ်းၶိုၼ်ႈမိူင်းၽီ ။ ၽီ Satan ၵေႃႈ ဢမ်ႇၸၢင်ႈ ႁွင့်ဢဝ် ဝိၺဵၼ်ႇ Jack လူင်းမိူင်း ငရၢႆး ယွၼ့်လႆႈပၼ် ၵႂၢမ်းမၼ်ႈဝႆ့ ။ ၵွပ်ႈၼၼ် Jack ၵေႃႈဢမ်ႇလႆႈတူၵ်းငရၢႆး ။ ဝိၺဵၼ်ႇ Jack လႆႈယူႇသဝ်းၵႂႃႇမႃး ၼႂ်းတီႈဢၼ်လပ်းသိင်ႇ (ၼႂ်းၵႄႈၵၢင် မိူင်းၽီ လႄႈ မိူင်းငရၢႆး) ။ ၵွပ်ႈၼၼ် Jack ၸင်ႇထၢမ်တီႈ Satan လွၵ်းလၢႆးသဵၼ်ႈတၢင်း ဢၼ်တေၸၢင်ႈဢွၵ်ႇပူၼ့်လႆႈ တီႈၼႂ်းခူင်း လပ်းသိင်ႇ ။ Satan ၵေႃႈတင်ႈၸႂ်ၶႂ်ႈငိူဝ့် Jack ဢၼ်ဢမ်ႇလႆႈၶိုၼ်ႈမိူင်းၽီ ဢမ်ႇတူၵ်းမိူင်း ငရၢႆးၼၼ့်သေ ၸင်ႇပၼ် Jack ၾႆးငရၢႆးဢၼ်ဢမ်ႇမေႃမွတ်ႇယဵၼ်လႆႈသေပွၵ်ႈ (Fire of Hades) ။
ဝိၺဵၼ်ႇ Jack ၼၼ့်ၵေႃႈ ၸင်ႇဢဝ်ႁူဝ်ၽၵ်းပိုၵ့်သီၶၢဝ် (တၢင်းၵိၼ်ဢၼ်မၼ်းလႆႈၸႂ် လိူဝ်သေ ပိူၼ်ႈ မိူဝ်ႈမၼ်းပဵၼ်ၵူၼ်း) ၼၼ့် မႃးၶုတ်ႇဢွၵ်ႇၼိူဝ့်တၢင်းၼႂ်းမၼ်းပႅတ်ႈ ၊ ၽွၵ်ႈႁူးတီႈပိူၵ်ႇ ႁူဝ်ၽၵ်းပိုၵ့်ၶၢဝ်ႇသေ ဢဝ်ၾႆးငရၢႆးသႂ်ႇဝႆ့သိမ်းသႂ်ႇဝႆ့တီႈၼႂ်းၼၼ့် ။ မုင်ႈမွင်းတႃႇတေႁႃထူပ်းႁၼ် သဵၼ်ႈတၢင်း ဢၼ်တေဢွၵ်ႇပူၼ့်လႆႈၼႂ်းၶူင်းလပ်းသိင်ႇလူင်ၼၼ့်သေ ဝိၺဵၼ်ႇ Jack ၵေႃႈဢမ်ႇမီး ယိူင်းမၢႆတီႈယူႇသဝ်းသေ လႆႈၵႂႃႇၵႂႃႇမႃးမႃးယူႇၸိူင့်ၼၼ် – ၼႆယဝ့် ။
ဢိင်ၼိူဝ်လွင်ႈ ပုင်းၾႆးလႄႈ Jack သေၸင်ႇဢွၼ်ၵၼ်ႁွင့်ဝႃႈ Jack Of Lantern ။ လုၵ့်တီႈ ၼၼ်ႈသေ ဝၢႆးမႃးၸင်ႇယဵၼ်းပဵၼ်ၵႂႃႇ Jack O’ Lantern ။
