ပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ပွၵ်ႈ 3 ၼႆႉ တေၶိုင်ၸတ်းႁဵတ်းၵႂႃႇၼႂ်းႁူဝ်လိူၼ်ၵျူႊလၢႆႊဢၼ် တေထိုင်ၼႆႉ တႃႇ ၶၢဝ်းတၢင်း 5 ဝၼ်း ဝႃႈၼႆ။

ဝၼ်းတီႈ 25/06/2018 ပၢင်ၵုမ်ႁူမ်ႈသၢင်ႈဢုပ်ႇဢူဝ်းလွင်ႈငမ်းယဵၼ် မိူင်းႁူမ်ႈတုမ် UPDJC ဢၼ်ၸတ်းႁဵတ်းတီႈ ၼေႇပျီႇတေႃႇၼၼ်ႉ ဢုပ်ႇၵုမ်တူၵ်းလူင်းလႆႈၸႂ်ၵၼ်ဝႃႈ ပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ပွၵ်ႈ 3 ၼႆႉ တေၸတ်း ႁဵတ်းၼႂ်းဝၼ်းတီႈ 11 လိူၼ်ၵျူႊလၢႆႊၵႂႃႇ ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ် ၸဝ်ႈၶိုၼ်းသႂ်ႇ ၸႂ်ယဵၼ် ၽူႈၵွၼ်းႁွင်ႈၵၢၼ် လုမ်း PI မၼ်းၸဝ်ႈလၢတ်ႈဝႃႈ “ ပၢင်ၵုမ်လူင် 21 ပွၵ်ႈ 3 ဢၼ်တေၸတ်းႁဵတ်း ဝၼ်းတီႈ 11 လိူၼ်ၼႃႈၼႆႉ မၼ်းယူႇတီႈ ၾၢႆႇလူင် ပွင်ၸိုင်ႈၶဝ်တၢင်ႇထိုင်မႃး။ ဢၼ်ၾၢႆႇလူင်ပွင်ၸိုင်ႈၶဝ် တၢင်ႇမႃးၼၼ်ႉၵေႃႈ ႁဝ်းၶႃႈႁၼ်ဝႃႈ မၼ်း တေပဵၼ် မႅၼ်ႈဝၼ်းဢၼ် ၽူႈၵိူဝ်းၵုမ်မိူင်းႁူမ်ႈတုမ်ၵေႃႈ တေတူဝ်ႈတၼ်း၊ ၾၢႆႇၽူႈၵွၼ်းသိုၵ်းသုင်သုတ်းၵေႃႈ တေ တူဝ်ႈတၼ်း ယွၼ်ႉၶဝ်တူဝ်ႈတၼ်းၼင်ႇၵၼ်လႄႈ ၶဝ်ၸင်ႇလိူၵ်ႈဝၼ်းၼၼ်ႉ ႁဝ်းၶႃႈတႄႉထၢင်ႇၸိူင်ႉၼၼ်။ ပေႃးဝႃႈပႆႇ လႆႈထၢမ်ၶဝ် 2 ၵေႃႉၼႆႉ တေမႃးဝႃႈ ဝၼ်းတီႈ 11 လိူၼ်ၵျူႊလၢႆႊၼႆႉ တေပႆႇပဵၼ်လႆႈ” ဝႃႈၼႆ။

သိုပ်ႇလၢတ်ႈထႅင်ႈဝႃႈ “ႁူဝ်ၶေႃႈလူင် ဢၼ်လူဝ်ႇဢုပ်ႇၵၼ်ၼႆႉ မီး 5 ႁူဝ်ၶေႃႈ ၼႂ်း 5 ႁူဝ်ၶေႃႈၼႆႉ ႁူဝ်ၶေႃႈယွႆႈမၼ်း ႁဝ်း တေဢုပ်ႇသင်လၢႆလၢႆ မိူၼ်ၸိူင်ႉၼင်ႇ ၵၢၼ်မိူင်းဢၼ်ၶဝ်တေဢုပ်ႇၼၼ်ႉ 1) ၵၢၼ် ၵႅတ်ႇၶႄႁႄႉၵင်ႈသုၼ်ႇ လႆႈၵူၼ်း ၸုမ်းဢေႇ။ 2) သုၼ်ႇလႆႈၵူၼ်းလႄႈ သုၼ်ႇလႆႈၸၢႆးယိင်းၽဵင်ႇပဵင်းၵၼ် ၸိူဝ်းၼႆႉ။ ၾၢႆႇၵၢၼ်ႁူမ်ႇလူမ်ႈသမ်ႉ လႆႈငိၼ်းဝႃႈ ၶဝ်ယင်းပႆႇတူၵ်းလူင်းၵၼ်လႆႈဝႃႈ တေဢုပ်ႇလွင်ႈလႂ်” ဝႃႈၼႆ။