Jack ၼႆ့ဢဝ် Satan ၶင်ဝႆ့လႆႈလႄႈ ဢွၼ်ၵၼ်ယုမ်ႇယမ်ဝႃႈ ၽီဢမ်ႇလီၶဝ်ၸိူဝ်းၼႆ့ၵေႃႈ ဢွၼ်ၵၼ်ၵူဝ်မၼ်းၼႆယဝ့် ။ ၵွပ်ႈၼႆၸင်ႇဢွၼ်ၵၼ်တႆးပုင်းၾႆး Jack o’ Lantern ။
မိူဝ်ႈဢွၼ်တၢင်း ပုင်ၾႆးၼႆ့ ဢဝ်ႁူဝ်ၽၵ်းပိုၵ့်သီၶၢဝ် သႅၼ်းယႂ်ႇၸိူဝ်းၼၼ့် ႁဵတ်းသေတႃ့ ဝၢႆးလင် ၼႆ့မႃး ၸင်ႇဢွၼ်ၵၼ်လႅၵ်ႈလၢႆႈဢဝ်မၢၵ်ႇပၵ့်သေႁဵတ်း ။
ၼႂ်းၾိင်ႈထုင်း ယူႊရူပ်ႉ ၶဝ်တႄ့ ဢွၼ်ၵၼ်ယုမ်ႇယမ်ဝႃႈ ၶၢဝ်းမႆႈၸမ်သဵင်ႈသေ တေၶဝ်ႈၼႂ်း ၶၢဝ်း ၵတ်းၼႆ့ ပဵၼ်ၶၢဝ်းဢၼ် ၽီၽဵတ်ႇဢမ်ႇလီၶဝ် ယူႇၸမ်ၵူၼ်းလႆႈလိူဝ်သေပိူၼ်ႈ ၼႆယဝ့် ။
ဝၢႆးသေႁိုင်မႃးလၢႆပီမိူင်းယဝ့် ၾိင်ႈထုင်းပွႆးဢၼ်ၼႆ့ ၸိုဝ်ႈသဵင်လိုဝ်းလင်မႃး တီႈၼႂ်း မိူင်ႁူမ်ႈတုမ် ဢမေႊရိၵၼ်ႊ (United States) , Canada, Ireland လႄႈ United Kingdom ၸိူဝ်းၼႆ့။
Halloween ၼႆ့ပဵၼ်ဢၼ်ၵဵဝ်ႇၵပ်းၵၼ်တၢင်း ၽီၽဵတ်ႇ ၊ ၽီမႃႇရၼ ၊ ၽီဢမ်ႇလီ ၊ သြႃႇမေႃၽီ ၸိူဝ်းၼႆ့ ။ ၶူဝ်းၶွင် မိၵ်ႈမၢႆဢၼ်ၵဵဝ်ႇၸွမ်း Halloween သမ့်ပဵၼ်ႁၢင်ႈ ၽီၽဵတ်ႇ ၊ ၽီၽိူဝ့် ၊ မၢၵ်ႇပၵ့် ၊ ႁၢင်ႈၵဝ့် ၊ မႅဝ်းလမ် ႁၢင်ႈဢၼ်လီ ယုပ်းၽၢၼ်ႈၵူဝ်ႁႄၸိူဝ်းၼႆ့ ။ သီလမ် တၢင်း သီမၢၵ်ႇၸွၵ်း (သီသူမ်ႈ) ၼႆ့ ပဵၼ်သီ ဢၼ်ၸႂ်ႉ ဢၼ်ၼုင်ႈ ဢၼ်ႁဵတ်းႁၢင်ႈတႅင်ႇၼႂ်းဝၼ်း Halloween ။ ၵူၺ်းၵႃႈ ဝၢႆးလင်ၼႆ့တႄ့ ဢွၼ်ၵၼ်ၸႂ်ႉတိုဝ်းပႃး သီၵမ်ႇ ၊ သီလႅင် လႄႈ သီတၢင်ႇမဵဝ်းထႅင်ႈ ။
ပုင်းၾႆး Jack O’ Lantern ၼႆ့ၵေႃႈ ပဵၼ်မိၵ်ႈမၢႆ Halloween ။ ၵူၼ်းမိူင်း England လႄႈ Ireland ၶဝ်တႄ့ တေဢဝ်ႁူဝ်ၽၵ်းပိုၵ့်သီၶၢဝ်ဢၼ်မူၼ်း (Turnip) မႃးၸီးမူင်ႇပဵၼ်ႁူးသေ တႆႈတဵၼ်းၼႂ်းမၼ်း။
ၵူၺ်းၵႃႈ ၵူၼ်းၸိူဝ်းဢၼ် ၶၢႆ့ၵႂႃႇယူႇ တီႈမိူင်းဢမေႊရိၵၼ်ႊၶဝ်တႄ့ ၸႂ်ႉမၢၵ်ႇပၵ့် တႅၼ်းတၢင် ။ ယွၼ့်မၢၵ်ႇပၵ့် လုၵ်ႈယႂ်ႇလႄႈ ၸၢင်ႈၶႅၵ်းႁဵတ်းႁၢင်ႈၾၢင် ဢၼ်ၶႂ်ႈႁဵတ်း လႆႈငၢႆႈငၢႆႈ ။ ၵမ်ႈၼမ်တႄ့ တေဢွၼ်ၵၼ်ဢဝ်မၢၵ်ႇပၵ့် ၶႅၵ်းႁဵတ်းႁၢင်ႈၾၢင် ဢၼ်လီၵူဝ်သေ ဝၢင်းဝႆ့ၸွမ်း ၽၵ်းတူႁိူၼ်း ။ ၸွမ်းၼင်ႇၾိင်ႈထုင်း ယုမ်ယမ်ဝႆ့ဝႃႈ ပဵၼ်တႃႇတေလွၵ်ႇၽီ ဢမ်ႇလီ ။
လွင်ႈဢၼ်လီမူၼ်ႈသိူဝ်းၼႂ်းၶမ်ႈပွႆး ဝၼ်း Halloween ၼၼ့်တႄ့ပဵၼ် Trick or Treating ။ ၶမ်ႈပွႆး Halloween ၼႆ့လုၵ်ႈဢွၼ်ႇၶဝ် တေယွမ့်သီတႃးၼႃႈ ၼုင်ႈသိူဝ်ႈၶူဝ်းႁဵတ်းႁၢင်ႈႁဵတ်းၾၢင် ဢၼ်လီ ၵူဝ်သေ ၶိုၼ်ႈႁိူၼ်း လူင်းႁိူၼ်း လႄႇႁႃတွႆႇၽၵ်းတူႁိူၼ်းပိူၼ်ႈ။ ပေႃးယဝ့်တေႁွင့်သႅၼ် ပႃးဝႃႈ Trick or Treat – ပွၵ်ႇဝႃႈ- ပေႃးဢမ်ႇပၼ်တၢင်းၵိၼ်(ဢမ်ႇလဵင့်မၢၵ်ႇဢူမ်) ၸိုင် တေဢူၼ်ဢၢၼ်ယႃႉၵဝ်းၸိူင်ႉၼႆတိၵ်းတိၵ်း ၼႆယဝ့် ။
ၽွင်းၸိူင့်ၼၼ် ၸိူဝ်းပဵၼ်ၸဝ်းႁိူၼ်းၵေႃႈ ဢွၼ်ၵၼ်ႁၢင်ႈၶိူင်ႈ သႂ်ႇသိူဝ်ႈၶူဝ်းဢၼ်လီၵူဝ်သေ ဢဝ် မၢၵ်ႇဢူမ် ၊ Chocolate ၊ ၶူဝ်းတွၼ်ႈ ၸိူဝ်းၼႆ့မႃးၸႅၵ်ႇပၼ် လုၵ်ႈဢွၼ်ႇ ၸိူဝ်းၼၼ်ႉ- ၾိင်ႈမၼ်းမီးၼင်ႇၼႆယဝ်ႉ ။
ဝဵင်း Anoka ၼႂ်းၸေႈတွၼ်ႈ Minnesota မိူင်းဢမေႊရိႊၵၼ်ႊ ၼႆ့ၸတ်းႁဵတ်းပွႆး Halloween ၶိုၵ့်ယႂ်ႇလူင် ထိုင်တီႈပေႃးလႆႈၸိုဝ်ႈဝႃႈ ဝဵင်း Halloween လုမ်ႈၾႃႉ – ၼႆယဝ့်။