လိူဝ်ၼၼ်ႉ ဢၼ်ၵိုတ်းထႅင်ႈ ႁူဝ်ၶေႃႈယႂ်ႇ ထႅင်ႈ 3 ႁူဝ်ၶေႃႈ ဢၼ်ဝႃႈ ၵၢၼ်တူင်ႇဝူင်းၵူၼ်း၊ ၵၢၼ်ပၢႆးမၢၵ်ႈမီးလႄႈ ၵၢၼ် တီႈလိၼ်လႄႈ ၶူဝ်းတိုၼ်းသၽႃႇဝ ၸိူဝ်းၼႆႉ တၢင်းလူင်ပွင်ၸိုင်ႈလႄႈ ၸုမ်းယိပ်းၵွင်ႈၵၢင်ႇ EAOs ၶဝ်လိူၵ်ႈ တင်ႈ ၽူႈတႅၼ်းတႃႇဢုပ်ႇဢူဝ်းၵၼ်ဝႆႉယဝ်ႉ ဝႃႈၼႆ။

ၸဝ်ႈၶိုၼ်းသႂ် သိုပ်ႇလၢတ်ႈဝႃႈ ဢၼ်ၶဝ်လိူၵ်ႈဝႆႉ တင်းသွင်ၾၢႆႇၼႆႉ ၸူဝ်ႈပႆႇထိုင်ဝၼ်းတီႈ 11 ၼၼ်ႉ ၶဝ်တေ လႆႈငူပ်ႉငီႉၵၼ် ႁဝ်းတေလႆႈမႃးတူၵ်းလူင်းၵၼ်ၸိူင်ႉႁိုဝ်။ ဢၼ်ၶဝ်ငူပ်ႉငီႉၵၼ်လႆႈမႃးၸိူဝ်းၼၼ်ႉ ၶဝ်တေ လႆႈတၢင်ႇၼႄတီႈပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ် ၼႂ်းဝၼ်းတီႈ 11 ၼၼ်ႉ။ ၵမ်းၼႆႉ ပၢင်ၵုမ်လူင်သမ်ႉ တေလႆႈ မႃးထတ်းသၢင်သေ လူဝ်ႇလႆႈမႄးထႅမ်ထွၼ်ၸိူင်ႉႁိုဝ်ၼႆၵေႃႈ ၶဝ်တေလႆႈမႄးထႅမ်ထွၼ်သေ မၵ်းမၼ်ႈ ပၼ်ၵႂႃႇ တေပဵၼ်ၸိူင်ႉၼၼ်။ ပၢင်ၵုမ်လူင် 21 ပွၵ်ႈ 3 ၼႆႉ တေၸတ်းႁဵတ်းၵႂႃႇၶၢဝ်းတၢင်း 5 ဝၼ်း” ဝႃႈၼႆ။

ပၢင်ၵုမ်လူင်ပၢင်လူင်ၵမ်း 3 ၼႆႉ လႆႈငိၼ်းဝႃႈတေမွၵ်ႇထိုင်ၽူႈၶဝ်ႈၸုမ်းဢူၺ်းလီပွတ်းႁွင်ႇ 7 ၸုမ်းၽွင်ႈယူႇ။ မိူၼ်ၼင်ႇ ၸုမ်းဝႃႉ၊ ၸုမ်းမိူင်းလႃး၊ ၸုမ်း SSPP/SSA လႄႈ ၸုမ်းၶၢင် ၸိူဝ်းၼႆႉ။ ၵူၺ်းၵႃႈ ၸုမ်းတဢၢင်း TNLA ၸုမ်းၵူဝ်းၵၢင်ႉ MNDAA လႄႈ ၸုမ်းရၶႅင်ႇ AA တႄႉတႃႇတေၽိတ်ႈမွၵ်ႇဢမ်ႇမွၵ်ႇၼၼ်ႉ ယူႇတီႈလူင်ပွင်ၸိုင်ႈ တင်း တပ်ႉသိုၵ်းမၢၼ်ႈ တိုၵ်ႉဢုပ်ႇဢူဝ်းငူပ်ႉငီႉၵၼ်ယူႇ ဝႃႈၼႆ။

ပၢင်ၵုမ်လူင်ပၢင်လူင် ႁူဝ်ပၢၵ်ႇပီ 21 ၼႆႉ ယိူင်းဢၢၼ်းဝႆႉဝႃႈ တေၸတ်းႁဵတ်း ၼိုင်ႈပီလႂ် 2 ပွၵ်ႈၼႆသေတႃႉ မိူဝ်ႈပီ 2016 ၵေႃႈ လႆႈၸတ်းႁဵတ်းမႃးပွၵ်ႈၼိုင်ႈၵူၺ်း။ ထိုင်မႃး ပီ 2017 ၵေႃႈ လႆႈၸတ်းႁဵတ်းမႃးပွၵ်ႈၼိုင်ႈၵူၺ်း ၼင်ႇၵဝ်ႇ။